Ẹdat Esịt nte ke Mmimọ Imọfiọk Ndikot N̄wed!

KE NDUSỤK ikpehe Solomon Islands, se iwakde isịm mbahade 80 eke ikie ke otu mbon oro ẹdide Mme Ntiense Jehovah idahaemi ẹkenyene ndin̄wana ye mfịna unana ifiọkn̄wed. Emi ikosụhọkede ebuana oro mmọ ẹsinyenede ke mme mbono esop eke urua ke urua kpọt edi ama anam etetịm edi ọkpọsọn̄ n̄kpọ n̄ko ọnọ mmọ ndikpep mbon en̄wen akpanikọ Obio Ubọn̄. Ndi ikpọ owo oro akanam mîwụtke titia itiat ẹkeme ndinen̄ede mfiọk ndikot n̄wed?

Ẹkama ediye uduot ekpri n̄wed Apply Yourself to Reading and Writing, emi Mme Ntiense Jehovah ẹsiode, ke ufọkn̄wed emi ẹkpepde nte ẹkotde ẹnyụn̄ ẹwetde n̄kpọ ke ekperede ndidi ke kpukpru esop Mme Ntiense Jehovah ke ofụri Solomon Islands. Mme ifiọkutom oro ẹtienede mi ẹwụt nte ẹdade ndutịm emi ẹn̄wam ediwak owo ndifori ukeme mmọ ndikot nnyụn̄ n̄wet n̄kpọ. Ke edide akpan n̄kpọ akan, ndifiọk ndikot n̄wed an̄wam mmọ ndinọ eti ikọ ntiense mban̄a mme edinịm ke akpanikọ mmọ.—1 Peter 3:15.

Ke ukpepn̄kpọ Bible eke urua ke urua oro ẹsikamade Enyọn̄-Ukpeme, isụn̄utom kiet oro ẹkenọde akanam utom ke esop kiet emi enyenede se iwakde ibe mme asuanetop Obio Ubọn̄ ikie ama okụt nte ke ibat ibat owo ẹkenyene magazine oro ndien ata esisịt ibat ẹkesinọ ibọrọ. Nso ikedi ntak? Unana ifiọkn̄wed. Ke ini esop oro ọkọtọtde nte ke ẹtọn̄ọ ufọkn̄wed ndikpep nte ẹkotde ẹnyụn̄ ẹwetde n̄kpọ, isụn̄utom oro ke idatesịt ama ọnọ idem unyịme unyịme ndidi andikpep. Ke akpa ini, sụk ibat ibat nditọ ufọkn̄wed ẹkedụk, edi ikebịghike se ibede owo 40 emi ẹdude ke nsio nsio isua emana ẹma ẹtọn̄ọ ndidụk.

Nso ikedi utịp? Isụn̄utom oro obụk ete: “Esisịt ini ke ẹma ẹketọn̄ọ ufọkn̄wed emi ẹkpepde nte ẹkotde ẹnyụn̄ ẹwetde n̄kpọ, mma n̄ka urua ke n̄kanika itiokiet usenubọk ndidep udia nnọ ufọkidụn̄ isụn̄utom. Do mma n̄kụt ndusụk nditọ ufọkn̄wed oro, idem ata n̄kpri owo, ẹnyamde isịp mbakara ye ikọn̄udia. Ntak-a? Koro mmọ ẹkeyom ndinyene okụk oro ekemde ndida ndep eton̄wed ye n̄wed uwetn̄kpọ  man ẹkama ke ufọkn̄wed oro ẹkpepde nte ẹkotde ẹnyụn̄ ẹwetde n̄kpọ! N̄ko, ndidụk ufọkn̄wed oro ama anam ọdọn̄ mmọ ndinyene ọkpọkpọ magazine Enyọn̄-Ukpeme.” Enye adian do ete: “Idahaemi ke ini Ukpepn̄kpọ Enyọn̄-Ukpeme esop, n̄kpri ye ikpọ ukem ukem ẹsitiene ẹbuana, ndien nneme nnyịn esinyene inem.” Isụn̄utom emi ama enen̄ede okop inemesịt ke ini owo inan̄ ke otu nditọ ufọkn̄wed oro ẹkebụpde enye m̀mê mmimọ imekeme ndibuana ke an̄wan̄wa utom ukwọrọikọ koro, nte mmọ ẹdọhọde, mmimọ “ikokopke ndịk aba.”

Eti utịp oro ufọkn̄wed emi ẹkpepde nte ẹkotde ẹnyụn̄ ẹwetde n̄kpọ enyenede ke idem nditọ ufọkn̄wed aka anyan akan edikpep ndikot nnyụn̄ n̄wet n̄kpọ. Ke uwụtn̄kpọ, ke ediwak isua, Ntiense kiet ama enyene n̄wan oro mîkenịmke ke akpanikọ emi ekesinọde esop editịmede esịt. Enye ama esitomo mme owo ke itiat ke ẹnamde enye esisịt n̄kpọ iyatesịt ndien ama esikam akama eto aka en̄wan ye iban eken. Ndusụk ini, ke ini enye odụkde mbono esop Christian ye ebe esie, enye ama esifịbe ebe esie ufụp tutu ebe esie ebiere ndisisịne obubịt akrasi enyịn mbak enye edikeme ndidori enye ikọ ke ese iban en̄wen.

Nte ededi, esisịt ini ke ufọkn̄wed oro ẹkpepde nte ẹkotde ẹnyụn̄ ẹwetde n̄kpọ ama ọkọtọn̄ọ, n̄wan emi ama obụp sụn̄sụn̄ ete: “Ndi mmekeme nditiene mbuana ke ufọkn̄wed emi?” Ibọrọ ekedi ih. Ọtọn̄ọde ke ini oro ka iso, akanam enye ikatabake ukpepn̄kpọ ufọkn̄wed oro m̀mê mbono esop. Enye ama enen̄ede esịn idem ke ukotn̄wed esie onyụn̄ anam n̄kọri oro akpade owo idem, emi akanamde enye enen̄ede okop inemesịt. Udiana eben̄e esie ekedi: “Ndi ẹmekeme ndikpep Bible ye ami?” Ebe esie ke idatesịt ama ọtọn̄ọ ndikpep n̄kpọ ye enye, ndien enye ama aka iso ndinam n̄kọri ke ukeme esie ndikot nnyụn̄ n̄wet n̄kpọ ye ke ifiọk Bible esie.

Ye owo isua 50 oro akananam mîwụtke titia itiat, ndikam n̄kama eton̄wed nnyụn̄ ntọn̄ọ ndiwet mme abisi ekeme ndidi ata ọkpọsọn̄ n̄kpọ. Ke ntọn̄ọ ntọn̄ọ ini ukpepn̄kpọ oro, ọkpọsọn̄ edifịk benetap n̄kama n̄wet n̄kpọ ama obụp ndusụk owo nnuenubọk. Ediwak urua ke ẹma ẹkesịn ọkpọsọn̄ ukeme ndimụm benetap n̄kama n̄wet n̄kpo, ndusụk nditọ ufọkn̄wed ẹdọhọ ye inua imam ẹte: “Mmekeme ndiwet n̄kpọ ifụre ifụre ke n̄wed!” Mme andikpep n̄ko ẹsikop inemesịt ke ẹkụtde n̄kọri oro nditọ ufọkn̄wed ẹnamde. Andikpep kiet ọkọdọhọ ete: “Ndikpep otu nditọ ufọkn̄wed n̄kpọ edi n̄kpọ akwa idatesịt, ndien nditọ ufọkn̄wed ẹsiwak ndiwụt ntotụn̄ọ esịtekọm mban̄a ndutịm otode Jehovah mi ke ndikwak ubọk ke utịt ukpepn̄kpọ kiet kiet.”

Ke adianade ye mme isụn̄utom emi, Mme Ntiense emi idahaemi ẹfiọkde ndikot nnyụn̄ n̄wet n̄kpọ ẹkop idatesịt. Ntak-a? Koro idahaemi mmọ ẹkeme ndida ukeme mmọ ndikot nnyụn̄ n̄wet n̄kpọ ntoro Jehovah.

[Mme ndise ke page 8, 9]

N̄kpri ye ikpọ ẹwụt esịtekọm ẹban̄a ufọkn̄wed oro ẹkpepde nte ẹkotde ẹnyụn̄ ẹwetde n̄kpọ