Mme Mbụme Ẹtode Mme Andikot

Nso ndausụn̄ ke N̄wed Abasi ọnọ kaban̄a edinọ eyen ukpep ke ini ete m̀mê eka kpọt edide kiet ke otu Mme Ntiense Jehovah?

Akpan edumbet N̄wed Abasi iba ẹnọ ete m̀mê eka oro edide Ntiense emi enyenede nsan̄a ndọ oro mîdịghe Ntiense ndausụn̄ kaban̄a edinọ eyen ukpep. Kiet edi: “Nnyịn inyene ndikop uyo Abasi n̄kan uyo owo.” (Utom 5:29) Enye eken edi: “Ebe edi ibuot ọnọ n̄wan, kpa nte Christ edide Ibuot ọnọ ufọk Abasi.” (Ephesus 5:23) Ọyọhọ edumbet iba emi inyeneke n̄kpọ ndinam kpọt ye Mme Ntiense oro mme ebe mmọ ẹdide Mme Ntiense edi enyene n̄kpọ ndinam n̄ko ye mbon oro nsan̄a ndọ mmọ mîdịghe Mme Ntiense. (1 Peter 3:1) Didie ke ete m̀mê eka oro edide Ntiense ekeme ndinam mme edumbet emi ẹda ukem ukem ke ini enye ekpepde nditọ esie n̄kpọ?

Edieke ebe edide kiet ke otu Mme Ntiense Jehovah, enye enyene mbiomo ndinọ ubon esie n̄kpọ eke spirit ye eke obụkidem. (1 Timothy 5:8) Okposụkedi eka oro mînịmke ke akpanikọ ekemede ndibiat ekese ini ye nditọ mmọ, ete oro edide Ntiense ekpenyene ndikpep nditọ esie n̄kpọ ebe ke ndinọ mmọ ukpep eke spirit ke ufọk ndinyụn̄ nda mmọ n̄ka mme mbono esop Christian emi mmọ ẹdibọde item kaban̄a ido uwem ye eti nsan̄a.

Nso edieke n̄wan esie oro mînịmke ke akpanikọ ọsọn̄ọde eyịre ndida nditọ mmọ n̄ka itie utuakibuot esie m̀mê ndikpep mmọ mme edinịm ke akpanikọ esie? Ibet idụt ekeme ndinọ enye unen ndinam ntre. Edide ẹyetap nditọ oro ẹsịn ke edinam utuakibuot ke mme utọ itie oro edikọn̄ọ akamba akamba ke uduot ukpep eke spirit oro ete mmọ ọnọde mmọ. Nte nditọ oro ẹkọride ẹkponi, ukpep N̄wed Abasi oro ete mmọ ọnọde ekpenyene ndin̄wam mmọ nditiene akpanikọ Ikọ Abasi. Ebe oro enịmde ke akpanikọ edikop inemesịt didie ntem edieke nditọ esie ẹdade ẹnọ akpanikọ!

Edieke edide eka edi kiet ke otu Mme Ntiense Jehovah, ana enye okpono edumbet itieibuot ke adan̄aemi ekerede aban̄a nsinsi mfọnọn̄kpọ nditọ esie. (1 Corinth 11:3) Ke ediwak idaha, nsan̄a ndọ esie oro mînịmke ke akpanikọ idifịnake edieke n̄wan emi edide Ntiense ọnọde nditọ mmọ ukpep eke ido uwem ye eke spirit, ndien mme mbono esop ikọt Jehovah ẹyen̄wam ke afan̄ emi. N̄wan emi ekeme ndin̄wam ebe esie oro mînịmke ke akpanikọ ndikụt mme ufọn ukpep oro ọbọpde-bọp oro nditọ mmọ ẹbọde ẹto esop Jehovah. N̄wan emi ekeme ndida mbufiọk nsọn̄ọ n̄wụt ufọn edisịn mme edumbet Bible ẹban̄ade nti ido uwem ke esịt nditọ mmọ, sia mmọ ẹdude ke ererimbot oro abiarade ke n̄kan̄ ido uwem.

Nte ededi, ebe oro mînịmke ke akpanikọ ekeme ndisọn̄ọ nyịre ete nditọ imọ ẹnam ido ukpono imọ, adade mmọ aka itie utuakibuot esie onyụn̄ ọnọde mmọ ukpep ido ukpono nte ekemde ye edinịm ke akpanikọ esie. Mîdịghe ebe ekeme ndibiọn̄ọ kpukpru ido ukpono onyụn̄ ọsọn̄ọ eyịre ete ke nditọ imọ inyeneke ndibọ ukpep ido ukpono baba kiet. Nte ibuot ubon, enye akpan akpan enyene mbiomo ndinam ubiere. *

Nte Christian emi ama akayak idem ọnọ, ke adan̄aemi okponode itieibuot ebe esie, n̄wan oro enịmde ke akpanikọ eyeti edu apostle Peter ye John, emi ẹkedọhọde ẹte: ‘Nnyịn idikemeke nditre nditịn̄ se nnyịn ikokụtde inyụn̄ ikopde.’  (Utom 4:19, 20) Ke ntak ekerede aban̄a mfọnọn̄kpọ eke spirit nditọ esie, eka oro edide Ntiense oyoyom mme ifet ndinọ mmọ ndausụn̄ eke ido uwem. Enye enyene mbiomo ke iso Jehovah ndikpep mbon en̄wen mban̄a se enye ọfiọkde ke edi akpanikọ, ndien enye ikposioho nditọ esie ifep. (Mme N̄ke 1:8; Matthew 28:19, 20) Didie ke eka oro edide Ntiense ekeme ndise mban̄a ọkpọsọn̄ mfịna emi?

Da n̄kpọ aban̄ade edinịm ke Abasi odu ke uwụtn̄kpọ. Ekeme ndidi n̄wan oro edide Ntiense idikemeke ndinịm ukpepn̄kpọ Bible ye nditọ esie ke ntak mme ukpan oro ebe esie enịmde. Ndi ntak emi akpanam enye etre nditịn̄ n̄kpọ ekededi aban̄ade Jehovah nnọ nditọ esie? Baba. Mme ikọ ye edinam esie nte ido edide ẹyewụt ke enye enịm ke Andibot odu. Nte eyịghe mîdụhe nditọ esie ẹyenyene mme mbụme ẹban̄a n̄kpọ emi. Akpana enye enyene ifụre ndida ifụre ido ukpono esie nnam n̄kpọ ebe ke nditịn̄ nnọ mbon en̄wen, esịnede nditọ esie, nte ke imọ imenịm ke Andibot odu. Idem ọkpọkọm enye idikemeke ndinịm ukpepn̄kpọ Bible ye nditọ esie m̀mê ndida mmọ n̄ka mme mbono esop kpukpru ini, enye ekeme ndinam mmọ ẹnyene ifiọk ẹban̄a Jehovah Abasi.—Deuteronomy 6:7.

Kaban̄a itie ebuana oro odude ke ufọt Ntiense ye nsan̄a ndọ esie oro mînịmke ke akpanikọ, apostle Paul ekewet ete: “Ebe eke mînịmke ke akpanikọ ama akabade edi edisana ke n̄wan esie, n̄wan eke mînịmke ke akpanikọ ama onyụn̄ akabade edi edisana ke eyen-ete oro: mîdịghe ntre, nditọ mbufo ikpasanake; edi kemi mmọ ẹsana.” (1 Corinth 7:14) Jehovah ese itie ebuana ndọ nte edisana ke ntak nsan̄a ndọ oro enịmde ke akpanikọ, ndien Jehovah ese nditọ mmọ nte edisana. N̄wan oro edide Ntiense ekpenyene ndinam ukeme esie man an̄wam nditọ esie ẹfiọk akpanikọ, ayakde se isụhọde esịn Jehovah ke ubọk.

Nte nditọ oro ẹkọride ẹkponi, mmọ ẹyebiere m̀mê mmimọ idida ke n̄kan̄ anie ọkọn̄ọde ke ifiọk oro mmọ ẹbọde ẹto ete ye eka mmọ. Mmọ ẹkeme ndibiere ndinam n̄kpọ ke n̄kemuyo ye mme ikọ Jesus emi: “Owo eke amade ete m̀mê eka akan Mi idotke ye Ami.” (Matthew 10:37) Ẹwụk mmọ n̄ko ẹte: “Nditọ, ẹkop uyo mme ete mbufo ye mme eka mbufo ke Ọbọn̄.” (Ephesus 6:1) Ediwak uyen ẹbiere ‘ndikop uyo Abasi nte andikara’ n̄kan uyo ete m̀mê eka oro mîdịghe Ntiense, kpa ye oro ẹkụtde ukụt ke ubọk ete m̀mê eka oro. Edidi n̄kpọ inemesịt didie ntem inọ ete m̀mê eka oro edide Ntiense ndikụt nditọ ẹbierede ndinam n̄kpọ Jehovah kpa ye ubiọn̄ọ!

[Ikọ idakisọn̄]