Nte Afo Emeti?

Nte afo ama adara ndikot mme nsiondi Enyọn̄-Ukpeme eke ndondo emi? Ọfọn, se m̀mê afo emekeme ndibọrọ mme mbụme ẹtienede mi:

• Nso idi edikere mban̄a, ndien ntak emi mme Christian ẹkpekọride enye?

Enye edi ukeme edinịm idem ke itie owo efen, utọ nte edikop ubiak owo efen ke esịt nnyịn. Ẹnọ mme Christian item ẹte ‘ẹkop mbọm ye kiet eken, ẹtie ima-ima nte nditọete ẹnyụn̄ ẹnyene mfefere esịt.’ (1 Peter 3:8) Jehovah enịm uwụtn̄kpọ ọnọ nnyịn nditiene ke ndiwụt edikere mban̄a. (Psalm 103:14; Zechariah 2:8) Nnyịn imekeme ndikọri edu edikere mban̄a ke afan̄ emi ebe ke ndikpan̄ utọn̄, nditịm nse, ye ndida ekikere nnyịn nnam n̄kpọ.—4/15, page 24-26.

• Man inyene ata inemesịt, ntak anade ẹbem iso ẹkọk udọn̄ọ eke spirit mbemiso ẹkọkde ndo ikpọkidem?

Ediwak mbon oro ẹkopde nsọn̄idem ke n̄kan̄ eke ikpọkidem ikopke inemesịt, koro mme mfịna ẹkande mmọ ubọk. Ke edide isio, ediwak Christian oro ẹbiomode ndo ke ikpọkidem mfịn ẹnen̄ede ẹkop inemesịt ndinam n̄kpọ Jehovah. Mbon oro ẹbọde ufọn ẹto ukọkudọn̄ọ eke spirit ẹyenyene ifet ndikụt ẹsiode ndo ikpọkidem ẹfep ke obufa ererimbot.—5/1, page 6-7.

• Ntak emi Mme Hebrew 12:16 esịnde Esau ke otu mme anam use?

Mbụk Bible owụt nte ke Esau ekenyene edu ediwụk ntịn̄enyịn ke edinyene usọp usọp utịp ye edisịn ndisana n̄kpọ ke ndek. Edieke owo ekededi mfịn ayakde utọ edu oro ọkọri ke esịt esie, oro ekeme ndida n̄kesịm akwa idiọkn̄kpọ, utọ nte use.—5/1, page 10-11.

• Tertullian ekedi anie, ndien ẹdiọn̄ọ enye ke ntak nso?

Enye ekedi ewetn̄wed ye ekpep ukpepn̄kpọ ido ukpono emi okodude uwem ke ọyọhọ isua ikie iba ye ikie ita E.N. Ẹdiọn̄ọ enye ke ntak ediwak n̄wed oro enye ekewetde ndida n̄n̄wana nnọ inua-okot Ido Ukpono Christ. Ke adan̄aemi anamde emi, enye ama ọtọn̄ọ mme ekikere ye mme ukpepn̄kpọ akwaifiọk oro ẹkesịnde itiat idakisọn̄ ẹnọ mme mbiara ukpepn̄kpọ, utọ nte Abasi-Ita-ke-Kiet.—5/15, page 29-31.

• Ntak emi mme nsenubon mînen̄ekede idi ntak mme udọn̄ọ, edu uwem, ye n̄kpa owo?

Ntaifiọk ẹsịm ubiere nte ke etie nte odu nsenubon oro edide ntak nsio nsio udọn̄ọ oro mme owo ẹdọn̄ọde, ndien ndusụk mmọ ẹnịm ke akpanikọ ẹte ke mme nsenubon ẹsikara edu uwem nnyịn. Edi, Bible ọnọ ikike aban̄a ntọn̄ọ ubonowo, esịnede usụn̄ nte idiọkn̄kpọ ye unana mfọnmma ẹkedide ẹdinọmọ ubonowo. Ke adan̄aemi mme nsenubon ẹkemede ndinyene udeme ke ndikara edu uwem nnyịn, unana mfọnmma ye n̄kann̄kụk nnyịn n̄ko ẹnyene akpan odudu.—6/1, page 9-11.

• Didie ke ikpan̄wed n̄kukịp oro ẹkefiọhọde ke Oxyrhynchus, Egypt, esịn un̄wana ke ẹdida enyịn̄ Abasi?

Ubak udịmikọ eke Job 42:11, 12 emi edide eke Greek Septuagint esịne Tetragrammaton (abisi Hebrew inan̄ emi adade ọnọ enyịn̄ Abasi). Emi edi uyarade efen nte ke enyịn̄ Abasi ke usem Hebrew ama odu ke Septuagint, emi mme andiwet N̄wed Abasi Christian Usem Greek ẹkesiwakde ndikot nto.—6/1, page 30.

• Ẹmen mme afai afai mbuba n̄kpa Obio Ukara Rome ẹdomo ye mme ewe mbre mbuba eyomfịn?

Ndise oro ẹkewụtde ndondo emi ke Akwa An̄wambre Rome, Italy, ọnọ ekikere aban̄a mme n̄kpọ eyomfịn oro ẹbietde emi, ẹsịnede mme ndise vidio ẹwụtde nte owo an̄wanade ye ayara enan̄, utopita, mme mbuba uwat ubomisọn̄ ye ọkpọkkpọk moto, ye en̄wan emi mme andida nse ẹsin̄wanade ke mme edinam mbre mbuba eyomfịn eken. Akpa mme Christian ẹma ẹti ke Jehovah imaha afai m̀mê ndima mbon afai, mme Christian mfịn ikponyụn̄ imaha. (Psalm 11:5)—6/15, page 29.

• Nte nnyịn idomode ndidi mme andikpep oro ẹnyenede uforo, nso ke nnyịn ikeme ndikpep nto uwụtn̄kpọ Ezra?

Ezra 7:10 (NW) osio n̄kpọ inan̄ oro Ezra akanamde owụt, mme n̄kpọ oro nnyịn ikpodomode ndikpebe. Enye ọdọhọ ete: “Ezra ke idemesie ama [1] etịm esịt esie [2] ndidụn̄ọde ibet Jehovah, nnyụn̄ [3] nnam enye, nnyụn̄ [4] nteme ewụhọ ye unenikpe ke Israel.”—7/1, page 20.

• Ke ikpehe edinam iba ewe ke odot Christian an̄wan ayara n̄kpọ ke ibuot?

Idaha kiet edi ke ubon. Enye ndiyara n̄kpọ ke ibuot owụt ke enye ọdiọn̄ọ ke ebe imọ enyene mbiomo ndida usụn̄ ke akam ye ke ndinọ ukpep eke Bible. Idaha efen edi ke mme edinam esop, ebiet emi enye owụtde nte ke imọ imọdiọn̄ọ ke N̄wed Abasi ọnọ irenowo oro ẹma ẹkena baptism odudu ndinọ ukpep ye ndausụn̄. (1 Corinth 11:3-10)—7/15, page 26-27.

• Ntak emi mme Christian ẹfiọkde ke yoga akan ikpîkpu nsịn̄edeidem onyụn̄ akama n̄kpọndịk?

Uduak yoga nte ikpehe ukpepn̄kpọ edi ndinam owo adiana kiet ye spirit oro akande odudu owo. Ke edide isio ye ndausụn̄ Abasi, yoga abuana editre ndammana ukeme ukere n̄kpọ. (Rome 12:1, 2) Yoga ekeme ndisio owo nnyan nnọ n̄kpọndịk oro ubụpekpo ye edinam ndedịbe odudu ẹkamade. (Deuteronomy 18:10, 11)—8/1, page 20-22.