Nte Afo Oyomụm Nsọn̄ọnda Fo Akama?

N̄KPRI inuen ifan̄ ẹkekpan̄a n̄kpọn̄? Owo ndomokiet ifiọkke, ndien eyedi ibat ibat owo ẹkere ẹban̄a emi—ata ediwak inuen ẹdu. Nte ededi, Jehovah ekere aban̄a mmọ. Nte an̄wan̄ade, ke etịn̄de aban̄a mme usụhọde inuen emi, Jesus ama ọdọhọ mme mbet esie ete: “Baba mmọ kiet iduọhọ ke isọn̄ ke mîtoho Ete mbufo.” Enye ama adian do ete: “Ẹkûfehe ndien; mbufo ẹmesọn̄ urua ẹkan ediwak n̄kpri inuen.”—Matthew 10:29, 31.

Ke ukperedem, mme mbet ẹma ẹnen̄ede ẹdifiọk adan̄a nte Jehovah akadade mmọ ke ọsọn̄urua. Kiet ke otu mmọ, apostle John, ama ewet ete: “Abasi akada emi ayarade ima emi Enye amade nnyịn, ke emi Enye okosiode edibon Eyen Esie kierakiet ọdọn̄ ke ererimbot, kpan̄ nnyịn ikpodu uwem oto ke Enye.” (1 John 4:9) Jehovah inọhọ ufak kpọt edi n̄ko ọn̄wọn̄ọ ọnọ kpukpru mme asan̄autom esie ete: “Ndikpụhu fi, ndinyụn̄ n̄kpọn̄ke fi.”—Mme Hebrew 13:5.

Nte an̄wan̄ade, n̄kpọ ndomokiet ikemeke ndibiat ima oro Jehovah amade ikọt esie. Nte ededi, mbụme edemede, ‘Ndi nnyịn imenen̄ede idian idem ye Jehovah ke usụn̄ oro nnyịn mîdikpọn̄ke enye tutu amama?’

Mme Ukeme Oro Satan Esịnde Ndibiat Nsọn̄ọnda Nnyịn

Ke ini Jehovah okodụride ntịn̄enyịn Satan owụt edinam nsọn̄ọnda Job, Satan ama ọbọrọ ete: “Nte Job akpatuak ibuot ọnọ fi edieke enye mîkpenyeneke ufọn ito oro?” (Job 1:9, Today’s English Version) Ikọ esie ọkọwọrọ nte ke mme owo ndisọn̄ọ nda ye Abasi ọkọn̄ọ ofụri ofụri ke ‘mme ufọn oro mmọ ẹkemede ndinyene nto oro.’ Edieke emi ekpedide akpanikọ, ẹkpekeme ndibiat nsọn̄ọnda Christian ekededi—ama akam edi se ẹnọde enen̄ede etie etabi etabi.

Ke se iban̄ade Job, Satan ke ntọn̄ọ ntọn̄ọ ọkọdọhọ ke Job idisọn̄ọke ida ye Abasi edieke enye atabade mme inyene esie oro enye akadade ke ata ọsọn̄urua n̄kpọ. (Job 1:10, 11) Ke ini ekedide edikụt ke ikọ emiom emi edi nsu, Satan ama ọdọhọ ete: “Owo ayasana kpukpru se enye enyenede ayak man odu uwem.” (Job 2:4, TEV) Ke adan̄aemi ikọ Satan ekemede ndidi akpanikọ ye ndusụk owo, Job ama esịn ndibiat nsọn̄ọnda esie. N̄wetnnịm n̄kpọ ọsọn̄ọ oro. (Job 27:5; 42:10-17) Ndi afo emenyene ukem nsọn̄ọnda oro? Mîdịghe ndi afo ayayak Satan abiat nsọn̄ọnda fo? Kere ban̄a idemfo nte nnyịn idụn̄ọrede ndusụk akpanikọ oro ẹbuanade kpukpru Christian.

Apostle Paul ama enịm ke akpanikọ ete ke ata nsọn̄ọnda Christian ekeme ndinen̄ede n̄kop odudu. Enye ekewet ete: “Mmetịm mbụre mfiọk nte, n̄kpa ye uwem, . . . ye n̄kpọ eke ẹdude ke emi, ye n̄kpọ eke ẹdidide, . . . ye n̄kpọ efen ekededi oro ẹbotde, idikemeke ndidian̄ade nnyịn ke ima Abasi, emi odude ke Christ Jesus Ọbọn̄ nnyịn.” (Rome 8:38, 39) Nnyịn imekeme ndinyene ukem mbuọtidem oro edieke ima oro nnyịn imade Jehovah okponde. Utọ ima oro edi mbọbọ oro n̄kpọ ndomokiet mîkemeke ndibiat oro idem n̄kpa mîkemeke ndikan.

 Edieke nnyịn inyenede utọ itie ebuana oro ye Abasi, tutu amama nnyịn idibụpke, ‘Ndi ami nyosụk n̄ka iso ndinam n̄kpọ Jehovah ke isua ifan̄ ke iso?’ Utọ eyịghe oro ọkpọnọ ekikere nte ke nsọn̄ọnda nnyịn ye Abasi ọkọn̄ọ ke se ikemede nditịbe nnọ nnyịn ke ini uwem nnyịn. Mme idaha ẹtode an̄wa ikemeke ndibiat ata nsọn̄ọnda. Enye ọkọn̄ọ ke orụk owo oro nnyịn idide ke esịtidem. (2 Corinth 4:16-18) Edieke nnyịn imade Jehovah ke ofụri esịt nnyịn, nnyịn idikpụhu enye tutu amama.—Matthew 22:37; 1 Corinth 13:8.

Nte ededi, ana nnyịn iti ite ke Satan kpukpru ini esiyom usụn̄ ndibiat nsọn̄ọnda nnyịn. Enye ekeme ndidomo nnyịn man iyak idem inọ mme udọn̄ obụkidem, mfịghe ubọkn̄ka, m̀mê ndiyak ndusụk orụk afanikọn̄ ẹnam nnyịn ikpọn̄ akpanikọ. Ata akpan nsan̄a Satan ke en̄wan emi edi ererimbot oro adianarede ọkpọn̄ Abasi, okposụkedi unana mfọnmma nnyịn esinamde edi mmemmem n̄kpọ ọnọ enye ndibiat nsọn̄ọnda nnyịn. (Rome 7:19, 20; 1 John 2:16) Nte ededi, nnyịn imenyene nsio nsio un̄wam ke en̄wan emi, akakan un̄wam edi akpanikọ oro nte ke nnyịn inanake ifiọk iban̄a n̄kukan esie.—2 Corinth 2:11.

Nso idi n̄kukan Satan? Paul eketịn̄ aban̄a mmọ nte “mme n̄kari n̄kari edinam” ke leta oro enye ekewetde ọnọ ẹsọk mbon Ephesus. (Ephesus 6:11; ikọ idakisọn̄ NW) Satan esinịm mme n̄kari n̄kari edinam ke usụn̄ nnyịn man abiat nsọn̄ọnda nnyịn. Nte enemde, nnyịn imekeme ndidiọn̄ọ mme n̄kari n̄kari edinam emi, koro ẹwet mme usụn̄ unam n̄kpọ Devil ke Ikọ Abasi ẹnọ nnyịn. Ukeme oro Satan ekesịnde ndibiat nsọn̄ọnda Jesus ye Job ẹnọ nnyịn uwụtn̄kpọ ẹban̄a ndusụk usụn̄ oro enye odomode ndibiat nsọn̄ọnda Christian nnyịn.

Owo Ikekemeke Ndibiat Nsọn̄ọnda Jesus

Ke ntọn̄ọ ntọn̄ọ utom ukwọrọikọ Jesus, Satan ama enyene uko ndidomo Eyen Abasi idomo ebe ke ndidọhọ enye anam itiat akabade uyo. Nso n̄kari n̄kari edinam ke emi ekedi ntem. Jesus ikadiaha n̄kpọ ke usen 40, ntre nte eyịghe mîdụhe enye ama enen̄ede okop biọn̄. (Luke 4:2, 3) Satan ọkọnọ ekikere ete Jesus oyụhọ ndammana udọn̄ esie iwiwa, ke usụn̄ oro akatuahade ye uduak Jehovah. Kpasụk ntre mfịn, ndutịm usuanetop ererimbot esịn udọn̄ ọnọ ediyụhọ udọn̄ idemowo ke ebe oro, ikereke iban̄a se ididide utịp. Etop esie edi, ‘Afo omodot ndinyene enye idahaemi,’ m̀mê, ‘Kam domo enye se!’

Edieke Jesus okpokoyụhọde ọkpọsọn̄ biọn̄ oro ọkọdọn̄de enye ye unana edikere mban̄a se ididide utịp, Satan okpokokụt unen ke ndinam Jesus ọduọk nsọn̄ọnda esie. Jesus ekese mme n̄kpọ ke enyịn eke spirit, ndien enye ama ọbọrọ uko uko ete: “Ẹma ẹwet ẹte, idịghe uyo ikpọn̄ ke owo edida odu uwem.”—Luke 4:4; Matthew 4:4.

Ekem Satan ama okpụhọ usụn̄ unam n̄kpọ esie. Ke abuande itie N̄wed Abasi ke ukwan̄ usụn̄, kpa itien̄wed oro Jesus ekesikotde oto, Devil ama esịn udọn̄ ọnọ Jesus ndisio idemesie ke edikon̄ ebiet temple nduọk ke isọn̄. Satan ama ọdọhọ ete: ‘Angel eyekpeme fi.’ Jesus ikenyeneke uduak ndomokiet ndiyom utịbe utịbe ukpeme nto Ete esie n̄kukụre man odụri ntịn̄enyịn ọnọ idemesie. Jesus ama ọdọhọ enye ete:  “Kûdomo Jehovah Abasi fo.”—Matthew 4:5-7; Luke 4:9-12.

Akpatre usụn̄ unam n̄kpọ oro Satan akadade ekedi ata in̄wan̄-in̄wan̄. Enye ama odomo ndinam ediomi ye Jesus ebe ke ndiyom ndinọ Jesus kpukpru mme obio ererimbot ye ubọn̄ mmọ ama akam edi Jesus ayatuak ibuot ini kiet ọnọ imọ. Oro ama ekpere ndidi kpukpru se Satan ekenyenede ndinọ. Edi didie ke Jesus akpakatuak ibuot ọnọ akwa asua Ete esie? Jesus ikpekereke-kere ndinam utọ n̄kpọ emi tutu amama! Jesus ama ọbọrọ ete: “Tuak ibuot nọ Jehovah Abasi fo, nyụn̄ nam n̄kpọ nọ Enye ikpọn̄-ikpọn̄.”—Matthew 4:8-11; Luke 4:5-8.

Ke idomo ita oro ẹma ẹkekpu, Satan ‘ama adaha ọkpọn̄ Jesus tutu ini efen eke ọfọnde.’ (Luke 4:13, NW) Emi owụt nte ke Satan kpukpru ini ama esidu ke edidemede man okụt ifet ndisịn nsọn̄ọnda Jesus ke udomo. Ini eke ọfọnde ama odu ke n̄kpọ nte isua iba ye ubak ke ukperedem ke ini Jesus ọkọtọn̄ọde nditịm mme mbet esie idem nnọ n̄kpa esie oro akasan̄ade ekpere. Apostle Peter ama ọdọhọ ete: “Idiọk n̄kpọ aka nsan-nsan ye Afo, Ọbọn̄; utọ n̄kpọ emi idiwọrọke Fi.”—Matthew 16:21, 22.

Ndi ekeme ndidi utọ ukwan̄ item oro ẹkenọde ye eti uduakesịt mi ama enem Jesus, sia edide kiet ke otu mme mbet esie ọkọnọ? Jesus ama ọsọsọp ọfiọk ete ke mme ikọ oro ẹkewụt mme ekikere Satan, ikowụtke eke Jehovah. Christ ama ọbọrọ uko uko ete: “Da ke edem Mi, Satan. Afo edi n̄kpọ iduọ ọnọ Mi; koro afo ukereke n̄kpọ Abasi, edi ekere n̄kpọ owo.”—Matthew 16:23.

Satan ikekemeke ndibiat nsọn̄ọnda Jesus ke ntak ima oro Enye ekenyenede ọnọ Jehovah. Idụhe n̄kpọ ndomokiet oro Devil ekekemede ndinọ, idụhe idomo, idem ọkpọkọm ọkọsọn̄ didie, oro ekekemede ndinam Jesus okûsọn̄ọ ada ye Ete esie eke heaven. Ndi nnyịn iyanam ukem ubiere oro ke ini mme idaha ẹnamde edi ọkpọsọn̄ n̄kpọ ọnọ nnyịn ndimụm nsọn̄ọnda nnyịn n̄kama? Uwụtn̄kpọ Job ayan̄wam nnyịn nditịm mfiọk mme n̄kpọ-ata oro nnyịn ikemede ndisobo.

Nsọn̄ọnda kpa ye Afanikọn̄

Nte Job ekedide edifiọk, mme afanikọn̄ ẹkeme ndisịm nnyịn ini ekededi. Enye ekedi ọdọ ndọ emi okopde inemesịt okonyụn̄ enyenede nditọ duop ye eti ndutịm eke spirit. (Job 1:5) Edi Job ikọfiọkke ite ke nsọn̄ọnda imọ ye Abasi ama akabade edi n̄kpọ eneni ke ebietidụn̄ eke heaven, ndien ke Satan ama ebiere ndibiat nsọn̄ọnda imọ ke usụn̄ ekededi oro enye ekemede.

Ikebịghike Job ama ataba inyene obụkidem esie. (Job 1:14-17) Edi, nsọn̄ọnda Job ama ebe udomo oro koro enye ikedehede ibuọt idem ke okụk. Ke etide ini oro enye ekedide imọ owo, Job ama ọdọhọ ete: “Edieke nnịmde gold ke idotenyịn mi, . . . edieke ndatde esịt, koro inyene mi okponde, . . . oro okponyụn̄ edi idiọk n̄kpọ . . . , koro n̄kposude nsu nnọ Abasi ke enyọn̄.”—Job 31:24, 25, 28.

Mfịn, nnyịn imekeme n̄ko nditaba ke ekperede ndidi kpukpru n̄kpọ oro nnyịn inyenede ke mbuari. Ẹma ẹbian̄a anam mbubehe kiet emi edide kiet ke otu Mme Ntiense Jehovah ẹbọ ata ediwak okụk, ẹkperede ndinam enye odụk nditaha. Enye etịn̄ in̄wan̄-in̄wan̄ ete: “Mma n̄kpere ndinyene ifehesịt. Ke akpanikọ, n̄kere ke n̄kpekenyene ifehesịt edieke mîkpekedịghe itie ebuana mi ye Abasi. Nte ededi, n̄kpọntịbe emi ama anam mi mfiọk nte ke mme ọsọn̄urua n̄kpọ eke spirit ikedịghe akpa n̄kpọ ke uwem mi. Nduaidem edinyene okụk ama ekpere ndifụk kpukpru n̄kpọ ekededi.” Toto ke ini oro, Ntiense emi omosụhọde udomo mbubehe esie, ndien enye esinam utom nte asiakusụn̄ unọ un̄wam kpukpru ini, esịnde hour 50 m̀mê awakde akan oro ke ọfiọn̄ ke utom ukwọrọikọ Christian. Nte ededi, mme mfịna en̄wen ẹkeme ndikam nnen̄ede n̄kama mfụhọ n̄kan owo nditaba inyene esie.

Ikebịghike Job okokop mbụk editaba inyene esie ke ini enye ọkọbọde ntọt nte ke nditọ esie mboduop ẹma ẹkpan̄a. Enye ama ọsọn̄ọ etịn̄ ete: “Ẹkọm enyịn̄ Jehovah.” (Job 1:18-21) Nte iyomụm nsọn̄ọnda nnyịn ikama edieke itabade ediwak mbonubon nnyịn ke mbuari? Francisco, esenyịn Christian ke Spain, ama ataba nditọ esie iba ke akama mmọn̄eyet mbabuat n̄kpọntịbe bọs. Enye ama enyene ndọn̄esịt ebe ke ndisịk n̄kpere Jehovah ndinyụn̄ nnyene ekese ndinam ke utom ukwọrọikọ Christian.

Idem ke ama akataba nditọ esie ke usụn̄  oro enyenede ndịk, afanikọn̄ Job ikekpetke-kpet ndikụre. Satan ama ọtọ enye ubiak ubiak udọn̄ọ oro okodorode owo ndidien. Ke idaha oro, n̄wan Job ama ọnọ Job idiọk item. Enye ama akpak Job ete: “Kpọn̄ Abasi, ndien kpa n̄kpa.” Job ama esịn item esie, ikonyụn̄ inamke “idiọk ke n̄kpọk-inua esie.” (Job 2:9, 10) Nsọn̄ọnda esie ikọkọn̄ọke ke ibetedem oro ubon esie ẹkenọde enye, edi ọkọkọn̄ọ ke ọkpọkpọ itie ebuana esie ye Jehovah.

Flora, emi ebe ye akpan esie ẹma ẹkekpọn̄ usụn̄ Christian ke se iwakde ikan isua duop emi ẹkebede, ọfiọk nte ekemede ndiketie Job ke idem. Enye ọdọhọ ete: “Ke ini afo ke mbuari atabade ibetedem otode ubon fo, emi ekeme ndikama ubiak. Edi mma mfiọk ke ami ndinyeneke inemesịt ke ẹsiode esop Jehovah ẹfep. Ntre mma nsọn̄ọ nda nnyụn̄ nnịm Jehovah ke akpa itie ke adan̄aemi ndomode ndika iso ndi eti eka ye n̄wanndọ. Mma nsibọn̄ akam kpukpru ini, ndien Jehovah ama ọsọn̄ọ mi idem. Ami mmokop inemesịt koro, okposụkedi ebe mi ebierede ndika iso mbiọn̄ọ mi, mmekpep ndiberi edem ofụri ofụri ke Jehovah.”

Usụn̄ unam n̄kpọ efen oro Satan akadade ndibiat nsọn̄ọnda Job ekenyene n̄kpọ ndinam ye ufan esie ita. (Job 2:11-13) Ekedi n̄kpọ mfụhọ didie ntem ke ini mmọ ẹketọn̄ọde ndikụt ndudue nnọ enye. Edieke enye ekpekenyịmede mme ikọ nsụkuyo mmọ, enye ọkpọkọduọk mbuọtidem esie ke Jehovah Abasi. Item mmọ akpakanam idem emem enye onyụn̄ abiat nsọn̄ọnda esie, ndien ke ntem n̄kari Satan okpokokụt unen.

Utu ke oro, Job ama ọsọn̄ọ ọdọhọ ete: “Ndisioho mfọn-mma [“nsọn̄ọnda,” NW] ke idem mi mfep tutu ndikpa.” (Job 27:5) Enye ikọdọhọke, ‘Ndiyakke mbufo ẹsio nsọn̄ọnda ke idem mi ẹfep.’ Job ama ọfiọk ke nsọn̄ọnda imọ ọkọn̄ọ ke imọ ye ima oro imọ imade Jehovah.

Akani N̄kari Ndida Mmụm Mbon Efen

Satan osụk adada ukwan̄ item m̀mê mme ikọ unana n̄kọkibuot otode mme ufan ye ekemmọ mme andinịm ke akpanikọ anam n̄kpọ. Unana nsịnudọn̄ otode esop ekeme ndibiat mbuọtidem nnyịn mmemmem mmemmem akan ubiọn̄ọ oro otode an̄wa. Ebiowo Christian kiet emi ke akpa ekesitienede an̄wana ekọn̄ ama emen ubiak oro enye okokopde ke ntak mme ikọ ye edinam unana n̄kọkibuot eke ndusụk ekemmọ mme Christian odomo ye ekọn̄ oro enye akan̄wanade. Enye ama etịn̄ aban̄a mme ikọ ye edinam unana n̄kọkibuot ete: “Enye edi ata ọkpọsọn̄ n̄kpọ oro akanam nsobode.”

Ke n̄kan̄ eken, nnyịn imekeme ndinen̄ede n̄kop iyatesịt mban̄a unana mfọnmma ekemmọ mme andinịm ke akpanikọ tutu nnyịn itre nditịn̄ ikọ ye ndusụk mmọ, m̀mê ikam itọn̄ọ nditaba mme mbono esop Christian. Ekeme nditie nte ndinam n̄kpọ mban̄a iyatesịt nnyịn edi ata akpan n̄kpọ. Edi edi n̄kpọ mfụhọ didie ntem ndinam n̄kpọ ke utọ usụn̄ oro owụtde unana edikụt n̄kpọ n̄ka anyan do nnyụn̄ nyak se mbon en̄wen ẹnamde m̀mê ẹtịn̄de abiat ata ọsọn̄urua inyene nnyịn—itie ebuana nnyịn ye Jehovah. Edieke nnyịn iyakde oro etịbe, nnyịn iyọduọ idụk kiet ke otu n̄kari oro Satan adade ke anyan ini.

Nte enende, nnyịn imoyom mme n̄kokon̄ idaha ke esop Christian. Edi edieke nnyịn iyomde n̄kpọ ikaha ito ekemmọ mme andituak ibuot, emi ẹsụk ẹdide mme anana-mfọnmma owo, nnyịn iditreke ndikụt edikpu. Ke edide isio, Jehovah owụt eti ibuot ke se enye oyomde oto mme asan̄autom esie. Edieke nnyịn ikpebede uwụtn̄kpọ esie, nnyịn iyeben̄e idem ndiyọ unana mfọnmma mmọ. (Ephesus 4:2, 32) Apostle Paul ama ọnọ item emi ete: “Ẹyat esịt, ndien ẹkûdue; ẹkûyak utịn osụhọde edisịm iyatesịt mbufo: ẹkûnyụn̄ ẹnọ Satan ufan̄.”—Ephesus 4:26, 27.

Nte Bible owụtde in̄wan̄-in̄wan̄, Satan esida nsio nsio n̄kari n̄kari usụn̄ unam n̄kpọ man—edieke enye ekemede—abiat nsọn̄ọnda Christian. Ndusụk n̄kari n̄kari usụn̄ unam n̄kpọ esie ẹsidemede udọn̄ mmeme ikpọkidem, mbon eken ẹsikama ubiak. Otode se ẹnemede emi, afo emekeme ndikụt ntak emi Satan mîkpedehede imen fi ke ndueidem. Ke ima oro afo amade Abasi ọsọn̄ọde odu fi ke esịt, biere ndiwụt ke Devil edi osu nsu nyụn̄ nam esịt Jehovah adat. (Mme N̄ke 27:11; John 8:44) Ti ete ke nnyịn ikpedehede ibiat ata nsọn̄ọnda Christian, inamke n̄kpọ m̀mê mme idomo ewe ke nnyịn isobo.