“Ẹfen Kiet Eken”

NDI emenịm ke akpanikọ ke Abasi efen mme idiọkn̄kpọ fo? Etie nte ata ediwak ikpọ owo ke United States ẹnịm emi ke akpanikọ. Dr. Loren Toussaint, adausụn̄ ke ndụn̄ọde oro ẹkenamde ke Ikpehe Ẹkpepde N̄kpọ Ẹban̄a N̄kaowo ke Ufọkn̄wed Ntaifiọk Michigan, ọtọt ete ke otu mbon America 1,423 oro ẹkedade ẹnam ndụn̄ọde, n̄kpọ nte mbahade 80 eke ikie ke otu ikpọ owo oro ẹbede isua 45 ke emana ẹkedọhọ ke Abasi efen mme idiọkn̄kpọ mmimọ.

Nte ededi, edi n̄kpọ udọn̄ nte ke mbahade 57 eke ikie kpọt ke otu mbon oro ẹkedade ẹnam ndụn̄ọde mi ẹkedọhọ ke mmimọ ima ifen mbon en̄wen. Ibat oro eti nnyịn mme ikọ Jesus ke Ukwọrọikọ Oro ke Obot: “Edieke mbufo ẹdahadedo ẹnọ owo ke ndudue mmọ, Ete mbufo ke heaven oyonyụn̄ adahado ọnọ mbufo. Edi edieke mbufo mîdahakedo inọ owo ke ndudue mmọ, Ete mbufo idinyụn̄ idahakedo ke ndudue mbufo.” (Matthew 6:14, 15) Ih, Abasi ndifen mme idiọkn̄kpọ nnyịn, ke ubak ubak, ọkọn̄ọ ke nnyịn ndinyịme ndifen mbon en̄wen.

Apostle Paul ama eti mme Christian ke Colossae edumbet emi. Enye eketeme mmọ ete: “Ẹme ime ye kiet eken, ẹnyụn̄ ẹfen kiet eken, edieke owo mbufo ekededi enyenede ikọ ye owo; kpa nte Ọbọn̄ ekefende mbufo, ẹfen mmọ en̄wen kpasụk ntre.” (Colossae 3:13) Edi akpanikọ, emi isimemke utom ndinam kpukpru ini. Ke uwụtn̄kpọ, ke ini owo etịn̄de ikọ ye afo ke usụn̄ oro mîwụtke edikere mban̄a m̀mê mfọnido, ekeme ndidi ọkpọsọn̄ n̄kpọ ndifen nnọ owo emi.

Kpa ye oro, ediwak ufọn ẹdu ke ndifen nnọ. Dr. David R. Williams, ekpepn̄kpọ mban̄a itie ebuana owo, ama etịn̄ aban̄a ndụn̄ọde esie ete: “Nnyịn ima ikụt ata okopodudu ebuana oro odude ke ufọt edifen mbon en̄wen ye nsọn̄idem ekikere oro mbon America oro ẹdude ke ufọt ufọt isua uwem ye mbonusọn̄ ẹnyenede.” Oro odu ke n̄kemuyo ye mme ikọ enyene-ọniọn̄ Edidem Solomon, oro enye ekewetde ke n̄kpọ nte isua 3,000 emi ẹkebede ete: “Sụn̄ sụn̄ esịt edi uwem obụkidem.” (Mme N̄ke 14:30) Sia edu edifen nnọ anamde inyene eti itie ebuana ye Abasi ye mbọhọidụn̄ nnyịn, nnyịn imenyene eti ntak ndifen kiet eken ke ofụri esịt.—Matthew 18:35.