Didie ke Nnyịn Ikpese Mme Idomo?

MME idomo! Kpukpru owo ẹsisobo mmọ. Mmọ ẹkeme ndito utọk, nsọn̄ọn̄kpọ ndutịm uforo, unana nsọn̄idem, mfịghe ubọkn̄ka ndinam idiọk, ukọbọ, mme n̄kpọ-ata ke ndimụm edida san̄asan̄a nnyịn n̄kama m̀mê idaha emi nnyịn idade kaban̄a ukpono ndem, ye ediwak n̄kpọ en̄wen. Inamke n̄kpọ m̀mê nso orụk idomo ke nnyịn isobo, mmọ ẹsiwak ndikama ọkpọsọn̄ editịmede esịt. Didie ke nnyịn ikeme ndiyọ mmọ uforo uforo? Ndi mmọ ẹnyene ufọn ẹnọ nnyịn ke usụn̄ ekededi?

Mfọnn̄kan Un̄wam

Edidem David eke eset ama osobo idomo ke ofụri uwem esie, kpa ye oro enye ama anam akpanikọ tutu esịm n̄kpa. Didie ke enye ekekeme ndiyọ? Enye ama owụt ebiet oro odudu esie okotode ke ini enye ọkọdọhọde ete: “Jehovah edi andibọk mi, ndinanake n̄kpọ.” Ekem enye ama aka iso ete: “Ndien n̄ko ke ini ndisan̄ade ke itịghede mfụt n̄kpa, ndifeheke idiọk: koro afo odude ye ami; edi eto fo ye esan̄ fo edidọn̄ mi esịt.” (Psalm 23:1, 4) Ih, Jehovah edi andinọ un̄wam oro mînyeneke adan̄a. Enye ama ekpeme David ke ata n̄kpọsọn̄ ini, ndien enye eben̄e idem ndinam ukem oro nnọ nnyịn ke ini oyomde.

Didie ke nnyịn ikeme ndinyene un̄wam Jehovah? Bible owụt nte ikemede ndinyene emi ke ini enye ọdọhọde ete: “Ẹtabi, ẹnyụn̄ ẹse nte Jehovah ọfọnde.” (Psalm 34:8) Oro edi ima ima ikot, edi nso ke enye ọwọrọ? Emi esịn udọn̄ ọnọ nnyịn ndinam n̄kpọ Jehovah nnyụn̄ nnam uwem nnyịn enen̄ede ekem ye uduak esie. Utọ usụn̄ uwem oro ọwọrọ ndiyak ndusụk ifụre nnyịn ẹtak, ndinam n̄waidem. Ke ndusụk idaha, emi ekeme ndikam nda n̄kesịm mme idomo—ukọbọ ye ndutụhọ. Edi, iyomke mbon oro ẹyerede ikot Jehovah ke ofụri esịt ẹtua n̄kpọfiọk ndikanam oro. Jehovah eyenen̄ede ọfọn ye mmọ. Enye eyekpeme onyụn̄ ese aban̄a mmọ ke n̄kan̄ eke spirit. Enye ayada Ikọ esie, edisana spirit esie, ye esop Christian, ọsọn̄ọ mmọ idem ke mme ini idomo. Ndien ke akpatre, enye ọyọnọ mmọ nsinsi uwem.—Psalm 23:6; 25:9; Isaiah 30:21; Rome 15:5.

Mbon oro ẹbierede ndinam ukpụhọde ke uwem mmọ man ẹnam n̄kpọ Jehovah ẹnyụn̄ ẹsọn̄ọde ẹyịre ke ubiere oro ẹsikụt ke Jehovah esisu kpukpru se enye ọkọn̄wọn̄ọde. Nditọ Israel oro ẹketienede Joshua ẹdụk Isọn̄  Un̄wọn̄ọ ẹma ẹkụt emi. Ke ndondo oro mmọ ẹkebede Jordan, mme idomo ẹma ẹdu ndiyọ, mme en̄wan ẹma ẹdu ndin̄wana, ndien n̄kpọsọn̄ ukpepn̄kpọ ẹma ẹdu ndikpep. Edi emana oro ama enen̄ede anam akpanikọ akan emana mme ete mmọ, oro ẹkewọrọde ke Egypt ẹkenyụn̄ ẹkpan̄ade ke Wilderness. Ntem, Jehovah ama ọnọ mme anam-akpanikọ oro ibetedem, ndien kaban̄a idaha mmọ ke utịt uwem Joshua, n̄wetnnịm n̄kpọ Bible ọdọhọ ete: “Jehovah onyụn̄ ọnọ mmọ nduọkodudu akan okụk, nte enye ọkọn̄wọn̄ọde kpukpru ọnọ mme ete mmọ; . . . Baba ikọ kiet ke kpukpru nti ikọ oro Jehovah ọkọdọhọde ufọk Israel ikpụhu; kpukpru ẹsu.” (Joshua 21:44, 45) Nnyịn imekeme n̄ko ndinyene ukem idaha emi edieke ibuọtde idem ọyọhọ ọyọhọ ke Jehovah ke ini idude ke idomo ye ke kpukpru ini eken.

Nso ikeme ndinam mbuọtidem nnyịn ke Jehovah emem? Jesus ama owụt n̄kpọ kiet oro ekemede ndinam mbuọtidem nnyịn emem, ke ini enye ọkọdọhọde ete: “Baba owo kiet ikemeke ndisan̄a utom mme ete iba: . . . Mbufo ikemeke ndisan̄a utom Abasi ye eke mammon.” (Matthew 6:24) Edieke nnyịn ibuọtde idem ye Jehovah, nnyịn idiyomke ifụre ke ebiet emi ata ediwak owo ke ererimbot ẹyomde ifụre, ke inyene obụkidem. Jesus ama ọnọ mme anditiene enye item ete: “Ẹkam ẹbem iso ẹyom Obio Ubọn̄ Esie ye edinen ido Esie; ndien ẹyedian kpukpru n̄kpọ emi ẹnọ mbufo.” (Matthew 6:33) Christian emi enyenede ekikere oro adade ukem ukem kaban̄a inyene obụkidem onyụn̄ enịmde Obio Ubọn̄ Abasi akpa ke uwem esie anam nnennen edimek. (Ecclesiastes 7:12) Nte ededi, n̄kpọ ekeme nditak enye. Mme n̄kpọ ẹkeme nditak enye ke n̄kan̄ obụkidem. Edi enye ọyọbọ ekese utịp. Ndien Jehovah ayan̄wam enye.—Isaiah 48:17, 18.

Se Nnyịn Ikpepde ito Mme Idomo

Nte ededi, ndimek ‘nditabi nse nte Jehovah ọfọnde’ ikpemeke owo ibiọn̄ọ ndiọi idaha ke uwem; m̀mê enye ndikpeme nnyịn ofụri ofụri mbiọn̄ọ en̄wan oro Satan ye mme isụn̄utom esie oro ẹdide owo ẹdade ẹtiene nnyịn. (Ecclesiastes 9:11) Nte utịp, ẹkeme ndisịn edinam akpanikọ ye ubiere Christian ke udomo. Ntak emi Jehovah esiyakde mme andituak ibuot nnọ enye ẹsobo mme utọ idomo oro? Apostle Peter ama ọnọ ntak kiet ke ini enye ekewetde ete: “[Akpana] nsio-nsio idomo ẹnam mbufo ẹdu ke mfụhọ ke emi ke ekpri ini; man mbuọtidem mbufo emi ẹma ẹdomo ẹwụt, emi ọsọn̄de urua akan mbiara gold emi ẹdade ikan̄ ẹdomo, ọkpọwọrọ edi n̄kpọ itoro ye ubọn̄ ye ukpono ọnọ mbufo ke adan̄aemi Jesus Christ ediyararede idem.” (1 Peter 1:6, 7) Ih, mme idomo ẹsinam nnyịn iwụt uduot mbuọtidem nnyịn ye ima oro imade Jehovah. Ndien mmọ ẹsin̄wam ndibọrọ isụn̄i ye edori ikọ Satan kpa Devil.—Mme N̄ke 27:11; Ediyarade 12:10.

Mme idomo n̄ko ẹsin̄wam nnyịn ndikọri mme edu Christian eken. Nte uwụtn̄kpọ, kere ban̄a ikọ andiwet Psalm emi: “[Jehovah] ese mbon nsụkidem; edi etie nsan-nsan ọdiọn̄ọ mbon iseri.” (Psalm 138:6) Nte obot nnyịn etiede, ediwak nnyịn idịghe mbon nsụhọdeidem, edi mme idomo ẹkeme ndin̄wam nnyịn ndikọri akpan edu emi. Ti idaha oro okodude ke eyo Moses ke ini ndusụk nditọ Israel ẹkedọhọde ke ndidia manna kpukpru urua, kpukpru ọfiọn̄, ama efek mmimọ. Etie nte oro ekedi idomo ọnọ mmọ, idem okposụkedi ẹkenọde manna oro ke utịbe utịbe usụn̄. Nso ikedi uduak idomo oro? Moses ama asian mmọ ete: “[Jehovah akada] manna . . . ọbọk fi ke wilderness, man enye osụhọde fi enịm, onyụn̄ odomo fi.”—Deuteronomy 8:16.

Kpasụk ntre, ẹkeme ndisịn nsụhọdeidem nnyịn ke udomo. Didie? Ọfọn, didie ke nnyịn  isinam n̄kpọ iban̄a mme edinen̄ede ke usụn̄ unam n̄kpọ ke esop? (Isaiah 60:17) Ndi nnyịn imọnọ utom edikwọrọ ye edikpep n̄kpọ ibetedem ofụri esịt? (Matthew 24:14; 28:19, 20) Ndi nnyịn imesinyene ọkpọsọn̄ udọn̄ ndinyịme mme edinam an̄wan̄a oro “asan̄autom emi anamde akpanikọ, onyụn̄ enyenede ọniọn̄” ọnọde ke mme akpanikọ Bible? (Matthew 24:45-47; Mme N̄ke 4:18) Nte nnyịn imesibiọn̄ọ mfịghe edinyene n̄kpọutom, ọfọn̄, m̀mê orụk ubomisọn̄ oro ọwọrọde edi obufa? Owo nsụhọdeidem eyekeme ndibọrọ ih ke mme utọ mbụme emi.—1 Peter 1:14-16; 2 Peter 3:11.

Mme idomo ẹsin̄wam nnyịn ndikọri akpan edu efen—ime. Mbet oro James ọkọdọhọ ete: “Ẹnịm ẹte edi n̄kpọ ọyọhọ idatesịt, nditọ-ete mi, ke ini nsio-nsio idomo ẹsịmde mbufo; ke ẹfiọkde ẹte mbuọtidem mbufo emi ẹma ẹdomo ẹwụt anam ime ọwọrọ. (James 1:2, 3) Ndiyọ nsio nsio idomo oro isobode uforo uforo ye ọyọhọ mbuọtidem ke Jehovah anam nnyịn ikọri edu edinam akpanikọ, edisọn̄ọ nyịre, ye nsọn̄ọnda. Enye ọsọn̄ọ nnyịn idem ndibiọn̄ọ en̄wan oro Satan, ayat-esịt abasi ererimbot emi, edidade itiene nnyịn ke ini iso.—1 Peter 5:8-10; 1 John 5:19; Ediyarade 12:12.

Nyene Nnennen Ekikere Ban̄a Mme Idomo

Mfọnmma Eyen Abasi, Jesus Christ, ama osobo ediwak idomo ke adan̄aemi okodude ke isọn̄ ama onyụn̄ ọbọ ekese ufọn ke ndikọyọ mmọ. Paul ekewet ete ke Jesus ama “ekpep nsụk-ibuot ọfiọk oto ndutụhọ eke Enye okụtde.” (Mme Hebrew 5:8) Enye ndikọsọn̄ọ nda tutu esịm n̄kpa ama ada itoro ọsọk enyịn̄ Jehovah onyụn̄ anam Jesus ekeme ndinọ ekọmurua mfọnmma uwem esie eke owo nte ufak kaban̄a ubonowo. Oro ama eberede usụn̄ ọnọ mbon oro ẹkebuọtde idem ke Jesus ndinyene idotenyịn nsinsi uwem. (John 3:16) Ke ntak oro Jesus akanamde akpanikọ ke idak idomo, idahaemi enye edi Akwa Oku ye Edidem nnyịn oro ẹdoride ke ebekpo.—Mme Hebrew 7:26-28; 12:2.

Nso kaban̄a nnyịn? Nnyịn ndisọn̄ọ nda ke ini isobode idomo ayada ekese edidiọn̄ ọsọk nnyịn kpasụk ntre. Bible etịn̄ aban̄a mbon oro ẹnyenede idotenyịn eke heaven ete: “Ọfọfọn ye owo eke ọsọn̄ọde ada ke idomo, koro ke ẹma ẹkedomo enye ẹfiọk ẹte ọfọn, ẹnenọ enye anyanya uwem, emi Ọbọn̄ ọkọn̄wọn̄ọde ndinọ mmọ emi ẹmade Enye.” (James 1:12) Ẹn̄wọn̄ọ ẹnọ mbon oro ẹnyenede idotenyịn eke isọn̄ ẹte ke mmọ ẹyenyene nsinsi uwem ke paradise isọn̄ edieke mmọ ẹsọn̄ọde ẹda ẹyọ. (Ediyarade 21:3-6) Se ikam idide akpan n̄kpọ ikan edi nte ke mmọ ndisọn̄ọ nda nyọ ada itoro ọsọk enyịn̄ Jehovah.

Nte nnyịn itienede nde ikpat Jesus, nnyịn imekeme ndinyene mbuọtidem nte ke imekeme ndiyọ kpukpru idomo oro nnyịn isobode ke editịm n̄kpọ emi uforo uforo. (1 Corinth 10:13; 1 Peter 2:21) Didie? Ebe ke ndibuọt idem ye Jehovah, emi ọnọde mbon oro ẹbuọtde idem ke enye “akwa ubom odudu.” (2 Corinth 4:7) Mbuọtidem nnyịn akpakam ebiet eke Job, oro idem ke ini ọyọde n̄kpọsọn̄ idomo eketịn̄de uko uko ete: “Enye odomo mi: nyọwọrọ mbiet gold.”—Job 23:10.

[Ndise ke page 31]

Jesus ndikọsọn̄ọ nda ke ini idomo ama ada itoro ọsọk enyịn̄ Jehovah. Nsọn̄ọnda nnyịn ekeme ndida itoro nsọk enyịn̄ Jehovah n̄ko