Ẹka Iso Ndinam Mme N̄kpọ Oro Mbufo Ẹkpepde

“Se mbufo ẹkekpepde ẹkenyụn̄ ẹbọde mi ke ubọk, ẹnyụn̄ ẹkopde ẹnyụn̄ ẹkụtde nte nnanam, mbufo ẹtiene ẹnam; ndien Abasi emem oyodu ye mbufo.”—PHILIPPI 4:9.

1, 2. Ke ofụri ofụri, nte Bible ke enyene odudu ke uwem mme owo oro ẹbatde idem nte mbon ido ukpono? Nam an̄wan̄a.

 “IDO Ukpono ke Ọtọtọt, edi Eti Ido Uwem Ososụhọde.” Akpan ibuotikọ emi ke n̄wedmbụk n̄kpọntịbe oro Emerging Trends etịn̄ ibio ibio aban̄a mme ibọrọ ndụn̄ọde ofụri idụt oro ẹkenamde ke United States. Nte an̄wan̄ade, idụt oro enyene n̄kọri ke ibat mme owo oro ẹkade ufọkabasi ẹnyụn̄ ẹdọhọde ke ido ukpono enyene akpan itie ke uwem mmimọ. Nte ededi, ntọt oro ọdọhọ ete: “Kpa ye uwak ibat emi, ediwak mbon America ẹnen̄ede ẹnyene eyịghe ẹban̄a odudu oro ido ukpono enyenede ke uwem mme owo ye n̄kaowo ke ofụri ofụri.”

² Idaha emi idịghe ke idụt kiet kpọt. Ke ofụri ererimbot, ediwak owo oro ẹdọhọde ke mmimọ imenyịme Bible inyụn̄ idi mbon ido ukpono iyakke N̄wed Abasi enyene ata odudu ke idem mmọ. (2 Timothy 3:5) Etubom otu ndụn̄ọde kiet ọkọdọhọ ete: “Nnyịn isụk idada Bible ke ọsọn̄urua n̄kpọ, edi amaedi edibiat ini n̄kot enye, ndikpep enye nnyụn̄ nda enye nsịn ke edinam—oro edi n̄kpọ eset.”

3. (a) Didie ke Bible otụk mbon oro ẹkabarede ẹdi ata mme Christian? (b) Didie ke mme anditiene Jesus ẹda item Paul oro ẹwetde ke Philippi 4:9 ẹsịn ke edinam?

³ Nte ededi, idaha oro edi isio ye ata mme Christian. Edida item Ikọ Abasi nsịn ke edinam omokpụhọde ekikere ye edu uwem mmọ. Ndien mbon en̄wen esisọsọp ẹkụt obufa edu  oro mmọ ẹwụtde. (Colossae 3:5-10) Ye mme anditiene Jesus, Bible idịghe n̄wed oro owo mîdaha inam n̄kpọ, emi ntọn̄ ama okofụk ke itie ubonn̄wed. Ke edide isio, apostle Paul ọkọdọhọ mme Christian ke Philippi ete: “Se mbufo ẹkekpepde ẹkenyụn̄ ẹbọde mi ke ubọk, ẹnyụn̄ ẹkopde ẹnyụn̄ ẹkụtde nte nnanam, mbufo ẹtiene ẹnam; ndien Abasi emem oyodu ye mbufo.” (Sịghisịghi ubọkn̄wed edi eke nnyịn; Philippi 4:9) Mme Christian ẹnam se ikande edinyịme akpanikọ Ikọ Abasi. Mmọ ẹnam se mmọ ẹkpepde, ẹkade iso ẹda item Bible ẹsịn ke edinam—ke ubon, ke itieutom, ke esop, ye ke kpukpru ikpehe eken ke uwem.

4. Ntak edide n̄kpọ-ata ndida mme ibet Abasi nsịn ke edinam?

⁴ Idịghe mmemmem n̄kpọ ndida mme ibet ye mme edumbet Abasi nsịn ke edinam. Nnyịn idu uwem ke ererimbot oro odude ke idak odudu Satan kpa Devil, emi Bible okotde “abasi eyo emi.” (2 Corinth 4:4; 1 John 5:19) Ke ntre, edi akpan n̄kpọ ndikpeme mbiọn̄ọ n̄kpọ ekededi oro edikpande nnyịn ndibịne usụn̄ uwem nsọn̄ọnda nnọ Jehovah Abasi. Didie ke nnyịn ikeme ndidi mbon nsọn̄ọnda?

Ẹmụm “Ido Nti Ikọ” Ẹkama

5. Nso ke ikọ Jesus oro: ‘Ka iso tiene Mi’ ọwọrọ?

⁵ Ikpehe kiet ndinam se nnyịn ikpepde abuana edisọn̄ọ mmụm utuakibuot akpanikọ n̄kama, kpa ye ubiọn̄ọ otode mbon oro mînịmke ke akpanikọ. Oyom ukeme ndime ime. Jesus ọkọdọhọ ete: “Edieke owo ekededi oyomde nditiene Mi, yak enye otụk idem esie, onyụn̄ emen [eto ndutụhọ esie onyụn̄ aka iso, NW] etiene Mi.” (Matthew 16:24) Jesus ikọdọhọke ke nnyịn ikpenyene nditiene imọ urua kiet, ọfiọn̄ kiet, m̀mê isua kiet kpọt. Utu ke oro, enye ọkọdọhọ ete: ‘Ka iso tiene Mi.’ Mme ikọ esie ẹwụt ẹte ke nnyịn ikpenyeneke ndidi mbet sụk ke ekpri ibio ini m̀mê ndituak ibuot mfịn ndien n̄kpọn̄ ituakke aba. Ndisọn̄ọ mmụm utuakibuot akpanikọ n̄kama ọwọrọ nnyịn ndisọn̄ọ ndu ke usụn̄ uwem oro nnyịn ikemekde, inamke n̄kpọ m̀mê nso itịbe. Didie ke nnyịn ikeme ndinam oro?

6. Nso idi ido nti ikọ oro mme Christian akpa isua ikie ẹkekpepde ẹto Paul?

⁶ Paul ama eteme nsan̄autom esie Timothy ete: “Mụm [ido, NW] nti ikọ eke okokopde mi ke inua kama tutu esịm usen oro nte item uwem fo, ke mbuọtidem ye ima eke odude ke Christ Jesus.” (2 Timothy 1:13) Nso ke ikọ Paul ọkọwọrọ? Ikọ Greek oro ẹkabarede “ido” mi ke ata ata usụn̄ ada aban̄a mbuwed emi ewet ndise ewetde. Okposụkedi mîsịneke ofụri ntọt, utọ mbuwed oro esinyene mme in̄wan̄-in̄wan̄ udomo man andise emi enyenede mbufiọk ekeme ndidiọn̄ọ se mbuwed oro aban̄ade ofụri ofụri. Ukem ntre, owo ikanamke ido nti ikọ oro Paul ekekpepde Timothy ye mbon en̄wen man ọnọ akpan ibọrọ ke kpukpru mbụme emi ẹkemede ndikere mban̄a. Edi, otu ukpepn̄kpọ emi ọnọ ndausụn̄ oro ekemde—mbuwed, yak idọhọ ntre—man mbon oro ẹnyenede esịt akpanikọ ẹkeme ndifiọk se Jehovah oyomde oto mmọ. Nte ededi, man ẹnem Abasi esịt, oyoyom mmọ ẹka iso ẹmụm ido akpanikọ oro ẹkama ebe ke ndinam se mmọ ẹkpepde.

7. Didie ke mme Christian ẹkeme ndisọn̄ọ nyịre ido nti ikọ?

⁷ Ke akpa isua ikie, mme utọ owo nte Hymenaeus, Alexander, ye Philetus ẹma ẹsịn udọn̄ ẹnọ mme ekikere oro mîkekemke ye “ido nti ikọ.” (1 Timothy 1:18-20; 2 Timothy 2:16, 17) Didie ke akpa mme Christian ẹkpekekeme ndifep ndidi se mbon nsọn̄ibuot ẹtụnde usụn̄? Ebe ke ndikpep mme uwetn̄kpọ eke odudu spirit ye ntịn̄enyịn nnyụn̄ nda se mmọ ẹkpepde nsịn ke edinam. Mbon oro ẹkekpebede uwụtn̄kpọ Paul ye mme anam-akpanikọ eken ẹma ẹkeme ndifiọk nnyụn̄ nsịn n̄kpọ ekededi oro mîkodụhe ke n̄kemuyo ye ido akpanikọ oro ẹkekpepde mmọ. (Philippi 3:17; Mme Hebrew 5:14) Utu ke ndiyak ‘esịt mmọ ọdọn̄ọ eneni ye en̄wan ikọ,’ mmọ ẹma ẹka iso ke eti usụn̄ uwem uten̄e Abasi mmọ. (1 Timothy 6:3-6) Nnyịn inam ukem oro ke ini nnyịn ikade iso ndida mme akpanikọ oro nnyịn ikpepde nsịn ke edinam. Ọsọn̄ọ mbuọtidem didie ntem ndikụt ediwak miliọn owo oro ẹnamde n̄kpọ Jehovah ke ofụri isọn̄ ẹkade iso ẹmụm ido nti ikọ Bible oro ẹkpepde mmọ ẹkama!—1 Thessalonica 1:2-5.

 Ẹfep “Ikpîkpu Mbụk”

8. (a) Didie ke Satan oyom ndibiat mbuọtidem nnyịn mfịn? (b) Ewe ntọt Paul ke ẹkụt ke 2 Timothy 4:3, 4?

⁸ Satan esidomo ndibiat nsọn̄ọnda nnyịn ebe ke ndinam nnyịn inyene eyịghe iban̄a se ẹkpepde nnyịn. Mfịn, kpa nte ekedide ke akpa isua ikie, mbon nsọn̄ibuot ye mbon en̄wen ẹsiyom ndibiat mbuọtidem mbon unana ifiọk. (Galatia 2:4; 5:7, 8) Ndusụk ini mmọ ẹsida ndutịm usuanetop ẹsuan ukwan̄ ntọt m̀mê idem ata nsu ẹban̄a mme usụn̄ unam n̄kpọ ye mme uduak ikọt Jehovah. Paul ama ọtọt ete ke ẹyewọn̄ọde ndusụk owo ẹkpọn̄ akpanikọ. Enye ekewet ete: “Ini ọmọn̄ edi eke mme owo mîdibọhọ eti ukpep-n̄kpọ; ndien sia utọn̄ ẹdebede mmọ ndikop isio ikọ, mmọ ẹyekọ mme andikpep ẹnọ idem nte ekemde ye mme idiọk udọn̄ mmọ, ẹyenyụn̄ ẹsio utọn̄ ẹfep ke akpanikọ, ẹnyụn̄ ẹwọn̄ọde ẹbịne ikpîkpu mbụk.”—2 Timothy 4:3, 4.

9. Anaedi Paul ekenyene nso ke ekikere ke ini enye eketịn̄de aban̄a “ikpîkpu mbụk”?

⁹ Utu ke ndimụm ido nti ikọ n̄kama, ndusụk owo ẹma ẹyak mme “ikpîkpu mbụk” ẹdemede mmọ udọn̄. Mme ikpîkpu mbụk emi ẹkedi nso? Ekeme ndidi Paul eketịn̄ aban̄a mme mbụk oro ẹkerede-kere, utọ nte mbon oro ẹkụtde ke abian̄a abian̄a n̄wed Tobit. * Ekeme ndidi mme ikpîkpu mbụk n̄ko ẹma ẹsịne mme aduai-owo-idem ufụmikọ oro ẹkerede-kere. Ndien, n̄ko, ekeme ndidi mbon oro ẹkesifụmide mme idaha Abasi m̀mê ẹkesikụtde ndudue ẹnọ mbon oro ẹdade usụn̄ ke esop ẹma ẹda n̄kari ẹbian̄a ndusụk owo—“nte ekemde ye mme udọn̄ idem mmọ.” (3 John 9, 10; Jude 4) Etie nte ndusụk owo ẹma ẹmek nsu utu ke ndimek akpanikọ Ikọ Abasi inamke n̄kpọ m̀mê mme n̄kpọ iduọ ewe ke oro akakama. Ikebịghike, mmọ ẹma ẹtre ndinam mme n̄kpọ oro mmọ ẹkekpepde, ndien emi ama ọnọ mmọ unan ke n̄kan̄ eke spirit.—2 Peter 3:15, 16.

10. Nso idi ndusụk ikpîkpu mbụk eyomfịn, ndien didie ke John okowụt ke oyom ẹdu ke ukpeme?

¹⁰ Nnyịn imekeme ndifep ndiwọn̄ọde mbịne ikpîkpu mbụk mfịn edieke nnyịn idụn̄ọrede inyụn̄ isatde se nnyịn ikpan̄de utọn̄ inọ inyụn̄ ikotde. Ke uwụtn̄kpọ, ndutịm usuanetop esiwak ndisịn udọn̄ nnọ oburobụt ido. Ediwak owo ẹsịn udọn̄ ẹnọ edikere nte ke owo idiọn̄ọke m̀mê Abasi odu m̀mê idụhe m̀mê ata unana edinịm ke Abasi odu. Ikpọ mbon nsụkuyo ẹda Bible ndidọhọ ke ẹkeda odudu spirit ẹwet imọ ẹnam nsahi. Ndien mbon nsọn̄ibuot eyomfịn ẹka iso ẹdomo ndinam ẹnyene eyịghe man ẹbiat mbuọtidem mme Christian. Kaban̄a ukem n̄kpọndịk oro mme nsunsu prọfet ẹkedade ẹdi ke akpa isua ikie, apostle John ama odụri owo utọn̄ ete: “Ndima, ẹkûnịm kpukpru spirit ke akpanikọ, edi ẹdomo mme spirit ẹse m̀mê mmọ ẹdi eke Abasi: koro ediwak prophet nsu  ẹma ẹwọn̄ọ ẹdụk ẹdi ke ererimbot.” (1 John 4:1) Ntre oyom nnyịn idu ke ukpeme.

11. Nso idi usụn̄ kiet ndidomo nse m̀mê nnyịn idu ke mbuọtidem?

¹¹ Ke afan̄ emi, Paul ekewet ete: “Ẹdomo idem mbufo ẹse m̀mê mbufo ẹdu ke mbuọtidem.” (2 Corinth 13:5) Apostle oro ama esịn udọn̄ ọnọ nnyịn ndika iso ndomo idem nnyịn man idiọn̄ọ m̀mê nnyịn ke isọn̄ọ iyịre otu ukpepn̄kpọ Christian. Edieke edide imenyene ntụhọ edikpan̄ utọn̄ nnọ mbon n̄kụni, oyom nnyịn idụn̄ọde idem nnyịn ke akam. (Psalm 139:23, 24) Nte nnyịn imenyene ntụhọ edikụt ndudue nnọ ikọt Jehovah? Ke edide ntre, ntak-a? Nte mme ikọ m̀mê edinam owo ama abiak nnyịn? Ke edide ntre, nte nnyịn imenịm mme n̄kpọ ke nnennen idaha? Ukụt ekededi oro nnyịn isobode ke editịm n̄kpọ emi edi ke ibio ini. (2 Corinth 4:17) Idem ọkpọkọm nnyịn imosobo ndusụk idomo ke esop, ntak emi nnyịn ikpetrede ndinam n̄kpọ Abasi? Edieke n̄kpọ ayatde nnyịn esịt, nte ikpetịmke ifọn nnyịn ndinam se ikemede man ibiere mfịna oro ndien ekem iyak enye isịn Jehovah ke ubọk?—Psalm 4:4; Mme N̄ke 3:5, 6; Ephesus 4:26.

12. Didie ke mbon Beroea ẹkenịm eti uwụtn̄kpọ ẹnọ nnyịn?

¹² Utu ke ndikụt ndudue nnọ, ẹyak nnyịn ika iso idụn̄ọde mme ntọt oro ikpepde ke ukpepn̄kpọ idemowo ye ke mme mbono esop ke usụn̄ eke spirit. (1 Corinth 2:14, 15) Ndien utu ke ndinyene eyịghe mban̄a Ikọ Abasi, owụt eti ibuot didie ntem ndinyene ido mbon Beroea eke akpa isua ikie emi ẹkedụn̄ọrede N̄wed Abasi ketket! (Utom 17:10, 11) Ntem, ẹyak nnyịn ida se ikpepde isịn ke edinam, isịnde ikpîkpu mbụk inyụn̄ isọn̄ọde iyịre ke akpanikọ.

13. Didie ke nnyịn ikeme ndisuan ikpîkpu mbụk ke unana edidiọn̄ọ?

¹³ Odu orụk ikpîkpu mbụk efen oro oyomde nnyịn ikpeme ibiọn̄ọ. Ata ediwak aduai-owo-idem mbụk ẹsitara ẹsuana, ediwak ini ke ndutịm unọ etop kọmputa. Oyowụt eti ibuot ndidu ke ukpeme mban̄a mme utọ mbụk oro, akpan akpan edieke nnyịn mîfiọkke ata ebiet emi ntọt oro otode. Idem ọkpọkọm Christian oro ọwọrọde eti etop ọkọnọ ifiọkutom m̀mê mbụk oro, ekeme ndidi enye ikenyeneke nnennen ifiọk iban̄a se idide akpanikọ. Ntak edi oro edide akpan n̄kpọ ndidu ke ukpeme mban̄a edika iso nsuan mbụk oro nnyịn mîdiọn̄ọke m̀mê edi akpanikọ. Ke akpanikọ nnyịn idiyomke ndika iso nsuan “idiọk mbụk,” m̀mê “mbukpo n̄ke.” (1 Timothy 4:7; New International Version) Sia nnyịn n̄ko inyenede mbiomo nditịn̄ akpanikọ nnọ kiet eken, nnyịn inam n̄kpọ ye eti ibuot ke ndifep n̄kpọ ekededi oro edikam anamde nnyịn isuan nsu ke unana edidiọn̄ọ.—Ephesus 4:25.

Mme Ufọn Edida Akpanikọ Nsịn ke Edinam

14. Mme ufọn ewe ẹsito edida mme n̄kpọ oro ikpepde ito Ikọ Abasi nsịn ke edinam?

¹⁴ Ndida se nnyịn ikpepde ke ọkpọkpọ ukpepn̄kpọ Bible ye ke mme mbono esop Christian nsịn ke edinam ayada ediwak ufọn edi.  Ke uwụtn̄kpọ, nnyịn imekeme ndikụt nte itie ebuana nnyịn ye mmọ emi ẹtode ke ufọk mme andinịm ke akpanikọ ọfọnde akan. (Galatia 6:10) Idaha ekikere nnyịn oyokpụhọde ọfọn akan ke ini idade mme edumbet Bible isịn ke edinam. (Psalm 19:8) Mmọdo, ebede ke ndida se ikpepde nsịn ke edinam, nnyịn ‘inam ukpep-n̄kpọ Abasi enyene uku’ ndien eyedi iyodụri mbon en̄wen iwụt utuakibuot akpanikọ.—Titus 2:6-10.

15. (a) Didie ke n̄kaiferi kiet ekenyene uko ndinọ ikọ ntiense ke ufọkn̄wed? (b) Nso ke afo ekpep oto ifiọkutom emi?

¹⁵ Ke otu Mme Ntiense Jehovah, ediwak uyen ẹdu emi ẹdade se mmọ ẹkpepde ke ọkpọkpọ ukpepn̄kpọ Bible ye mme n̄wed Christian ọkọrọ ye ke edidụk mme mbono esop kpukpru ini, ẹsịn ke edinam. Eti edu uwem mmọ edi okopodudu ikọ ntiense ọnọ mme andikpep ye ekemmọ nditọ ufọkn̄wed. (1 Peter 2:12) Kere ban̄a Leslie, n̄kaiferi emi edide isua 13 ke emana ke United States. Enye ọdọhọ ete ke ama esisọn̄ imọ ndinyene nneme ye mme nsan̄a ufọkn̄wed mban̄a se imọ inịmde ke akpanikọ, edi usen kiet oro ama okpụhọde. “Otu nditọ ukpepn̄kpọ ẹketịn̄ ẹban̄a nte mme owo ẹsidomode ndinyam mme n̄kpọ nnọ owo. N̄kaiferi kiet ama emenede ubọk onyụn̄ etịn̄ aban̄a Mme Ntiense Jehovah.” Nte Ntiense, didie ke Leslie akanam n̄kpọ? Enye ọdọhọ ete: “Mma n̄n̄wana mban̄a mbuọtidem mi, emi nnịmde ke akpanikọ nte ke ama akpa kpukpru owo idem, sia nsidopde-dop uyo ke ufọkn̄wed.” Nso ikedi utịp uko Leslie? Enye ọdọhọ ete: “Mma n̄keme ndinịm ediye uduot ekpri n̄wed ye tract nnọ eyen ufọkn̄wed oro, sia enye ekenyenede mme mbụme efen.” Jehovah esikop idatesịt didie ntem ke ini mme uyen oro ẹdade se mmọ ẹkpepde ẹsịn ke edinam ẹnyenede uko ndinọ ikọ ntiense ke ufọkn̄wed!—Mme N̄ke 27:11; Mme Hebrew 6:10.

16. Didie ke uyen Ntiense kiet ọbọ ufọn oto Ufọkn̄wed Utom Ukara Abasi?

¹⁶ Uwụtn̄kpọ efen edi eke Elizabeth. Ọtọn̄ọde ke ini enye ekedide isua itiaba ke emana ye ke ofụri isua oro enye okodude ke ufọkn̄wed praimari, ekpri n̄kaiferi emi ama esikot mme andikpep esie ẹdi Ufọkmbono Obio Ubọn̄ ini ekededi oro enye ekenyenede n̄kpọ ndinam ke Ufọkn̄wed Utom Ukara Abasi. Edieke andikpep mîkemeke ndidụk, Elizabeth ama esibet ke n̄wed asuanade onyụn̄ okot utịn̄ikọ oro ọnọ andikpep oro. Ke akpatre isua oro enye okodude ke ufọkn̄wed sekọndri, Elizabeth ama ewet utịn̄ikọ oro enyenede page duop aban̄a mme ufọn Ufọkn̄wed Utom Ukara Abasi onyụn̄ okot enye ke iso andikpep inan̄. Ẹma ẹkot enye edinam owụt nte enye ọkpọnọde utịn̄ikọ ke Ufọkn̄wed Utom Ukara Abasi, ndien enye ama emek ibuotikọ emi “Ntak Emi Abasi Ayakde Idiọkido Odu?” Elizabeth ọbọ ufọn oto ndutịm unọ ukpep oro Mme Ntiense Jehovah ẹnamde ke Ufọkn̄wed Utom Ukara Abasi. Enye edi kiet kpọt ke otu ediwak uyen Christian emi ẹdade itoro ẹsọk Jehovah ebe ke ndida mme n̄kpọ oro mmọ ẹkpepde ẹto Ikọ esie nsịn ke edinam.

17, 18. (a) Nso item ke Bible ọnọ aban̄a edinam akpanikọ? (b) Didie ke edu edinam akpanikọ owo Ntiense Jehovah okotụk eren kiet?

¹⁷ Bible esịn udọn̄ ọnọ mme Christian ndinam akpanikọ ke kpukpru n̄kpọ. (Mme Hebrew 13:18, NW) Unana edinam akpanikọ ekeme ndibiat itie ebuana nnyịn ye mbon en̄wen, onyụn̄ ekeme ndibiat itie ebuana nnyịn ye Jehovah oro edide akpan n̄kpọ akan. (Mme N̄ke 12:22) Edu uwem nnyịn oro ẹkemede ndibuọt  idem ọnọ uyarade nte ke nnyịn imanam mme n̄kpọ oro nnyịn ikpepde, ndien emi amanam ediwak owo ẹnen̄ede ẹkpono Mme Ntiense Jehovah.

¹⁸ Kere ban̄a se iketịbede inọ owoekọn̄ emi ekerede Philip. Enye ama ọduọk babru ubọ okụk ban̄k oro enye ekesịnde ubọk edi mîkewetke ibatokụk oro enye oyomde ndibọ ndien enye ikọfiọkke emi ibọhọke ke ẹma ẹkesịn babru oro ke leta ẹnọ ẹsọk enye. Owo kiet ke otu Mme Ntiense Jehovah ọkọfiọhọ babru ubọ okụk ban̄k oro, ndien ekpri n̄wed oro ẹkewetde ẹdian ke babru oro ọkọdọhọ ke mme n̄kpọ oro andikụt enịmde ke akpanikọ okonụk enye ndinọ babru ubọ okụk ban̄k oro ẹsọk enye. Philip ama okop n̄kpaidem. Enye ọkọdọhọ ete: “Ẹkpesio $9,000 mi.” Ẹma ẹkpu enye ke idaha efen ke ini ẹkeyịpde itam esie ke ufọkabasi. Nte an̄wan̄ade, owo emi ọdiọn̄ọde enye ekemen itam esie, edi esenowo ọkọnọ babru ubọ okụk ban̄k emi akakpade ediwak tọsịn dollar ẹsọk enye! Ke akpanikọ, mme Christian oro ẹnamde akpanikọ ẹda ukpono ẹsọk Jehovah Abasi!

Ẹka Iso Ndinam Se Mbufo Ẹkpepde

19, 20. Didie ke nnyịn idibọ ufọn ito edinam n̄kpọ ke n̄kemuyo ye mme n̄kpọ oro ikpepde ito N̄wed Abasi?

¹⁹ Mbon oro ẹnamde se mmọ ẹkpepde ẹto Ikọ Abasi ẹbọ ata ediwak ufọn. Mbet oro James ekewet ete: “Owo eke owụkde enyịn ese ata edifọn ibet Abasi emi anamde owo ọwọrọ ufụn, onyụn̄ ọsọn̄ọde ada ke esịt, idịghe andikokop emi efrede, edi edi andinanam; owo emi oyokụt edidiọn̄ ke edinam esie.” (James 1:25) Ih, edieke nnyịn inamde n̄kpọ ke n̄kemuyo ye mme n̄kpọ oro ikpepde ke N̄wed Abasi, nnyịn iyenyene ata inemesịt inyụn̄ ikeme ndiyọ mme mfịghe uwem ke usụn̄ oro ọfọnde akan. Ke akande kpukpru, nnyịn iyenyene edidiọn̄ Jehovah ye idotenyịn nsinsi uwem!—Mme N̄ke 10:22; 1 Timothy 6:6.

²⁰ Ntem, ke usụn̄ ekededi, ẹka iso ẹsịn idem ẹkpep Ikọ Abasi. Ẹsop idem ọtọkiet kpukpru ini ye mme andituak ibuot nnọ Jehovah, ẹnyụn̄ ẹkpan̄ utọn̄ ẹnọ mme n̄kpọ oro ẹnemede ke mme mbono esop Christian. Ẹda se mbufo ẹkpepde ẹsịn ke edinam, ẹka iso ẹnam enye, ndien “Abasi emem oyodu ye mbufo.”—Philippi 4:9.

[Ikọ idakisọn̄]

Nte Afo Emeti?

• Nso idi “ido nti ikọ,” ndien didie ke nnyịn ikeme ndimụm enye n̄kama?

• Nso “ikpîkpu mbụk” ke oyom nnyịn ifep?

• Mme ufọn ewe ke mbon oro ẹnamde mme n̄kpọ oro mmọ ẹkpepde ẹto Ikọ Abasi ẹnyene?

[Mme Mbụme Ukpepn̄kpọ]

[Ndise ke page 17]

Didie ke akpa mme Christian ẹkpekekeme ndifep ndidi se mbon nsọn̄ibuot ẹtụnde usụn̄?

[Mme ndise ke page 18]

Ẹkeme nditọ n̄kpasịp eyịghe ebe ke ndutịm usuanetop, Intanet, ye mbon nsọn̄ibuot eyomfịn

[Ndise ke page 19]

Ifọnke ndisuan mme ntọt oro owo mîdiọn̄ọke m̀mê ẹdi akpanikọ

[Mme ndise ke page 20]

Ke itieutom, ke ufọkn̄wed, ye ke mme ebiet en̄wen, Mme Ntiense Jehovah ẹda se mmọ ẹkotde ke Ikọ Abasi ẹsịn ke edinam