‘Enye Ayada Mi Aka ke Mmọn̄ Nduọk-Odudu’

KE MME idụt Bible oro eyo esifiopde, esiyom mme erọn̄ ẹn̄wọn̄ mmọn̄ kpukpru usen. Ke ntre, akpan ubak utom ekpemerọn̄ esidi ndinọ mme erọn̄ esie mmọn̄. Ndusụk ini, mme ekpemerọn̄ ẹsikoi mmọn̄ ke obube mmọn̄ ẹsịn ke akwa un̄wọn̄ mmọn̄, man mme erọn̄ ẹkeme ndin̄wọn̄. (Genesis 29:1-3) Nte ededi, akpan akpan ke ukwọ edịm, ikpehe oro odude ekpere n̄kpri idịm ye akpa mmọn̄ esidi ifụre ifụre, ebiet “mmọn̄ nduọk-odudu.”—Psalm 23:2.

Eti ekpemerọn̄ esinyene ndifiọk ebiet oro enye edikụtde mmọn̄ ye awawa mbiet inọ mme erọn̄ esie. Mme erọn̄ esie ndika iso ndu uwem ọkọn̄ọ ke enye nditịm mfiọk ikpehe oro enye adade mme erọn̄ esie aka. David, emi akabiatde ediwak isua ndikpeme erọn̄ ke n̄kpri obot Judea, ama emen ndausụn̄ eke spirit oro Abasi ọnọde odomo ye ndausụn̄ ekpemerọn̄ emi adade mme erọn̄ esie usụn̄ aka ebiet oro awawa mbiet ye ọnọ-uwem mmọn̄ ẹdude. David ọkọdọhọ ete: “[Enye] ayada mi aka ke mmọn̄ nduọk-odudu.”—Psalm 23:1-3.

Ediwak isua ke ukperedem, ebede ke prọfet esie Ezekiel, Jehovah ama ọnọ ukem uwụtn̄kpọ oro. Enye ama ọn̄wọn̄ọ nditan̄ ikọt esie oro ẹkesuande ke nsio nsio idụt mbon, kpa nte ekpemerọn̄ atan̄de mme erọn̄ esie obon. Enye ama ọsọn̄ọ ọnọ mmọ ete: “Ndien nyosio mmọ . . . nda mmọ ndi ke isọn̄ mmọ, ndien nyọbọk mmọ ke ikpọ obot Israel, ke mben udiọn̄ mmọn̄.”—Ezekiel 34:13.

Jehovah Abasi n̄ko enen̄ede enyene udọn̄ ndinọ mmọn̄ eke spirit. N̄wed Ediyarade etịn̄ aban̄a “akpa mmọn̄ uwem” oro otode ke ebekpo Abasi ewet. (Ediyarade 22:1) Ẹnọ kpukpru owo ikot ẹte ẹdin̄wọn̄ mmọn̄ emi. “Owo eke amade, yak edi edibọ mmọn̄ uwem ke ikpîkpu.”—Ediyarade 22:17.

Mmọn̄ uwem emi ada aban̄a ndutịm oro Abasi anamde kaban̄a nsinsi uwem. Owo ekededi ekeme nditọn̄ọ ndin̄wọn̄ utọ mmọn̄ emi ebe ke ‘ndifiọk ata Abasi kierakiet, ye enye emi Abasi ọkọdọn̄de, kpa Jesus Christ.’—John 17:3.