Ndọn̄esịt ke Mme Ini Afanikọn̄

MBỤK idahaemi ikamake ndọn̄esịt. Owo kiet ekewet ete: “Mme n̄kpọntịbe ndondo emi ẹnen̄ede ẹkama mfụhọ tutu ediwak ini esisọn̄ nnyịn ndibiere m̀mê iyenyene esịt ikem ndikpan̄ utọn̄ n̄kop mbụk n̄kpọntịbe n̄kanika itiokiet.” Ererimbot ọyọhọ ye ekọn̄, edinam oyomonsia, ndutụhọ, ubiatibet, ye udọn̄ọ—mme idiọkn̄kpọ oro ẹkemede ndisọp nsịm nnyịn nnennen nnennen ke mîkam idịghe mmọ ẹsesịm nnyịn.

Bible ama ebem iso etịn̄ aban̄a mme n̄kpọntịbe emi nnennen nnennen. Ke etịn̄de aban̄a eyo nnyịn, Jesus ọkọdọhọ ke ikpọ ekọn̄, ndiọi udọn̄ọ, akan̄, ye unyekisọn̄ ẹyedu. (Luke 21:10, 11) Ukem ntre, apostle Paul ama ewet aban̄a “ndiọk eyo,” ini emi mme owo ẹditiede obom-obom, ẹdidide mme ama inyene, ẹnyụn̄ ẹsua se ifọnde. Enye okokot ini oro “ukperedem ini.”—2 Timothy 3:1-5.

Ntem, ke nditịn̄ mban̄a mme idaha ererimbot, mbụk n̄kpọntịbe ke ndusụk idaha ebiet se Bible ekebemde iso etịn̄. Edi mbiet emi ikaha anyan ikan oro. Bible anam ẹfiọk se mbụk n̄kpọntịbe mînamke. Nnyịn imekeme ndifiọk ntak emi idiọkn̄kpọ ẹwakde ntem ye se ini iso akamade ito Ikọ Abasi eke odudu spirit.

Nte Abasi Esede Idiọkido

Bible anam an̄wan̄a nte Abasi esede mme akama-mfụhọ idaha oro ẹdude ke eyo nnyịn.  Okposụkedi enye ekebemde iso ada okụt mme afanikọn̄ emi, enye imaha mmọ inyụn̄ iduakke ndiyọ mmọ ke nsinsi. Apostle John ekewet ete: “Abasi edi ima.” (1 John 4:8) Jehovah enen̄ede ekere aban̄a mme owo onyụn̄ asua kpukpru idiọkido. Nte enende, nnyịn imekeme ndiwọn̄ọde mbịne Abasi man ibọ ndọn̄esịt, sia enye ọfọnde onyụn̄ enyenede esịtmbọm ndien enye enyene ukeme onyụn̄ aduak ndisio idiọkido mfep ke isọn̄. Andiwet psalm ekewet ete: “[Edidem eke heaven oro Abasi emekde] ayanyan̄a ubuene ke ini enye esemede; ye owo ukụt, ye owo eke mînyeneke andinyan̄a. Enye ayatua eyen unana ye ubuene mbọm, onyụn̄ anyan̄a ukpọn̄ mme ubuene. Enye ayafak ukpọn̄ mi osio ke ukụt ye nnama: onyụn̄ ese iyịp mmọ ke n̄kpọ-uto.”—Psalm 72:12-14.

Nte afo emesitua mbon oro ẹkụtde ndutụhọ mbọm? Eyedi emesitua. Mbọm edi edu oro Jehovah esịnde nnyịn ke esịt, sia ẹkebotde nnyịn ke mbiet esie. (Genesis 1:26, 27) Ke ntre, nnyịn imekeme ndidori enyịn nte ke Jehovah ekere aban̄a ndutụhọ oro esịmde owo. Jesus, oro eketịmde ọdiọn̄ọ Jehovah akan owo efen ekededi, ekekpep ete ke Jehovah enen̄ede enyene udọn̄ ke idem nnyịn onyụn̄ ọyọhọ ye ntotụn̄ọ esịtmbọm.—Matthew 10:29, 31.

Mme edibotn̄kpọ ẹwụt ẹte ke Abasi ekere aban̄a ubonowo. Jesus ọkọdọhọ ke Abasi ‘anam utịn Esie asiaha ọnọ mme idiọk owo ye nti owo, onyụn̄ anam edịm edep ọnọ ndinen owo ye mme anam ukwan̄ido.’ (Matthew 5:45) Paul ọkọdọhọ mbon oro ẹkedude ke obio Lystra ete: “[Abasi] iyakke n̄kpọ-ntiense anana ọnọ Enye, ke emi Enye ọfọnde ido, onyụn̄ ọnọde mbufo edịm heaven ye ini eduek, onyụn̄ ọnọde mbufo udia, anam esịt mbufo ọyọhọ ye idatesịt.”—Utom 14:17.

Anie Enyene Nduduọhọ?

Odot ẹtịm ẹfiọk ke Paul ama ọdọhọ mbon obio Lystra n̄ko ete: “Ke mme eyo eke ẹbede [Abasi] akayak kpukpru mme idụt ẹsan̄a ke mme usụn̄ idem mmọ.” Ntem, mme idụt—m̀mê mme owo ke idemmọ—ẹnen̄ede ẹnyene nduduọhọ ke ata ediwak afanikọn̄ oro mmọ ẹsobode. Owo ikpenyeneke ndiduọhọ Abasi.—Utom 14:16.

Ntak emi Jehovah ayakde ndiọi n̄kpọ ẹtịbe? Nte enye ayanam n̄kpọ aban̄a oro tutu amama? Ẹkeme ndikụt ibọrọ mme mbụme emi ke Ikọ Abasi kpọt. Oro edi koro ibọrọ oro etịm enyene n̄kpọ ndinam ye owo eke spirit efen ye eneni oro enye ekedemerede ke obio mme spirit oro enyịn mîkwe.

[Mme ndise ke page 4]

Mme owo ẹsitua mbon efen mbọm. Nte ndutụhọ owo inamke Abasi mbọm?

 [Ebiet Ẹdade Ndise Ẹto ke page 2]

IKPAEDEM: Ubomisọn̄ ekọn̄: UN PHOTO 158181/J. Isaac; unyekisọn̄: San Hong R-C Picture Company

[Ebiet Ẹdade Ndise Ẹto ke page 3]

Ke enyọn̄ enyọn̄ ubọk ufien, Croatia: UN PHOTO 159208/S. Whitehouse; eyenọwọn̄ oro etiede biọn̄: UN PHOTO 146150 BY O. MONSEN