Nte Afo Okpodu Uwem Mfre-Idem?

EDIWAK owo ẹkeme ndikere ke edi ikọ itoro ndidọhọ ke owo etie ifụre ifụre, sụn̄sụn̄, onyụn̄ enyene edu ediyọ se itịbede. Nte ededi, utọ edu oro ekeme ndida nsịm edu mfre-idem. Bible ọdọhọ ete: “Mfre-idem ndisịme owo oyonyụn̄ osobo mmọ.” (Mme N̄ke 1:32) Nso ke oro ọwọrọ?

Mme edikabade Bible efen ẹkabade akpasarade ikọ Hebrew oro nte “unana ntịn̄enyịn” (American Standard Version), “ndikop uyụhọ” (The New American Bible), ye “ndinam efen.” (The New English Bible) Ke usụn̄ifiọk emi, ẹbuan mfre-idem ye ifu ye unana ntịn̄enyịn ye ndisịme.

Ke akpa isua ikie, mme Christian ke esop Laodicea ikekereke ke imanana n̄kpọ ke n̄kan̄ eke spirit. Mmọ ẹma ẹtan̄ ase ẹte ke mimmọ ‘inanake n̄kpọ ndomokiet.’ Jesus Christ ama enen̄ede mmọ, ọdọhọde mmọ ẹfiak ẹdemede ifịk Christian mmọ.—Ediyarade 3:14-19.

Mbon eyo Noah n̄ko ẹma ẹnyene edu mfre-idem. Mmọ ẹma ẹnen̄ede ẹsịn idem ke mme n̄kpọ uwem ererimbot, “ẹdiade ẹnyụn̄ ẹn̄wọn̄de n̄kpọ, ẹdọde ndọ ẹnyụn̄ ẹdade owo ẹnọ ke ndọ . . . , mînyụn̄ ifiọkke tutu ukwọ edi edimen mmọ kpukpru efep.” Jesus ama adian do ete: “Kpasụk ntre ke [edidu, NW] Eyen Owo eyedi.”—Matthew 24:37-39.

Mme ntịn̄nnịm ikọ Bible oro ẹsude ẹwụt ke nnyịn idu uwem ke ini “[edidu, NW] Eyen owo,” kpa Jesus Christ. Akpakam nnyịn idehede idu efen efen uwem, uwem unana ntịn̄enyịn, ye ediyụhọ udọn̄ idemowo—kpa uwem mfre-idem.—Luke 21:29-36.