Jehovah Ekere Aban̄a Mbufo
Jehovah Ekere Aban̄a Mbufo
“Ẹtop kpukpru ọkpọsọn̄ ekikere eke ẹtịmerede mbufo esịt ẹduọk ẹdori [Abasi], koro Enye ke ekere mbufo.”—1 PETER 5:7.
1. Akpan usụn̄ ewe ke Jehovah ye Satan ẹnen̄ede ẹnyene ukpụhọde?
JEHOVAH ye Satan ẹnen̄ede ẹnyene ukpụhọde. Devil n̄kukụre oyom ndin̄wana ye owo ekededi emi esịkde ekpere Jehovah. Ẹwụt ukpụhọde emi ke ọwọrọetop n̄wed ndụn̄ọde kiet. Kaban̄a mme utom Satan nte ẹwụtde ke n̄wed Job eke Bible, Encyclopædia Britannica (1970) ọdọhọ ete: ‘Utom Satan edi ndiyọrọ ke ererimbot nyom mme edinam ye mme owo ndidori ikọ; ke ntem utom esie edi ata isio ye eke “enyịn Ọbọn̄,” emi ẹsan̄ade ke ofụri ererimbot ndisọn̄ọ mmụm kpukpru nti owo n̄kama (II Chron. xvi, 9). Satan ọdọhọ ke mme owo ẹwụt eti ido mmọ ke ibụk ibụk usụn̄ ndien Abasi enyịme enye esịn eti ido mme owo ke udomo esịm adan̄a oro Abasi enịmde.’ Ke akpanikọ, nso ukpụhọde ke emi edi ntem!—Job 1:6-12; 2:1-7.
2, 3. (a) Didie ke se ikọ oro “Devil” ọwọrọde etịm anam se iketịbede inọ Job an̄wan̄a? (b) Didie ke Bible owụt ke Satan ke aka iso ndidori mme asan̄autom Jehovah ke isọn̄ ikọ?
2 Ikọ oro “Devil” oto ikọ Greek oro ọwọrọde “andidori owo ikọ,” “ọdọk-edidọk.” N̄wed Job owụt nte ke Satan ama odori Job, anam-akpanikọ asan̄autom Jehovah, ikọ ete ke enye akanam n̄kpọ Abasi ke ntak ibụk, ọdọhọde ete: “Nte Job abak Abasi ke ikpîkpu?” (Job 1:9) Mbụk oro ke n̄wed Job owụt ke kpa ye mme idomo esie, Job ama etetịm asan̄a ekpere Jehovah. (Job 10:9, 12; 12:9, 10; 19:25; 27:5; 28:28) Ke n̄kpọsọn̄ idomo esie ẹma ẹkebe, enye ama ọdọhọ Abasi ete: “N̄kokop mban̄a fi nte utọn̄ okopde: edi ke emi enyịn mi okụt fi.”—Job 42:5.
3 Ndi Satan etre ndidori mme anam-akpanikọ asan̄autom Abasi ikọ toto ke ini Job? Baba-o. N̄wed Ediyarade owụt ete ke utịt ini emi, Satan ke aka iso ndidori nditọete Christ oro ẹyetde aran ye mme anam-akpanikọ nsan̄a mmọ n̄ko ikọ. (2 Timothy 3:12; Ediyarade 12:10, 17) Ntem, enen̄ede oyom kpukpru nnyịn mme Christian akpanikọ isụk idem inọ Jehovah Abasi nnyịn emi ekerede aban̄a, inamde n̄kpọ esie ke ntak ntotụn̄ọ ima ndien ke ntem iwụtde ke edori ikọ Satan edi nsu. Ke inamde emi, nnyịn iyadat Jehovah esịt.—Mme N̄ke 27:11.
Jehovah Oyom Ndin̄wam Nnyịn
4, 5. (a) Ke okpụhọrede ye Satan, nso ke Jehovah esise ke isọn̄? (b) Nso ke ẹyom ẹto nnyịn edieke anade inyene mfọn Jehovah?
4 Devil ke oyo ke ererimbot, oyom owo eke enye editade edinyụn̄ odoride ikọ. (Job 1:7, 9; 1 Peter 5:8) Ke edide isio, Jehovah oyom ndin̄wam mbon oro ẹyomde enye ọsọn̄ọ omụm mmimọ akama. Prọfet Hanani ama asian Edidem Asa ete: “Koro enyịn Jehovah ẹsan̄ade ke ofụri ererimbot, ẹte isọn̄ọ imụm mmọ eke ofụri esịt mmọ odude ke enye ikama.” (2 Chronicles 16:9) Nso ukpụhọde idu ntem ke ufọt asua oro Satan emi oyode oyom se editade ye Jehovah oro ọnọde ima ima ukpeme!
5 Jehovah isehe nnyịn man omụm kpukpru ndudue nnyịn. Andiwet psalm ekewet ete: “O Jehovah, afo ekpese mme idiọk ido, O Ọbọn̄, anie ekpekeme ndida?” (Psalm 130:3) Ibọrọ edi: idụhe owo. (Ecclesiastes 7:20) Edieke isan̄ade ikpere Jehovah ke ofụri esịt, enye eyese nnyịn, idịghe man obiom nnyịn ikpe, edi man ese ukeme nnyịn onyụn̄ ọbọrọ akam oro ibọn̄de iben̄e un̄wam ye edifen nnọ. Apostle Peter ekewet ete: “Enyịn Jehovah ke esese ndinen owo, utọn̄ Esie onyụn̄ ọbiọn̄ọ eseme mmọ; Edi Jehovah asasak iso ese mmọ emi ẹnamde idiọk.”—1 Peter 3:12.
6. Didie ke se iketịbede inọ David edi n̄kpọ ndọn̄esịt ye ntọt ọnọ nnyịn?
6 David ekedi anana-mfọnmma owo, ama onyụn̄ anam akwa idiọkn̄kpọ. (2 Samuel 12:7-9) Edi enye ama an̄wan̄a esịt esie ọnọ Jehovah onyụn̄ asan̄a ekpere enye ke akam ofụri esịt. (Psalm 51:1-12, ikọ enyọn̄ ibuotn̄wed) Jehovah ama okop akam David onyụn̄ efen ọnọ enye, okposụkedi enye ọkọyọde ndiọi utịp oro idiọkn̄kpọ esie akadade edi. (2 Samuel 12:10-14) Emi ekpenyene ndidi n̄kpọ ndọn̄esịt ye ntọt nnọ nnyịn. Edi n̄kpọ ndọn̄esịt ndifiọk nte ke Jehovah enyịme ndifen mme idiọkn̄kpọ nnyịn edieke nnyịn inen̄erede itua n̄kpọfiọk, edi edi akpan n̄kpọ ndifiọk nte ke idiọkn̄kpọ esiwak ndida ndiọi utịp ndi. (Galatia 6:7-9) Edieke iyomde ndisan̄a n̄kpere Jehovah, nnyịn ikpenyene ndinen̄ede mfep n̄kpọ ekededi oro ekemede ndiyat enye esịt.—Psalm 97:10.
Jehovah Odụri Ikọt Esie Ada
7. Nso orụk mme owo ke Jehovah esise, ndien didie ke enye esidụri mmọ ada?
7 David ama ewet ke kiet ke otu psalm esie ete: “Koro Jehovah okon̄de, ndien enye ese mbon nsụkidem; edi etie nsan-nsan ọdiọn̄ọ mbon iseri.” (Psalm 138:6) Ukem ntre, psalm efen ọdọhọ ete: “Anie ebiet Jehovah Abasi nnyịn, emi odụn̄de ke enyọn̄, emi onyụn̄ osụhọrede ese n̄kpọ ke enyọn̄ ye ke isọn̄? Enye osio mme ubuene ke ntan emen.” (Psalm 113:5-7) Ih, akwa Andibot ekondo osụhọde ese isọn̄, ndien enyịn esie okụt “mbon nsụkidem,” ye “mme ubuene,” emi ‘ẹsemede ẹnyụn̄ ẹtuade ẹban̄a kpukpru mbubiam ido emi ẹnamde.’ (Ezekiel 9:4) Enye ada Eyen esie ndidụri mme utọ owo emi nda. Ke adan̄aemi okodude ke isọn̄, Jesus ama ọdọhọ ete: “Baba owo kiet ikemeke nditiene Mi, ibọhọke Ete emi ọkọdọn̄de Mi odụri enye edi . . . Baba owo kiet ikemeke nditiene Mi, ibọhọke Ete ọnọ enye ukeme.”—John 6:44, 65.
8, 9. (a) Ntak oyomde kpukpru nnyịn itiene Jesus? (b) Nso inen̄ede idi n̄wọrọnda iban̄a ndutịm ufak?
8 Kpukpru owo ẹkpenyene nditiene Jesus nnyụn̄ mbuọt idem ke uwa ufak esie koro mmọ ẹkemanade nte mme anamidiọk oro ẹdianarede ẹkpọn̄ Abasi. (John 3:36) Oyom mmọ ẹfiak ẹditie ke emem ye Abasi. (2 Corinth 5:20) Abasi ikebetke mme idiọkowo ẹdi ẹdikpe enye ubọk mbemiso enye anamde ndutịm man mmọ ẹkeme nditie ke emem ye enye. Apostle Paul ekewet ete: “Abasi etịm ayarade ima eke amade nnyịn, ke emi Christ akpade ke ibuot nnyịn ke adan̄aemi nnyịn isụk idide mme idiọk owo kan̄a. Koro edieke Abasi akadade n̄kpa Eyen Esie esịn emem ke ufọt nnyịn ye Idem Esie ke adan̄aemi nnyịn ikedide mme asua, n̄wan̄wadiso, sia ima ikabade itie ke emem ye Enye, ke Abasi ayada uwem Eyen Esie anyan̄a nnyịn.”—Rome 5:8, 10.
9 Apostle John ama ọsọn̄ọ n̄wọrọnda akpanikọ emi nte ke Abasi ke anam mme owo ẹkabade ẹtie ke emem ye Enye, ewetde ete: “Abasi akada emi ayarade ima emi Enye amade nnyịn, ke emi Enye okosiode edibon Eyen Esie kierakiet ọdọn̄ ke ererimbot, kpan̄ nnyịn ikpodu uwem oto ke Enye. Ima odu ke orụk usụn̄ emi, itoho ke emi nnyịn ikamade Abasi, edi oto ke emi Abasi akamade nnyịn, onyụn̄ osiode Eyen Esie ọdọn̄, ete, edidi usio-isop mme idiọk-n̄kpọ nnyịn.” (1 John 4:9, 10) Abasi ekebem iso anam usio-ukot, idịghe owo. Nte inụkke fi ndisan̄a n̄kpere Abasi emi okowụtde utọ akwa ima oro ọnọ mme owo oro ẹdide “mme idiọk owo” ẹnyụn̄ ẹdide “mme asua”?—John 3:16.
Ntak Anade Iyom Jehovah
10, 11. (a) Man iyom Jehovah, nso ke ana nnyịn inam? (b) Didie ke nnyịn ikpese editịm n̄kpọ Satan?
10 Nte ededi, Jehovah inyịkke-nyịk nnyịn nditiene enye. Ana nnyịn iyom enye, ‘ifiọn̄ọ ubọk in̄wana ndisịm Enye, inyụn̄ ikụt Enye; okposụkedi nte Enye mîyomke usụn̄ ye baba nnyịn owo kiet.’ (Utom 17:27) Ana nnyịn ifiọk ke Jehovah enyene unen ndiyom nsụkibuot nnyịn. Mbet oro James ekewet ete: “Ẹsụk idem ndien ẹnọ Abasi; ẹn̄wana ye Satan, ndien enye eyefehe ọkpọn̄ mbufo; ẹsan̄a ẹkpere Abasi, ndien Enye ayasan̄a ekpere mbufo. Ẹyet ubọk mbufo ẹsana, mbufo mme anam-idiọk: ẹnyụn̄ ẹnam esịt mbufo ẹsana, mbon esịt iba.” (James 4:7, 8) Nnyịn ikpemen̄eke ndisọn̄ọ nda n̄n̄wana ye Devil nnyụn̄ nda ke n̄kan̄ Jehovah.
11 Emi ọwọrọ ndidianade idem n̄kpọn̄ idiọk editịm n̄kpọ Satan. James ama ewet n̄ko ete: “Nte mbufo ifiọkke ite, edidi ufan ye ererimbot edi edidi usua ye Abasi? mmọdo owo ekededi eke oyomde ndidi ufan ye ererimbot anam idem usua ye Abasi.” (James 4:4) Ke n̄kan̄ eken, edieke nnyịn iyomde ndidi mme ufan Jehovah, ana idori enyịn ererimbot Satan ndisua nnyịn.—John 15:19; 1 John 3:13.
12. (a) Nso ikọ ndọn̄esịt ke David ekewet? (b) Nso ntọt ke Jehovah akada prọfet Azariah ọnọ?
12 Ke ini ererimbot Satan ọbiọn̄ọde nnyịn ke ndusụk akpan usụn̄, oyom nnyịn inen̄ede ika ibịne Jehovah ke akam, iben̄ede enye un̄wam. David, oro okokụtde edinyan̄a Jehovah ediwak ini, ama ewet ikọ ndọn̄esịt emi ọnọ nnyịn ete: “Jehovah emekpere kpukpru mmọ eke ẹsemede ẹnọ enye, kpukpru mmọ eke ẹsemede ẹnọ enye ke akpanikọ. Enye ayanam se mme andibak enye ẹmade: onyụn̄ okop eseme mmọ, onyụn̄ anyan̄a mmọ. Jehovah ekpeme kpukpru mmọ eke ẹmade enye: onyụn̄ osobo kpukpru mme idiọk owo.” (Psalm 145:18-20) Psalm emi owụt ke Jehovah ekeme ndinyan̄a nnyịn ke ini nnyịn owo kiet kiet isobode idomo ye nte ke enye ayanyan̄a ikọt esie nte otu ke ini “akwa ukụt.” (Ediyarade 7:14) Jehovah ayasan̄a ekpere nnyịn edieke nnyịn isan̄ade ikpere enye. Ke “spirit Abasi” adade enye usụn̄, prọfet Azariah ama etịn̄ se nnyịn ikpadade nte akpanikọ ke ofụri ofụri ete: “Jehovah ada ye mbufo ke ini mbufo ẹdade ye enye; ndien edieke mbufo ẹdiyomde enye, mbufo ẹyekụt enye; edi edieke mbufo ẹdikpọn̄de enye, enye ọyọkpọn̄ mbufo.”—2 Chronicles 15:1, 2.
Ana Jehovah Edi Ata Owo ọnọ Nnyịn
13. Didie ke nnyịn ikeme ndiwụt ke Jehovah edi ata owo ọnọ nnyịn?
13 Apostle Paul ama ewet aban̄a Moses ete ke ‘enye ama ọsọn̄ọ ada nte n̄kpọ eke okụtde Enye emi enyịn owo mîkwe.’ (Mme Hebrew 11:27) Edi akpanikọ, akanam Moses ikekwe Jehovah. (Exodus 33:20) Edi Jehovah ekenen̄ede edi ata owo ọnọ enye tutu etie nte n̄kpọ eke enye okokụtde Enye. Ukem ntre, ke ẹma ẹkedomo enye ẹkụre, Job ama ekeme ndinen̄ede n̄kụt Jehovah ke enyịn ikike, nte Abasi oro ayakde mme anam-akpanikọ asan̄autom esie ẹsobo mme idomo edi oro akanam mîkpọn̄ke mmọ. (Job 42:5) Ẹma ẹtịn̄ ẹban̄a Enoch ye Noah ẹte ke mmọ ẹma ‘ẹsan̄a ye Abasi.’ Mmọ ẹkenam emi ebe ke ndiyom ndinem Abasi esịt nnyụn̄ nsụk ibuot nnọ enye. (Genesis 5:22-24; 6:9, 22; Mme Hebrew 11:5, 7) Edieke Jehovah edide ata owo ọnọ nnyịn nte enye ekedide ọnọ Enoch, Noah, Job, ye Moses, nnyịn ‘iyọdiọn̄ọ enye’ ke kpukpru usụn̄ nnyịn, ndien enye “eyenen̄ede usụn̄ [nnyịn] enịm.”—Mme N̄ke 3:5, 6.
14. Nso ke ‘ndiyịre’ ye Jehovah ọwọrọ?
14 Ata esisịt ini mbemiso nditọ Israel ẹkebede ẹdụk Isọn̄ Un̄wọn̄ọ, Moses ama ọnọ mmọ item ete: “Mbufo ẹtiene Jehovah Abasi mbufo, ẹnyụn̄ ẹbak enye, ẹnyụn̄ ẹnịm mbet esie, ẹnyụn̄ ẹkop uyo esie, ẹnyụn̄ ẹnam n̄kpọ esie, ẹnyụn̄ ẹyịre ye enye.” (Deuteronomy 13:4) Mmọ ẹkenyene nditiene Jehovah, mbak enye, n̄kop uyo esie, nnyụn̄ nyịre ye enye. Ke ebuana ye ikọ oro ẹkabarede mi nte “ẹyịre,” eyen ukpepn̄kpọ Bible kiet ọdọhọ ke “ikọ oro ẹdade mi owụt ata n̄kpet n̄kpet ye ntotụn̄ọ itie ebuana.” Andiwet psalm ọkọdọhọ ete: “Jehovah etie ufan ye mmọ eke ẹbakde enye.” (Psalm 25:14) Nnyịn iyenyene ọsọn̄urua n̄kpet n̄kpet itie ebuana ye Jehovah edieke enye edide ata owo ọnọ nnyịn edieke nnyịn inyụn̄ imade enye tutu ifehe ndiyat enye esịt ke usụn̄ ekededi.—Psalm 19:9-14.
Ndi Ọmọfiọk nte Jehovah Ekpemede Fi?
15, 16. (a) Didie ke Psalm 34 owụt ke Jehovah ekere aban̄a nnyịn? (b) Nso ke nnyịn ikpanam edieke ọsọn̄de nnyịn nditi mme edinam mfọnido oro Jehovah owụtde nnyịn?
15 Kiet ke otu n̄kari n̄kari edinam Satan edi ndidomo ndinam nnyịn ifre ke Jehovah Abasi nnyịn esikpeme mme anam-akpanikọ asan̄autom esie kpukpru ini. Edidem David eke Israel ama etịm ọfiọk nte Jehovah esinọde ukpeme, idem ke ini enye okodude ke ata enyene-ndịk idaha. Ke ini okonụkde enye ndinam nte idi idat ke iso Edidem Achish eke Gath, enye ama etịm ikwọ, ata edinem psalm, emi ekesịnede mme ikọ mbuọtidem emi: “Mbufo ẹtiene mi ẹkpono Jehovah, ẹyak nnyịn inyụn̄ itoro enyịn̄ esie ọtọ kiet. N̄koyom Jehovah, ndien enye eyere mi, onyụn̄ osio mi ke kpukpru se ndịghede. Angel Jehovah ana akan mmọ eke ẹbakde enye okụk, onyụn̄ anyan̄a mmọ. O mbufo ẹtabi, ẹnyụn̄ ẹse nte Jehovah ọfọnde: ọfọfọn ọnọ owo eke eberede idem ye enye. Jehovah emekpere mmọ eke esịt obụn̄ọde mmọ; onyụn̄ anyan̄a mmọ eke esịt ọduọde. Ediwak ukụt ẹsịm eti owo; edi Jehovah osio enye ke mmọ kpukpru.”—Psalm 34:3, 4, 7, 8, 18, 19; 1 Samuel 21:10-15.
16 Ndi afo emenịm ke akpanikọ ke Jehovah enyene odudu ndinyan̄a? Ndi ọmọfiọk ke enye esida mme angel esie ọnọ ukpeme? Ndi afo amatabi ese nte Jehovah ọfọnde? Ini ewe edi akpatre ini emi afo ekenen̄erede okụt ke Jehovah ọfọn ye afo? Domo nditi. Ndi ekedi ke akpatre ufọk oro afo akawahade ke an̄wautom, kpa ke ini eketiede fi ke idem nte ke udukemeke ndikwọrọ ikọ aba? Ekem, eyedi afo ama enyene inem inem nneme ye enyeneufọk. Ndi ama eti ndikọm Jehovah ke enye ndikọnọ fi ukeme efen efen oro okoyomde ye ke enye ndikọnọ fi utịp? (2 Corinth 4:7) Ke n̄kan̄ eken, ekeme ndisọn̄ fi nditi ndusụk akpan edinam mfọnido oro Jehovah okowụtde fi. Ekeme ndidi oyoyom afo ekere afiak edem aka urua kiet oro ekebede, ọfiọn̄ kiet, isua kiet, m̀mê awakde akan oro. Edieke emi edide ntre, ntak mûsịnke ọkpọsọn̄ ukeme ndinen̄ede nsan̄a n̄kpere Jehovah nnyụn̄ ndomo ndikụt nte enye ekpemede onyụn̄ adade fi usụn̄? Apostle Peter ama ọnọ mme Christian item ete: “Ẹsụhọde idem . . . ke idak ọkpọsọn̄ ubọk Abasi . . . Ẹtop kpukpru ọkpọsọn̄ ekikere eke ẹtịmerede mbufo esịt ẹduọk ẹdori Enye, koro Enye ke ekere mbufo.” (1 Peter 5:6, 7) Ke akpanikọ, idem ayakpa fi ndikụt adan̄a nte Jehovah ekerede aban̄a fi!—Psalm 73:28.
Ẹka Iso Ẹyom Jehovah
17. Nso ke oyom edieke anade nnyịn ika iso iyom Jehovah?
17 Ndimụm itie ebuana nnyịn ye Jehovah n̄kama ekpenyene ndidi edinam oro akade-ka iso. Jesus ọkọdọhọ ke akam oro enye ọkọbọn̄de ọnọ Ete esie ete: “Ndien nsinsi uwem oro edi ndifiọk Fi, ata Abasi kierakiet, ye Enye emi afo ọkọdọn̄de, kpa Jesus Christ.” (John 17:3) Oyom n̄kaiso ukeme man nnyịn ifiọk Jehovah ye Eyen esie. Nnyịn imoyom un̄wam akam ye edisana spirit man “nditụn̄ọ n̄kpọ Abasi” ẹn̄wan̄a nnyịn. (1 Corinth 2:10; Luke 11:13) Nnyịn imoyom n̄ko ndausụn̄ “asan̄autom emi anamde akpanikọ, onyụn̄ enyenede ọniọn̄” man ida udia eke spirit oro ẹnọde ke “edikem ini” ibọk ekikere nnyịn. (Matthew 24:45) Ke usụn̄ emi, Jehovah eteme nnyịn ndikot Ikọ esie ke usen ke usen, ndidụk mme mbono esop Christian kpukpru ini, ndinyụn̄ nnyene ọyọhọ ebuana ke utom edikwọrọ “gospel Ubọn̄ Abasi.” (Matthew 24:14) Ke ndinam ntre, nnyịn iyaka iso ndiyom Jehovah Abasi nnyịn emi ekerede aban̄a.
18, 19. (a) Nso ke nnyịn ikpebiere ndinam? (b) Didie ke ẹdidiọn̄ nnyịn edieke isọn̄ọde ida in̄wana ye Devil inyụn̄ ikade iso ndiyom Jehovah?
18 Satan ke esịn ofụri ukeme esie ndida ukọbọ, ubiọn̄ọ, ye mfịghe ẹtode kpukpru ebiet ntiene ikọt Jehovah. Enye esidomo ndibiat emem ye eti idaha oro nnyịn inyenede ye Abasi nnyịn. Enye iyomke nnyịn ika iso ke utom ediyom mbon oro ẹnyenede esịt akpanikọ inyụn̄ in̄wam mmọ ẹdi ẹdida ke n̄kan̄ Jehovah ke eneni oro aban̄ade itie edikara ofụri ekondo. Edi ana nnyịn ibiere ndika iso nnam akpanikọ nnọ Jehovah, ibuọtde idem ke enye ndinyan̄a nnyịn nsio ke ubọk andidiọk. Ebede ke ndiyak Ikọ Abasi ada nnyịn usụn̄ ye ke ndika iso mbuana ifịk ifịk ye esop esie oro ẹkụtde ke enyịn, nnyịn imekeme nditịm nnịm ke akpanikọ nte ke enye kpukpru ini ayan̄wam nnyịn.—Isaiah 41:8-13.
19 Ke ntre, kpukpru nnyịn ikpakam isọn̄ọ ida in̄wana ye Devil ye mme n̄kari n̄kari edinam esie, nte ikade iso iyom edima Abasi nnyịn, Jehovah, emi mîdikpụhu ‘ndinam nnyịn isọn̄ọ ida, inyụn̄ ikop idem.’ (1 Peter 5:8-11) Ntem nnyịn iyaka iso ‘imụm idem inịm ke ima Abasi, inyụn̄ itie ibet mbọm Ọbọn̄ nnyịn Jesus Christ emi edisụn̄ọde ke nsinsi uwem.’—Jude 21.
Didie ke Afo Ọkpọbọrọ?
• Nso ke ikọ oro “Devil” ọwọrọ, ndien didie ke Devil anam n̄kpọ ekekem ye enyịn̄ oro?
• Didie ke Jehovah okpụhọde ye Devil ke usụn̄ nte Enye esede mme andidụn̄ isọn̄?
• Ntak anade owo enyịme ufak man enye ekeme ndisan̄a n̄kpere Jehovah?
• Nso ke ‘ndiyịre’ ye Jehovah ọwọrọ, ndien didie ke nnyịn ikeme ndika iso nyom enye?
[Mme Mbụme Ukpepn̄kpọ]
[Ndise ke page 15]
Kpa ye mme idomo, Job ama edi edifiọk ke Jehovah ekere aban̄a imọ
[Mme ndise ke page 16, 17]
Edikot Bible ke usen ke usen, edidụk mme mbono esop Christian kpukpru ini, ye edibuana ifịk ifịk ke utom ukwọrọikọ ẹti nnyịn ke Jehovah ekere aban̄a nnyịn