Mme Mbụme Ẹtode Mme Andikot

Ndi ekpedi edinam mbuaha mbuọtidem ndibọ ido ukpono en̄wen ufọk ndep nda nnam Ufọkmbono Obio Ubọn̄?

Ke ofụri ofụri, Mme Ntiense Jehovah ẹfep mme utọ usụn̄ unam mbubehe oro ye mme ido ukpono eken. Kpa ye oro, utọ usụn̄ unam mbubehe oro ekeme nditre ndidi edinam mbuaha mbuọtidem. Ẹkeme ndise enye nte mbubehe oro ẹnamde ini kiet kpọt. Esop n̄kann̄kụk eke Mme Ntiense Jehovah idianake kiet ye otu ido ukpono en̄wen ndibọp itie utuakibuot oro mmọ mbiba ẹdidade ẹnam n̄kpọ.

Nso ke Jehovah ese nte edinam mbuaha mbuọtidem? Kere ban̄a item apostle Paul emi: “Ẹkûbọp idem utịn̄e-utịn̄e ye mmọ eke mînịmke ke akpanikọ. Nso udeme ke edinen ido enyene ye ukwan̄ido? Nso ebuana ke un̄wana enyene ye ekịm? Nso ndụk ke Christ odụk ye Belial? Nso udeme ke andinịm ke akpanikọ enyene ye owo eke mînịmke ke akpanikọ? Nso ediomi ke temple Abasi odiomi ye ndem? . . . Mmọdo, Jehovah ọnọ uyo ete, Ẹwọn̄ọ ke otu mmọ, ẹnyụn̄ ẹdianade ẹda. Ẹkûnyụn̄ ẹtụk n̄kpọ ndek baba kiet; ndien nyadara mbufo.” (2 Corinth 6:14-17) Nso ke mme ikọ Paul oro “ebuana” ye “udeme” ẹwọrọ?

Ebuana oro Paul etịn̄de aban̄a enen̄ede esịne edibuana utuakibuot ye mme edinam eke spirit ye mme okpono ndem ye mbon oro mînịmke ke akpanikọ. Enye ama odụri mbon Corinth utọn̄ aban̄a ‘edidia n̄kpọ ke okpokoro mme demon.’ (1 Corinth 10:20, 21) Ntem, edinam mbuaha mbuọtidem edi edibuana utuakibuot m̀mê edinyene ebuana eke spirit ye mme esop ido ukpono eken. (Exodus 20:5; 23:13; 34:12) Ke ini ẹdepde ufọk oro ido ukpono ekesidade anam n̄kpọ, ẹnam emi n̄kukụre man ẹnyene ufọk oro ẹdinamde akabade edi Ufọkmbono Obio Ubọn̄. Mbemiso ẹdade enye ẹnam n̄kpọ nte Ufọkmbono Obio Ubọn̄, ẹnyene ndinam enye asana ọbọhọ n̄kpọ ekededi oro enyenede ebuana ye nsunsu utuakibuot. Ke ẹma ẹkediọn̄ ufọk emi ẹma, ẹyeyak enye ẹnọ Jehovah kaban̄a utuakibuot esie ikpọn̄-ikpọn̄. Ebuana m̀mê udeme ndomokiet idụhe ke ufọt utuakibuot akpanikọ ye nsunsu utuakibuot.

Ke ini ẹnemede ẹban̄a nte ẹdisan̄ade ẹdep ufọk oro, ẹkpenyene ndisụhọde ebuana oro ẹnyenede ye ido ukpono oro ndien ebuana emi ekpedi n̄kukụre kaban̄a mbubehe edidep ufọk oro. Mme andibuana ke esop Christian ẹyenam ọfọn nditi item Paul oro nditre ‘ndibọp idem utịn̄e-utịn̄e ye mmọ eke mînịmke ke akpanikọ.’ Okposụkedi nnyịn mîkereke ke imọfọn ikan mbon oro ẹdọhọde nte inyenede mme edinịm ke akpanikọ efen, nnyịn imefep ndinyene ebuana ye mmọ m̀mê ndiyak mmọ ẹdụri nnyịn ẹsịn ke utuakibuot mmọ. *

Nso kaban̄a esop ndibọ ufọk oro enyenede ido ukpono ke ukpe okụk? Ndibọ ufọk ke ukpe okụk esinam ẹnyene ebuana ofụri ini, ndien ana ẹfep emi. Idem ọkpọkọm ẹyom ndibọ utọ ufọk oro nnam n̄kpọ ini kiet kpọt, otu mbiowo ẹkpenyene ndikere mban̄a se itienede emi: Ndi ndisọi n̄kpọ ye mme mbiet ido ukpono ekededi ẹdu ke esịt m̀mê an̄wa ufọk oro? Didie ke mme owo ke n̄kann̄kụk oro ẹdise nnyịn ndida ufọk oro nnam n̄kpo? Ndi nnyịn ndida ufọk oro nnam n̄kpọ ayanam owo ekededi ke esop atuak ukot ọduọ? (Matthew 18:6; 1 Corinth 8:7-13) Ana mbiowo ẹdụn̄ọde mme n̄kpọ emi ndien ekem ẹnam ubiere oro ekemde. Mbiowo ẹnyene n̄ko ndikere mban̄a ubieresịt mmọ ye eke ofụri esop ke ini mmọ ẹbierede m̀mê akpana ẹdep ẹnyụn̄ ẹnam utọ ufọk oro akabade edi Ufọkmbono Obio Ubọn̄.

[Ikọ idakisọn̄]

[Ndise ke page 27]

Ẹma ẹdep ufọk emi, ekedide synagogue mi, ẹnyụn̄ ẹnam enye akabade edi Ufọkmbono Obio Ubọn̄