‘Nyene Ibuot ke Ini Iso Fo’

“Ata akamba ibat ubonowo ẹda mme akpa isua uwem mmọ ẹnam n̄kpọ nditahade ukperedem isua uwem mmọ.” Ntre ke Jean de La Bruyère, ewetn̄wed owo France eke ọyọhọ isua ikie 17 ọkọdọhọ. Ke akpanikọ, akparawa owo oro ananade iwụk ekeme ndimen̄e ndida ifet oro ebererede ọnọ enye nnam n̄kpọ nte ọfọnde, ekem okop iyatesịt onyụn̄ atua n̄kpọfiọk ke akpatre. Ke n̄kan̄ eken, uyen oro edide itụn ekeme ndika iso ke usụn̄ uwem oro mîwụtke eti ibuot, anamde enye okûnyene idatesịt ke ukperedem isua uwem esie. Ke usụn̄ ekededi, n̄koinnam idiọkn̄kpọ m̀mê editre ndinam se akpanade ẹnam ekeme ndisụn̄ọ ke ekese unana inemesịt.

Didie ke ẹkeme ndifep utọ idaha oro nditịbe? Ke odụride owo utọn̄ aban̄a edu unana iwụk oro mme uyen ẹnyenede, Ikọ Abasi ọnọ n̄kparawa owo item ete: “Nyụn̄ ti Andibot fi ke ini afo edide akparawa, ke ini ukụt mîka-idịghe kan̄a, ke mme isua eke afo edidọhọde ete, ‘N̄kwe inem ke esịt,’ mîka-isịmke (fi).” (Ecclesiastes 12:1) Edieke afo edide uyen, nam mme usio-ukot oro ẹnyenede iwụk man ekpep aban̄a “Andibot fi” ke adan̄aemi afo edide akparawa.

Didie, ndien, ke Bible an̄wam n̄kparawa owo ndifep ndisịme ido ini uyen? Enye ọdọhọ ete: “Kop item, nyụn̄ bọ ntụnọ, man enyene ibuot ke ini iso fo.” (Mme N̄ke 19:20) Bible n̄ko owụt in̄wan̄-in̄wan̄ ete ke ndisịn eti ibuot otode Abasi ke ntak unana ntịn̄enyịn m̀mê nsọn̄ibuot ini uyen, m̀mê ke isua emana ekededi, esikama ndotndot utịp. (Mme N̄ke 13:18) Ke n̄kan̄ eken, ndinam item Abasi esisụn̄ọ ke “anyan usen, ye isua uwem, ye ifụre,” kpa uwem oro ọnọde uyụhọ onyụn̄ enyenede se ọwọrọde.—Mme N̄ke 3:2.