“Ẹkama Idem nte Odotde ke Iso Mme Gentile”
“Ẹkama Idem nte Odotde ke Iso Mme Gentile”
“Ẹkpono kpukpru owo. Ẹma [“ofụri otu,” NW] nditọ-ete.”—1 Peter 2:17.
1, 2. (a) Nso ke ọkọmbụk kiet nnọ n̄wedmbụk n̄kpọntịbe ekewet aban̄a Mme Ntiense Jehovah? (b) Ntak emi Mme Ntiense Jehovah ẹsidomode ndinyene n̄kokon̄ idaha edu uwem?
KE EDIWAK isua emi ẹkebede, ọkọmbụk kiet nnọ n̄wedmbụk n̄kpọntịbe ke Amarillo, Texas, U.S.A., ama aka nsio nsio ufọkabasi ke n̄kann̄kụk oro onyụn̄ ewet n̄kpọ aban̄a se enye okokụtde. Ke ekikere esie, otu kiet ekedi n̄wọrọnda. Enye ọkọdọhọ ete: “Ke isua ita, mma ndụk ikpọ mbono Mme Ntiense Jehovah eke isua ke isua ke Efe Obio Amarillo. Nte n̄kabuanade ye mmọ, n̄kekwe owo mmọ ndomokiet ọn̄wọn̄de sika, beer, m̀mê osion̄ode idiọk inua ikọ. Mmọ ẹkedi otu mme owo oro ẹsanade idem ẹkan, ẹnyenede eti edu uwem, ẹsịnede n̄kpọ nte odotde, ẹnyụn̄ ẹtiede ufan ufan oro akanam nsobode.” Ẹsiwak ndiwet ediwak ikọ ntre mban̄a Mme Ntiense Jehovah. Ntak emi mme owo oro mîbuanake se Mme Ntiense ẹnịmde ke akpanikọ ẹsiwakde nditịn̄ mme ikọ itoro mban̄a mmọ?
2 Nte ido edide, ẹsitoro ikọt Abasi ke ntak nti edu uwem mmọ. Okposụkedi mme ido uwem ke ofụri ofụri ẹbiarade, Mme Ntiense Jehovah ẹse n̄kokon̄ idaha ido uwem nte se anade ẹnyene, nte ubak utuakibuot mmọ. Mmọ ẹdiọn̄ọ ẹte ke mme edinam mmimọ ẹkeme ndinam mme owo ẹtịn̄ eti m̀mê idiọk ẹban̄a Jehovah ye nditọete Christian mmimọ ye nte ke nti edu uwem mmimọ ẹnam mme owo ẹkpan̄ utọn̄ ke akpanikọ emi mmimọ ikwọrọde. (John 15:8; Titus 2:7, 8) Do, ẹyak ise nte ikpakamade idem nnyịn nte odotde ndien ke ntre ikade iso ndimụm eti enyịn̄ Jehovah ye eke Mme Ntiense esie n̄kama ye nte nnyịn idibọde ufọn ke ndinam ntre.
Ubon Christian
3. Oyom ẹkpeme mme ubon Christian ẹbiọn̄ọ nso?
3 Kere ban̄a edu uwem nnyịn ke esịt ubon. N̄wed oro Die Neuen Inquisitoren: Religionsfreiheit und Glaubensneid (Mbufa Mbon Ukara Ufịk Ido Ukpono: Ifụre ye Isịnenyịn Ido Ukpono), eke Gerhard Besier ye Erwin K. Scheuch, ọdọhọ ete: “Ye [Mme Ntiense Jehovah], ubon edi n̄kpọ emi anade ẹnen̄ede ẹkpeme.” Ikọ oro edi akpanikọ, ndien mfịn ekese n̄kpọndịk ẹdu emi oyomde ẹkpeme ubon ẹbiọn̄ọ. Odu nditọ oro ‘ẹsọn̄de ibuot ye ete ye eka,’ onyụn̄ odu ikpọ owo emi ‘ẹnanade ima uduot owo,’ m̀mê ‘ẹyakde idiọk itọn̄ akan mmọ ubọk.’ (2 Timothy 3:2, 3) Ubon ẹdi ebiet emi afai ẹsidude ke ufọt nsan̄a ndọ, mme ete ye eka ẹkamade nditọ mmọ ke idiọk usụn̄ m̀mê ẹkpude ndise mban̄a mmọ, ndien nditọ ẹsisọn̄ ibuot, ẹsịnde idem ke uda n̄kpọsọn̄ ibọk ye oburobụt ido, m̀mê ẹfen̄ede ẹkpọn̄ ufọk. Kpukpru emi ẹdi utịp otode odudu nsobo eke ‘spirit ererimbot emi.’ (Ephesus 2:1, 2) Oyom nnyịn ikpeme ubon nnyịn ibiọn̄ọ spirit emi. Didie? Ebe ke nditiene mme item ye ndausụn̄ oro Jehovah ọnọde mbonubon.
4. Mme mbiomo ewe ke mbonubon ẹdide Christian ẹnyene ke idem kiet eken?
4 Mme Christian oro ẹdọde ndọ ẹfiọk ẹte ke mmimọ imenyene mbiomo edise mban̄a kiet eken ke n̄kan̄ eke ntụk, eke spirit, ye eke obụkidem. (1 Corinth 7:3-5; Ephesus 5:21-23; 1 Peter 3:7) Mme ete ye eka ẹdide Christian ẹnyene ndodobi mbiomo edise mban̄a nditọ mmọ. (Mme N̄ke 22:6; 2 Corinth 12:14; Ephesus 6:4) Ndien nte nditọ emi ẹdude ke mme ubon Christian ẹkọride ẹkponi, mmọ ẹsikpep nte ke mmimọ nde imenyene mbiomo. (Mme N̄ke 1:8, 9; 23:22; Ephesus 6:1; 1 Timothy 5:3, 4, 8) Ndibiom mbiomo ubon oyom ukeme, ediyak idem nnọ, edu ima ye n̄waidem. Nte ededi, adan̄a nte mbonubon ẹbiomde mbiomo oro Abasi ọnọde mmọ, ntre ke mmọ ẹdidi edidiọn̄ ẹnọ kiet eken ke ubon ye ke esop. Ke edide akpan n̄kpọ akan, mmọ ẹkpono Enye emi ọkọtọn̄ọde ubon, kpa Jehovah Abasi.—Genesis 1:27, 28; Ephesus 3:15.
Itie Nditọete Christian
5. Mme edidiọn̄ ewe ke nnyịn inyene ke ndibuana ye ekemmọ mme Christian?
5 Nte mme Christian, nnyịn n̄ko imenyene mbiomo edise mban̄a ekemmọ mme andinịm ke akpanikọ ke esop ndien, akpan akpan edise mban̄a mmọ emi ẹnamde ‘otu nditọ-ete emi ẹdude ke ererimbot.’ (1 Peter 5:9) Itie ebuana nnyịn ye esop edi akpan n̄kpọ kaban̄a nsọn̄idem eke spirit nnyịn. Ke ini nnyịn ibuanade ye ekemmọ mme Christian, nnyịn imesidara itie ebuana mmọ oro ọnọde nsịnudọn̄ ọkọrọ ye eti udia eke spirit emi otode “asan̄autom emi anamde akpanikọ, onyụn̄ enyenede ọniọn̄.” (Matthew 24:45-47) Edieke nnyịn inyenede mfịna, nnyịn imekeme ndika mbịne nditọete nnyịn n̄koyom eti item oro ọkọn̄ọde ke mme edumbet N̄wed Abasi. (Mme N̄ke 17:17; Ecclesiastes 4:9; James 5:13-18) Ke ini nnyịn idude ke unana, nditọete nnyịn isikpọn̄ke nnyịn. Nso edidiọn̄ ke edi ntem ndidi ubak esop Abasi!
6. Didie ke Paul okowụt nte ke nnyịn imenyene mbiomo edise mban̄a mme Christian eken?
6 Nte ededi, nnyịn idụhe ke esop man ibọbọ kpọt; nnyịn idu do n̄ko ndinọnọ. Ke akpanikọ, Jesus ọkọdọhọ ete: “Ọfọn ndinọ akan ndibọ.” (Utom 20:35) Apostle Paul ama owụt edu edinọ enọ ke ini enye ekewetde ete: “Ẹnyụn̄ ẹyak nnyịn isọn̄ọ imụm ikọ eke idade iyarade idori-enyịn ikama, mbak edibọhọ nnyịn oyok; koro Enye emi ọnọde nnyịn un̄wọn̄ọ edi Abasi akpanikọ: ẹyak nnyịn inyụn̄ ikere nte ikpedemerede kiet eken inọ ima ye nti utom; ikûnyụn̄ isịn ndisop idem ọtọ kiet, nte edu ndusụk owo edide, edi inọ kiet eken item; ndien mbufo ẹkpedọdiọn̄ ẹnam ntem, adan̄a nte ẹkụtde ẹte usen oro ke asan̄a ekpere.”—Mme Hebrew 10:23-25.
7, 8. Didie ke nnyịn iwụt edu unọ enọ ke esịt esop nnyịn ye kaban̄a mme Christian ke mme idụt en̄wen?
7 Ke esịt esop, nnyịn ‘isiyarade idotenyịn nnyịn’ ke ini inọde ibọrọ ke mbono esop m̀mê ibuanade ke ndutịm ke mme usụn̄ efen. Ke akpanikọ, mme utọ ebuana oro ẹsinọ nditọete nnyịn nsịnudọn̄. Nnyịn nde imesisịn udọn̄ inọ mmọ ebe ke nneme nnyịn mbemiso ye ke mbono esop asuanade. Oro edi ini emi nnyịn ikemede ndisọn̄ọ mbon iduọesịt idem, idọn̄de mbon mmemidem ye mbon udọn̄ọ esịt. (1 Thessalonica 5:14) Ata mme Christian ẹma nditat ubọk nnọ utọ enọ oro, emi edide ntak oro ediwak mbon oro ẹdụkde mme mbono esop nnyịn ke akpa ini ẹsikopde inemesịt ndikụt ima oro odude ke otu nnyịn.—Psalm 37:21; John 15:12; 1 Corinth 14:25.
8 Edi, ima nnyịn itreke ke esop nnyịn kpọt. Enye atara esịm ofụri otu nditọete nnyịn ke ofụri ererimbot. Ke uwụtn̄kpọ, ntak edi oro ekebe etịbe odude ọnọ Okụk Ufọkmbono Obio Ubọn̄ ke Ufọkmbono Obio Ubọn̄ nnyịn kiet kiet. Ufọkmbono Obio Ubọn̄ nnyịn ekeme ndidu ke eti idaha, edi nnyịn imọdiọn̄ọ ite ke ediwak tọsịn ekemmọ mme Christian ke mme idụt efen inyeneke eti itie ndisop idem. Ke ini nnyịn itịpde etịbe isịn ke Okụk Ufọkmbono Obio Ubọn̄, nnyịn iwụt ima oro imade mme utọ owo oro, idem ọkpọkọm nnyịn ifiọkke mmọ.
9. Nso akpan ntak inam Mme Ntiense Jehovah ẹma kiet eken?
9 Ntak emi Mme Ntiense Jehovah ẹmade kiet eken-e? Ọfọn, Jesus okowụk mmọ ndinam ntre. (John 15:17) Ndien ima emi mmọ ẹmade kiet eken edi uyarade nte ke spirit Abasi ke anam utom ke idemmọ nte owo kiet kiet ye nte otu. Ima edi ubak “mbun̄wụm spirit.” (Galatia 5:22, 23) Nte Mme Ntiense Jehovah ẹkpepde Bible, ẹdụkde mme mbono esop Christian, ẹnyụn̄ ẹbọn̄de akam ẹnọ Abasi kpukpru ini, ima akabade edi ndammana n̄kpọ ọnọ mmọ kpa ye oro ẹdụn̄de ke ererimbot emi ‘ima ediwak owo ama okosụhọde.’—Matthew 24:12.
Ndinam N̄kpọ ye Ererimbot
10. Nso mbiomo ke nnyịn inyene kaban̄a ererimbot?
10 Paul nditịn̄ mban̄a ‘ediyarade idotenyịn nnyịn’ eti nnyịn aban̄a mbiomo efen. Ediyarade idotenyịn emi abuana utom edikwọrọ eti mbụk nnọ mbon emi mîdịghe kan̄a nditọete Christian nnyịn. (Matthew 24:14; 28:19, 20; Rome 10:9, 10, 13-15) Utọ ukwọrọikọ emi edi edinam unọ enọ efen. Ndibuana ke enye oyom ini, odudu, ntịmidem, ukpep, ye edida mme inyene nnyịn nnam n̄kpọ. Edi, Paul ama ewet n̄ko ete: “Mmakama mme Greek ye isen owo isọn, ye mbon eti ibuot ye mme ọkọi nde. Ntre ke n̄kan̄ mi, mmeben̄e idem ndikwọrọ gospel nnọ mbufo nde emi ẹdude ke Rome.” (Rome 1:14, 15) Ukem nte Paul, ẹyak nnyịn ikûfam efam ke ini nnyịn ikpede “isọn” emi.
11. Mme edumbet N̄wed Abasi iba ewe ẹkara itie ebuana nnyịn ye ererimbot, edi kpa ye oro nso ke nnyịn ifiọk?
11 Nte nnyịn imenyene mme mbiomo efen kaban̄a mmọ emi mîdịghe ekemmọ mme andinịm ke akpanikọ? Ih. Ke akpanikọ, nnyịn imọfiọk ite ke “ofụri ererimbot onyụn̄ esịne ke ubọk andidiọk.” (1 John 5:19) Nnyịn imọdiọn̄ọ ke Jesus eketịn̄ aban̄a mme mbet esie ete: “Mmọ idịghe eke ererimbot, kpa nte Ami mmendịghe eke ererimbot.” Edi, nnyịn idụn̄ ke ererimbot, inyene se idade idu uwem ito enye, inyụn̄ ibọ mme ufọn oro enye ọnọde. (John 17:11, 15, 16) Ntre, nnyịn imenyene mme mbiomo ke ererimbot. Nso ke mmọ ẹdi? Apostle Peter ama ọbọrọ mbụme oro. Esisịt ini mbemiso nsobo Jerusalem, enye ama ewet leta ọnọ ẹsọk mme Christian ke Asia Minor, ndien ikpehe kiet ke leta oro an̄wam nnyịn ndinịm adan̄a ke itie ebuana nnyịn ye ererimbot.
12. Ke nso usụn̄ ke mme Christian ẹdi “ododụn̄ ye mbon isan̄,” ndien ke ntre, nso ke mmọ ẹkpetre ndinam?
12 Peter ama ọtọn̄ọ ke ndidọhọ ete: “Ndima mi, mmeben̄e mbufo nte ododụn̄ ye mbon isan̄, nte, ẹdianade ẹkpọn̄ idiọk udọn̄ obụkidem, emi ẹn̄wanade ye ukpọn̄ owo.” (1 Peter 2:11) Ke usụn̄ifiọk eke spirit, mme Christian akpanikọ ẹdi mme “ododụn̄ ye mbon isan̄” koro n̄kpọ emi mmọ ẹnen̄erede ẹwụk ntịn̄enyịn ke uwem mmọ edi idotenyịn nsinsi uwem—mbon oro ẹyetde aran ke spirit, uwem ke heaven ndien “mme erọn̄ en̄wen,” uwem ke paradise isọn̄ ke ini iso. (John 10:16; Philippi 3:20, 21; Mme Hebrew 11:13; Ediyarade 7:9, 14-17) Nte ededi, nso idi mme idiọk udọn̄ obụkidem? Mmọ ẹsịne mme utọ n̄kpọ nte udọn̄ edinyene inyene, udọn̄ kaban̄a uwọrọiso, udọn̄ oburobụt ido idan̄, ye mme udọn̄ oro ẹtịn̄de ẹban̄a nte “ufụp” ye “edisịn esịt ke n̄kpọ owo.”—Colossae 3:5; 1 Timothy 6:4, 9; 1 John 2:15, 16.
13. Didie ke mme udọn̄ obụkidem ‘ẹn̄wana ye ukpọn̄ nnyịn’?
13 Mme utọ udọn̄ oro ẹnen̄ede ‘ẹn̄wana ye ukpọn̄ nnyịn.’ Mmọ ẹbiat itie ebuana nnyịn ye Abasi ndien ke ntem ẹsịnde idotenyịn Christian nnyịn (“ukpọn̄,” m̀mê uwem nnyịn) ke itiendịk. Ke uwụtn̄kpọ, edieke nnyịn inyenede udọn̄ ke ndiọi n̄kpọ, didie ke nnyịn ikeme ndida idem nnyịn nnọ Abasi nte “odu-uwem uwa, emi asanade, emi onyụn̄ enemde Abasi ndibọ”? Edieke nnyịn iduọde idụk afia uma inyene, didie ke nnyịn ‘idibem iso iyom Obio Ubọn̄ Abasi’? (Rome 12:1, 2; Matthew 6:33; 1 Timothy 6:17-19) Mfọnn̄kan usụn̄ nditiene edi uwụtn̄kpọ Moses, isịn mme etabi ererimbot emi inyụn̄ inịm utom Jehovah akpa ke uwem nnyịn. (Matthew 6:19, 20; Mme Hebrew 11:24-26) Oro edi akpan usụn̄ oro ikemede ndinịm adan̄a ke itie ebuana nnyịn ye ererimbot.
“Ẹkama Idem nte Odotde”
14. Ntak emi nnyịn nte mme Christian isidomode ndikama idem nte odotde?
14 Ẹkụt akpan ndausụn̄ efen ke mme udiana ikọ Peter emi: “Ẹkama idem nte odotde ke iso mme Gentile, man ke nde eke mmọ ẹtịn̄de n̄kpọ ẹbiat mbufo ẹte ẹdi mme anam-idiọk, mmọ ẹkpeda nti ido mbufo, emi ẹdikụtde ke ini eke ẹdide ndidomo mbufo nse, ẹnọ Abasi ubọn̄.” (1 Peter 2:12) Nte mme Christian, nnyịn imesidomo ukeme ndinịm nti uwụtn̄kpọ. Nnyịn imesisịn idem ikpep n̄kpọ ke ufọkn̄wed. Ke itieutom, nnyịn imesisịn ifịk inam utom inyụn̄ inam akpanikọ—idem ọkpọkọm etie nte ke eteutom nnyịn iwụtke eti ibuot. Ke ubon oro abaharede, ebe m̀mê n̄wan emi enịmde ke akpanikọ esisịn akpan ukeme nditiene mme edumbet Christian. Isidịghe mmemmem n̄kpọ kpukpru ini, edi nnyịn imọfiọk ke eti edu uwem nnyịn enem Jehovah esịt esinyụn̄ awak ndinyene eti utịp ke idem mbon oro mîdịghe Mme Ntiense.—1 Peter 2:18-20; 3:1.
15. Nnyịn isan̄a didie ifiọk nte ke ẹtịm ẹdiọn̄ọ n̄kokon̄ idaha ido uwem Mme Ntiense Jehovah?
15 Ẹkụt nti utịp oro ata ediwak Mme Ntiense Jehovah ẹnyenede ke ndimụm nti idaha n̄kama ke mme ikọ oro ẹtịn̄de ẹban̄a mmọ, emi ẹkemịn̄de ke ediwak isua emi ẹkebede. Ke uwụtn̄kpọ, Il Tempo eke Italy ama ọtọt ete: “Mme owo emi ẹnamde utom ye Mme Ntiense Jehovah ẹsitịn̄ ẹban̄a mmọ nte mbonutom oro ẹnamde akpanikọ, emi ẹnen̄erede ẹnịm se mmọ ẹkpepde ke akpanikọ tutu editie nte n̄kpọ eke mmọ ẹsịnde idem ofụri ofụri ke enye; kpa ye oro, mmọ ẹdot ukpono ke ntak nsọn̄ọnda eke ido uwem mmọ.” Herald eke Buenos Aires, Argentina, ọkọdọhọ: “Ke ofụri isua emi ẹkebede, Mme Ntiense Jehovah ẹwụt ke mmimọ idi mbon obio oro ẹnamde utom ọkpọsọn̄, ẹsịnde ifịk, ẹnọde ntịn̄enyịn ke n̄kpọ, ẹnyụn̄ ẹbakde Abasi.” Akwa ọfiọkn̄wed owo Russia oro, Sergei Ivanenko ọkọdọhọ ete: “Ẹdiọn̄ọ Mme Ntiense Jehovah ke ofụri ererimbot nte nti mme enịm ibet ndien akpan akpan ke ntak edu mmọ eke editịn̄ enyịn n̄kpe tax.” Etubom utom ke an̄wambre kiet emi Mme Ntiense Jehovah ẹkedade ẹnịm mbono mmọ ke Zimbabwe ọkọdọhọ ete: “Mmokụt ndusụk Mme Ntiense ẹtan̄de n̄kpri n̄wed ke isọn̄ ẹnyụn̄ ẹnamde mme itie ukaikọt ẹsana. Ẹnịm an̄wambre emi asana akan nte akasanade ke mbemiso. Mme uyen mbufo ẹdu eti uwem. Ubaha nte Mme Ntiense Jehovah kpọt ẹkpedude ke ofụri ererimbot.”
Nsụkidem Christian
16. Nso idi itie ebuana nnyịn ye mme ukara ererimbot, ndien ntak-a?
16 Peter etịn̄ n̄ko aban̄a itie ebuana nnyịn ye mme ukara ererimbot. Enye ọdọhọ: “Ẹsụk idem ẹnọ kpukpru idaha eke ẹnịmde ke otu owo kaban̄a Ọbọn̄; ẹnọ edidem nte andikara kpukpru owo; ye mbọn̄ eken, nte mmọ emi enye osiode ọdọn̄, ete ẹnọ mme anam-idiọk usiene, ẹnyụn̄ ẹnọ mme anam nti n̄kpọ itoro. Koro Abasi aduak ntem ete, mbufo ẹda nti ido ẹkịbi inua mbon ndisịme, eke mîfiọkke se mmọ ẹtịn̄de.” (1 Peter 2:13-15) Nnyịn imesiwụt esịtekọm iban̄a mme ufọn oro ibọde ito eti ukara, ndien ke inamde n̄kpọ itiene mme ikọ Peter, nnyịn imesinịm mme ibet ukara inyụn̄ ikpe mme tax. Okposụkedi nnyịn ifiọkde unen emi Abasi ọnọde ukara ndinọ mme abiatibet ufen, akpan ntak emi nnyịn isụkde ibuot inọ ukara ererimbot edi “kaban̄a Ọbọn̄.” Emi edi uduak Abasi. Efen n̄ko, nnyịn iyomke ndida esuene nsọk enyịn̄ Jehovah ke ndibọ ufen ke ntak idiọk edinam.—Rome 13:1, 4-7; Titus 3:1; 1 Peter 3:17.
17. Ke ini “mbon ndisịme” ẹbiọn̄ọde nnyịn, nnyịn ikeme ndinyene mbuọtidem ke nso?
17 Ke ndiọkiso, ndusụk “mbon ndisịme” oro ẹdude ke ukara ẹsikọbọ m̀mê ẹbiọn̄ọ nnyịn ke mme usụn̄ efen—utọ nte ke ndisịn nsọk man ẹdori nnyịn ikọ. Edi, ke edikem ini Jehovah, ẹsiyarade mme nsu mmọ kpukpru ini, ẹsinyụn̄ ẹkụt unen ke ndikịbi inua mbon ndisịme oro mîfiọkke se mmọ ẹtịn̄de.’ Mbụk uwem nnyịn nte mme Christian ọmọnọ uyarade ke idemesie. Ntak edi oro ikpọ mbon ukara oro ẹsinamde akpanikọ ẹsiwakde nditoro nnyịn nte mme anam nti utom.—Rome 13:3; Titus 2:7, 8.
Ifịn Abasi
18. Nte mme Christian, mme usụn̄ ewe ke nnyịn ikeme ndifep ndida ifụre edimek nnyịn nnam n̄kpọ ke idiọk usụn̄?
18 Peter ke emi odụri owo utọn̄ ete: “Ẹdu uwem nte mmọ emi ẹnyenede unen ke idem mmọ, edi ẹkûsan̄a ke unen oro ẹfụk udu, edi ẹsan̄a nte ifịn Abasi.” (1 Peter 2:16; Galatia 5:13) Mfịn, ifiọk akpanikọ Bible oro inyenede osio nnyịn ke ufụn mme nsunsu ukpepn̄kpọ ido ukpono. (John 8:32) Efen n̄ko, nnyịn imenyene ifụre edimek, ndien nnyịn imekeme ndinam mme edimek. Edi, nnyịn idaha ifụre nnyịn inam n̄kpọ ke idiọk usụn̄. Ke ini imekde mme nsan̄a, usịnen̄kpọ, ukamaidem, unọ idem inemesịt—idem udia ye mmịn—nnyịn imesiti nte ke mme Christian akpanikọ ẹdi ifịn Abasi, iyomke ndinem idemmọ esịt. Nnyịn imemek ndikpono Jehovah utu ke ndidụk ufụn nnọ mme udọn̄ obụkidem nnyịn m̀mê mme n̄kon̄ine ye edu unam n̄kpọ eke ererimbot.—Galatia 5:24; 2 Timothy 2:22; Titus 2:11, 12.
19-21. (a) Didie ke nnyịn ise mbon oro ẹkamade ukara? (b) Didie ke ndusụk owo “ẹma ofụri otu nditọete”? (c) Nso idi ata akpan mbiomo nnyịn?
19 Peter aka iso ọdọhọ ete: “Ẹkpono kpukpru owo. Ẹma [“ofụri otu,” NW] nditọ-ete. Ẹten̄e Abasi. Ẹkpono edidem.” (1 Peter 2:17) Sia Jehovah Abasi ayakde mme owo ẹdu ke nsio nsio itie ukara, nnyịn imesiwụt mme owo emi ukpono oro odotde. Nnyịn imesikam ibọn̄ akam iban̄a mmọ man otodo ẹyak nnyịn inam utom nnyịn ke emem ye ke uten̄e Abasi. (1 Timothy 2:1-4) Nte ededi, ke ukem ini oro, nnyịn ‘imama ofụri otu nditọ-ete.’ Nnyịn imesinam n̄kpọ kpukpru ini iyom ufọn nditọete Christian nnyịn, idịghe man inọ mmọ unan.
20 Ke uwụtn̄kpọ, ke ini afai eke ekpụk ọkọnọmọde idụt Africa kiet, nti ido Christian eke Mme Ntiense Jehovah ama ọwọrọ ada. N̄wedmbụk Reformierte Presse eke Switzerland ama ọtọt ete: “ke 1995, N̄ka Unen Mbon Africa . . . ama owụt nte ke kpukpru ufọkabasi ẹma ẹbuana [ke en̄wan oro] ke ẹsiode Mme Ntiense Jehovah ẹfep.” Ke ini mbụk aban̄ade mme n̄kpọntịbe mmọn̄eyet emi ekesịmde ofụri ererimbot, Mme Ntiense Jehovah ke Europe ẹma ẹsọsọp ẹnọ udia ye un̄wam ibọkusọbọ ẹsọk nditọete mmọ ye mbon eken oro ẹdude ke idụt oro okosobode unọmọ mi. (Galatia 6:10) Mmọ ẹma ẹnam mme ikọ eke Mme N̄ke 3:27 emi: “Kûsịn ndida eti n̄kpọ nnọ mmọ eke ẹkpenyenede enye, ke ini ubọk fo ekemede ndinam.”
21 Nte ededi, mbiomo efen odu oro edide akpan n̄kpọ akan ukpono oro anade inọ mbon ukara ererimbot ekededi, onyụn̄ akam okpon akan ima oro anade ima nditọ ete nnyịn. Nso idi oro? Peter ọkọdọhọ ete: “Ẹten̄e Abasi.” Nnyịn imakama Jehovah isọn oro etịmde okpon akan enye oro ikamade owo ekededi. Didie ke oro edi ntre? Ndien didie ke nnyịn ikeme ndinam mme mbiomo oro inyenede ke iso Abasi ye ukara ẹda ukem ukem? Ẹyebọrọ mme mbụme emi ke ibuotikọ oro etienede.
Nte Afo Emeti?
• Mme mbiomo ewe ke mme Christian ẹnyene ke ubon?
• Didie ke nnyịn ikeme ndiwụt edu unọ enọ ke esop?
• Mme mbiomo ewe ke nnyịn inyene kaban̄a ererimbot?
• Nso idi ndusụk ufọn emi ẹtode edisọn̄ọ nnyene n̄kokon̄ idaha ido uwem?
[Mme Mbụme Ukpepn̄kpọ]
[Ndise ke page 9]
Didie ke ubon Christian ekeme ndidi ebiet emi akwa idatesịt otode?
[Mme ndise ke page 10]
Ntak emi Mme Ntiense Jehovah ẹmade kiet eken-e?
[Mme ndise ke page 10]
Nte nnyịn imekeme ndiwụt ima nnọ nditọete nnyịn idem ọkpọkọm nnyịn ke idem nnyịn ifiọkke mmọ?