Kpukpru Nnyịn Imoyom Itoro

EKEDI eti usen ọnọ ekpri eyenan̄wan oro. Okposụkedi ekesiyomde ẹnọ enye edinen̄ede ke mme ini eken, ke usen enye emi, enye ikesịnke ntịme ndomokiet. Nte ededi, ke okoneyo oro, ke ama ekenịm ekpri eyenan̄wan emi ke bed, eka esie ama okop enye atuade. Ke obụpde ntak emi enye atuade, enye ama ọbọrọ ye mmọn̄eyet ete: “Nte ami n̄kedịghe eti eyen mfịn?”

Mbụme emi ama otụk eka esie etieti. Kpukpru ini enye ama esisọp ndinọ eyen emi edinen̄ede. Edi ke usen enye emi, kpa ye oro ama okokụt nte ekpri eyen emi esịnde ukeme nditre ndisịn ntịme, eka esie iketịn̄ke ndomo ikọ kiet nditoro enye.

Idịghe n̄kpri owo kpọt ẹyom itoro ye ikọ ndọn̄esịt. Kpukpru nnyịn imoyom—ukem nte isiyomde item ye edinen̄ede.

Esitie nnyịn ke idem didie ke ini ibọde itoro ofụri esịt? Nte oro isinọhọ nnyịn inemesịt inyụn̄ inam ikop idem inem ke usen oro? Eyedi emi esinam ikere ke ẹkụt ẹnyụn̄ ẹkere ẹban̄a nnyịn. Enye esinọ nnyịn idotenyịn nte ke se ikanamde ama etịm odot ye ukeme oro nnyịn ikesịnde, esinyụn̄ esịn udọn̄ ọnọ nnyịn ndifiak nnam ukem n̄kpọ oro ke ini iso. Idịghe n̄kpọ n̄kpaidem nte ke itoro ofụri esịt esiwak ndinam nnyịn isan̄a ikpere owo emi akadade ini nditịn̄ mme n̄kpọ oro ẹnọde nsịnudọn̄.—Mme N̄ke 15:23.

Jesus Christ ama ọfiọk ke oyom ẹnọ owo itoro. Ke n̄ke talent, Ọbọn̄ oro (adade aban̄a Jesus) enen̄ede otoro kiet kiet ke otu asan̄autom oro ẹkenamde akpanikọ ete: “Emetịm anam, afo eti asan̄autom ye owo akpanikọ.” Nso n̄kpọ inemesịt ke emi edi ntem! Idem okposụkedi mmọ ẹnyenede nsio nsio odudu ye ukeme, ẹtoro mmọ mbiba ukem ukem.—Matthew 25:19-23.

Ntre ẹyak nnyịn iti eka ekpri eyenan̄wan oro. Iyomke nnyịn ibet tutu mme owo ẹtua ẹyom itoro mbemiso nnyịn itorode mmọ. Utu ke oro, nnyịn imekeme ndiyom mme ifet ndinọ itoro. Ke akpanikọ nnyịn imenyene eti ntak ndinọ itoro ofụri esịt ke kpukpru ifet.