Ntọt Mme Anditan̄a Obio Ubọn̄

Kpukpru Owo Ẹkeme Ndidụk Ufọkmbono Obio Ubọn̄

KE ADAN̄AEMI ọkọnọde mme mbet esie ukpep aban̄a an̄wan̄wa utom ukwọrọikọ, Jesus Christ ama esịn udọn̄ ọnọ mmọ ete “ẹkwọrọ [ikọ] ke ọkọm ufọk.” (Matthew 10:27) Ih, akana mmọ ẹnam utom ukwọrọikọ Christian mmọ an̄wan̄wa, man kpukpru owo ẹkụt. Ke ndinam item emi, Mme Ntiense Jehovah ẹnam utom mmọ n̄ko an̄wan̄wa. Edu edinam n̄kpọ an̄wan̄wa emi anam Mme Ntiense ẹkan ubiọn̄ọ onyụn̄ anam ẹtịm ẹdiọn̄ọ mmọ.

Okposụkedi kpukpru owo ẹkemede ndidụk mme mbono esop Mme Ntiense Jehovah, usua esinam ndusụk owo ẹmen̄e ndidụk Ufọkmbono Obio Ubọn̄. Emi edi ntre ke Finland. Mbon eken ẹsikam ẹkop ndịk ndika mbufa itie. Ke ini ẹbọpde obufa Ufọkmbono Obio Ubọn̄ m̀mê ẹdiọn̄de ufọkmbono oro ama okododu, ẹsiwak ndinam ndutịm man mme owo ẹdi ẹdise enye. Ẹkeme ndisịn san̄asan̄a ukeme ndikot mme mbọhọidụn̄ ndidi ndise Ufọkmbono Obio Ubọn̄ oro nnyụn̄ mmehe ye utom Mme Ntiense Jehovah.

Ke ebiet kiet, Mme Ntiense ẹma ẹdiomi ubịnikọt magazine ke usen oro mmọ ẹkediomide mme owo ndidi ndise obufa Ufọkmbono Obio Ubọn̄ mmọ. Ntiense iba ẹma ẹsobo ye akanieren kiet oro ọkọdọhọde ke imọ imesima ndikot magazine Enyọn̄-Ukpeme ye Awake! Nditọete emi ẹma ẹsian enye ke ẹnam ndutịm man mme owo ẹdi ẹdise Ufọkmbono Obio Ubọn̄ emi ẹnyụn̄ ẹdọhọ ke iyada enye ika do. Eren oro ama ọdọhọ ke iyenem esịt nditiene mmọ n̄ka. N̄wan esie oro eketienede okop nneme oro ama ofiori ete, “Nyetiene ndi n̄ko!”

Ke ini okodụkde Ufọkmbono Obio Ubọn̄ oro, eren oro ama ese akanade onyụn̄ ọdọhọ ete: “Ekịm ndomokiet idụhe mi. Kamse, ebiet emi eye onyụn̄ ayama. Ẹkesian mi ẹte ke Ufọkmbono Obio Ubọn̄ esikekịm!” N̄wan ye ebe emi ẹma ẹdu ke ndusụk ini ẹnyụn̄ ẹdọhọ ẹnọ mmimọ ndusụk n̄wed oro ẹkedude ke itie ubọ n̄wed.

Esop kiet ama oyom nditọt ke n̄wedmbụk n̄kpọntịbe n̄kann̄kụk mban̄a ini oro mme owo ẹkemede ndidi ndise Ufọkmbono Obio Ubọn̄ mmọ ke usen oro ẹdiyakde enye inọ. Ke ama ọkọbọ ntọt aban̄a edinam emi, akwa andiwet n̄wed ama ọnọ ekikere ete ẹwet n̄kpọ ẹban̄a ibuotikọ emi. Nditọete ẹma ẹnyịme, ndien esisịt ini ke oro ebede, ẹma ẹmịn̄ ndinem n̄kpọ ẹban̄a ibuotikọ oro ke ubak page n̄wedmbụk n̄kpọntịbe oro, ẹtịn̄de ẹban̄a edinam oro ye utom esop n̄kann̄kụk eke Mme Ntiense Jehovah.

Ke ẹma ẹkemịn̄ ibuotikọ emi, akanian̄wan Ntiense kiet ama osobo ye mbọhọidụn̄ oro ọkọdọhọde enye ete: “Ẹwet ndinem n̄kpọ ẹban̄a Mme Ntiense Jehovah ke n̄wedmbụk n̄kpọntịbe mfịn!” Eyenete an̄wan emi ama ọnọ enye ikọ ntiense ndien ke ukperedem ama ọnọ enye ediye uduot ekpri n̄wed oro Jehovah’s Witnesses in the Twentieth Century.

Ke adianade ye edinen̄ede ndusụk ukwan̄ ekikere oro ẹnyenede ẹban̄a Mme Ntiense Jehovah, mme utọ ndutịm oro ẹbuanade edika n̄kese ye ediyak mbufa Ufọkmbono Obio Ubọn̄ nnọ ẹsidemede udọn̄ mme asuanetop ke ndisịn udọn̄ nnọ mmọ ndinọ mme owo efen efen ikot ndidụk mme mbono esop. Ih, ke ediwak idụt, esịnede Finland, mme owo ẹfiọk ẹte ke kpukpru owo ẹkeme ndidụk Ufọkmbono Obio Ubọn̄ Mme Ntiense Jehovah.