Mme Mbụme Ẹtode Mme Andikot
Mme Mbụme Ẹtode Mme Andikot
Nte ọdiọk edieke ẹdade ekpri okụk ẹkọbi n̄kpa?
Ikọ Abasi inemeke n̄kpọ ọyọhọ ọyọhọ iban̄a mbre mfọniso, edi enye etịn̄ ekese n̄kpọ ndiwụt ke kpukpru orụk mbre mfọniso ẹtuaha ye mme edumbet Bible. * Ke uwụtn̄kpọ, ẹtịm ẹfiọk ke mbre mfọniso esidemede idiọkitọn̄. Emi akam edi akpan n̄kpọ oro mme Christian ẹkpekerede ẹban̄a, sia Bible ọdọhọde ke mbon “idiọk itọn̄” ididaha Obio Ubọn̄ Abasi inyene, onyụn̄ abuande edisịn esịt ke n̄kpọ owo ye ukpono ndem.—1 Corinth 6:9, 10, NW; Colossae 3:5.
Mbre mfọniso n̄ko esidemede ntan̄idem ye idiọk edu ndomoidem, ye ọkpọsọn̄ udọn̄ edidia owo. Apostle Paul ama odụri owo utọn̄ aban̄a mme utọ n̄kpọ oro ke ini enye ekewetde ete: “Nnyịn ikûtan̄ idem, ikûyat kiet eken esịt, ikûnyụn̄ ifịbe ufụp ye kiet eken.” (Galatia 5:26) Ke akande oro, mbre mfọniso esinam ndusụk owo ẹberi edem ke nsunsu ekikere oro akarade enye. Mme ebre mbre mfọniso ẹsision̄o kpukpru orụk nsunsu ekikere ẹdi, ẹdoride enyịn ndida mmọ nnyene mfọniso. Mmọ ẹnam nnyịn iti nditọ Israel oro mîkanamke akpanikọ ẹkenyụn̄ “ẹbride okpokoro ẹnọ Gad [“abasi mfọniso,” NW] ẹnyụn̄ ẹdade mbuaha wine ẹsịn ẹnọ Meni ẹyọhọ.”—Isaiah 65:11.
Ndusụk owo ẹkeme ndikere ke ndida n̄kpri okụk n̄kọbi n̄kpa ke mbre kad m̀mê ke nsa obukpọk oro ẹbrede ye mme iman m̀mê n̄kpet n̄kpet ufan edi mbre oro mîkemeke ndinọ unan. Edi akpanikọ, owo oro adade ekpri okụk ọkọbi n̄kpa idibatke ke imọ idi owo idiọkitọn̄, owo ntan̄idem, owo ndomoidem, m̀mê owo oro enịmde nsunsu ekikere ke akpanikọ. Kpa ye oro, nso utịp ke n̄kpa emi edinyene ke idem mbon oro enye adade ọkọbi okụk? Ediwak owo oro ẹnyenede mbumehe ubre mbre mfọniso ẹketọn̄ọ emi ke edida n̄kpri okụk n̄kọbi n̄kpa nte ‘sụk n̄kpọ ndida nnọ idem inemesịt.’ (Luke 16:10) Se iketiede nte mbre oro mîkemeke ndinọ unan ama akabade ọnọ mmọ unan idiọk idiọk.
Oro enen̄ede edi ntre ye nditọwọn̄. Ediwak nditọwọn̄ ẹsikop nduaidem edidia n̄kpri okụk oro mmọ ẹkekọbide ndien emi esinam mmọ ẹduọ ẹdụk idomo edikọbi ediwak okụk. (1 Timothy 6:10) Ntọt ndụn̄ọde anyan ini emi Esop Arizona Oro Esede N̄kpọ Aban̄a Mbumehe Ubre Mbre Mfọniso, oro ẹkemịn̄de ke United States, ọsọn̄ọ nte ke ediwak mbon oro ẹnyenede mbumehe ubre mbre mfọniso ẹketọn̄ọ emi ke ini uyen “ke ndida n̄kpri okụk n̄kọbi n̄kpa ke mme mbre mbuba m̀mê ke ndibre kad ye mme ufan m̀mê mme iman.” Ntọt ndụn̄ọde en̄wen ọdọhọ ke “nditọwọn̄ ẹsitọn̄ọ ndibre mbre mfọniso ke ufọk, ediwak ini ẹkamade kad ẹbre ye ubon ye mme ufan.” Ntọt oro adian do ete ke “mbahade 40 eke ikie ke otu nditọwọn̄ oro ẹkebrede mbre mfọniso ẹketọn̄ọ ndinam emi idem mbemiso ẹsịmde isua 11 ke emana.” N̄wed oro Why Do People Gamble Too Much—Pathological and Problem Gambling ọdọhọ ke ediwak uyen oro ẹbrede mbre mfọniso ẹsibiat ibet mîdịghe ẹnam oburobụt ido man ẹnyene okụk ẹda ẹyụhọ mbumehe mmọ. Nso idiọk utịp ke n̄kpọ oro eketiede nte se mînọhọ unan ke akpa, ada edi ntem!
Sia nnyịn idụn̄de ke ererimbot oro ọyọhọde ye ediwak afia ye mme idomo, ntak ikposiode idem nte mîdotke inyan inọ mme afia efen efen? (Mme N̄ke 27:12) Ndibre mbre mfọniso—edide nditọwọn̄ ẹdu m̀mê idụhe, edide ẹsịn ekpri m̀mê uwak okụk—esịn idaha eke spirit owo ke itiendịk, ẹkpenyụn̄ ẹnyene ndifep emi. Ọkpọfọn mme Christian oro ẹsibrede nsa obukpọk m̀mê mbre kad nte sụk n̄kpọ ndida nnọ idem nduọkodudu ẹwewet se mmọ ẹdiade ẹnịm, mîdịghe ẹbre mbre oro nte n̄kpọ ndida nnọ idem inemesịt ye unana edidia owo. Mme Christian oro ẹnyenede eti ibuot ẹnyụn̄ ẹkerede ẹban̄a idaha eke spirit mmọ ye eke mme ufan ye ubon mmọ idibreke mbre mfọniso—idem edieke ẹsịnde ekpri okụk.
[Mme Ikọ idakisọn̄]
^ ikp. 3 The World Book Encyclopedia akabade mbre mfọniso nte “edikọbi n̄kpa mban̄a se ididide utịt mbre mbuba, utịt n̄kpọntịbe, m̀mê n̄kpọntịbe unana idotenyịn.” Enye aka iso etịn̄ ete ke mme “ebre mbre mfọniso ẹsiwak ndida okụk n̄kọbi n̄kpa ke . . . mme utọ n̄kpọ nte mbre afia emi ẹdiade ke mfọniso, mbre kad, ye nsa mbakara.”