Ntak Esinen̄erede Ọsọn̄ Ndikpe Ubọk?

KE July 2000, Ufọkmbet California ke United States ama enịm ibet oro uduak ekedide ndinam mme owo ẹkûnyene nduduọhọ edieke mmọ ẹtuade owo oro mmọ ẹnọde unan ke mbabuat n̄kpọntịbe, mbọm. Ntak ẹkenịmde ibet emi? Ẹma ẹkụt ke ini mbabuat n̄kpọntịbe ọnọde owo unan m̀mê owotde owo, mme owo ẹsimen̄e ndikpe ubọk mbak esopikpe edidọhọ ke oro edi edinyịme nduduọhọ. Ke n̄kan̄ eken, mbon oro ẹkerede ke akpana ẹkpe mmimọ ubọk usọp usọp ẹkeme ndiyat esịt, ndien ekpri mbabuat n̄kpọntịbe ekeme ndisụn̄ọ ke ọkpọsọn̄ utọk.

Nte ededi, iyomke afo ekpe ubọk ke mbabuat n̄kpọntịbe oro mîdịghe afo edi ntak. Ndien mme ini ẹkeme ndidu oro ndikpeme se afo etịn̄de edide edinam eti ibuot. N̄ke eset kiet ọdọhọ ete: “Awak ikọ inua itreke ndidue: edi owo eke omụmde n̄kpọk-inua esie akama edi ọniọn̄.” (Mme N̄ke 10:19; 27:12) Kpa ye oro, afo emekeme ndida mbufiọk n̄n̄wam.

Nte ededi, ndi idịghe akpanikọ nte ke ediwak owo isinyịmeke ndikpe ubọk, idem ọkpọkọm ibuanake edikot ikpe? Ke ufọk, n̄wanndọ ekeme ndiseme ete,  ‘Akananam ebe mi ikpehe ubọk ke n̄kpọ ndomokiet.’ Ke itieutom, eseutom ekeme ndiseme ete, ‘Mbonutom mi isinyịmeke ndudue mmọ, ndien mmọ isiwakke ndidọhọ ke imeseme iban̄a se ikanamde.’ Ke ufọkn̄wed, andikpep ekeme ndidọhọ, ‘Owo ikpepke nditọwọn̄ ndidọhọ mbọk kûyat esịt.’

Ntak kiet emi owo ekemede ndimen̄e ndikpe ubọk ekeme ndidi ndịk nte ke mme owo ẹyefụmi imọ. Ke okopde ndịk nte ke ẹyefụmi imọ, owo ekeme nditre nditịn̄ nte etiede enye ke idem. Kamse, owo emi ẹkeduede ekeme ndikam mfụmi owo emi eduede enye ofụri ofụri, anamde edi ọkpọsọn̄ n̄kpọ andidue ndinam emem.

Unana edikere mban̄a ntụk mbon en̄wen ekeme ndidi ntak efen emi ndusụk owo ẹsimen̄ede ndikpe ubọk. Mmọ ẹkeme ndikere, ‘Ami ndikpe ubọk idinen̄ekede ndudue oro n̄kanamde.’ Mbon efen n̄ko ẹsimen̄e ndikpe ubọk ke ntak mme utịp oro emi ekemede ndida ndi. Mmọ ẹsikere, ‘Ndi ẹyebiom mi ikpe ẹnyụn̄ ẹdia mi isop?’ Nte ededi, n̄kponn̄kan n̄kpọ oro ọbiọn̄ọde edinyịme ndudue edi ntan̄idem. Owo oro atan̄de idem akaha ndidọhọ “mmeseme mban̄a oro” ekeme ndibiere ete, ‘Nyomke ndisụhọde uku mi ke ndinyịme ndudue mi. Oro oyosụhọde mi itie.’

Ke ntak ekededi, esinen̄ede ọsọn̄ ediwak owo nditịn̄ ikọ n̄kpeubọk. Edi, nte esinen̄ede oyom ẹnam n̄kpeubọk? Nso idi mme ufọn edikpe ubọk?

[Ndise ke page 3]

“Owo ikpepke nditọwọn̄ ndidọhọ mbọk kûyat esịt”

[Ndise ke page 3]

“Mbonutom mi isinyịmeke ndudue mmọ”

[Ndise ke page 3]

“Akananam ebe mi ikpehe ubọk”