Ẹka Iso Ẹnam N̄kpọ ke Esịt Kiet
Ẹka Iso Ẹnam N̄kpọ ke Esịt Kiet
“Nyakabade edisana n̄kpọk-inua [“usem,” NW] nnọ mme idụt: man kpukpru mmọ ẹkot enyịn̄ Jehovah, man ẹnam n̄kpọ ẹnọ enye ke esịt kiet.” —ZEPHANIAH 3:9.
1. Nso itịbe ke ndisu Zephaniah 3:9?
ẸSEM n̄kpọ nte usem 6,000 idahaemi ke ofụri isọn̄. Ke ẹsiode mmọ emi ẹfep, nsio nsio n̄kpri usem ẹdu oro ẹsemde ke nsio nsio n̄kann̄kụk. Nte ededi, ọkpọkọm mme owo ẹsem mme usem oro ẹdide ata nsio nsio utọ nte Arabic ye Zulu, Abasi anam n̄kpọ oro enen̄erede edi n̄wọrọnda. Enye anam mme owo ke kpukpru itie ẹkeme ndikpep nnyụn̄ nsem edisana usem kiet. Emi etịbe ke ndisu un̄wọn̄ọ oro ẹkedade prọfet Zephaniah ẹn̄wọn̄ọ: “[Ami Jehovah Abasi] nyakabade edisana n̄kpọk-inua [“usem,” NW] nnọ mme idụt: man kpukpru mmọ ẹkot enyịn̄ Jehovah, man ẹnam n̄kpọ ẹnọ enye ke esịt kiet.”—Zephaniah 3:9.
2. Nso idi “edisana usem,” ndien nso inam ẹkeme ndisem enye?
2 “Edisana usem” edi akpanikọ Abasi oro ẹkụtde ke Ikọ esie, kpa Bible. Enye enen̄ede edi akpanikọ aban̄ade Obio Ubọn̄ Abasi, emi edinamde enyịn̄ Jehovah asana, ediwụtde unen itie edikara esie, edinyụn̄ adade edidiọn̄ ọsọk ubonowo. (Matthew 6:9, 10) Nte n̄kukụre edisana usem eke spirit ke isọn̄, mme owo ke kpukpru idụt ye orụk ke ẹsem edisana usem emi. Enye an̄wam mmọ ẹkeme ndinam n̄kpọ Jehovah “ke esịt kiet.” Ke ntem mmọ ẹnam n̄kpọ esie ke edidianakiet, m̀mê “ye unyịmesịt kiet.”—The New English Bible.
Inaha Ẹnam Asari
3. Nso inam nnyịn ikeme ndinam n̄kpọ Jehovah ke edidianakiet?
3 Nte mme Christian, nnyịn imowụt esịtekọm iban̄a edidianakiet nnyịn kpa ye oro isemde ediwak usem. Okposụkedi nnyịn ikwọrọde eti mbụk Obio Ubọn̄ ke ediwak usem, nnyịn inam n̄kpọ Abasi ke edidianakiet. (Psalm 133:1) Emi edi ntre koro, ebiet ekededi oro nnyịn idụn̄de ke isọn̄, nnyịn ida edisana usem kiet itoro Jehovah.
4. Ntak mîkpanaha asari odu ke otu ikọt Abasi?
4 Inaha asari odu ke otu ikọt Abasi. Apostle Peter ama anam oro an̄wan̄a ke ini enye ọkọkwọrọde ikọ ke ufọk Cornelius, akwa owo ekọn̄ Gentile ke 36 E.N., ama onyụn̄ onụk enye ndidọhọ ete: “Ke akpanikọ mmokụt nte Abasi iten̄eke owo enyịn: edi ke kpukpru idụt Enye adadara owo ekededi eke abakde Enye onyụn̄ anamde nti ido.” (Utom 10:34, 35) Sia oro edide akpanikọ, inaha ẹnam asari, ẹsiak isio n̄ka, m̀mê ẹwụt uma ke esop Christian.
5. Ntak ọdiọkde ndisịn udọn̄ nnọ edisiak isio n̄ka ke esop?
5 Eyen akamba ufọkn̄wed kiet ama etịn̄ aban̄a Ufọkmbono Obio Ubọn̄ oro enye akawahade ete: “Nte ido edide, mme ufọkabasi ẹsidụri mme andibuana ẹtode akpan orụk m̀mê ekpụk kiet. . . . Mme Ntiense Jehovah ẹkebono ọtọkiet ibahakede ibono ke otu.” Nte ededi, ndusụk mme andibuana ke esop Corinth eset ke ẹketọ ubahade. Ke ndidemede utọk ntem, mmọ ẹkebiọn̄ọ edisana spirit Abasi, oro esinamde edidianakiet ye emem ẹdu, ndinam utom. (Galatia 5:22) Edieke nnyịn ikpesịnde udọn̄ inọ edisiak isio n̄ka ke esop, emi ekpedi edin̄wana ye ndausụn̄ spirit. Ke ntre, ẹyak nnyịn iti mme ikọ oro apostle Paul ekewetde ọnọ ẹsọk mbon Corinth ete: “Edi mmada enyịn̄ Ọbọn̄ nnyịn Jesus Christ n̄kpe mbufo ubọk, nditọ-ete, nte mbufo kpukpru ẹnyene ikọ-inua kiet, ubahade okûnyụn̄ odu ke otu mbufo; edi mbufo ẹtọn̄ọ ntak ẹkabade ẹfọn ẹma ke ẹdinyene esịt kiet ye ekikere kiet.” (1 Corinth 1:10) Ke leta oro enye ekewetde ọnọ ẹsọk mbon Ephesus, Paul ama ọsọn̄ọ etịn̄ n̄ko aban̄a ufọn edidianakiet.—Ephesus 4:1-6, 16.
6, 7. Nso item ke James ọkọnọ aban̄a ediwụt uma, ndien didie ke ẹbuan mme ikọ esie?
6 Ẹyom mme Christian ẹnam n̄kpọ ye unana asari kpukpru ini. (Rome 2:11) Sia ndusụk owo ke esop akpa isua ikie ẹkewụtde mbon inyene uma, mbet oro James ama ewet ete: “Nditọ-ete mi, ẹkûda mbuọtidem emi mbufo ẹnyenede ye Ọbọn̄ nnyịn Jesus Christ, emi edide Ubọn̄, ẹdian ye uten̄e-enyịn. Koro edieke owo emi esịnede n̄kpanuen-a-gold ye ediye ọfọn̄idem odụkde edi ke esop mbufo, eyen ubuene emi esịnede edidehe ọfọn̄ onyụn̄ odụkde edi; ndien mbufo ẹsede esịne ediye ọfọn̄idem, ẹdọhọ enye ẹte, Tetie mi ke eti itie; ẹnyụn̄ ẹdọhọ eyen ubuene ẹte, Da do, mîdịghe, Sụhọde mi ke isọn̄ ke mben udoriukot mi: nte mbufo inyeneke esịt iba, inyụn̄ idaha ukwan̄ ekikere ibiere n̄kpọ inọ owo?”—James 2:1-4.
7 Edieke mbon inyene emi ẹsịnede n̄kpanuen o-gold ye ata ndiye ọfọn̄ edi emi mîdịghe mme andinịm ke akpanikọ ọkọrọ ye mme ubuene emi ẹsịnede ndedehe ọfọn̄ edi emi mîdịghe mme andinịm ke akpanikọ ẹkedide mbono esop Christian, ẹma ẹsinọ mbon inyene san̄asan̄a ntịn̄enyịn. Ẹma ẹsinọ mmọ “eti itie,” ke adan̄aemi ẹkedọhọde mme ubuene ẹte ẹdada m̀mê ẹsụhọde ẹtetie ke isọn̄ ke udoriukot owo efen. Edi, Abasi ke unana asari ama ọnọ uwa ufak Jesus ke ufọn mbon inyene ye mme ubuene ukem ukem. (Job 34:19; 2 Corinth 5:14) Ntre, edieke nnyịn iyomde ndinem Jehovah esịt nnyụn̄ nnam n̄kpọ esie ke esịt kiet, inaha nnyịn iwụt uma m̀mê ‘ikpek mme owo, iyom ufọn idem nnyịn.’—Jude 4, 16.
Ẹtre Nsụkuyo
8. Nso iketịbe ke ntak nsụkuyo nditọ Israel?
8 Man imụm edidianakiet nnyịn ikama inyụn̄ ika iso inyene mfọn Abasi, ana nnyịn inam item Paul emi: “Ke edinam kpukpru n̄kpọ ẹtre nsụkuyo.” (Philippi 2:14, 15) Mme anana-mbuọtidem nditọ Israel oro ẹkesion̄ode ke ufụn Egypt ẹma ẹsụk Moses ye Aaron uyo, ndien ke ntem ẹkam ẹsụkde Jehovah Abasi uyo. Ke ntak emi, ọtọn̄ọde ke owo isua edịp dọk, ke ẹsiode Joshua ye Caleb ye mme Levite ẹfep, ikodụkke Isọn̄ Un̄wọn̄ọ edi ẹma ẹkpan̄a ke isan̄ isua 40 oro Israel akanamde ke Wilderness. (Numbers 14:2, 3, 26-30; 1 Corinth 10:10) Nso utịp ke mmọ ẹkekpe ntem ke ntak nsụkuyo!
9. Nso iketịbe inọ Miriam ke ntak nsụkuyo esie?
9 Emi owụt se ikemede nditịbe nnọ idụt nsụkuyo. Nso kaban̄a mbon nsụkuyo kiet kiet? Ọfọn, Miriam, adiahaeka Moses ọkọrọ ye Aaron eyeneka esie, ẹma ẹsụk uyo ẹte: “Nte ye Moses ikpọn̄ ke Jehovah osụk ọdọhọ? Nte enye idọhọke ye nnyịn n̄ko?” Mbụk oro adian do ete: “Ndien Jehovah okop.” (Numbers 12:1, 2) Nso ikedi utịp? Abasi ama esuene Miriam, emi nte an̄wan̄ade ekedide andida iso ke nsụkuyo oro. Didie? Ebe ke nditọ enye akpamfia nnyụn̄ nnam enye odu ke edem nna ke usen itiaba tutu ẹnam enye asana.—Numbers 12:9-15.
10, 11. Nsụkuyo oro owo mîbiọn̄ọke ekeme ndisụn̄ọ ke nso? Nam an̄wan̄a.
10 Nsụkuyo idịghe sụk eseme oro ẹsemede ẹban̄a ndusụk idiọk edinam. Mbon oro ẹkọbọde ke ndisụk uyo ẹsida ekikere m̀mê idaha mmọ ke akpan n̄kpọ ẹkaha, ẹdụride ntịn̄enyịn ẹnọ idemmọ utu ke Abasi. Edieke owo mîbiọn̄ọke edu emi, enye esidemede utọk ke otu nditọete eke spirit onyụn̄ ọbiọn̄ọ ukeme oro mmọ ẹsịnde ndinam n̄kpọ Jehovah ke esịt kiet. Emi edi ntre koro mbon nsụkuyo ẹsikokụni kpukpru ini, ẹdoride enyịn mbon en̄wen ndidiana ye mmimọ.
11 Ke uwụtn̄kpọ, owo ekeme ndikụt ndudue nnọ usụn̄ nte ebiowo ọnọde utịn̄ikọ m̀mê nte enye esede aban̄a utom esie ke esop. Edieke nnyịn ikpan̄de utọn̄ inọ owo nsụkuyo oro, nnyịn imekeme nditọn̄ọ ndikere n̄kpọ nte enye ekerede. Ekeme ndidi mme edinam ebiowo oro ikesifịnake nnyịn, edi ke emi ẹma ẹketọ n̄kpasịp unana edikop uyụhọ ke esịt nnyịn mi, mmọ ẹtọn̄ọ ndifịna nnyịn. Ke akpatre, idụhe n̄kpọ ndomokiet oro ebiowo emi edinamde oro edifọnde ke enyịn nnyịn, ndien nnyịn n̄ko imekeme nditọn̄ọ ndisụk enye uyo. Utọ ido emi idotke ke esop ikọt Jehovah.
12. Nso utịp ke nsụkuyo ekeme ndinyene ke itie ebuana nnyịn ye Abasi?
12 Ndisụk iren emi ẹkpemede otuerọn̄ Abasi uyo ekeme ndida nsịm edisụn̄i mmọ. Utọ edisụk uyo m̀mê edisụn̄i oro ekeme ndibiat itie ebuana nnyịn ye Jehovah. (Exodus 22:28) Mbon idiọk ikọ inua oro mîkabakede esịt ididaha Obio Ubọn̄ Abasi inyene. (1 Corinth 5:11; 6:10) Mbet oro Jude ama ewet aban̄a mbon nsụkuyo oro ‘ẹkesịnde mme andikara ke ndek, ẹnyụn̄ ẹsụn̄ide mme akama ikpọ itie,’ m̀mê mme esenyịn ke esop. (Jude 8) Mbon nsụkuyo oro ikenyeneke unyịme Abasi, ndien nnyịn iyowụt eti ibuot ke ndifep idiọk usụn̄ uwem mmọ.
13. Ntak mîdịghe kpukpru eseme ẹdiọk?
13 Nte ededi, idịghe kpukpru eseme ẹsiyat Abasi esịt. Enye ikofụmike “mfiori” aban̄ade Sodom ye Gomorrah edi ama osobo ndiọi obio oro. (Genesis 18:20, 21; 19:24, 25) Ke Jerusalem, esisịt ini ke Pentecost eke 33 E.N. ama ekebe, “mme Jew emi ẹsemde usem Greek [ẹma] ẹsụk mme Hebrew uyo, koro [mîkesehe] mme ebe-akpa mmọ ke ini ẹdemede udia ke usen ke usen.” Nte utịp, “mme apostle duopeba” ẹma ẹnen̄ede idaha oro ke ndimek “owo itiaba, emi ẹnyenede eti enyịn̄” ndise mban̄a “utom” edideme udia. (Utom 6:1-6) Inaha mbiowo eyomfịn ‘ẹsịri utọn̄ mmọ’ ẹbaha edinen eseme. (Mme N̄ke 21:13) Ndien utu ke ndikụt ndudue nnọ ekemmọ mme andituak ibuot, mbiowo ẹnyene ndinam n̄kpọ ke usụn̄ oro ọnọde nsịnudọn̄ onyụn̄ ọbọpde-bọp.—1 Corinth 8:1.
14. Man ifep nsụkuyo, nso edu ke ẹnen̄ede ẹyom?
14 Oyom kpukpru nnyịn ifep nsụkuyo, koro edu edisụk uyo ekeme ndinọ unan ke n̄kan̄ eke spirit. Utọ edu oro ekeme ndibiat emem nnyịn. Utu ke oro, ẹyak nnyịn iyak edisana spirit anam nnyịn ikọri ima kpukpru ini. (Galatia 5:22) Ndinam n̄kpọ ke n̄kemuyo ye ‘ewụhọ ima Edidem’ ayan̄wam nnyịn ndika iso nnam n̄kpọ Jehovah ke esịt kiet.—James 2:8; 1 Corinth 13:4-8; 1 Peter 4:8.
Ẹkpeme Idem ke Edidọk
15. Didie ke afo okpowụt ukpụhọde oro odude ke ufọt ikọ-edem ye edidọk?
15 Sia nsụkuyo ekemede ndida nsịm idiọk ikọ-edem, ana nnyịn ikpeme se itịn̄de. Ikọ-edem edi ikpîkpu ndutịn̄ aban̄ade mme owo ye mbubehe mmọ. Nte ededi, edidọk edi nsunsu ikọ emi ẹtịn̄de ẹban̄a owo ndibiat eti enyịn̄ esie. Utọ ikọ oro ọdiọk onyụn̄ edi ikọ unana uten̄e Abasi. Abasi ke ntre ama ọdọhọ nditọ Israel ete: “Kûsan̄a ubia mbia ke otu mbio-obio mbufo.”—Leviticus 19:16.
16. Nso ke Paul eketịn̄ aban̄a ndusụk mme etịn̄ ikọ-edem, ndien didie ke item esie okpotụk nnyịn?
16 Sia ikpîkpu ndutịn̄ ekemede ndida nsịm edidọk, Paul ama ọsọn̄ọ asua ọnọ ndusụk mme etịn̄ ikọ-edem. Ke ama eketịn̄ aban̄a mme ebeakpa oro odotde esop ẹnọ un̄wam, enye ama etịn̄ aban̄a mme ebeakpa oro ẹkekpepde “ndifu ifu, ẹsan̄a ke ufọk ke ufọk: inyụn̄ idịghe ifu ikpọn̄, edi ẹkabade mbabara ye mbon iban̄a, ẹtịn̄ se mmọ mîkpetịn̄ke.” (1 Timothy 5:11-15) Edieke Christian an̄wan ọfiọkde ete ke imọ imenyene mmeme editịn̄ utọ ikọ oro ekemede ndida nsịm edidọk, enye ayanam ọfọn ndinam item Paul, ndidi ‘owo oro odotde ukpono; mînyụn̄ idịghe owo ebiari.’ (1 Timothy 3:11) Nte ededi, ana iren Christian n̄ko ẹkpeme ẹbiọn̄ọ idiọk ikọ-edem.—Mme N̄ke 10:19.
Ẹtre Ndibiere Ikpe Nnọ Owo!
17, 18. (a) Nso ke Jesus eketịn̄ aban̄a edibiere ikpe nnọ nditọete nnyịn? (b) Didie ke nnyịn ikeme ndida item Jesus aban̄ade edibiere ikpe nnọ owo nsịn ke edinam?
17 Idem Ọkpọkọm nnyịn idọkke owo ekededi edidọk, ẹkeme ndiyom nnyịn isịn ukeme ofụri esịt man ifep ndibiere ikpe nnọ mbon en̄wen. Jesus ama obiom utọ edu oro ikpe ke ini enye ọkọdọhọde ete: “Ẹkûsion̄o owo ndo, [“ẹtre ndibiere ikpe nnọ owo,” NW], mbak ẹdision̄o mbufo ndo [“owo edibiere ikpe ọnọ mbufo,” NW]. Koro nte mbufo ẹsion̄ode owo ndo [“ẹbierede ikpe ẹnọ owo,” NW], kpa ntre ke ẹdision̄o mbufo ndo [“ẹdibiere ẹnọ mbufo,” NW]. Ndien udomo eke mbufo ẹdade ẹdomo, ke ẹdida ẹdomo ẹnọ mbufo. Nsinam afo esede ekpri mbio eke odude ke enyịn eyen-ete fo, edi mûkereke obukpọk oro odude fi ke enyịn? M̀mê edinam didie ọdọhọ eyen-ete fo, ete, Yak nsio fi mbio ke enyịn; ndien sese, obukpọk odu fi ke enyịn. Afo mbubịk! Bem iso sio obukpọk oro ke enyịn fo fep, ndien eyetịm okụt usụn̄ nte adade osio mbio ke enyịn eyen-ete fo efep.”—Matthew 7:1-5.
18 Nnyịn ikpodomoke ndisio ekpri “mbio” ke enyịn eyenete nnyịn man in̄wam enye, ke ini ndamban̄a “obukpọk” ọbiọn̄ọde ukeme nnyịn ndibiere ikpe nte enende. Ke akpanikọ, edieke nnyịn inen̄erede iwụt esịtekọm iban̄a mbọm Abasi, nnyịn idinyeneke ntụhọ edibiere ikpe nnọ nditọete nnyịn eke spirit. Didie ke nnyịn ikpọdiọn̄ọ mmọ ukem nte Ete nnyịn eke heaven? Eyịghe idụhe Jesus okodụride nnyịn utọn̄ ete ‘itre ndibiere ikpe nnọ owo mbak owo edibiere ikpe ọnọ nnyịn’! Edinyene nnennen ekikere mban̄a unana mfọnmma nnyịn ekpenyene ndikpan nnyịn ndibiere ikpe oro Jehovah edidade nte ukwan̄ikpe.
Mmeme N̄kpọ Oro Ẹnyenede Ukpono
19. Didie ke nnyịn ikpese ekemmọ mme andinịm ke akpanikọ?
19 Edieke nnyịn ibierede ndidiana kiet ye ekemmọ mme andituak ibuot nnam n̄kpọ Abasi ke esịt kiet, nnyịn idifepke ndibiere ikpe nnọ mmọ kpọt. Nnyịn iyọsọp ndikpono mmọ. (Rome 12:10) Ke akpanikọ, nnyịn idiyom ufọn mmọ, idịghe eke nnyịn, iyonyụn̄ idat esịt ndinam mme usụhọde utom ke ufọn mmọ. (John 13:12-17; 1 Corinth 10:24) Didie ke nnyịn ikeme ndikọri utọ eti edu oro? Nnyịn ikeme ndinam oro ebe ke nditi nte ke kpukpru mme andinịm ke akpanikọ ẹsọn̄ urua ke enyịn Jehovah ye nte ke nnyịn imoyom kiet eken, kpa nte idem owo emi ndido kiet kiet ẹyomde eken.—1 Corinth 12:14-27.
20, 21. Nso ke mme ikọ 2 Timothy 2:20, 21 ẹwọrọ ẹnọ nnyịn?
20 Edi akpanikọ, mme Christian ẹdi ọtọ-akpa aban̄ mbat oro ẹyakde ubọn̄ ubọn̄ n̄kpọuto emi edide utom ukwọrọikọ ẹsịn ke ubọk. (2 Corinth 4:7) Edieke anade nnyịn inam edisana utom emi ke usụn̄ oro adade itoro ọsọk Jehovah, ana nnyịn inyene eti idaha ye enye ye Eyen esie. Edi n̄kukụre ke ndika iso nsana ke n̄kan̄ ido uwem ye ke n̄kan̄ eke spirit ke nnyịn ikeme ndidi n̄kpọutom emi enyenede ukpono, emi Abasi adade anam n̄kpọ. Ke afan̄ emi, Paul ekewet ete: “Ke akwa ufọk idịghe n̄kpoduoho gold ye n̄kpoduoho silver ikpọn̄ ẹdu, edi se ẹdade eto ye mbat ẹnam ẹnyụn̄ ẹdu; ẹnịm ndusụk mmọ ẹnọ itie ukpono, ẹnyụn̄ ẹnịm mmọ eken ẹnọ usụhọde-itie. Edieke owo adianarede idem ye mbio idiọk ndutịn̄, enye eyedi n̄kpọ-utom emi enyenede ukpono, n̄kpọ-utom emi Abasi anamde asana, emi Ete ufọk ekemede ndida nnam n̄kpọ, emi ẹben̄ede enye ẹnịm ẹnọ kpukpru orụk eti utom.”—2 Timothy 2:20, 21.
21 Mbon oro mîdụhe uwem ekekem ye mme n̄kpọ oro Abasi oyomde ẹdi ‘n̄kpọutom oro mînyeneke ukpono.’ Nte ededi, ke ndibịne usụn̄ uwem Abasi, nnyịn iyedi ‘n̄kpọ-utom emi enyenede ukpono, emi ẹnamde asana m̀mê ẹsiode ẹnịm kaban̄a utom Jehovah ẹnyụn̄ ẹben̄ede ẹnịm ẹnọ kpukpru orụk eti utom.’ Ntre nnyịn imekeme ndibụp idem nnyịn ite: ‘Ndi ami ndi “n̄kpọ-utom emi enyenede ukpono”? Ndi mmenyene eti odudu ke idem ekemmọ mme andinịm ke akpanikọ? Ndi ami ndi andibuana ke esop oro anamde utom ye ekemmọ mme andituak ibuot ke esịt kiet?’
Ẹka Iso Ẹnam N̄kpọ ke Esịt Kiet
22. Ẹkeme ndimen esop Christian ndomo ye nso?
22 Esop Christian etie nte ubon. Ke ini mbonubon ẹtuakde ibuot ẹnọ Jehovah, idaha oro etiede ima ima ye inem inem ẹsidu ke ubon. Ubon ekeme ndisịne mme owo oro ẹnyenede nsio nsio edu, edi kpukpru ẹnyene itie ukpono. Ukem oro ke edi ke esop. Okposụkedi kpukpru nnyịn idide nsio nsio—inyụn̄ idide mme anana-mfọnmma owo—Abasi ada Christ ndidụri nnyịn nda. (John 6:44; 14:6) Jehovah ye Jesus ẹma nnyịn, ndien ukem nte ubon oro adianade kiet, ke akpanikọ oyom nnyịn ima kiet eken.—1 John 4:7-11.
23. Nso ke nnyịn ikpeti inyụn̄ ibiere ndinam?
23 Esop Christian oro etiede nte ubon edi n̄ko ebiet oro nnyịn nte enende idoride enyịn ndikụt edisana ido. Apostle Paul ekewet ete: “Nyom irenowo ndien ẹbọn̄ akam ke kpukpru ebiet, ẹmenede ndisana ubọk ke enyọn̄, ẹkûnyene iyatesịt ye eneni.” (1 Timothy 2:8) Paul ke ntem ama abuan edisana ido ye akam oro ẹbọn̄de an̄wan̄wa “ke kpukpru ebiet” emi mme Christian ẹsopde idem. Sụk irenowo emi ẹnyenede edisana ido ẹkpebọn̄ akam an̄wan̄wa ke ibuot esop. Nte ededi, Abasi odori enyịn kpukpru nnyịn ndinam n̄kpọ ke edisana ido nnọ enye nnyụn̄ nnam nnọ kiet eken. (Ecclesiastes 12:13, 14) Ẹyak nnyịn ke ntre ibiere ndinam utom ọtọkiet ke edidianakiet, ukem nte mme ndido idem owo. Nnyịn n̄ko ikpakam inam utom ke edidianakiet nte ubak ubon mme andituak ibuot nnọ Jehovah. Ke akande kpukpru, ẹyak nnyịn iti nte ke imoyom kiet eken ndien ke iyenyene unyịme ye edidiọn̄ Abasi edieke nnyịn ikade iso ndinam n̄kpọ Jehovah ke esịt kiet.
Didie ke Afo Ọkpọbọrọ?
• Nso in̄wam ikọt Jehovah ndinam n̄kpọ esie ke esịt kiet?
• Ntak emi mme Christian ẹfepde ndinam asari?
• Afo ọkpọdọhọ ke nso ikwan̄a ye nsụkuyo?
• Ntak emi nnyịn ikpokponode ekemmọ mme andinịm ke akpanikọ?
[Mme Mbụme Ukpepn̄kpọ]
[Ndise ke page 15]
Peter ama ọfiọk nte ke “Abasi iten̄eke owo enyịn”
[Ndise ke page 16]
Ndi afo ọmọfiọk ntak emi Abasi ekesuenede Miriam?
[Ndise ke page 18]
Mme anam-akpanikọ Christian ẹdat esịt ndinam n̄kpọ Jehovah ke esịt kiet