Didie ke Nnyịn Ikeme Ndinam Mme Usen Uwem Nnyịn Ẹnyene Se Ẹwọrọde ke Enyịn Jehovah?

“N̄kpọn̄ emi ekebede, ọtọn̄ọde ke ini emi utịn akasiahade esịm ini emi utịn okosopde, ẹma ẹtaba ọsọn̄urua hour iba, emi kiet kiet esịnede ọsọn̄urua minit 60. Owo ikemeke ndifiak nnyene mmọ aba, koro mmọ ẹma ẹbe ẹfep ke nsinsi!” —Lydia H. Sigourney, ewetn̄wed owo America (1791-1865).

MME usen uwem nnyịn iwakke, ẹsinyụn̄ ẹwara ndibe mfep. David andiwet psalm ama ekere aban̄a nte uwem omụhọde onyụn̄ ọbọn̄ akam ete: “O Jehovah, nam mi mfiọk utịt mi, ye idomo mme usen mi, nte ẹtiede; nam mfiọk nte mfụmde. Sese, afo emenịm usen mi nte ekaubọk; eyo mi idịghe baba n̄kpọ kiet ke iso fo.” Se ikebehede David ekedi ndidu uwem ke usụn̄ oro edinemde Abasi esịt ebe ke utịn̄ikọ ye edinam esie. Ke etịn̄de aban̄a ibetedem esie ke Abasi, enye ọkọdọhọ ete: “Mmodori fi enyịn mi.” (Psalm 39:4, 5, 7) Jehovah ama akpan̄ utọn̄. Enye ama onyụn̄ odomo mme edinam David onyụn̄ ọnọ enye utịp nte ekemde ye mme edinam esie.

Edi mmemmem n̄kpọ ndiyọhọ ye utom kpukpru ini ndinyụn̄ ndu uwem oro etiede itọk itọk onyụn̄ ọyọhọde ye edinam. Emi ekeme ndinam nnyịn inen̄ede ikop editịmede esịt, akpan akpan sia inyenede ekese n̄kpọ ndinam edi inyenede ata esisịt ini ndida nnam mmọ. Ndi ọdọn̄ nnyịn nte ọkọdọn̄de David—ndidu uwem ke usụn̄ oro idinyenede unyịme Abasi? Ke nditịm ntịn̄, Jehovah esise onyụn̄ etịm odụn̄ọde nnyịn owo kiet kiet. Ke n̄kpọ nte isua 3,600 emi ẹkebede, Job, eren oro akabakde Abasi, ama enyịme ete ke Jehovah ama okụt usụn̄ imọ onyụn̄ odụn̄ọde kpukpru edinam imọ. Job ama obụp ete: “Ndinyụn̄ mbọrọ enye didie ke ini obụpde?” (Job 31:4-6, 14) Nnyịn ikeme ndinam mme usen uwem nnyịn ẹnyene se ẹwọrọde ke enyịn Abasi ebe ke ndinịm mme n̄kpọ eke spirit akpa, ndisụk ibuot nnọ mme ewụhọ esie, ndinyụn̄ nda ini nnyịn nnam n̄kpọ ọniọn̄ ọniọn̄. Ẹyak nnyịn itịm idụn̄ọde mme n̄kpọ emi.

Ndinam Mme N̄kpọ eke Spirit Ẹdi Akpan N̄kpọ Oro Ẹbehede Nnyịn

Nte enende, N̄wed Abasi eke odudu spirit esịn udọn̄ ọnọ nnyịn ndinịm mme n̄kpọ eke spirit akpa ke ini ọdọhọde ete: ‘Ẹdomo ẹfiọk se [“idide akpan n̄kpọ,” NW] ikan.’ Nso idi akpan n̄kpọ emi? Emi abuana “ifiọk ye kpukpru ikike.” (Philippi 1:9, 10) Ndinyene ifiọk mban̄a uduak Jehovah oyom ete ida ini nnyịn inam n̄kpọ ọniọn̄ ọniọn̄. Nte ededi, ndinam mme n̄kpọ eke spirit ẹdi akpan n̄kpọ oro ẹbehede nnyịn ayanam nnyịn idu uwem oro enyenede se ọwọrọde onyụn̄ ọnọde uyụhọ.

Apostle Paul eti nnyịn ete ‘idomo ifiọk se itịmde inem Ọbọn̄ esịt.’ Ndidomo mfiọk se itịmde inem Ọbọn̄ esịt, abuana nnyịn ndidụn̄ọde mme uduakesịt nnyịn. Apostle oro aka iso ete: “Ẹtịm ẹfiọk se Ọbọn̄ amade.” (Ephesus 5:10, 17) Ntre, nso isinem Ọbọn̄ esịt? N̄ke Bible kiet ọbọrọ ete: “Ata akpan n̄kpọ edi eti ibuot; nyene eti ibuot: nyụn̄ nyene asian ye ofụri inyene fo. Kpono enye, ndien enye oyofori fi.” (Mme N̄ke 4:7, 8) Jehovah esidat esịt aban̄a owo emi enyenede onyụn̄ owụtde eti ibuot emi otode Abasi. (Mme N̄ke 23:15) Utọ eti ibuot emi ọfọn koro owo ikemeke  ndiyịp m̀mê ndibiat enye. Ke nditịm ntịn̄, enye esikpeme owo osio ke ‘idiọk usụn̄ ye ke ubọk mbon oro ẹtịn̄de n̄kwan̄a.’—Mme N̄ke 2:10-15.

Do, owụt eti ibuot didie ntem ndibiọn̄ọ ntụhọ ekededi ndida mme n̄kpọ eke spirit didie didie! Oyom nnyịn ikọri edu ediwụt esịtekọm nnọ mme ikọ Jehovah nnyụn̄ nnyene eti mbak nnọ enye. (Mme N̄ke 23:17, 18) Ke adan̄aemi ẹkemede ndinyene utọ idaha ekikere emi ini ekededi ke uwem, enen̄ede ọfọn nditọn̄ọ ke ini uyen nnyene nnennen idaha ekikere emi nnyụn̄ nda mme edumbet Bible nsịn ke edinam. Enyene-ọniọn̄ Edidem Solomon ọdọhọ ete: “Nyụn̄ ti Andibot fi ke ini afo edide akparawa.”—Ecclesiastes 12:1.

Ata ntotụn̄ọ usụn̄ ndikọri esịtekọm nnọ Jehovah ebe ke ndibọn̄ akam nnọ enye kpukpru usen. David ama ọfiọk nte edin̄wan̄a esịt nnọ Jehovah edide akpan n̄kpọ, koro enye ama eben̄e ete: “O Jehovah, kop n̄kpeubọk mi, nyụn̄ kpan̄ utọn̄ ke eseme mi; kûdop uyo unọ mmọn̄eyet mi.” (Psalm 39:12) Nte n̄kpet n̄kpet itie ebuana oro inyenede ye Abasi esinen̄ede otụk nnyịn ndusụk ini esịm udomo oro mmọn̄eyet asiahade nnyịn ke enyịn? Ke akpanikọ, adan̄a nte in̄wan̄ade esịt nnyịn inọ Jehovah inyụn̄ itiede ikere Ikọ esie, ntre ke enye etetịm asan̄a ekpere nnyịn.—James 4:8.

Ẹkpep Nsụkibuot

Moses ekedi eren mbuọtidem efen oro ekeberide edem ke Abasi. Ukem nte David, Moses ama ekeme ndikụt ke uwem ọyọhọ ye mfịna. Ke ntre, enye ama eben̄e Abasi ete anam imọ ifiọk ‘ndibat usen imọ, man imọ ida esịt ifiọk idi.’ (Psalm 90:10-12) Ẹkeme ndinyene esịt ifiọk n̄kukụre ke ndikpep nnyụn̄ ndu uwem ekekem ye mme ibet ye edumbet Jehovah. Moses ama ọfiọk emi ndien nte ini akakade enye ama odomo ndinam idụt Israel eti n̄wọrọnda akpanikọ oro ebe ke ndifiak nsian mmọ mme ibet ye mme ewụhọ Abasi mbemiso mmọ ẹkedade Isọn̄ Un̄wọn̄ọ ẹnyene. Edidem ekededi oro Jehovah emekde ke ukperedem ete akara Israel ekenyene ndision̄o Ibet n̄wet ke idemesie nnyụn̄ n̄kot enye ke kpukpru usen uwem esie. Ntak-a? Man enye ekpekpep ndibak Abasi. Emi ekenyene ndisịn nsụkibuot edidem ke udomo. Emi ekenyene ndikpeme enye mbak enye edimenede esịt esiemmọ akan nditọete esie, okonyụn̄ enyene ndinam mme usen ukara esie ẹbịghi. (Deuteronomy 17:18-20) Jehovah ama afiak ọsọn̄ọ un̄wọn̄ọ emi ke ini enye ọkọdọhọde Solomon, eyen David ete: “Edieke afo edisan̄ade ke usụn̄ mi, onyụn̄ enịm mme ewụhọ mi, ye mbet mi, kpa nte David usọ akasan̄ade, nyanam mme usen fo ẹbịghi.”—1 Ndidem 3:10-14.

Abasi abat nsụkibuot ke ata akpan n̄kpọ. Edieke nnyịn ikpesede ndusụk n̄kpọ oro Jehovah oyomde oto nnyịn ye mme ewụhọ esie ke usụhọde, ke akpanikọ enye okpokụt utọ edu oro. (Mme N̄ke 15:3) Ndifiọk emi ekpenyene ndinụk nnyịn ndika iso nda kpukpru item Jehovah ke ata ọsọn̄urua n̄kpọ, idem okposụkedi ndinam oro mîdidịghe mmemmem n̄kpọ kpukpru ini. Satan esinam kpukpru se enye ekemede ‘ndibiọn̄ọ nnyịn’ nte nnyịn idomode ndinịm mme ibet ye mme ewụhọ Abasi.—1 Thessalonica 2:18.

Enen̄ede edi akpan n̄kpọ ndinam item N̄wed Abasi oro ọdọhọde ete isop idem ọtọkiet kaban̄a utuakibuot ye ebuana ọtọkiet. (Deuteronomy 31:12, 13; Mme Hebrew 10:24, 25) Ntre nnyịn iyanam ọfọn ndibụp idem nnyịn: ‘Ndi mmenyene iwụk ye ifịk oro ẹyomde man n̄ka iso nnam se inen̄erede idot?’ Ndisịn ndisop idem ọtọkiet nnyụn̄ mbọ item ke mme mbono esop Christian ke ntak oro isịnde ukeme ndiyom ifụre oro okụk ọnọde ekeme ndinam itie ebuana nnyịn ye  Jehovah emem. Apostle Paul ekewet ete: “Ẹkûkọmọ ke ima inyene; ẹnem-esịt ye se mbufo ẹnyenede; koro Abasi ọdọhọde ete, Ndikpụhu fi, ndinyụn̄ n̄kpọn̄ke fi.” (Mme Hebrew 13:5) Ndisụk ibuot unyịme unyịme nnọ mme ewụhọ Jehovah owụt ke nnyịn imenyene ọyọhọ mbuọtidem nte ke enye eyese aban̄a nnyịn.

Jesus ama ekpep nsụkibuot onyụn̄ ọbọ ufọn oto oro. Ntre nnyịn imekeme. (Mme Hebrew 5:8) Adan̄a nte nnyịn ikọride edu nsụkibuot, ntre ke edimem utom ọnọ nnyịn ndisụk ibuot, idem ke n̄kpri n̄kpọ. Edi akpanikọ, ke ntak nsọn̄ọnda nnyịn, ekeme ndidi nnyịn iyosobo idiọk ye idem ibak ibak edinam ke ubọk mbon en̄wen. Emi ekeme ndinen̄ede ntịbe ke itieutom, ke ufọkn̄wed, m̀mê ke ubon oro abaharede ke n̄kan̄ ido ukpono. Kpa ye oro, nnyịn imokop ndọn̄esịt ito se ẹketịn̄de ẹnọ nditọ Israel nte ke edieke mmọ ‘ẹmade Jehovah, ẹnyụn̄ ẹkopde uyo esie ẹnyụn̄ ẹyịrede ye enye, ke enye eyedi uwem mmọ, ye uniọn̄ mme usen mmọ.’ (Deuteronomy 30:20) Ẹn̄wọn̄ọ ukem emi ẹnọ nnyịn.

Ẹda Ini Ẹnam N̄kpọ Ọniọn̄ Ọniọn̄

Ndida ini nnyịn nnam n̄kpọ ọniọn̄ ọniọn̄ ayan̄wam nnyịn n̄ko ndinam mme usen uwem nnyịn ẹnyene se ẹwọrọde ke enyịn Jehovah. Sia mîtiehe nte okụk oro ẹkemede ndifam nnịm, ana ẹda ini ẹnam n̄kpọ mîdịghe ini oro eyebe. Kpukpru hour oro ẹbede ẹbe ẹfep ke nsinsi. Sia nnyịn kpukpru ini isinyenede ekese ndinam, ndi ke ida ini nnyịn inam n̄kpọ man iyọhọ uduak nnyịn ke uwem? Akpan uduak kpukpru Christian ekpedi ndibuana kpukpru ini ke utom edikwọrọ Obio Ubọn̄ ye edinam mbet.—Matthew 24:14; 28:19, 20.

Nnyịn ikeme ndida ini nnyịn nnam n̄kpọ ọniọn̄ ọniọn̄ n̄kukụre ke ima iketịm ifiọk ufọn esie. Ephesus 5:16 esịn udọn̄ ọnọ nnyịn nte odotde ete ‘idedep ifet,’ ndien emi ọwọrọ ndiyak mme  n̄kpọ emi mînen̄ekede idi akpan n̄kpọ ẹtak. Enye ọwọrọ ndisụhọde ini oro isịnde ke ndibịne mme n̄kpọ oro ẹsidiade ini. Ebeubọk edise ekebe ndise m̀mê edidụn̄ọde Intanet, edikot mme n̄wed ererimbot oro mînyeneke ufọn, m̀mê edisịn idem ke ebeubọk unọ idem nduọkodudu ye inemesịt, ẹkeme ndinam nnyịn ikpa mba. Adianade do, ebeubọk edikọ inyene obụkidem ekeme ndidia ini oro ikpesịnde ndinyene esịt ifiọk.

Mbon oro ẹsịnde udọn̄ ẹnọ edida ini nnam n̄kpọ nte ọfọnde ẹdọhọ ẹte: “Owo ikemeke ndida ini esie nnam n̄kpọ nte ọfọnde edieke enye mînịmke nti utịtmbuba.” Mmọ ẹnọ ekikere ẹban̄a n̄kpọ ition oro ẹyomde man ẹnịm utịtmbuba: akpan utịtmbuba, enye oro enyenede udomo, enye oro ẹkemede ndisịm, enye oro edide ata idem n̄kpọ, ye enye oro enyenede ini oro anade ẹsịm.

Eti utịtmbuba kiet edi ndifori edu ukot Bible nnyịn. Akpa usio-ukot edi ndinịm akpan utịtmbuba—ndikot ofụri Bible. Udiana usio-ukot edi ndidomo utịtmbuba nnyịn. Ke ndinam emi, nnyịn imekeme ndise m̀mê nnyịn ke inam n̄kọri. Mme utịtmbuba ẹkpenyene ndinam nnyịn isịn̄ede idem inyụn̄ inam n̄kọri. Ana mmọ n̄ko ẹdi ata idem n̄kpọ ye se ikemede ndisịm. Ana ẹkere ẹban̄a ọkpọkpọ ukeme, usọ, ye ini oro odude. Ndusụk owo ẹkeme ndiyom ini efen efen man ẹsịm utịtmbuba. Ke akpatre, oyom nnyịn inịm ini oro idisịmde utịtmbuba oro. Ndinịm ini ndikụre n̄kpọ ekeme ndinen̄ede nnụk nnyịn ndisọp n̄kụre n̄kpọ oro.

Kpukpru mbonubon Bethel ofụri ererimbot, emi ẹnamde utom ke ibuot itieutom ofụri ererimbot eke Mme Ntiense Jehovah m̀mê ke kiet ke otu n̄kọk itieutom mmọ ke ofụri ererimbot, ẹnyene akpan utịtmbuba ndikot ofụri Bible ke akpa isua oro mmọ ẹdude ke Bethel. Mmọ ẹfiọk ẹte ke edikot Bible oro enyenede ufọn eyetịp esịn ke n̄kọri eke spirit mmimọ onyụn̄ anam mmimọ inyene ata n̄kpet n̄kpet itie ebuana ye Jehovah emi ekpepde mmimọ usụn̄ udori. (Isaiah 48:17) Ndi nnyịn n̄ko imekeme ndinam edikot Bible ofụri ini edi utịtmbuba nnyịn?

Mme Ufọn Ẹtode Edinam Mme Usen Uwem Nnyịn Ẹnyene Se Ẹwọrọde

Ndinam mme n̄kpọ eke spirit ẹdi akpa ke uwem nnyịn oyosụn̄ọ ke ediwak edidiọn̄. Edidiọn̄ kiet edi ke enye eyetịp esịn ke nnyịn ndikop uyụhọ ke se inamde oyonyụn̄ anam uwem nnyịn enyene se ọwọrọde. Ndineme nneme ye Jehovah kpukpru ini ke akam ofụri esịt anam nnyịn itịm isan̄a ikpere enye. Nnyịn ndibọn̄ akam owụt nte ke nnyịn imọbuọt idem ye enye. Ndikot Bible ye mme n̄wed ẹkọn̄ọde ke Bible oro “asan̄autom emi anamde akpanikọ, onyụn̄ enyenede ọniọn̄” ọnọde, kpukpru usen, owụt ke nnyịn imenyịme ndikpan̄ utọn̄ nnọ Abasi ke ini enye etịn̄de ikọ ọnọ nnyịn. (Matthew 24:45-47) Emi an̄wam nnyịn ndinyene esịt ifiọk man ikeme ndinam nnennen ubiere ye edimek ke uwem.—Psalm 1:1-3.

Nnyịn imadat esịt ndinịm mme ewụhọ Jehovah, koro ndinam ntre ibiakke owo idem. (1 John 5:3) Nte nnyịn inamde usen kiet kiet enyene se ọwọrọde ke enyịn Jehovah, nnyịn isọn̄ọ itie ebuana nnyịn ye enye. Nnyịn n̄ko ikabade idi ata un̄wam eke spirit inọ ekemmọ mme Christian. Mme utọ edinam emi ẹnam esịt Jehovah Abasi adat. (Mme N̄ke 27:11) Ndien idụhe utịp okponde akan edinyene unyịme Jehovah idahaemi ye ke nsinsi!

[Ndise ke page 21]

Mme Christian ẹbat mme n̄kpọ eke spirit ke akpan n̄kpọ

[Mme ndise ke page 22]

Ndi afo ke ada ini fo anam n̄kpọ ọniọn̄ ọniọn̄?

[Ndise ke page 23]

Nnyịn isọn̄ọ itie ebuana nnyịn ye Jehovah nte inamde usen kiet kiet enyene se ọwọrọde ke enyịn esie