Mme Edinam Oro Ẹsịnde Udọn̄ Ẹnọ Nti Ido Uwem

Ke utịt utịt 2001, mbon oro ẹkekpan̄de utọn̄ ke mbụk n̄kpọntịbe idụt emi ẹkesuande ke Radio Mozambique ẹma ẹkop ntọt emi:

“Adaibuot ukara idụt emi ama aka ekese mme ufọkutom n̄kọk itieutom Mme Ntiense Jehovah ke Maputo. Enye ama esịn udọn̄ ọnọ esop ido ukpono emi ete etetịm esịn ukeme ke ndisịn udọn̄ nnọ mme ubon ndinyene nti ido uwem ye ke ndida ndutịm mmọ oro ẹkpepde nte ẹkotde n̄wed ẹnyụn̄ ẹwetde n̄kpọ, nnọ ikpọ owo ukpep. N̄kpọ nte owo 10,000 ẹbọbọ ufọn ẹto ndutịm emi. Nte Chissano, adaibuot ukara idụt oro ọdọhọde, ẹkpenyene nditoro mme utọ edinam emi koro mmọ ẹnen̄ede ẹtịp ẹsịn ke edikọk mfịna unana ifiọkn̄wed oro idụt emi osụk enyenede.”

Ntọt oro ama aka iso ye ndusụk utịn̄ikọ adaibuot ukara oro ẹtienede mi, oro ẹkemụmde ẹsịn ke ọkpọ umụmikọ: “Enen̄ede edi n̄kpọ nsịnudọn̄ ọnọ nnyịn ndikụt udọn̄ oro ediwak owo ẹnyenede ke ndinam mme owo ẹkeme ndikot n̄wed nnyụn̄ n̄wet n̄kpọ. Emi owụt nte ke mbio obio ẹmọn̄ ẹn̄wam nnyịn ndinam ediwak owo ẹfiọk ndikot n̄wed nnyụn̄ n̄wet n̄kpọ. Ke ntre, n̄kpama ndisịn udọn̄ nnọ Mme Ntiense Jehovah nditetịm nsịn ukeme ke ndinam mme owo ẹfiọk ndikot n̄wed nnyụn̄ n̄wet n̄kpọ, ke usem ekededi. Se inen̄erede idi akpan n̄kpọ edi ndikụt nte ke mme owo ẹkeme ndikot n̄wed nnyụn̄ n̄wet n̄kpọ ye nte ke mmọ ẹkeme ndineme nneme mmemmem mmemmem, ndien nte ini akade ẹtiene ẹbuana akamba akamba ke unọ ukpep emi.”

Mme Ntiense Jehovah ke Mozambique ẹsinịm ufọkn̄wed emi ẹkpepde nte ẹkotde n̄wed ẹnyụn̄ ẹwetde n̄kpọ ke itie 850 ke ofụri idụt oro man mme owo ẹkeme ndikot Ikọ Abasi ke idemmọ. Ke adianade do, mmọ ẹsinịm n̄kpọ nte ukpepn̄kpọ Bible mfọn 50,000 kpukpru urua. Kpukpru emi edi ubak ndutịm unọ ukpep Bible ofụri ererimbot oro ẹnamde ke idụt 235 idahaemi. (Matthew 24:14) Afo n̄ko emekeme ndibọ ufọn nto ndutịm emi. Mbọk kûmen̄e ndisobo ye Mme Ntiense Jehovah ke n̄kann̄kụk fo.