Mme Mbụme Ẹtode Mme Andikot

Ndi akan̄a oro ẹkan̄ade ẹnọ Abasi esibọp owo ke nsinsi?

Ke N̄wed Abasi, akan̄a edi akpan un̄wọn̄ọ ẹnamde ẹnọ Abasi ndinam n̄kpọ, ndiwa uwa, ndidụk utom m̀mê ediomi, mîdịghe ndibet ndusụk n̄kpọ oro ke idemmọ mîdiọkke. Bible ọdọn̄ọ mme mbụk ẹban̄ade akan̄a oro ọkọkọn̄ọde ke idaha, koro mmọ ẹma ẹbuana un̄wọn̄ọ nditiene akpan usụn̄ uwem edieke Abasi ekebemde iso anam n̄kpọ. Ke uwụtn̄kpọ, Hannah eka prọfet Samuel ama “akan̄a akan̄a, onyụn̄ ọdọhọ ete, Jehovah mme udịm, edieke afo . . . mûnyụn̄ ufreke eyen fo an̄wan, edi ama ọnọ eyen fo an̄wan eyen-eren, nyada enye nnọ Jehovah kpukpru usen uwem esie, ndien akadan̄ iditụkke enye ibuot.” (1 Samuel 1:11) Bible etịn̄ n̄ko ke ẹsikan̄a akan̄a ke imaesịt. Akan̄a oro ẹkan̄ade ẹnọ Abasi esibọp owo ebịghi adan̄a didie?

Edidem Solomon eke Israel eset ọdọhọ ete: “Adan̄aemi afo akan̄ade akan̄a ọnọ Abasi, kûbebịghi ndinọ enye.” Enye adian do ete: “Nọ se afo akan̄ade. Ọfọn nte etrede ndikan̄a, akan nte akan̄ade, ndien etre ndinọ.” (Ecclesiastes 5:4, 5) Ibet oro ẹkenọde nditọ Israel ebe ke Moses ọdọhọ ete: “Ke adan̄aemi afo edikan̄ade akan̄a ọnọ Jehovah Abasi fo, kûbịghi ndisio enye: koro Jehovah Abasi fo mîditreke ndiyom enye ke ubọk fo; ndien afo eyedue isop.” (Deuteronomy 23:21) Nte an̄wan̄ade, ndikan̄a akan̄a nnọ Abasi edi ata akamba n̄kpọ. Ẹkpenyene ndikan̄a akan̄a ye eti ntak, ndien owo oro akan̄ade akan̄a ikpeyịkke m̀mê imọ iyekeme ndisio se ededi oro imọ ikakan̄ade. Mîdịghe ntre, ọfọn enye nditre ndikan̄a. Edi, ndi kpukpru akan̄a ẹsibọp owo ke ndondo oro ẹkan̄ade?

Nso edieke akan̄a oro owo akakan̄ade okoyomde owo anam n̄kpọ oro enye ke ukperedem edide edifiọk nte ke idụhe ke n̄kemuyo ye uduak Abasi? Nso edieke emi ekedide akan̄a oro ke ndusụk usụn̄ edinamde ẹbuan oburobụt ido ye utuakibuot akpanikọ? (Deuteronomy 23:18) Nte an̄wan̄ade, utọ akan̄a oro ibọpke owo. Akan oro, ke idak Ibet Moses, ebe m̀mê ete ama esikeme ndibiat akan̄a oro n̄wan m̀mê eyen esie an̄wan akakan̄ade.—Numbers 30:3-15.

Kere n̄ko ban̄a owo oro akakan̄ade akan̄a ọnọ Abasi nditre ndidọ ndọ edi oro idahaemi ekikere esie asiahade iba. Idaha oro enye odude anam enye ekere ke ndinam se imọ ikakan̄ade oro ekeme ndinam imọ ibiat ibet Abasi aban̄ade eti ido uwem. Ndi akpana enye osụk odomo ndinam se enye akakan̄ade oro? Nte ikpetịmke ifọn enye ndikpeme idemesie nsio ke idaha ediduọ ndụk oburobụt ido ke nditre ndinam se enye akakan̄ade oro, ndien utu ke oro eben̄ede Abasi ete atua imọ mbọm onyụn̄ efen ọnọ imọ ke nditre ndinam se ikakan̄ade? Enye ikpọn̄ ekeme ndinam ubiere enye emi. Owo ndomokiet ikemeke ndinam ubiere emi nnọ enye.

Nso edieke owo edide edifiọk ke ukperedem ete imọ ikakan̄a akan̄a ke ibụmede? Ndi akpana enye osụk osio akan̄a oro? Ikedịghe mmemmem n̄kpọ inọ Jephthah ndisio akan̄a oro enye akakan̄ade ọnọ Abasi, edi enye ama anam oro ke ofụri esịt. (Judges 11:30-40) Owo nditre ndisio akan̄a ekeme ndinam Abasi ‘ayat esịt’ onyụn̄ abiat se enye akanamde. (Ecclesiastes 5:6) Ndida n̄kpọ aban̄ade edisio akan̄a  mfefere mfefere ekeme ndida nsịm owo nditaba mfọn Abasi.

Jesus Christ ọkọdọhọ ete: “Edi ẹyak ikọ mbufo edi Edi ntre, ye, Idịghe ntre: koro se ibede oro oto ke andidiọk.” (Matthew 5:37) Inaha Christian ekere kpọt aban̄a edisio akan̄a nnọ Abasi edi ana enye ekere n̄ko aban̄a ndinam kpukpru ikọ oro enye etịn̄de—ọnọ Abasi ye mme owo—ẹdi se ẹkemede ndiberi edem. Nso edieke enye odude ke nnanenyịn ke ntak ediomi oro enye okodụkde, oro ke akpa eketiede nte ọfọn edi ke etịmde anam ndụn̄ọde enye edikụt ke ifọnke? Enye ikpadaha mme utọ n̄kpọ emi mfefere mfefere. Edi ke ẹma ẹkenyene nneme ofụri esịt, owo enye eken ekeme ndibiere ndinam akan̄a oro okûbọp enye.—Psalm 15:4; Mme N̄ke 6:2, 3.

Nso ikpenen̄ede ibehe nnyịn ke se iban̄ade akan̄a ye mme n̄kpọ en̄wen? Ẹyak nnyịn kpukpru ini ika iso iyom ndinyene eti itie ebuana ye Jehovah Abasi.

[Mme ndise ke page 30, 31]

Hannah ikemen̄eke ndisio akan̄a esie

[Mme ndise ke page 30, 31]

Jephthah ama osio akan̄a esie, okposụkedi ndinam emi mîkedịghe mmemmem n̄kpọ