Enọ Ndịbentua

“ẸMEKEME ndikot mi eben̄e-eben̄e; oro ifịnake mi. Ami mben̄e eben̄e nnọ Jesus.” In̄wan̄-in̄wan̄ ikọ asan̄autom Protestant emi owụt eneni oro odude ke nte ẹkpenyenede okụk ẹse ẹban̄a ido ukpono. Etie nte ido ukpono oro ẹtịmde-tịm ekeme ndika iso ndu n̄kukụre ebe ke nditịp ediwak okụk. Ana ẹkpe okụkọfiọn̄, ẹbọp ẹnyụn̄ ẹse ẹban̄a mme temple ẹnyụn̄ ẹnyene okụk ndida nse mban̄a ubịnikọt ukwọrọikọ. Didie ke ẹkeme ndinyene okụk oro ẹyomde?

Ediwak ufọkabasi ẹnyene okụk emi ẹto edibọ ọyọhọ mbak duop. * Ọkwọrọikọ oro Norman Robertson ọdọhọ ete ke “edibọ ọyọhọ mbak duop edi usụn̄ oro Abasi adade anam ẹnyene okụk ndise mban̄a obio ubọn̄ Esie ke isọn̄. Emi edi ndutịm oro Enye anamde man ẹnyene okụk ndida n̄kwọrọ Gospel.” Ke mîkopke bụt nditi mme anditiene enye mban̄a mbiomo oro mmọ ẹnyenede nditịp etịbe, enye esitịn̄ ye nsọn̄uyo ete: ‘Ọyọhọ mbak duop idịghe enọ oro afo ọnọde koro ekemede ndinọ. Enye edi edinam nsụkibuot. Nditre ndinọ ọyọhọ mbak duop edi in̄wan̄-in̄wan̄ edibiat ewụhọ Abasi. Enye edi n̄wo.’—Tithing—God’s Financial Plan.

Eyedi afo emenyịme nte ke ndinọ enọ ekpedi ubak utuakibuot Christian. Nte ededi, ndi uyịre uyịre edidọhọ ẹnọ okụk esifịna fi, ndusụk akam ayatde fi esịt? Inácio Strieder, ekpep ukpepn̄kpọ ido ukpono owo Brazil ọduọhọ mme ufọkabasi ke ndibọ ọyọhọ mbak duop man ẹda “ẹkọk mme mfịna ufọkabasi” onyụn̄ okot mme utọ edinam oro “se mîkemke ye ibet, n̄wo, ye ediwọn̄ọde n̄kpọn̄ ukpepn̄kpọ ido ukpono.” Enye ọdọhọ ete ke utịp edi nte ke ẹnam “mbon oro mînyeneke utom, mme ebeakpa, mme ubuene emi ẹdụn̄de ke ntaha ufọk, ye mbon oro mîkemeke ndikọk ibuot, ẹkere ke Abasi ọkpọn̄ mmimọ ye nte ke ẹnyịk mmimọ ndinọ ‘ọkwọrọikọ’ enọ tutu ubon mmimọ ẹkpa biọn̄.”

Afo emekeme ndikere ete: ‘Ndi mme ufọkabasi oro ẹnyịkde mme owo ẹnọ ọyọhọ mbak duop ẹda se N̄wed Abasi etịn̄de ẹnam n̄kpọ nte enende? Mîdịghe nte ekeme ndidi ndusụk ido ukpono ẹnam otuerọn̄ mmọ ẹkop ndịk Abasi man ẹwo mmọ? Nte Abasi enen̄ede oyom nnyịn inọ enọ ndịbentua?’

[Ikọ idakisọn̄]