Ke Okpokoro Etubom Nsụn̄ikan̄
Ke Okpokoro Etubom Nsụn̄ikan̄
MME owo oro ẹnemde itie, nti udia, ye inem inem nneme ẹsinam udia oro ẹnọde ke okpokoro etubom nsụn̄ikan̄ enen̄ede enem. Edi nneme oro ẹkenemede ke okpokoro udia Etubom Robert G. Smith, emi esiwatde nsụn̄ikan̄ White Star Line, anam ẹnen̄ede ẹdiọn̄ọ akamba udia eke spirit.—Isaiah 25:6.
Ke 1894, ke edide isua 24 ke emana, Robert ama akabade edi etubom nsụn̄ikan̄ Kinclune of Dundee onyụn̄ anam akpa isan̄ esie akanade ererimbot. Ke ukperedem, enye ama awat nsio nsio nsụn̄ikan̄ White Star, utọ nte Cedric, Cevic, ye Runic. * Ke adan̄aemi enye akawatde kiet ke otu nsụn̄ikan̄ emi oto New York ebe Inyan̄ibom Atlantic aka Liverpool, England, Robert ama okot Charles Taze Russell emi okodude ke nsụn̄ikan̄ oro ete edidia udia ke okpokoro imọ. Nneme oro Robert ekenyenede ye Russell ama edemede udọn̄ esie ke etop Bible, ndien man an̄wam enye ndifiọk n̄kpọ efen efen, enye ama okop inemesịt ndibọ Russell mme eboho Studies in the Scriptures.
Russell ama aka iso ndida leta nnyene nneme ye enye, ndien nte utịp, udọn̄ oro Robert ekenyenede ke etop Bible ama ọkọri. Robert ama abuana obufa ifiọk esie ye n̄wan esie. Ikebịghike mmọ mbiba ẹma ẹkabade ẹdi ifịk ifịk Nditọ Ukpepn̄kpọ Bible, nte ẹkediọn̄ọde Mme Ntiense Jehovah ini oro. Ke ukperedem, Robert ama enyene ifet edinọ mme utịn̄ikọ Bible. Ke uwụtn̄kpọ, ke Brisbane, Australia, enye ama ọnọ utịn̄ikọ ke ibuotikọ emi “The Balm of Gilead” (Balm Gilead) onyụn̄ owụt nte ke Ikọ Abasi esịne etop oro edide “editịbe kpukpru afanikọn̄ isọn̄.” Ko ke England, n̄wan ye n̄kpri nditọ esie ẹma ẹn̄wam ndiwụt mme owo ndise “Photo-Drama of Creation,” ẹnyụn̄ ẹbre mme utịn̄ikọ Russell oro ẹkemụmde ẹdọn̄ ke usanikwọ nte ẹkesụk ẹwụtde mme ndise oro.
Robert ama ayak akpanikọ Obio Ubọn̄ oro enye ọkọbọde ọnọ nditọ esie. Mfịn, emana ition ke ukperedem, mbonubon esie 18 ẹbuana eti mbụk ifịk ifịk ye mbon en̄wen, ẹwụtde esịtekọm ẹban̄a udia oro ẹkenọde ke okpokoro etubom nsụn̄ikan̄.
Ebede ke mme n̄wed ye utom unọ ukpep Bible mmọ, Mme Ntiense Jehovah ke ẹn̄wam mme owo ke ofụri ererimbot ndikop etop Bible oro ekedemerede Etubom Smith, udọn̄. Afo n̄ko emekeme ndidụn̄ọde mfiọk se ikenen̄erede inem ntre ke okpokoro etubom nsụn̄ikan̄.
[Ikọ idakisọn̄]
^ ikp. 3 Etubom E. J. Smith (emi mîbuanake n̄kpọ ye Robert Smith) akawat ukem nsụn̄ikan̄ oro, ẹkekotde Titanic, oro ekesịpde ke akpa isan̄ esie.
[Ndise ke page 8]
Robert G. Smith
[Ndise ke page 8]
Charles T. Russell