Mfọnn̄kan Ini Ndidu Uwem

KE INI osobode n̄kpọsọn̄ idaha, nte esidọn̄ fi ndikụt eset oro n̄kpọ ọkọfọnde? Do, kere ban̄a mme ikọ enyene-ọniọn̄ Edidem Solomon emi: “Kûdọhọ ete, Nsinam eyo oko ọfọnde akan emi? Koro afo mûdaha eti ibuot ubụp uban̄a n̄kpọ emi.”—Ecclesiastes 7:10

Ntak emi Solomon ọkọnọde item emi? Koro enye ama ọfiọk ete ke ndinyene nnennen ekikere mban̄a eset ekeme ndinen̄ede n̄n̄wam ke ndiyọ ndiọi idaha eke idahaemi. Mbon oro esidọn̄de mmọ ndikụt eset oro n̄kpọ ọkọfọnde ẹkeme ndinen̄ede mfre nte ke eyo oro n̄ko ẹkeyọhọ ye mme mfịna ye afanikọn̄ ye nte ke uwem ikenen̄ekede ifọn. Ekeme ndidi ndusụk n̄kpọ ẹma ẹfọn ke eset, edi enen̄ede etie nte mme n̄kpọ eken ikọfọnke. Nte Solomon eketịn̄de, eti ibuot idụhe ke ndikere mban̄a eset nte mîdotke, sia anade in̄wan̄-in̄wan̄ nte ke nnyịn ikemeke ndifiak n̄kodu ke eset.

Nte ndinen̄ede nnyene udọn̄ mban̄a eset ekeme ndinọ unan ekededi? Ih, edieke enye mîyakke nnyịn ikpụhọde ida ekekem ye mme idaha oro nnyịn idude ke emi, mîdịghe edieke enye ọbiọn̄ọde nnyịn ndifiọk nnyụn̄ n̄wụt esịtekọm mban̄a ini oro nnyịn idude uwem idahaemi ye idotenyịn oro nnyịn ikemede ndinyene.

Ke akpanikọ, idahaemi edi mfọnn̄kan ini ndidu uwem, kpa ye oro mme mfịna ererimbot ẹkade-ka iso ndikọri. Ntak-a? Koro nnyịn imekpere ini oro uduak Abasi kaban̄a isọn̄ nnyịn edisude ye mme edidiọn̄ ẹtode emem emem ukara Obio Ubọn̄ esie. Bible ọn̄wọn̄ọ ete: “Enye ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.” (Ediyarade 21:4) Ndien sia mme idaha ẹdinen̄erede ifọn, owo ndomokiet idinyeneke ntak ndiyom eset oro n̄kpọ ọkọfọnde.