Yak Ọkpọkpọ Ukpepn̄kpọ Ikọ Abasi Enem Fi

“Nyekere kpukpru se afo anamde, nyonyụn̄ n̄kere utom fo.”—PSALM 77:12.

1, 2. (a) Ntak emi nnyịn ikposiode ini inịm nditie n̄kere? (b) Nso ke “nditie n̄kere” ye “kere” ẹwọrọ?

 NTE mme mbet Jesus Christ, nnyịn ikpenyene ndinen̄ede n̄kere mban̄a itie ebuana nnyịn ye Abasi ye ntak oro nnyịn inamde n̄kpọ Esie. Nte ededi, mfịn ata ediwak owo ẹnen̄ede ẹyọhọ ye utom tutu mmọ inyeneke ini nditie n̄kere n̄kpọ. Mmọ ẹsịn idem ofụri ofụri ke uyom inyene, udep n̄kpọurua, ye ikpîkpu edinam uyom inemesịt. Didie ke nnyịn ikeme ndifep utọ ikpîkpu edinam emi? Kpa nte isisiode ini inịm ke usen kiet kiet inọ mme akpan edinam, utọ nte edidia udia ye edide idap, ana nnyịn n̄ko isio ini inịm ke usen kiet kiet nditie n̄kere mme utom ye edinam Jehovah.—Deuteronomy 8:3; Matthew 4:4.

² Ndi akanam afo omodop etie ekere n̄kpọ? Nso ke nditie n̄kere ọwọrọ? N̄wed ukabadeikọ kiet akabade ikọ emi nte “owo ndiwụk ekikere ke n̄kpọ: ndikere ntotụn̄ọ ntotụn̄ọ mban̄a n̄kpọ.” Ndien ikọ oro “kere” ọwọrọ ndikere mban̄a n̄kpọ, akpan akpan ke ndopuyo. Nso ke emi ọwọrọ ọnọ nnyịn?

3. Ndinam n̄kọri ke n̄kan̄ eke spirit enyene nnennen ebuana ye nso?

³ N̄kpọ kiet edi-o, emi ekpenyene nditi nnyịn se apostle Paul ekewetde ọnọ ẹsọk Timothy, ekemmọ asan̄autom, ete: “Tutu ndi, sịn ifịk ke edikot n̄wed nnọ owo, ye ke edikwọrọ ikọ, ye ke edikpep owo n̄kpọ. . . . Tịn̄ enyịn nam [“kere ban̄a,” NW] mme n̄kpọ emi; sịn idem ke esịt ofụri-ofụri; man kpukpru owo ẹkụt n̄kọri fo ke eti ido.” Ih, ẹma ẹdọri enyịn ndikụt n̄kọri, ndien mme ikọ Paul ẹkewụt nte edikere mban̄a mme n̄kpọ eke spirit enyenede nnennen ebuana ye edinam n̄kọri. Ntre ke edi mfịn. Man ikop uyụhọ oro otode edinam n̄kọri ke n̄kan̄ eke spirit, ana nnyịn ‘ikere iban̄a’ inyụn̄ ‘isịn idem ofụri ofụri’ ke mme n̄kpọ oro ẹnyenede ebuana ye Ikọ Abasi.—1 Timothy 4:13-15.

4. Mme n̄kpọutom ewe ke afo ekeme ndida nnam n̄kpọ man ẹn̄wam fi ekere aban̄a Iko Jehovah kpukpru ini?

⁴ Mfọnn̄kan ini afo nditie n̄kere n̄kpọ esịne fi ke ubọk onyụn̄ ọkọn̄ọ ke edinam ofụri ini ubon fo. Ediwak owo ẹsikere ẹban̄a itie Bible ke tụhi-tụhi usenubọk ke ini mmọ ẹkotde ẹto ekpri n̄wed Ẹdụn̄ọde N̄wed Abasi ke Usen ke Usen. Ke akpanikọ, n̄kpọ nte mme anamutom unyịmesịt 20,000 ke mme ufọkidụn̄ Bethel ke ofụri ererimbot ẹsitọn̄ọ usen kiet kiet ke ndida minit 15 nneme itie Bible eke usen oro. Ke adan̄aemi ibat ibat owo ke ubon Bethel ẹsinọde utịn̄ikọ kpukpru usenubọk, mbon eken ẹsikere se ẹtịn̄de ẹnyụn̄ ẹkotde. Mme Ntiense eken ẹsikere Ikọ Jehovah ke adan̄aemi ẹkade utom. Mmọ ẹsikpan̄ utọn̄ ẹkop nte ẹkotde Bible ye magazine Enyọn̄-Ukpeme ye Awake! ke ọkpọ umụmikọ oro odude ke ndusụk usem. Ediwak ibanndọ ẹsinam  emi ke adan̄aemi ẹnamde utom ufọk. Ke nditịm ntịn̄, mmọ ẹkpebe Asaph andiwet psalm, oro ekewetde ete: “Nyatan̄ [ase] Jehovah: koro nyeti mme utịbe n̄kpọ fo ke eset. Nyekere kpukpru se afo anamde, nyonyụn̄ n̄kere utom fo.”—Psalm 77:11, 12.

Nnennen Edu Ada Nti Utịp Edi

5. Ntak emi ọkpọkpọ ukpepn̄kpọ ekpedide akpan n̄kpọ ọnọ nnyịn?

⁵ Ke eyo TV, vidio, ye kọmputa nnyịn emi, mme owo inyeneke aba ini ndikot n̄wed. Ke akpanikọ, oro ikpenyeneke ndidi ntre ye Mme Ntiense Jehovah. Kamse, edikot Bible etie nte urụk unyan̄a uwem oro akpahade nnyịn adian Jehovah. Ediwak tọsịn isua emi ẹkebede, Joshua ama ada itie Moses nte andida Israel usụn̄. Man enyene edidiọn̄ Jehovah, Joshua ekenyene ndikot Ikọ Abasi ke idemesie. (Joshua 1:8; Psalm 1:1, 2) Oro osụk ededi se ẹyomde mfịn. Nte ededi, ke ntak esisịt ifiọkn̄wed, ukotn̄wed ekeme ndidi ọkpọsọn̄ n̄kpọ m̀mê se ifekde-fek ndusụk owo. Ntre, nso ikeme ndin̄wam nnyịn ndinyene udọn̄ ndikot nnyụn̄ n̄kpep Ikọ Abasi? Ẹkeme ndikụt ibọrọ ke mme ikọ Edidem Solomon oro ẹwetde ke Mme N̄ke 2:1-6. Mbọk kụbọde Bible fo kot mme ufan̄ikọ emi. Ndien nnyịn iyeneme mmọ ọtọkiet.

6. Nso edu ke nnyịn ikpenyene iban̄a ifiọk Abasi?

⁶ Akpa kan̄a, nnyịn imokụt ikọ item emi: “Eyen mi, afo ama ọbọ ikọ mi, onyụn̄ enịm mbet mi ke idem fo; onyụn̄ akpan̄ utọn̄ fo ke eti ibuot, onyụn̄ esịn esịt fo ke mbufiọk; . . . ” (Mme N̄ke 2:1, 2) Nso ke nnyịn ikpep ito mme ikọ emi? Nnyịn ikpep nte ke nnyịn owo kiet kiet imenyene mbiomo. Tịm fiọk ekikere oro “afo ama ọbọ ikọ mi.” Ikọ oro “ama” edi akamba iko, koro ata ekese owo isikpan̄ke utọn̄ ke Ikọ Abasi. Man Ikọ Abasi enem nnyịn ndikpep, ana nnyịn inyịme ndibọ ikọ Jehovah inyụn̄ ida enye nte n̄kpọuto oro nnyịn mîyomke ọbọhọ nnyịn. Nnyịn ikpedehede iyak mme edinam eke usen ke usen ẹnam nnyịn inana ini ikaha m̀mê ẹwọn̄ọde ntịn̄enyịn nnyịn tutu nnyịn itọn̄ọ ndinana udọn̄ ke Ikọ Abasi, idem inyenede eyịghe iban̄a enye.—Rome 3:3, 4.

7. Ntak emi nnyịn ikpenyenede ndidụk nnyụn̄ n̄kpan̄ utọn̄ ke mme mbono esop Christian ke ini ekededi oro ikemede?

⁷ Nte nnyịn imesinen̄ede ‘ikpan̄ utọn̄’ ke ini ẹtatde Ikọ Abasi ke mme mbono esop Christian nnyịn? (Ephesus 4:20, 21) Nte nnyịn ‘imesisịn esịt’ man inyene mbufiọk? Ekeme ndidi etịn̄ikọ idịghe enye oro enyenede ifiọk akan, edi ke adan̄aemi enye etịn̄de Ikọ Abasi, odot nnyịn itịm inọ enye n̄kpan̄utọn̄. Nte ededi, man ikpan̄ utọn̄ ke ọniọn̄ Jehovah, ana nnyịn idu ke mme mbono esop Christian ke ini ekededi oro ikemede. (Mme N̄ke 18:1) Kere ban̄a se owo ekededi oro mîkodụhe ke mbono oro ẹkenịmde ke ubet enyọn̄ ke Jerusalem ke Pentecost 33 E.N. akatabade! Okposụkedi mme mbono esop nnyịn mîdịghe n̄wọrọnda nte enye oro, ẹsineme n̄kpọ ẹban̄a Bible, kpa akpan n̄wed ukpepn̄kpọ nnyịn. Ntem, kpukpru mbono esop ẹkeme ndinyene ufọn nnọ nnyịn edieke nnyịn ikpan̄de utọn̄ inyụn̄ itienede ise se ẹkotde ke Bible nnyịn.—Utom 2:1-4; Mme Hebrew 10:24, 25.

8, 9. (a) Nso ke ọkpọkpọ ukpepn̄kpọ oyom oto nnyịn? (b) Didie ke afo ekeme ndimen ufọn gold ndomo ye ufọn ifiọk Abasi?

⁸ Mme ikọ enyene-ọniọn̄ edidem oro efen ẹdi: “Ama ofiori okot asian, emenede uyo fo ọnọ mbufiọk; . . . ” (Mme N̄ke 2:3) Nso edu ke mme ikọ emi ẹwụt? Kamse, mmọ ẹwụt ke ana ẹnyene ọkpọsọn̄ udọn̄ ndifiọk Ikọ Jehovah! Mmọ ẹwọrọ ndinyịme ndikpep n̄kpọ ye ekikere edinyene mbufiọk, man ẹfiọk se uduak Jehovah edide. Nte ededi, emi oyom ukeme, ndien emi ada nnyịn esịm ikọ ye uwụtn̄kpọ Solomon efen.—Ephesus 5:15-17.

⁹ Enye aka iso ọdọhọ ete: “Ama oyom enye [asian] nte silver, onyụn̄ odụn̄ọde enye nte n̄kpọ-uto eke edịbede; . . . ” (Mme N̄ke 2:4) Emi anam nnyịn iti utom mme ọdọkisọn̄, oro ẹdụn̄ọrede ẹyom inua-okot ọsọn̄urua n̄kpọ nte silver ye gold ke ediwak isua ikie emi ẹbede. Mme owo ẹwot mbon efen ke ntak gold. Mmọ eken ẹda ofụri eyouwem mmọ ẹyom enye. Nte ededi, nso ata ufọn ke gold enyene? Edieke afo okposopde usụn̄ ke desat onyụn̄ okopde nsatitọn̄,  ewe ke afo ekpemek: gold m̀mê edin̄wọn̄ mmọn̄? Edi, mme owo ẹsịn ifịk didie ntem ẹyom gold emi ekọmurua esie mînyeneke iwụk! * Adan̄a didie akan oro ke nnyịn ikpesịn ifịk iyom eti ibuot, mbufiọk, ye asian ẹban̄ade Abasi ye uduak esie! Edi nso idi mme ufọn utọ edidụn̄ọde nyom oro?—Psalm 19:7-10; Mme N̄ke 3:13-18.

10. Nso ke nnyịn idisịme edieke nnyịn ikpepde Ikọ Abasi?

¹⁰ Solomon aka iso ke nneme esie ete: “Ndien afo eyetịm ọfiọk uten̄e Jehovah, onyụn̄ esịme ifiọk Abasi.” (Mme N̄ke 2:5) Nso ekikere oro akpade owo idem ke emi edi ntem—nte ke nnyịn mme anamidiọk owo imekeme ndisịme “ifiọk Abasi,” Jehovah, kpa Ọbọn̄ Andikara ekondo! (Psalm 73:28; Utom 4:24) Ke ediwak isua ikie, mbon akwaifiọk ye inua-okot mme ọfiọkn̄kpọ owo eke ererimbot emi ẹmedomo ndifiọk mme ndịben̄kpọ ẹban̄ade uwem ye ekondo. Nte ededi, mmọ isịmeke “ifiọk Abasi.” Ntak-a? Okposụkedi ifiọk Abasi odude ediwak tọsịn isua ke Ikọ Abasi, kpa Bible, mmọ ẹfụmi enye, ẹdade nte ke enye emem akaha ndien ke ntre inyịmeke inyụn̄ isịmeke enye.—1 Corinth 1:18-21.

11. Nso idi ndusụk ufọn ọkpọkpọ ukpepn̄kpọ?

¹¹ Solomon etịn̄ n̄kpọ efen oro ekemede ndin̄wam nnyịn, ete: “Koro Jehovah enyene eti ibuot; ifiọk ye mbufiọk ẹto enye ke inua.” (Mme N̄ke 2:6) Jehovah esinyịme ndinọ owo ekededi oro enyịmede ndiyom eti ibuot, ifiọk, ye mbufiọk mme n̄kpọ emi ke ntatubọk. Ke akpanikọ nnyịn imenyene kpukpru ntak ndima ọkpọkpọ ukpepn̄kpọ Ikọ Abasi, okposụkedi emi oyomde ukeme, ntụnọ, ye n̄waidem. Ke nsụhọde n̄kaha nnyịn imenyene Bible oro ẹmịn̄de-mịn̄ ndien iyomke ida ubọk ision̄o enye iwet, nte ndusụk owo ke eset ẹkenamde!—Deuteronomy 17:18, 19.

Ndisan̄a ke Ido nte Odotde Ọbọn̄

12. Nso ikpedi uduak nnyịn ke ndiyom ifiọk Abasi?

¹² Nso ikpedi uduak ọkpọkpọ ukpepn̄kpọ nnyịn? Ndi uduak ekpedi man etie nte ke imọfọn ikan mbon en̄wen? Man iwụt ke imọfiọk n̄kpọ ikan? Man itie nte n̄wed ofụri orụk ifiọk Bible? Baba-o. Uduak nnyịn edi man idu uwem, itịn̄ ikọ, inyụn̄ inam n̄kpọ nte mme Christian, iben̄ede idem kpukpru ini ndida  edu Christ emi ọnọde nduọkodudu n̄n̄wam mbon efen. (Matthew 11:28-30) Apostle Paul ama odụri owo utọn̄ ete: “Ifiọk anam owo okohode idem, edi ima ọbọp owo ọkọri ke nti ido.” (1 Corinth 8:1) Ke ntre, nnyịn ikpenyene ndiwụt edu nsụhọdeidem oro Moses okowụtde ke ini enye ọkọdọhọde Jehovah ete: “Mbọk, wụt mi usụn̄ fo, man mfiọk fi, man afo enen iso ye ami.” (Exodus 33:13) Ih, nnyịn ikpoyom ifiọk man inem Abasi esịt, idịghe man inem owo esịt. Nnyịn iyom ndidi mme osụhọde-idem asan̄autom Abasi oro ẹdotde. Didie ke nnyịn ikeme ndisịm utịtmbuba emi?

13. Nso ke ẹyom man owo akabade edi asan̄autom Abasi emi odotde?

¹³ Paul ama ọnọ Timothy item aban̄a nte enye ekpenemde Abasi esịt ke ndidọhọ: “Sịn ifịk wụt Abasi idem fo, ete idi owo eke ẹdomode ẹfiọk, anam-utom eke mînyeneke ntak ndikop bụt, edi itịmde isiak ikọ akpanikọ.” (2 Timothy 2:15) Ikọ oro ‘nditịm nsiak’ oto adianaiba ikọ edinam Greek oro ke akpa ọkọwọrọde “ndisịbe nnennen nnennen.” (Kingdom Interlinear) Nte ndusụk owo ẹdọhọde, emi ọnọ ekikere aban̄a ekịmọfọn̄ oro afatde ọfọn̄ etiene idomo, ye ọtọin̄wan̄ oro obotde ebono ke udịm, ye ntre ntre eken. Ke usụn̄ ekededi, utịp ana edi n̄kpọ oro edide nnennen. Emi ọwọrọ ete ke man odot ndidi asan̄autom Abasi emi ẹnyịmede, Timothy ekenyene ‘ndisịn ifịk’ ndikụt nte ke ukpepn̄kpọ ye edu uwem imọ ẹdu ke n̄kemuyo ye ikọ akpanikọ.—1 Timothy 4:16.

14. Didie ke ọkpọkpọ ukpepn̄kpọ nnyịn okpotụk se nnyịn inamde inyụn̄ itịn̄de?

¹⁴ Paul ama etịn̄ ukem n̄kpọ emi ke ini enye ekesịnde udọn̄ ọnọ ekemmọ mme Christian ke Colossae ete “ẹsan̄a ke ido nte odotde Ọbọn̄, ẹnem Enye esịt ke kpukpru usụn̄” ebe ke ‘ndin̄wụm mfri ke edinam kpukpru nti utom, nnyụn̄ n̄kọri ke ifiọk Abasi.’ (Colossae 1:10) Mi Paul abuan owo ndidu uwem nte odotde Ọbọn̄ ye ‘ndin̄wụm mfri ke edinam kpukpru nti utom’ ọkọrọ ye ‘ndikọri ke ifiọk Abasi.’ Ke ikọ efen, se Jehovah adade ke akpan n̄kpọ idịghe n̄kukụre nte nnyịn imade ifiọk edi n̄ko nte nnyịn itienede Ikọ Abasi ketket ke se nnyịn inamde inyụn̄ itịn̄de. (Rome 2:21, 22) Emi ọwọrọ nte ke ana ọkpọkpọ ukpepn̄kpọ nnyịn otụk ekikere ye edu uwem nnyịn edieke nnyịn iyomde ndinem Abasi esịt.

15. Didie ke nnyịn ikeme ndikpeme nnyụn̄ n̄kara esịt ye ekikere nnyịn?

¹⁵ Mfịn, Satan ebiere ndida en̄wan eke ekikere mbiat idaha eke spirit nnyịn. (Rome 7:14-25) Ke ntre ana nnyịn ikpeme inyụn̄ ikara ekikere nnyịn man idot ke enyịn Abasi nnyịn, Jehovah. N̄kpọekọn̄ nnyịn edi “ifiọk Abasi,” emi ekemede ‘ndimụm kpukpru ekikere nte mbuot-ekọn̄, nnyụn̄ nnam mmọ ẹsụk ibuot ẹnọ Christ.’ Emi edi ntak efen efen oro nnyịn inyenede nditịn̄ enyịn n̄kpep Bible ke usen ke usen, nte nnyịn iyomde ndision̄o ibụk ibụk ekikere obụkidem mfep ke esịt nnyịn.—2 Corinth 10:5.

Mme N̄kpọ Un̄wam Ndida N̄kọ Ifiọk

16. Didie ke ikeme ndibọ ufọn nte Jehovah ekpepde nnyịn n̄kpọ?

¹⁶ Ukpepn̄kpọ Jehovah ada mme ufọn eke spirit ye eke obụk edi. Enye idịghe ukpepn̄kpọ ido ukpono emi mînyeneke ufọn. Ntem nnyịn ikot ite: “Ami ndi Jehovah Abasi fo, emi n̄kpepde fi usụn̄ udori, nda fi usụn̄ eke afo edisan̄ade.” (Isaiah 48:17) Didie ke Jehovah anam  nnyịn isan̄a ke usụn̄ esie emi enyenede ufọn? Akpa, nnyịn imenyene Ikọ esie eke odudu spirit, kpa Edisana Bible. Emi edi akpan n̄wed ukpepn̄kpọ nnyịn, emi nnyịn isikade ibịne kpukpru ini. Ntak edi oro ọfọnde ndikụbọde Bible ntiene nse nte ẹkotde ke mme mbono esop Christian. Ẹkeme ndikụt nti utịp ẹtode ndinam ntre ke mbụk aban̄ade eunuch owo Ethiopia, oro ẹwetde ke Utom ibuot 8.

17. Nso iketịbe inọ eunuch owo Ethiopia, ndien nso ke emi owụt?

¹⁷ Ẹma ẹnam eunuch owo Ethiopia akabade esịt odụk Ido Ukpono Mme Jew. Enye ama enen̄ede enịm Abasi ke akpanikọ, ndien ama esikpep N̄wed Abasi. Enye okokot uwetn̄kpọ Isaiah nte enye akawatde ke chariot esie ke ini Philip ekefehede ebịne onyụn̄ obụpde enye ete: “Nte ọmọfiọk se ikọ oro okotde ọwọrọde?” Didie ke eunuch oro ọkọbọrọ? “N̄keme didie ke owo mîtemeke mi? Ntre ke enye eben̄e Philip ete ọdọk editie ye imọ.” Ekem Philip, emi edisana spirit akadade usụn̄, ama an̄wam eunuch oro ndifiọk se ntịn̄nnịm ikọ Isaiah ọwọrọde. (Utom 8:27-35) Nso ke emi owụt? Nte ke nnyịn ndikot Bible ke idem nnyịn ikemke. Ebede ke spirit esie, Jehovah ada otu asan̄autom emi anamde akpanikọ, onyụn̄ enyenede ọniọn̄ ndin̄wam nnyịn ifiọk se Ikọ esie ọwọrọde ke nnennen ini. Didie ke ẹnam emi?—Matthew 24:45-47; Luke 12:42.

18. Didie ke otu asan̄autom emi anamde akpanikọ, onyụn̄ enyenede ọniọn̄ an̄wam nnyịn?

¹⁸ Okposụkedi ẹtịn̄de ẹban̄a otu asan̄autom emi nte “anamde akpanikọ, onyụn̄ enyenede ọniọn̄,” Jesus ikọdọhọke ke enye idinamke ndudue. Otu mme anam-akpanikọ nditọete oro ẹyetde aran mi ẹsụk ẹdi mme anana-mfọnmma Christian. Idem kpa ye oro mmọ ẹnyenede nti uduak, mmọ ẹkeme ndinam ndudue, kpa nte mme utọ owo oro ke akpa isua ikie ẹkesinamde ndudue ndusụk ini. (Utom 10:9-15; Galatia 2:8, 11-14) Nte ededi, mmọ ẹnyene eti uduakesịt, ndien Jehovah ada mmọ ndinọ nnyịn mme n̄kpọ un̄wam ukpep Bible ndisọn̄ọ mbuọtidem nnyịn ke Ikọ ye ke mme un̄wọn̄ọ Abasi. Akpan n̄kpọ un̄wam oro asan̄autom emi ọnọde nnyịn ndida nnam ọkpọkpọ ukpepn̄kpọ edi New World Translation of the Holy Scriptures. Enye odu idahaemi ke ofụri ofụri m̀mê ke ubak ubak, ke usem 42, ndien ẹmịn̄ idem miliọn 114 ke ediwak nsiondi. Didie ke nnyịn ikeme ndida enye nnam n̄kpọ uforo uforo ke ọkpọkpọ ukpepn̄kpọ nnyịn?—2 Timothy 3:14-17.

19. Nso idi ndusụk ikpehe ke New World Translation—With References oro ẹkemede ndifọn ke ọkpọkpọ ukpepn̄kpọ?

¹⁹ Da New World Translation of the Holy Scriptures—With References ke uwụtn̄kpọ. Enye enyene mme ikpehe oro ẹwụtde mme itien̄wed efen oro ẹtịn̄de ukem n̄kpọ, mme ikọ idakisọn̄, mbio mbio ikọ oro ẹwetde nte “Bible Words Indexed” (Mme Ikọ Bible Ẹsion̄ode Ẹwet Ẹtiene Abisi Enyịn̄), “Footnote Words Indexed” (Mme Ikọ Idakisọn̄ Ẹsion̄ode Ẹwet Ẹtiene Abisi  Enyịn̄), ye Appendix (Se Ẹwetde Ẹdian) oro ẹtịn̄de n̄kpọ ntatara ntatara ẹtụk nsio nsio ibuot nneme 43, esịnede n̄wed ndise obio, ye mme chart. “Introduction” (Ntọn̄ọikọ) odu n̄ko emi etịn̄de aban̄a ediwak ebiet oro ẹdade ntọt oro ẹdọn̄ọde ke n̄wọrọnda edikabade Bible emi ẹto. Edieke enye odude ke usem oro ekemede ndin̄wan̄a fi, domo nte ekekeme ndinen̄ede mmehe ye mme ikpehe emi nnyụn̄ nda mmọ nnam n̄kpọ. Ke usụn̄ ekededi, nnyịn ikpọtọn̄ọ ndutịm ukpepn̄kpọ nnyịn ye Bible, ndien New World Translation edi edikabade oro ọsọn̄ọde ẹtịn̄ aban̄a nnennen enyịn̄ Abasi nte enye etịn̄de aban̄a ukara Obio Ubọn̄ Abasi.—Psalm 149:1-9; Daniel 2:44; Matthew 6:9, 10.

20. Mme mbụme ewe ẹban̄ade ọkpọkpọ ukpepn̄kpọ ẹyom ibọrọ idahaemi?

²⁰ Idahaemi, nnyịn imekeme ndibụp: ‘Nso un̄wam efen ke nnyịn iyom man ifiọk Bible? Didie ke nnyịn ikeme ndisio ini nnịm nnọ ọkpọkpọ ukpepn̄kpọ? Didie ke nnyịn ikeme ndinam ukpepn̄kpọ nnyịn enen̄ede enyene uforo? Didie ke ukpepn̄kpọ nnyịn okpotụk mbon efen?’ Ibuotikọ oro etienede eyeneme mme akpan ikpehe n̄kọri Christian nnyịn emi.

[Ikọ idakisọn̄]

Nte Afo Emeti?

• Nso ke “nditie n̄kere” ye “kere” ẹwọrọ?

• Nso edu ke nnyịn ikpenyene kaban̄a edikpep Ikọ Abasi?

• Nso ikpedi uduak ọkpọkpọ ukpepn̄kpọ nnyịn?

• Mme n̄kpọ ewe ke nnyịn inyene man ẹn̄wam nnyịn ndifiọk Bible?

[Mme Mbụme Ukpepn̄kpọ]

[Ndise ke page 15]

Mbonubon Bethel ẹkụt nte editọn̄ọ usen kiet kiet ye edikere mban̄a itie Bible ọsọn̄ọde owo idem ke n̄kan̄ eke spirit

[Mme ndise ke page 15]

Nnyịn imekeme ndida ọsọn̄urua ini nnam n̄kpọ ke ndikpan̄ utọn̄ n̄kop nte ẹkotde Bible ke ọkpọ umụmikọ ke adan̄aemi ikade isan̄

[Ndise ke page 16]

Mme owo ẹsinam utom ọkpọsọn̄ ke anyan ini man ẹnyene gold. Afo esịn ukeme adan̄a didie ke ndikpep Ikọ Abasi?

[Ebiet Ẹdade N̄kpọ Ẹto]

Ẹbọ Ẹto California State Parks, 2002

[Mme ndise ke page 17]

Bible edi n̄kpọuto oro ekemede ndida nsịm nsinsi uwem