Emana Jesus—Usụn̄ ye Ntak Akadade Itie

“IKETỊBEKE!” Ediwak mbon oro mîdịghe mme Christian ẹkeme ndidọhọ ntem ke ini ẹkopde mbụk emana Jesus. Mmọ ẹkere ke owo ndinịm ke akpanikọ nte ke n̄wan oro mîfiọkke eren ekeme ndiyomo nnyụn̄ mman eyen ye unana enye ndikenyene ebuana ye eren ikemke ye ifiọk ntaifiọk. Afo ekere didie?

Ke 1984, ẹma ẹmịn̄ leta oro ekenemede n̄kpọ emi ke The Times eke London, ọdọhọde ete: “Iwụtke ifiọk ndida ifiọk ntaifiọk mfan̄a ke utịben̄kpọ ikemeke nditịbe. Ndinịm ke akpanikọ nte ke mme utịben̄kpọ ikemeke nditịbe edi edinam mbuọtidem ukem nte edinịm ke akpanikọ nte ke mmọ ẹkeme nditịbe.” Prọfesọ 14 oro ẹdide mme andikpep ifiọk ntaifiọk ke mme ufọkn̄wed ntaifiọk Britain ẹma ẹsịn ubọk ke leta oro. Mmọ ẹkedọhọ ẹte: “Nnyịn imenyịme nte ke n̄wan oro mîfiọkke eren ama aman eyen, imenyịme mme utịben̄kpọ oro ẹwetde ke Gospel ye ediset ke n̄kpa Christ nte mme n̄kpọntịbe oro ẹkedade itie.”

Kpa ye oro, an̄wan̄a ntak emi idem esikpade owo ke akpa ini emi enye okopde ke n̄wan emi mîfiọkke eren akaman Jesus. Idem ama akam akpa eka Jesus ke idemesie emi mîkọfiọkke eren ke ini angel Abasi ọkọdọhọde ete: “Sese, afo oyoyomo, onyụn̄ aman eyeneren, onyụn̄ osio Enye enyịn̄ Jesus.” Mary ama obụp ete: “N̄kpọ emi edikeme didie ndisu, sia mmenyeneke ebe?” Ekem angel oro ama anam an̄wan̄a nte ke Abasi edida edisana spirit esie anam utịben̄kpọ emi, adiande do ete: “Ikọ baba kiet eke otode Abasi idinanake odudu.” (Luke 1:31, 34-37) Ke akpanikọ Enye emi akanamde ndyọ ndyọ usụn̄ emi owo esisan̄ade amana, ekeme n̄ko ndinam n̄wan oro mîfiọkke eren oyomo onyụn̄ aman Jesus. Edieke Abasi okobotde ekondo ye mme ibet emi ẹkemede ndinam enye aka iso odu ke eti idaha, enye n̄ko ekeme ndida nsen ke idịbi Mary mbot mfọnmma Eyen.

Ntak Okoyomde Enye Amana

Owo Abasi oro Joseph ama ododụk ediomi ndọ ye Mary ke ini n̄wan emi okoyomode idịbi. Ke ndap, angel Abasi ama anam an̄wan̄a Joseph utịbe utịbe ntak oro n̄wan oro enye okodụkde ediomo ndọ oro mîkonyụn̄ ifiọkke erenowo, okoyomode. Angel oro ọkọdọhọ ete: “Kûfehe ndida Mary n̄wan fo nnyọn̄ ufọk: koro idịbi oro enye oyomode oto ke Edisana Spirit. Ndien enye ayaman eyeneren; afo oyonyụn̄ osio Enye enyịn̄ Jesus, koro edi Enye ayanyan̄a ikọt Esie osio ke mme idiọk-n̄kpọ mmọ.” (Matthew 1:20, 21) Enyịn̄ oro Jesus ke usem Hebrew ọwọrọ “Jehovah Edi Andinyan̄a.” Emi eti nnyịn nte ke nnyịn imoyom ẹnyan̄a nnyịn ẹsio ke idiọkn̄kpọ ye n̄kpa  onyụn̄ eti nnyịn ndutịm oro Jehovah Abasi anamde kaban̄a utọ edinyan̄a oro ebe ke Jesus.

Sia akpa owo oro, Adam, ama akanam idiọkn̄kpọ, kpukpru nditọ esie ẹkemana nte mme anana-mfọnmma, ẹnyenede ntụhọ edibiat mme ibet Abasi. (Rome 5:12) Ẹkpesan̄a didie ẹnyan̄a nditọ Adam ẹsio ke idiọkn̄kpọ ẹnyụn̄ ẹnam mmọ ẹdi mfọnmma? Ama oyom ẹnọ mfọnmma uwem owo en̄wen, oro edide ukem ukem ye se Adam ọkọduọkde man ẹnam unenikpe. Ntak edi oro Abasi akanamde Jesus amana ke utịbe utịbe usụn̄ nte mfọnmma owo, ntak onyụn̄ edi oro Jesus ekenyịmede mme asua esie ẹwot enye. (John 10:17, 18; 1 Timothy 2:5, 6) Ke Jesus ama ekeset ke n̄kpa onyụn̄ ọdọk aka heaven, enye ama ekeme nditịn̄ uko uko ete: “Mma n̄kabade n̄kpa, ndien sese, ndodu uwem ke nsinsi, nnyụn̄ n̄kama ukpọhọde n̄kpa ye [“Hades,” NW; udi ofụri ubonowo].”—Ediyarade 1:18.

Jesus ada ndamban̄a ukpọhọde n̄kpa ye Hades eberede usụn̄ ọnọ mme anamidiọk ndifiak nnyene se Adam ọkọduọkde. Jesus ama anam an̄wan̄a ete: “Ami ndi ediset ye uwem: owo eke ọbuọtde idem ye Ami, okposụk edi nte enye ama akpa, enye oyodu uwem: ndien owo ekededi eke odude uwem onyụn̄ ọbuọtde idem ye Ami idikpaha ke nsinsi.” (John 11:25, 26) Nso utịbe utịbe un̄wọn̄ọ ke emi edi ntem! Edi kpa ye oro, ntak okponde akan emi akam odu oro okoyomde Jesus amana.

Ata Akpan Ntak

Uwem Jesus ikọtọn̄ọke ke Mary ndiyomo enye. Enye ama etịn̄ in̄wan̄-in̄wan̄ ete: “Nto ke heaven nsụhọde ndi.” (John 6:38) Jesus ama odụn̄ ke obio mme spirit ye Ete esie eke heaven toto ke ini ẹketọn̄ọde ndibot mme n̄kpọ. Ke akpanikọ, Bible etịn̄ aban̄a enye nte “ebeiso ke kpukpru se Abasi obotde.” (Ediyarade 3:14) Jesus ama etie ke heaven okụt nsọn̄ibuot idiọk angel emi ọkọwọn̄ọrede mme akpa owo ọkpọn̄ ukara Abasi. Emi ama anam Jesus enyene ata akpan ntak ndiyom ndidi ndimana nte mfọnmma Eyen Abasi. Nso ntak ikedi oro?

Ekedi man enye owụt ke Ete imọ eke heaven enyene unen ndikara ofụri ekondo. Ke ndikọsọn̄ọ nda nnam akpanikọ toto ke emana tutu esịm n̄kpa esie ke isọn̄, Jesus ama owụt ke imọ imenyịme ndisụk ibuot nnọ usụn̄ oro Jehovah akarade mme edibotn̄kpọ Esie. Mbemiso n̄kpa esie ke ubọk mme asua Abasi, Jesus ama etịn̄ in̄wan̄-in̄wan̄ ntak akanamde enye enyịme ndikpa n̄kpa uwa. Enye ọkọdọhọ ke ntak ekedi man ererimbot ẹfiọk ẹte ke imọ imama Ete. (John 14:31) Edieke akpa owo iba oro, Adam ye Eve, ẹkpekekọride utọ ima oro, mmọ ẹkpekekeme ndisọn̄ọ nda nnam akpanikọ ke ini mmọ ẹkesobode idomo oro akakam ememde akan emi.—Genesis 2:15-17.

Edinam akpanikọ Jesus n̄ko ama ayarade idiọk angel oro Satan, nte osu nsu. Satan ama ọdọk Abasi ye owo edidọk ebe ke ndida ke iso  mme angel ke heaven ndọhọ nte: “Kpukpru se owo enyenede ke owo edinọ ke ibuot uwem esie.” (Job 2:1, 4) Satan okosu nsu ete ke kpukpru owo ẹyesọn̄ ibuot ye Abasi man ẹnyan̄a uwem mmọ.

Se ẹnemede mi ke enyọn̄ emi ama edemede mme eneni aban̄a unen itie edikara Abasi. Man ẹbiere mme eneni emi, Jesus ama enyịme ndimana nte owo nnyụn̄ nnam akpanikọ tutu esịm n̄kpa.

Ntem, nte enye ke idemesie ọkọdọhọde, akpan ntak oro Jesus akamanade ke isọn̄ ekedi man enye ‘edi ntiense ọnọ akpanikọ.’ (John 18:37) Enye akanam oro ebe ke ndiwụt ke ikọ ye ke edinam nte ke itie edikara Abasi enen̄ede enen ndien ke ndisụk ibuot nnọ enye esida nsinsi inemesịt edi. Jesus n̄ko ama anam an̄wan̄a nte ke imọ ikedi ererimbot ndinọ uwem imọ “ndifak ediwak owo,” ibererede usụn̄ inọ mme anamidiọk ndisịm mfọnmma nnyụn̄ nnyene nsinsi uwem. (Mark 10:45) Man ubonowo ẹfiọk mme akpan n̄kpọ emi, ama oyom ẹwet mbụk emana Jesus ẹnịm. Ke adianade do, mme n̄kpọ oro ẹketịbede ke ini emana Jesus ẹsịne mme akpan ukpepn̄kpọ efen efen, nte ẹdiwụtde ke ibuotikọ oro etienede.

[Mme ndise ke page 4]

Ẹkpesan̄a didie ẹnyan̄a nditọ Adam ẹsio ke idiọkn̄kpọ?