“Ẹkpeme”!
“Ẹkpeme”!
“Se ndọhọde mbufo, mmonyụn̄ ndọhọ kpukpru owo nte, Ẹkpeme.”—MARK 13:37.
1, 2. (a) Nso ukpepn̄kpọ ke owo kiet ekekpep aban̄a edikpeme inyene esie? (b) Ke uwụtn̄kpọ Jesus aban̄ade inọ, nso ke nnyịn ikpep iban̄a editaba idap n̄kpeme?
JUAN ekesibon mme ọsọn̄urua n̄kpọ esie ke ufọk. Enye ekesibon mmọ ke idak bed esie—itie emi enye ekekerede ke edịbe akan ke ufọk. Nte ededi, ke okoneyo usen kiet ke adan̄aemi enye ye n̄wan esie ẹma ẹkede idap, inọ ama odụk ubet oro. Nte an̄wan̄ade, inọ oro ama ọdiọn̄ọ ata nnennen itie ndika. Enye sụn̄sụn̄ ama osion̄o kpukpru mme ọsọn̄urua n̄kpọ ke idak bed oro ọkọrọ ye okụk oro Juan ekesịnde ke drọwa okpokoro oro akanade ke mben bed. Ke ndan̄nsiere, Juan ama edikụt ke inọ ama odụk ufọk. Eyebịghi enye ndifre ubiak ubiak ukpepn̄kpọ emi enye ọkọbọde oto n̄kpọntịbe oro: Owo oro edede idap ikemeke ndikpeme inyene esie.
2 Ntre ke edi ke n̄kan̄ eke spirit. Nnyịn ikemeke ndimụm idotenyịn ye mbuọtidem nnyịn n̄kama edieke idede idap. Ntem, Paul ọnọ item ete: “Ẹyak nnyịn ikûde idap, nte mmọ eken, edi ẹyak nnyịn itaba idap ikpeme, imụm idem ikama.” (1 Thessalonica 5:6) Jesus ama ọnọ uwụtn̄kpọ aban̄ade inọ man owụt adan̄a nte edide akpan n̄kpọ nditaba idap n̄kpeme. Enye ama etịn̄ aban̄a mme n̄kpọntịbe oro ẹdidade ẹkesịm edidi esie nte Ebiereikpe, ndien ekem enye ama eteme ete: “Ẹkpeme ndien: koro mbufo mîfiọkke usen eke Ọbọn̄ mbufo edide. Edi ẹfiọk emi, ẹte, edieke enyene-ufọk ọkpọfiọkde ini eke inọ edide, enye ekpekpeme, ikponyụn̄ iyakke ẹbụn̄ ufọk esie ẹdụk. Mmọdo mbufo nde ẹben̄e idem; koro ke ini eke mbufo mîdorike enyịn, Eyen Owo eyedi.” (Matthew 24:42-44) Inọ isibemke iso itọt ini emi enye edidide. Enye esiyom ndidi ke ini oro owo ndomokiet mîdorike enyịn ke imọ iyedi. Kpasụk ntre, nte Jesus ọkọdọhọde, utịt editịm n̄kpọ emi edidi ke ‘ini eke nnyịn mîdorike enyịn.’
“Ẹdu ke Ukpeme; Ẹsọn̄ọ Ẹda ke Mbuọtidem”
3. Didie ke Jesus akada uwụtn̄kpọ ifịn emi ẹtiede ẹbet eteufọk mmọ ọnyọn̄ udianndọ edi owụt nte edide akpan n̄kpọ ndidu ke edidemede?
3 Ke nditịn̄ mme ikọ oro ẹwetde ke Gospel Luke, Jesus ekemen mme Christian odomo ye ifịn emi ẹtiede ẹbet eteufọk mmọ ọnyọn̄ udianndọ edi. Mmọ ẹnyene ndidu ke edidemede man ke ini emi enye edinyọn̄de edisịm, mmọ ẹkpedu ke mben̄eidem ndidara enye. Ke ukem usụn̄ oro, Jesus ọkọdọhọ ete: “Eyen Owo eyedi ke ini eke mbufo mîdorike enyịn.” (Luke 12:40) Ndusụk mbon oro ẹma ẹkenam n̄kpọ Jehovah ke ediwak isua ẹkeme ndifre nte ini emi nnyịn idude uwem mi edide usọp usọp. Mmọ ẹkeme ndikam nsịm ubiere nte ke utịt idisọpke idi. Edi utọ ekikere oro ekeme ndiwọn̄ọde ntịn̄enyịn nnyịn n̄kpọn̄ mme n̄kpọ eke spirit onyụn̄ anam nnyịn ibịne mme utịtmbuba eke obụkidem, kpa mme n̄kpọ oro ẹkemede ndinam nnyịn iyet idap ke n̄kan̄ eke spirit.—Luke 8:14; 21:34, 35.
4. Nnyịn ndinịm nso ke akpanikọ edinam nnyịn idu ke ukpeme, ndien didie ke Jesus okowụt emi?
4 Nnyịn imekeme ndikpep n̄kpọ efen nto uwụtn̄kpọ Jesus. Okposụkedi ifịn oro mîkọfiọkke hour emi eteufọk mmọ edinyọn̄de edi, nte an̄wan̄ade mmọ ẹma ẹdiọn̄ọ okoneyo oro enye edinyọn̄de edi. Ọkpọkọsọn̄ mmọ nditie n̄kpeme ke ofụri okoneyo edieke mmọ ẹkpekekerede ke eteufọk mmimọ ekeme ndinyọn̄ ndi okoneyo efen ekededi. Edi mmọ ikekereke ntre, mmọ ẹma ẹdiọn̄ọ okoneyo oro enye edinyọn̄de idi, ndien emi ama anam mmọ ẹnen̄ede ẹdu ke ukpeme. Ke ukem usụn̄ oro, mme ntịn̄nnịm ikọ Bible ẹwụt in̄wan̄-in̄wan̄ nte ke nnyịn idu uwem ke utịt ini; edi mmọ isianke nnyịn usen m̀mê hour oro utịt edidide. (Matthew 24:36) Nnyịn ndinịm ke akpanikọ nte ke utịt ke edi an̄wam nnyịn ndidu ke ukpeme, edi edieke nnyịn inen̄erede inịm ke akpanikọ ite ke usen Jehovah enen̄ede ekpere, emi ayanam nnyịn inen̄ede idu ke ukpeme.—Zephaniah 1:14.
5. Didie ke nnyịn ikeme ndinam n̄kpọ mban̄a item Paul oro “ẹdu ke ukpeme”?
5 Ke ewetde n̄wed ọnọ ẹsọk mbon Corinth, Paul ama eteme ete: “Ẹdu ke ukpeme, ẹsọn̄ọ ẹda ke mbuọtidem.” (1 Corinth 16:13) Ih, ndidu ke ukpeme enyene ebuana ye nnyịn ndisọn̄ọ nda ke mbuọtidem Christian. Didie ke nnyịn ikeme ndidu ke ukpeme? Ebe ke ndinyene ntotụn̄ọ ifiọk Ikọ Abasi. (2 Timothy 3:14, 15) Nti edu ukpepn̄kpọ idemowo ye edidụk mme mbono esop kpukpru ini ẹn̄wam ndisọn̄ọ mbuọtidem nnyịn, ndien ndinyene usen Jehovah ke ekikere edi akpan ubak mbuọtidem nnyịn. Ntre, ndidụn̄ọde mme uyarade N̄wed Abasi oro ẹwụtde nte ke nnyịn imen̄ede idu uwem ikpere utịt editịm n̄kpọ emi, ke ini ke ini, ayan̄wam nnyịn ikûfre mme akpanikọ oro ẹdide akpan n̄kpọ emi ẹban̄ade utịt oro edide. * Ọfọn n̄ko nditịm mfiọk mme n̄kpọntịbe ererimbot oro ẹsude ntịn̄nnịm ikọ Bible. Eyenete eren kiet ke Germany ekewet ete: “Kpukpru ini oro n̄kpan̄de utọn̄ nnọ mbụk n̄kpọntịbe—ekọn̄, unyekisọn̄, afai, ye edisabade ekondo nnyịn—emi esinam mi mfiọk nte ke utịt ekpere.”
6. Ke nso usụn̄ ke Jesus okowụt nte ekemede ndifre ndidu ke ukpeme ke n̄kan̄ eke spirit nte ini akade?
6 Ke Mark ibuot 13, nnyịn imokụt uwetn̄kpọ efen emi Jesus eketemede mme anditiene enye ete ẹdu ke ukpeme. Nte ibuotn̄wed Bible emi ọdọhọde, Jesus ekemen idaha mmọ odomo ye etie-usụn̄ emi ebetde eteufọk esie ndinyọn̄ esenidụt. Etie-usụn̄ ikọfiọkke ini oro eteufọk esie edinyọn̄de edi. Enye n̄kukụre ekenyene ndidu ke ukpeme. Jesus ama etịn̄ aban̄a nsio nsio ini ukpeme inan̄ emi eteufọk oro ekekemede ndinyọn̄ ndi. Ọyọhọ ini ukpeme inan̄ ọkọtọn̄ọ ke n̄kpọ nte n̄kanika ita usenubọk esịm ini oro utịn asiahade. Ke akpatre ini ukpeme oro, etie-usụn̄ ama esikeme ndiyet idap mmemmem mmemmem. Nte mbụk ọdọhọde, mbonekọn̄ ẹsida n̄kpọusen nte mfọnn̄kan ini ndimụm asua oro odude ke ndueidem. Kpasụk ntre, ke akpatre hour emi, kpa ini emi ererimbot emi edede ọkpọsọn̄ idap ke usụn̄ifiọk eke spirit, nnyịn imekeme ndisobo ọkpọsọn̄ en̄wan nditaba idap n̄kpeme. (Rome 13:11, 12) Ntem, ke uwụtn̄kpọ esie, Jesus ama eteme ndien ndien ete: “Mbufo ẹtịn̄ enyịn ẹse, ẹkpeme . . . Mbufo ẹkpeme ndien . . . Se ndọhọde mbufo, mmonyụn̄ ndọhọ kpukpru owo nte, Ẹkpeme.”—Mark 13:32-37.
7. Nso n̄kpọ oro enen̄ede akama n̄kpọndịk idu, ndien ye emi ke ekikere, nso nsịnudọn̄ ke nnyịn isiwak ndikot ke Bible?
7 Ke ediwak ini ke utom ukwọrọikọ esie ye ke enye ama ekeset ke n̄kpa, Jesus ama esịn udọn̄ ọnọ nnyịn ete idu ke ukpeme. Ke akpanikọ, ekpere ndidi kpukpru ini oro N̄wed Abasi etịn̄de n̄kpọ aban̄a utịt editịm n̄kpọ emi, ẹsiteme nnyịn ẹte idu ke ukpeme m̀mê ikpeme. * (Luke 12:38, 40; Ediyarade 3:2; 16:14-16) Nte an̄wan̄ade, ndiyet idap ke spirit enen̄ede akama n̄kpọndịk. Kpukpru nnyịn imoyom item oro!—1 Corinth 10:12; 1 Thessalonica 5:2, 6.
Apostle Ita Oro Mîkekemeke Ndikpeme
8. Ke in̄wan̄ Gethsemane, didie ke apostle Jesus ita ẹkenam n̄kpọ ẹban̄a ikọ esie nte mmọ ẹdu ke ukpeme?
8 Ndidu ke ukpeme oyom se ikande nti uduak, nte nnyịn ikpepde ito uwụtn̄kpọ Peter, James, ye John. Mmọ ẹkedi iren ita oro ẹmade n̄kpọ eke spirit emi ẹkekade iso nditiene Jesus ẹkenyụn̄ ẹnyenede ntotụn̄ọ ima ẹnọ enye. Edi, ke okoneyo Nisan 14, 33 E.N., mmọ ẹma ẹkpu ndidu ke ukpeme. Ke ẹma ẹkekpọn̄ ubet enyọn̄ oro mmọ ẹkediade usọrọ Passover, apostle ita emi ẹma ẹsan̄a ye Jesus ẹka in̄wan̄ Gethsemane. Do, Jesus ama ọdọhọ mmọ ete: “Ukpọn̄ Mi ofụhọ eti-eti ekpere ndikpa; mbufo ẹtie mi, ẹkpeme ye Ami.” (Matthew 26:38) Utịm ikata Jesus ama ọbọn̄ akam ifịk ifịk ọnọ Ete esie eke heaven, ndien enye ama afiak edi utịm ikata edikụt nte mme ufan esie ẹkam ẹdede idap.—Matthew 26:40, 43, 45.
9. Eyedi nso iketịp isịn ke mme apostle ndiyet idap?
9 Ntak emi mme anam-akpanikọ iren emi ẹkekpude Jesus ke okoneyo oro? Ntak kiet ekedi mmemidem. Eyo ama ọsọn̄, ekeme ndidi ama ebe ufọt okoneyo, ndien ‘enyịn eketie mmọ idap idap.’ (Matthew 26:43) Kpa ye oro, Jesus ama ọdọhọ ete: “Ẹkpeme, ẹnyụn̄ ẹbọn̄ akam, mbak mbufo ẹdidụk ke idomo; ukpọn̄ ọsọp ke akpanikọ, edi obụkidem edi mmem-mmem.”—Matthew 26:41.
10, 11. (a) Kpa ye oro enye akakpade mba, nso ikan̄wam Jesus ndidu ke ukpeme ke in̄wan̄ Gethsemane? (b) Nso ke nnyịn ikeme ndikpep nto se iketịbede inọ apostle ita oro Jesus ọkọdọhọde ẹdu ke ukpeme?
10 Nte eyịghe mîdụhe, Jesus n̄ko ama akpa mba ke akpan okoneyo oro. Nte ededi, utu ke ndide idap, enye ama ada mme akpatre akpan ini oro enye ekenyenede ifụre mi, ndibọn̄ akam ifịk ifịk. Usen ifan̄ ke mbemiso, enye ama esịn udọn̄ ọnọ mme anditiene enye ndibọn̄ akam, ọdọhọde ete: “Edi mbufo ẹtaba idap kpukpru ini, ẹnyụn̄ ẹkpe ubọk, man mbufo ẹkpekeme ndibọhọ kpukpru n̄kpọ oro ẹdiwọrọde, nnyụn̄ nda ke iso Eyen Owo.” (Luke 21:36; Ephesus 6:18) Edieke nnyịn inamde item Jesus inyụn̄ itienede eti uwụtn̄kpọ esie ke ini edide edisịm edibọn̄ akam, n̄kpeubọk ofụri esịt oro nnyịn inamde inọ Jehovah ayan̄wam nnyịn ndidu ke ukpeme ke n̄kan̄ eke spirit.
11 Nte ededi, Jesus ama ọfiọk—okposụkedi mme mbet esie mîkọfiọkke ini oro—nte ke mîbịghike ẹyemụm imọ ẹnyụn̄ ẹbiere ikpe n̄kpa ẹnọ imọ. Idomo esie eyesịm ubiak ubiak utịt ke eto ndutụhọ. Jesus ama odụri mme apostle esie utọn̄ aban̄a mme n̄kpọ emi, edi se enye eketịn̄de ikan̄wan̄ake mmọ. Ntem, mmọ ẹma ẹde idap ke adan̄aemi enye akatabade idap ọbọn̄ akam. (Mark 14:27-31; Luke 22:15-18) Kpa nte ekedide ye mme apostle, obụkidem nnyịn n̄ko edi mmemmem ndien odu mme n̄kpọ oro nnyịn mîfiọkke kan̄a. Edi, edieke nnyịn ifrede nte ini emi nnyịn idude uwem mi edide usọp usọp, nnyịn imekeme ndide idap ke n̄kan̄ eke spirit. Nnyịn idikeme ndidu ke ukpeme n̄kukụre ebe ke ndidu ke edidemede.
Akpan Edu Ita Oro Ẹyomde
12. Ewe edu ita ke Paul akabuan ye edikpeme ukeme ukere n̄kpọ nnyịn?
12 Didie ke nnyịn ikeme ndinyene ke ekikere nte ini edide usọp usọp? Nnyịn imokokụt nte akam ye nte edinyene usen Jehovah ke ekikere ẹdide akpan n̄kpọ. Ke adianade do, Paul ama asiak akpan edu ita oro nnyịn ikpọkọride. Enye ọdọhọ ete: “Ẹyak nnyịn, emi idide nditọ uwemeyo, imụm idem nnyịn ikama [“ikpeme ukeme ukere n̄kpọ nnyịn,” NW], isịne mbuọtidem ye ima nte n̄kpọ ikpanesịt, inyụn̄ iyara idotenyịn edinyan̄a nte ndụn ke ibuot.” (1 Thessalonica 5:8) Ẹyak nnyịn ikere ibio ibio iban̄a udeme emi mbuọtidem, idotenyịn, ye ima ẹnyenede ke nnyịn ndika iso ndu ke ukpeme ke n̄kan̄ eke spirit.
13. Nso udeme ke mbuọtidem enyene ke ndinam nnyịn ika iso idu ke edidemede?
13 Ana nnyịn inyene mbuọtidem emi mîsehekede nte ke Jehovah odu ye nte ke Enye “edi Andinọ mmọ emi ẹyomde Enye utịp.” (Mme Hebrew 11:6) Akpa edisu ntịn̄nnịm ikọ Jesus aban̄ade utịt ke akpa isua ikie ọsọn̄ọ mbuọtidem nnyịn nte ke edisu oro okponde akan ayada itie ke eyo nnyịn. Ndien mbuọtidem oro nnyịn inyenede anam itie ibet usen Jehovah ye ọkpọsọn̄ udọn̄, itịmde ifiọk ite ke ‘ntịn̄nnịm n̄kukụt iditreke ndisu, idinyụn̄ ibehe ini.’—Habakkuk 2:3.
14. Didie ke idotenyịn edi akpan n̄kpọ edieke anade nnyịn idu ke ukpeme?
14 Idotenyịn nnyịn oro mîdikpụhu etie nte “ukwak ubom ukpọn̄ nnyịn” emi esin̄wamde nnyịn ndiyọ mme mfịna idem ọkpọkọm nnyịn inyene ndibet ọyọhọ edisu un̄wọn̄ọ Abasi. (Mme Hebrew 6:18, 19) Margaret, eyenete an̄wan oro ẹyetde aran ke spirit emi odude ke iduọk isua 90 okonyụn̄ anade baptism ke se ikande isua 70 emi ẹkebede, enyịme ete: “Ke ini udọn̄ọ kansa okowotde ebe mi ke 1963, mma n̄kere ke ọkpọkọfọn utịt ndisọsọp ndi. Edi idahaemi mmokụt ke n̄kenen̄ede n̄kere mban̄a mme ufọn idem mi. Ini oro nnyịn ikọfiọkke adan̄a nte utom emi editarade ke ofụri ererimbot. Idem idahaemi ediwak itie ẹsụk ẹdodu emi utom akam ọtọn̄ọde-tọn̄ọ. Ntre mmadat esịt nte Jehovah enyenede ime.” Apostle Paul ọsọn̄ọ etịn̄ ọnọ nnyịn ete: ‘Ime ọwọrọ eti edu, eti edu onyụn̄ ọwọrọ idotenyịn: ndien idotenyịn emi iyakke nnyịn ikụt bụt.’—Rome 5:3-5.
15. Didie ke ima edinụk nnyịn ndinam n̄kpọ idem ọkpọkọm etie nte ke nnyịn imebet ke anyan ini?
15 Ima Christian edi n̄wọrọnda edu koro enye edi akpan edu oro akarade ofụri se nnyịn inamde. Nnyịn inam n̄kpọ inọ Jehovah sia nnyịn imade enye, inamke n̄kpọ m̀mê nso idi ndutịm ubatini esie. Ima oro nnyịn imade mbọhọidụn̄ nnyịn esinụk nnyịn ndikwọrọ eti mbụk Obio Ubọn̄, inamke n̄kpọ m̀mê uduak Abasi oro anamde nnyịn inam ntre ebịghi adan̄a didie inyụn̄ inamke n̄kpọ m̀mê adan̄a ediwak ini didie ke nnyịn isifiak ika mme ufọk oro. Nte Paul ekewetde, “mbuọtidem, ye idotenyịn, ye ima ẹsụk ẹdu, mmọ mbita; edi andikpon-n̄kan ke otu mmọ edi ima.” (1 Corinth 13:13) Ima ayanam nnyịn ika iso iyọ onyụn̄ an̄wam nnyịn ndika iso ndu ke ukpeme. “[Ima] ododori enyịn aban̄a kpukpru n̄kpọ, ememe ime ke kpukpru n̄kpọ. Ima idibehe ifep [ke] nsinsi.”—1 Corinth 13:7, 8.
‘Ẹsọn̄ọ Ẹmụm Se Ẹnyenede Ẹkama’
16. Utu ke nditek ke ifịk, mme edu ewe ke nnyịn ikpọkọri?
16 Nnyịn idu uwem ke akpan ini oro mme n̄kpọntịbe ererimbot ẹtide nnyịn kpukpru ini nte ke idu ke akpatre ini eke ukperedem ini emi. (2 Timothy 3:1-5) Idahaemi idịghe ini nditek ke ifịk edi edi ini ‘ndisọn̄ọ mmụm se inyenede n̄kama.’ (Ediyarade 3:11) Ebede ke ‘ndidu ke ukpeme nnyụn̄ mbọn̄ akam’ ye ke ndikọri mbuọtidem, idotenyịn, ye ima, nnyịn iyọsọn̄ọ iwụt nte ke imeben̄e idem inọ ini idomo. (1 Peter 4:7) Nnyịn imenyene ekese ndinam ke utom Ọbọn̄. Ndiyọhọ ke utom uten̄e Abasi ayan̄wam nnyịn ndinen̄ede ndu ke ukpeme.—2 Peter 3:11.
17. (a) Ntak emi nnyịn mîkpayakke idem emem nnyịn edieke isobode edikpu ke ini ke ini? (Se ekebe oro odude ke page 21.) (b) Didie ke nnyịn ikpekpebe Jehovah, ndien nso edidiọn̄ ina ibet mbon oro ẹkpebede Enye?
17 Jeremiah ekewet ete: “Jehovah edi udeme mi: mmọdo nyodori enyịn ye enye. Jehovah ọmọfọn ye mmọ eke ẹbetde enye, ọfọn ye ukpọn̄ eke oyomde enye. Ọfọn ndidori enyịn, nnyụn̄ ntie ndop mbet edinyan̄a Jehovah.” (Eseme 3:24-26) Ndusụk nnyịn ibet ke ibio ini kpọt. Mbon en̄wen ẹmebet ke ediwak isua ndikụt edinyan̄a Jehovah. Nte ededi, ini edibet emi omụhọ didie ntem ke ẹmende ẹdomo ye nsinsi ini oro edide ke iso! (2 Corinth 4:16-18) Ndien ke adan̄aemi nnyịn itiede ibet edikem ini Jehovah, nnyịn imekeme ndikọri mme akpan edu Christian inyụn̄ in̄wam mbon en̄wen ndibọ ufọn nto ime Jehovah nnyụn̄ n̄kụt akpanikọ. Do, ẹyak kpukpru nnyịn idu ke ukpeme. Ẹyak nnyịn ikpebe Jehovah inyụn̄ inyene ime, iwụtde esịtekọm ke idotenyịn oro enye ọnọde nnyịn. Ndien nte nnyịn ikade iso ndidu ke edidemede, ẹyak nnyịn isọn̄ọ imụm idotenyịn nsinsi uwem ikama. Do, mme ikọ ntịn̄nnịm un̄wọn̄ọ emi ke akpanikọ ẹyenyene n̄kpọ ndinam ye nnyịn: “[Jehovah] eyemenede fi enịm ke enyọn̄ man ada isọn̄ enyene. [“Ke ini ẹsobode mme idiọk owo ẹfep, afo oyokụt,” NW].”—Psalm 37:34.
[Mme Ikọ idakisọn̄]
^ ikp. 5 Ẹkeme ndidi n̄kpọ un̄wam n̄ko ndidụn̄ọde uyarade itiokiet oro ẹwụtde nte ke nnyịn idu uwem ke “ukperedem ini” nte ẹkewụtde ke nsiondi Enyọn̄-Ukpeme eke January 15, 2000, page 12 ye 13.—2 Timothy 3:1.
^ ikp. 7 Ke etịn̄de aban̄a ikọedinam Greek oro ẹkabarede nte “ẹkpeme,” ewetn̄wed ukabadeikọ oro W. E. Vine anam an̄wan̄a ete ke ikọ emi ke ata ata usụn̄ ọwọrọ ‘ndibịn idap mfep,’ ndien enye “itịn̄ke iban̄a ikpîkpu editaba idap, edi etịn̄ aban̄a mbon oro ẹdude ke ukpeme ẹtie ẹbet n̄kpọ.”
Didie ke Afo Ọkpọbọrọ?
• Didie ke nnyịn ikeme ndisọn̄ọ edinịm ke akpanikọ nnyịn nte ke utịt editịm n̄kpọ emi emekpere?
• Nso ke ẹkeme ndikpep nto uwụtn̄kpọ Peter, James, ye John?
• Edu ita ewe ẹdin̄wam nnyịn ndika iso ndu ke ukpeme ke n̄kan̄ eke spirit?
• Ntak emi edide ini ‘ndisọn̄ọ mmụm se nnyịn inyenede n̄kama’?
[Mme Mbụme Ukpepn̄kpọ]
[Ekebe/Ndise ke page 21]
“Ọfọfọn Ọnọ Owo eke Ebetde.”—Daniel 12:12
Kere nte ke etie owo ukpeme ke idem nte ke inọ ọmọn̄ odụk okụre oro enye ekpemede. Ke eyo okụtde, owo ukpeme emi enen̄ede akpan̄ utọn̄ ke uyom ekededi oro etiede nte ke inọ ke edi. Nte ini ebede enye enen̄ede akpan̄ utọn̄ onyụn̄ asuan enyịn esie. Ẹkeme ndikụt ke abian̄a abian̄a uyom—uyom ọkpọsọn̄ ofụm oro enyen̄ede mme eto m̀mê uyom otode n̄kpọ oro an̄wa onụkde ọtọ—ekeme ndibian̄a enye.—Luke 12:39, 40.
Ukem emi ekeme nditịbe nnọ mmọ oro “ẹtiede ẹbet ediyarade Ọbọn̄ nnyịn Jesus Christ.” (1 Corinth 1:7) Mme apostle ẹkekere ẹte ke Jesus ọmọn̄ “ọtọn̄ọ ntak ayak Obio Ubọn̄ ọnọ Israel” ke ndondo oro enye ekesetde ke n̄kpa. (Utom 1:6) Isua ifan̄ ke ukperedem, ama oyom ẹti mme Christian ke Thessalonica nte ke edidu Jesus ekedi ke ini iso. (2 Thessalonica 2:3, 8) Kpa ye oro, abian̄a abian̄a idotenyịn aban̄ade usen Jehovah ikanamke akpa mme anditiene Jesus oro ẹkpọn̄ usụn̄ oro adade esịm uwem.—Matthew 7:13.
Ke eyo nnyịn, edikpu ke ntak etiede nte ke utịt editịm n̄kpọ emi ebịghi ndidi ikpanamke nnyịn itre ndidu ke ukpeme. Abian̄a abian̄a uyom ekeme ndibian̄a owo ukpeme emi odude ke edidemede, edi ana enye osụk ekpeme! Utom esie edi oro. Ukem oro ke edi ye mme Christian.
[Ndise ke page 18]
Nte afo emenịm ke akpanikọ ete ke usen Jehovah emekpere?
[Mme ndise ke page 19]
Mme mbono esop, akam, ye nti edu ukpepn̄kpọ, ẹn̄wam nnyịn ndika iso ndu ke ukpeme
[Ndise ke page 22]
Ukem nte Margaret, nnyịn ikpakam inyene ime inyụn̄ itetịm idu ke ukpeme