“Afo Emenen, Uwem Enen̄ede Enem!”

NTE afo akpama ndikpep se uwem enen̄erede ọwọrọ? Magdalena, eyenan̄wan isua 18, edide kiet ke otu Mme Ntiense Jehovah emi odụn̄de ke Szczecin, Poland, ama an̄wam Katarzyna, nsan̄a ubet ukpepn̄kpọ esie ke akamba ufọkn̄wed, ndinam oro. Katarzyna ekedi owo oro ọkọsọn̄ọde enịm ke Abasi idụhe, edi ke ini Magdalena ekenyenede nneme ye enye aban̄a Bible, enye ama enen̄ede owụt udọn̄.

Okposụkedi Katarzyna akamade nneme oro Magdalena ekenyenede ye enye ke Bible, enye ikenyịmeke kpukpru se ẹkenemede. Nte enye ekenemede ye Magdalena aban̄a mme ufan akpanikọ, Katarzyna ama ọdọhọ ini kiet ete: “Afo emenyene Bible; ọmọfiọk mme edumbet oro ekpetienede ye ebiet oro okpokụtde mme ufan. Edi nso kaban̄a mbon oro mîkemeke nditiene mme edumbet oro idahaemi?”

N̄wọrọnda ukpụhọde ama ada itie ke ini Katarzyna akanamde isan̄ aka London, England. Enye ama aka ekese ọfis n̄kọk itieutom Mme Ntiense Jehovah do, ndien mfọnido oro ẹkewụtde enye ama enen̄ede otụk enye. Utọ n̄kpri mfọnido nte ediberede usụn̄ nnọ enye ye edinen̄ede n̄wụt udọn̄ ke se enye eketịn̄de ẹma ẹdemede enye udọn̄.

Ke ini obufa isua ufọkn̄wed ọkọtọn̄ọde ke September 2001, Katarzyna ama ebiere ndinyịme ukpepn̄kpọ Bible ofụri ini. Enye ke ọkọri ke ima oro enye enyenede ọnọ mme edumbet Bible onyụn̄ ọtọn̄ọ ndida mmọ nsịn ke edinam ke uwem ofụri usen esie. Ke ndondo emi, enye ama ọdọhọ Magdalena ete: “Etie mi ke idem nte n̄kpọ eke ntọn̄ọde obufa uwem.” Enye n̄ko ama eneme ibio ibio nneme ye Magdalena ke urụk ukopikọ oro ẹkamade-kama ẹsan̄a, ọdọhọde ete: “Sọsọn̄ọ etieti ke ukpepn̄kpọ nnyịn mfịn! Afo emenen, uwem enen̄ede enem! Edi n̄kpọ inemesịt ndifiọk enye emi nnyịn ikpọkọmde kaban̄a oro.”