Mbụk Eyouwem

Ekpri Babru Oro Okokpụhọrede Uwem Mi

NTE IRENE HOCHSTENBACH OBỤKDE

Ekedi ke mbubịteyo Tuesday kiet ke 1972. N̄kedi isua 16 ke emana, ndien mma ntiene ete ye eka mi n̄ka mbono ido ukpono ke Eindhoven, obio kiet ke ikpehe obio ukara Brabant ke Netherlands. N̄kokopke idem inem, ntre mma n̄kere ke n̄kpakakam ndu ke ebiet en̄wen. Ekem, n̄kaiferi iba ẹma ẹnọ mi ekpri babru oro ẹkewetde etop emi: “Edima Irene, nnyịn iyama ndin̄wam fi.” N̄kọfiọkke adan̄a nte ekpri babru oro edikpụhọrede uwem mi. Edi mbemiso mbụkde se iketịbede ke oro ebede, yak ntịn̄ kan̄a mban̄a idaha mi ke uwem.

N̄KAMANA ke isuo Belitung, ke Indonesia. Ke nteti ndusụk uyom oro n̄kesikopde ke ufiop ufiop isuo oro—uyom ikọt eyop oro ofụm abarade, sụn̄sụn̄ uyom akpa oro odude ekpere, imam nditọwọn̄ oro ẹbrede mbre ẹkpere ufọk nnyịn, ye uyom ikwọ oro nsitiede ke ufọk nnyịn n̄kop. Ke 1960, ke ini n̄kedide isua inan̄ ke emana, nnyịn ima ikpọn̄ Indonesia ika Netherlands. Ikanam anyan isan̄ emi ke nsụn̄ikan̄, ndien uyom oro nnen̄ede nti edi uyom n̄kpọmbre mi oro n̄kamade n̄kan—ekpri eyen ọkpọ oro ekesimiade ekọmọ. Ke ndide isua itiaba, mma ndọn̄ọ udọn̄ọ oro akanamde mi n̄kabade ndi inan, ndien tọn̄ọ ke ini oro, n̄kemeke ndikop uyom n̄kpọ ndomokiet. N̄kukụre uyom oro ntide edi enye oro n̄kokopde mbemiso ndide inan.

Ndikọri Nte Inan

Ke ntak ima ima ntịn̄enyịn oro ete ye eka mi ẹkenọde mi ke ntọn̄ọ, ami n̄ketịmke mfiọk se edidi inan ọwọrọde. Ke ini n̄kedide  eyenọwọn̄, n̄kesikam nda n̄kpọ un̄wam ukopikọ oro n̄kenyenede nnam mbubru, okposụkedi enye mîketịmke inyene ufọn inọ mi. Man ẹnyene nneme ye ami, nditọ mbọhọ nnyịn ẹkesida ndom ẹwet ofụri se ẹyomde nditịn̄ ke mbenusụn̄, ndien mma nsibọrọ mmọ, idem okposụkedi mmen̄kesikopke se ntịn̄de.

Nte n̄kọkọride n̄kpon, mma ndifiọk ke mmokpụhọde ye mme owo eken. Mma nnyụn̄ ntọn̄ọ ndikụt nte ndusụk owo ẹsakde mi ke ntak emi ndide inan, ke adan̄aemi mbon eken mîkesimaha ndisan̄a ye ami. Mma ntọn̄ọ nditie ikpọn̄ ikpọn̄ nnyụn̄ n̄kop ndobo. Do ke n̄kọtọn̄ọ ndifiọk se ndidi inan ọwọrọde, ndien nte n̄kọkọride n̄kpon, ntre ke n̄kenen̄ede n̄kop ndịk mban̄a mbon oro ẹkopde n̄kpọ.

Man n̄keme ndika san̄asan̄a ufọkn̄wed mbon inan, ete ye eka mi ẹma ẹda ofụri ubon nnyịn ẹwọrọ ẹkpọn̄ ekpri obio oro ikodụn̄de ke ikpehe obio ukara Limburg ẹka Eindhoven. Ete mi ama oyom utom do, ndien nditọeka mi ẹma ẹtọn̄ọ obufa ufọkn̄wed. Ami mmokop inemesịt mban̄a kpukpru ukpụhọde oro mmọ ẹkenamde ke ntak mi. Ẹma ẹkpep mi ke ufọkn̄wed ndikpụhọde uyo nnyụn̄ ntịn̄ ikọ nte etịmde an̄wan̄a. Ndien okposụkedi andikpep mîkesidaha usem idiọn̄ọ ikpep n̄kpọ, nsan̄a ubet ukpepn̄kpọ mi ẹma ẹkpep mi usem idiọn̄ọ.

Ndidu Ikpọn̄ Ikpọn̄ Uwem

Nte n̄kọkọride n̄kpon, ete ye eka mi ẹma ẹsịn ofụri ukeme ndineme nneme ye ami, edi ediwak n̄kpọ ikan̄wan̄ake mi. Ke uwụtn̄kpọ, ami n̄kọfiọkke nte ke ete ye eka mi ke ẹkekpep Bible ye Mme Ntiense Jehovah. Edi mmeti usen kiet oro nnyịn ikakade ebiet kiet emi ata ediwak owo ẹketiede ke n̄kpọitie. Kpukpru mmọ ẹkese iso iso, ndusụk ini ẹma ẹsikwak ubọk, ekem ẹdaha ẹdada—edi n̄kọfiọkke ntak emi mmọ ẹkenamde kpukpru oro. Nte ini akakade, mma ndifiọk ke n̄kodu ke akamba mbono Mme Ntiense Jehovah. Ete ye eka mi n̄ko ẹma ẹsida mi ẹka ekpri ufọkmbono ke Eindhoven. Mma n̄kop inem ndidu do koro kpukpru owo ẹma ẹfọn ido ndien eketie nte ke ubon nnyịn ama okop inemesịt, edi n̄kọfiọkke ntak emi nnyịn ikesikade do. Idahaemi, mmọfiọk nte ke ekpri ufọkmbono oro ekedi Ufọkmbono Obio Ubọn̄ Mme Ntiense Jehovah.

Ke ndiọkiso, owo ndomokiet ikodụhe ndikabade se ẹkenamde ke mme mbono esop emi nnọ mi. Idahaemi ke ndifiọk nte ke mbon oro ẹkedude do ẹma ẹyom ndin̄wam mi edi mmọ ikọfiọkke nte ẹkpenamde n̄kpọ ye ami sia ndide inan. N̄kesitie ikpọn̄ ikpọn̄ ke mme mbono esop emi ndien mma nsikere nte, ‘Akpakam edi n̄kodu ke ufọkn̄wed utu ke ndidu mi.’ Edi ke adan̄aemi n̄kosụk n̄kerede n̄kpọ emi, n̄kaiferi iba ẹma ẹsọsọp ẹwet n̄kpọ ke ekpri babru ẹnyan ẹnọ mi. Oro edi ekpri babru oro n̄ketịn̄de mban̄a ke ntọn̄ọ. N̄kọfiọkke ke ekpri babru emi ayanam mi ntọn̄ọ ọsọn̄urua itie ufan oro edisiode mi ke itie ikpọn̄.

Ndikọri Ọsọn̄urua Itie Ufan

Colette ye Hermine, nditọiban iba oro ẹkenọde mi ekpri babru oro ẹkedi n̄kpọ nte isua 20 ke emana. Ekem, mma ndifiọk ke mmọ ẹkedi esop Mme Ntiense Jehovah oro nsidụkde mbono esop man ẹdinam utom nte mme asiakusụn̄ ofụri ini, m̀mê mme asan̄autom uyọhọ ini. Okposụkedi Colette ye Hermine mîketịmke ifiọk usem idiọn̄ọ, mma ndomo ndifiọk se mmọ ẹkesitịn̄de ebe ke ndise mmọ n̄kpọkinua ke ini mmọ ẹtịn̄de ikọ ye ami, ndien nnyịn ima isineme nneme mfọn mfọn ke utọ usụn̄ emi.

Ete ye eka mi ẹma ẹkop inemesịt ke ini Colette ye Hermine ẹkedọhọde ke iyom ndikpep Bible ye ami, edi nditọiban emi ẹma ẹnam se ikande oro. Mmọ ẹma ẹnen̄ede ẹsịn ukeme ndikabade se ẹkesinemede ke mme mbono esop ke Ufọkmbono Obio Ubọn̄ nnọ mi,  ẹnyụn̄ ẹnam mi mmehe ye mbon eken ke esop. Mmọ ẹma ẹsitie ye ami ẹkpep mme nneme Bible oro ndidade n̄kwọrọ ikọ, ẹnyụn̄ ẹn̄wam mi nditịm mme utịn̄ikọ eyen ufọkn̄wed oro ndinọde ke Ufọkn̄wed Utom Ukara Abasi. Kamse, idahaemi mmakam nnyene uko ndida ke iso otuowo oro ẹkopde n̄kpọ nnọ utịn̄ikọ!

Akan oro, Colette ye Hermine ẹma ẹwụt ke mmimọ idi mme owo oro n̄kemede ndiberi edem. Mmọ ẹma ẹsinyene ime ẹnyụn̄ ẹnọ mi n̄kpan̄utọn̄. Okposụkedi nnyịn ikesiwakde ndisak ke ini nnamde ndudue, akananam mmọ ikadaha mi inam mbubru; m̀mê ndikop bụt ndidu ye ami. Mmọ ẹma ẹsidomo ndifiọk nte etiede mi ke idem ẹnyụn̄ ẹda mi nte idem mmọ. Nti nditọiban emi ẹma ẹnọ mi ata eti enọ—ima ye itie ufan mmọ.

Ke edide akpan n̄kpọ akan, Colette ye Hermine ẹma ẹkpep mi nte ke nnyene ndidiọn̄ọ Abasi nnyịn, Jehovah, nte ufan oro ẹkemede ndiberi edem. Mmọ ẹma ẹnam mi mfiọk nte ke Jehovah esikụt mi ntiede ke Ufọkmbono Obio Ubọn̄ ye nte ke enye ọfiọk se owo ndidi inan ọwọrọde. Edi n̄kpọ inemesịt didie ntem ndikụt nte ima oro nnyịn inyenede inọ Jehovah adiande nnyịn mbita ọtọkiet nte ufan! Ke ntak edikere mban̄a oro Jehovah ekerede aban̄a mi, ọkọrọ ye ima oro mmade enye, mma nyarade uyakidem mi nnọ enye ke ndina baptism ke July 1975.

Ndisan̄a ye Akpan Ufan

Ke mme isua oro ẹketienede, mma ndimehe ye ediwak nditọete Christian iren ye iban. Eyenete eren kiet ama akabade edi ata akpan ufan mi, ndien nnyịn ima idọ ndọ ke 1980. Esisịt ini ke oro ebede, mma ntọn̄ọ ndinam utom nte asiakusụn̄, ndien ke 1994, ẹma ẹnọ mi ye Harry, ebe mi, ika ikanam utom nte mme akpan asiakusụn̄ ke efakutom oro Ẹsemde Usem Idiọn̄ọ Dutch. Ke isua oro eketienede, n̄kenyene ndinam utom oro akamade n̄kpọ-ata. N̄kenyene nditiene ebe mi oro mîdịghe inan emi akanamde utom nte andida itie esenyịn circuit, n̄kese nsio nsio esop.

Nte nsinamde edi emi. Akpa ini oro ikade ikese esop, mmesisọsọp mbịne ediwak nditọete iren ye iban nte n̄kekeme nnyụn̄ ntịn̄ owo emi ami ndide nnọ mmọ. Mmesisian mmọ ke ndi inan ndien yak mmọ ẹsise mi iso ẹnyụn̄ ẹtịn̄ ikọ ye ami sụn̄sụn̄. Mmesidomo n̄ko ndinọ ibọrọ inikiet inikiet ke mme mbono esop. Ndien mmesibụp m̀mê odu owo oro edimade ndikabade ikọ nnọ mi ke urua mbono esop oro ye ke an̄wautom.

Ndinam n̄kpọ ntem esinen̄ede an̄wam tutu nditọete mi ẹsifre ndusụk ini nte ke ndi inan, adade esịm mme idaha oro ẹdide n̄kpọ imam.  Ke uwụtn̄kpọ, mmọ ẹsidọhọ mi ẹte ke ini mmimọ isikụtde mi nsan̄ade ke obio, mmimọ imesifri ifiom ubomisọn̄ mmimọ ndikọm mi, edi ami nsiyereke. Ami n̄ko mmesifre ndusụk ini nte ke ndi inan—nte ini oro nsidomode ndidọn̄ odu ye ebe mi. Ke ini n̄kụtde bụt ofụkde enye iso inikiet inikiet, mmesifiọk nte ke “odu” mi ama ọsọn̄ uyo akaha.

Nditọwọn̄ ẹsin̄wam mi ke usụn̄ oro mmen̄kodorike enyịn. Ke ata akpa ini oro ikakade ikese esop kiet, eyeneren isua usụkkiet ama okụt ke ndusụk owo ke Ufọkmbono Obio Ubọn̄ ẹma ẹsimen̄e nditịn̄ ikọ ye ami, ntre enye ama ebiere ndinam n̄kpọ mban̄a oro. Enye ama asan̄a ekpere mi, edimụm mi ubọk asan̄a akada ke ufọt Ufọkmbono Obio Ubọn̄ onyụn̄ ofiori ete, “Mbọk, emi edi Irene—enye edi inan!” Mbon oro ẹkedude ẹma ẹsan̄a ẹdi ẹnyụn̄ ẹditịn̄ owo emi mmọ ẹdide.

Nte nsan̄ade ye ebe mi nnam utom circuit, mmaka iso ndinyene ediwak ufan. Uwem mi okpụhọde didie ntem mfịn akan mme isua oro n̄ketiede ikpọn̄ ikpọn̄! Toto ke mbubịteyo oro Colette ye Hermine ẹkewetde n̄kpọ ke ekpri babru oro ẹnọ mi, ami mmokụt odudu oro ufan enyenede mmonyụn̄ nsobo mme owo oro ami nnen̄erede mma. Ke akande kpukpru, ami mmedifiọk Jehovah, kpa Ufan oro ọsọn̄de urua akan. (Rome 8:38, 39) Ekpri babru oro okpụhọde uwem mi didie ntem!

[Ndise ke page 24]

Mmeti uyom n̄kpọmbre mi oro n̄kamade n̄kan

[Mme ndise ke page 25]

Ke an̄wautom n̄ko ye Harry, ebe mi