Ẹti Mme Ntiense Jehovah Oro Ẹkewotde

KE March 7, 2002, ẹma ẹfụhọde itiat editi ke obio Körmend ke n̄kan̄ edem usoputịn Hungary. Ẹkenam emi nditi Mme Ntiense Jehovah ita oro mbon Nazi ẹkewotde ke 1945.

Ẹkedian itiat editi emi ke ibibene ibuot itieutom unịme ikan̄ emi odude idahaemi ke Usụn̄ Hunyadi, kpa ebiet emi ẹkewotde mmọ. Ẹkedian itiat emi ke 2002 ndida nti ‘mme Christian oro ẹkewotde ke March 1945, ke ntak mmọ ẹkesịnde ndidụk ekọn̄ ke ntak ubieresịt mmọ. Antal Hőnisch (1911-1945), Bertalan Szabó (1921-1945), János Zsondor (1923-1945), emi ẹkedide Mme Ntiense Jehovah.’

Uwotowo emi akada itie n̄kpasịp ọfiọn̄ iba mbemiso Ekọn̄ Ererimbot ọyọhọ II ekesịmde utịt. Ntak ẹkewotde mme Christian emi? N̄wedmbụk n̄kpọntịbe Hungary oro Vas Népe anam an̄wan̄a ete: “Ke Hitler ama akada ukara ke Germany, idịghe mme Jew kpọt edi n̄ko Mme Ntiense Jehovah ẹma ẹsịne ke otu mbon oro ẹkekọbọde ẹnyụn̄ ẹtụhọrede, ẹsịnde ke itienna ekikere ẹnyụn̄ ẹwotde edieke mmọ mîkan̄ke edinịm ke akpanikọ ido ukpono mmọ. . . . Ke March 1945, edinam oyomonsia ama akabade edi ọsọ n̄kpọ ke n̄kan̄ edem usoputịn Hungary. . . . Ndusụk ntak edinam oyomonsia emi ẹkedi man ẹbịn Mme Ntiense Jehovah ẹsion̄o ke obio ẹnyụn̄ ẹwot mmọ.”

Ẹkebahade edinam edifụhọde itiat oro ẹsịn ke ikpehe iba. Ẹkenịm akpa ikpehe edinam ke ufọkmbre Ufọkubọn̄ Batthyány, ndien mme etịn̄ikọ ẹma ẹsịne Prọfesọ Szabolcs Szita, adaibuot ke Ufọkutom Esede Aban̄a N̄wetnnịm N̄kpọ Nsobo eke Orụk oro ke Budapest; László Donáth, andibuana ke Kọmiti Ufọkmbet Esede Aban̄a Unen Owo, Mbubehe N̄kpri Otu ye eke Ido Ukpono; ye Kálmán Komjáthy, owo emi okokụtde uwotowo emi, emi idahaemi edide ewetmbụk obio oro. Se ibede owo 500 emi ẹkedude do ẹma ẹnam isan̄ man ẹkedụk ọyọhọ ikpehe edinam iba—edifụhọde itiat editi oro, emi Ọbọn̄ obio Körmend, József Honfi okofụhọrede.

Ke leta oro enye ekewetde mbemiso ẹwotde enye, Ntiense oro Ján Žondor (János Zsondor) ama ọdọhọ nditọete Christian esie iren ye iban ete mmọ ẹkûfụhọ. Enye ekewet ete: “Ke nsụk nteti mme ikọ John oro ẹkụtde ke Ediyarade 2:10: ‘Wụt idem nte anam-akpanikọ tutu esịm n̄kpa.’ . . . Ẹdọhọ mbonufọk ẹte mmọ ẹkûfụhọ, koro n̄kpa ke ntak akpanikọ n̄kpaha nte abiatibet.”

[Ndise ke page 32]

Bertalan Szabó

[Ndise ke page 32]

Antal Hőnisch

[Ndise ke page 32]

Ján Žondor