Mme Mbụme Ẹtode Mme Andikot

Nte Christian ndidori ubọk ke Bible ke esopikpe nda un̄wọn̄ọ ke iyetịn̄ ofụri akpanikọ ekem ye N̄wed Abasi?

Owo kiet kiet enyene ndinam ọkpọkpọ ubiere ke afan̄ emi. (Galatia 6:5) Nte ededi, Bible ikpanke owo ndida un̄wọn̄ọ nditịn̄ akpanikọ ke esopikpe.

Edida un̄wọn̄ọ edi ọsọ edinam anyan ini. Ke uwụtn̄kpọ, ke eset, mbon Greece ẹma ẹsimenede ubọk ke enyọn̄ mîdịghe ẹtụk itieuwa ke ini mmọ ẹdade un̄wọn̄ọ. Ke ini owo Rome okoyomde ndida un̄wọn̄ọ, enye ama esikama itiat ke ubọk onyụn̄ ọn̄wọn̄ọ ete: “Edieke n̄koide-koi nsu nsu, ke adan̄aemi Jupiter ekpemede obio ye ọkpọsọn̄ ufọkekọn̄ ukpeme obio, yak [abasi] Jupiter ọbọ mi kpukpru nti n̄kpọ ke uwem ọduọk, kpa nte nduọkde itiat emi.”—Cyclopedia of Biblical, Theological, and Ecclesiastical Literature, oro John McClintock ye James Strong ẹwetde, Eboho VII, page 260.

Mme utọ edinam oro ẹkewụt udọn̄ ubonowo ndifiọk nte ke Abasi odu emi ekemede ndikụt se mme owo ẹnamde emi mmọ ẹdinamde ibat ẹnọ. Toto ke eset, ata mme andituak ibuot nnọ Jehovah ẹma ẹfiọk ke enye ọdiọn̄ọ se mmimọ itịn̄de inyụn̄ inamde. (Mme N̄ke 5:21; 15:3) Mmọ ẹma ẹsida un̄wọn̄ọ ke iso Abasi, mîdịghe ẹda Enye nte ntiense, yak idọhọ ntre. Ke uwụtn̄kpọ, Boaz, David, Solomon, ye Zedekiah ẹma ẹnam emi. (Ruth 3:13; 2 Samuel 3:35; 1 Ndidem 2:23, 24; Jeremiah 38:16) Mme andituak ibuot nnọ ata Abasi n̄ko ẹma ẹsinyịme mbon en̄wen ẹnọ mmimọ un̄wọn̄ọ. Ntre ke ekedi ye Abraham ye Jesus Christ.—Genesis 21:22-24; Matthew 26:63, 64.

Ndusụk ini owo oro adade un̄wọn̄ọ ke iso Jehovah ama esinam idiọn̄ọ. Abram (Abraham) ama ọdọhọ edidem Sodom ete: “Mma mmen ubọk nnọ Jehovah, Abasi Ibom, andinyene enyọn̄ ye isọn̄.” (Genesis 14:22) Angel oro eketịn̄de ikọ ọnọ prọfet Daniel ama “emenede ubọk nnasia esie ye ubọk ufien esie ke enyọn̄, onyụn̄ otomo enye emi odude uwem ke nsinsi.” (Daniel 12:7) Ẹkam ẹtịn̄ ẹban̄a Abasi ke ndamban̄a usụn̄ nte emenerede ubọk esie ke enyọn̄ ke un̄wọn̄ọ.—Deuteronomy 32:40; Isaiah 62:8.

N̄wed Abasi ikpanke owo ndida un̄wọn̄ọ. Nte ededi, Christian inyeneke ndida un̄wọn̄ọ man ọsọn̄ọ kpukpru se enye etịn̄de. Jesus ọkọdọhọ ete: “Edi yak ikọ mbufo edi Edi ntre, ye, Idịghe ntre.” (Sịghisịghi ubọkn̄wed edi eke nnyịn; Matthew 5:33-37) Mbet oro James ama etịn̄ ukem ikọ oro. Ke ini enye ọkọdọhọde ete “ẹkûtomo n̄kpọ,” enye okodụri owo utọn̄ aban̄a edida un̄wọn̄ọ ke se mîdịghe akpan n̄kpọ. (James 5:12) Jesus m̀mê James ikọdọhọke ke akwan̄a ndida un̄wọn̄ọ ke iyetịn̄ akpanikọ ke esopikpe.

Nso ndien, edieke ẹdọhọde Christian ada un̄wọn̄ọ ke esopikpe nte ke se imọ iditịn̄de edi akpanikọ? Enye ekeme ndikere ke idiọkke imọ ndida utọ un̄wọn̄ọ oro. Mîdịghe ntre, ẹkeme ndinyịme enye ọsọn̄ọ etịn̄ nte ke imọ idisụhu nsu.—Galatia 1:20.

Ke ini edide ido esopikpe ndimenede ubọk ke enyọn̄ m̀mê ndidori ubọk ke Bible ke ini ẹdade un̄wọn̄ọ, Christian ekeme ndimek ndinam ntre. Enye ekeme nditi mme uwụtn̄kpọ N̄wed Abasi ẹban̄ade edida un̄wọn̄ọ oro ẹsan̄ade ye edinam idiọn̄ọ. Ye Christian, se idide akpan n̄kpọ ikan owo ndinam ndusụk idiọn̄ọ ke ini adade un̄wọn̄ọ, edi enye nditi nte ke imọ ida un̄wọn̄ọ emi ke iso Abasi nditịn̄ akpanikọ. Utọ un̄wọn̄ọ oro edi ata akpan n̄kpọ. Edieke Christian ekerede ke imọ imekeme ndien ke ikpenyene ndibọrọ mbụme oro ẹdibụpde imọ ke mme utọ idaha oro, do ana enye eti ke imọ ima ida un̄wọn̄ọ nditịn̄ akpanikọ. Nte ededi, emi edi se Christian ekpetịn̄de kpukpru ini.