‘Ẹn̄wụm Mfri Ekese’

‘Ẹn̄wụm mfri ekese; ntem ke mbufo ẹdidi mbet Mi.’—JOHN 15:8.

1. (a) Nso n̄kpọ oro ẹyomde man owo edi mbet ke Jesus eketịn̄ ọnọ mme apostle esie? (b) Nso mbụme ke nnyịn ikpobụp idem nnyịn?

 KE MBUBỊTEYO oro mbemiso n̄kpa esie. Jesus ama ada ekese ini eneme ata ọkpọkpọ nneme man esịn udọn̄ ọnọ mme apostle esie. Idahaemi, anaedi ama ebe ufọt okoneyo, edi ke ntak ima oro enye akamade mme n̄kpet n̄kpet ufan esie, Jesus ama aka iso ndineme nneme. Ekem, ke ufọt nneme esie, enye ama eti mmọ n̄kpọ kiet efen oro okoyomde mmọ ẹnam man ẹka iso ẹdi mme mbet imọ. Enye ọkọdọhọ ete: “Ete Mi ada ubọn̄ ke edin̄wụm emi mbufo ẹn̄wụmde mfri ekese; ntem ke mbufo ẹdidi mbet Mi.” (John 15:8) Ndi nnyịn mfịn imanam n̄kpọ oro ẹyomde mi man owo edi mbet? Nso ke ‘ndin̄wụm mfri ekese’ ọwọrọ? Man ifiọk emi, ẹyak nnyịn ifiak ibịne nneme oro enye ekenemede mbubịteyo oro.

2. Ewe n̄ke aban̄ade mfri ke Jesus ekeke mbubịteyo oro mbemiso n̄kpa esie?

² Item oro ẹkenọde ẹte ẹn̄wụm mfri edi ubak n̄ke oro Jesus ekekede ọnọ mme apostle esie. Enye ọkọdọhọ ete: “Ami ndi ata vine, Ete Mi onyụn̄ edi ọdiọn̄-in̄wan̄ vine. Kpukpru n̄kọk ke idem Mi eke mîn̄wụmke mfri, Enye esịbe efep; ndien kpukpru n̄kọk eke on̄wụmde mfri, Enye ọdiọn̄, man on̄wụm mfri awak akan. Mbufo ẹmesasana oto ke ikọ eke mma n̄ketịn̄ nnọ mbufo. Ẹdụn̄ Mi ke idem, Ami nnyụn̄ ndụn̄ mbufo ke idem. Nte n̄kọk mîkemeke ndin̄wụm mfri ke idem esie, ibọhọke enye odụn̄ ke vine, kpasụk ntre ke mbufo ikemeke ndin̄wụm mfri, ibọhọke mbufo ẹdụn̄ Mi ke idem. Ami ndi vine,  mbufo ẹdi mme n̄kọk: . . . Ete Mi ada ubọn̄ ke edin̄wụm emi mbufo ẹn̄wụmde mfri ekese; ntem ke mbufo ẹdidi mbet Mi. Kpa nte Ete akamade Mi, Ami n̄konyụn̄ mma mbufo: ẹsụk ẹdụn̄ ke ima Mi. Edieke mbufo ẹnịmde mbet Mi, mbufo ẹyedụn̄ ke ima Mi; kpa nte Ami n̄kenịmde mbet Ete Mi, nnyụn̄ ndụn̄de ke ima Esie.”—John 15:1-10.

3. Nso ke ana mme anditiene Christ ẹnam man ẹn̄wụm mfri?

³ Jehovah edi Ọdiọn̄-In̄wan̄ vine ke n̄ke emi, Jesus edi vine, ndien mme apostle oro Jesus eketịn̄de ikọ ọnọ ẹdi mme n̄kọk. Adan̄a nte mme apostle oro ẹkedomode ‘ndidụn̄’ Jesus ke idem, mmọ ẹkenyene ndin̄wụm mfri. Ekem Jesus ama anam an̄wan̄a nte mme apostle oro ẹkpekụtde unen ke ndika iso nnyene akpan edidianakiet emi: “Edieke mbufo ẹnịmde mbet Mi, mbufo ẹyedụn̄ ke ima Mi.” Ke ukperedem, apostle John ama ewet ukem ikọ oro ọnọ ẹsọk ekemmọ mme Christian: “Owo emi enịmde mbet [Christ] odụn̄ ke Enye.” * (1 John 2:24; 3:24) Ntem, ke ndinịm mbet Christ, mme anditiene enye ẹdụn̄ ke enye, ndien edidianakiet oro anam mmọ ẹn̄wụm mfri. Nso idi uduot mfri oro oyomde nnyịn in̄wụm?

Ifet Ndinam N̄kọri

4. Nso ke nnyịn ikeme ndikpep nto ọkpọikọ oro nte ke Jehovah ‘esisịbe’ kpukpru n̄kọk eke mîn̄wụmke mfri “efep”?

⁴ Ke n̄ke vine oro, ke ini n̄kọk mîn̄wụmke mfri, Jehovah ‘esisịbe efep.’ Nso ke emi asian nnyịn? Enye asian nnyịn nte ke oyom kpukpru mme mbet ẹn̄wụm mfri ye nte ke kpukpru mmọ ẹkeme ndin̄wụm mfri, inamke n̄kpọ m̀mê nso idi mme idaha ye ukeme mmọ. Ke nditịm ntịn̄, ‘ndisịbe,’ m̀mê ndinam mbet Christ okûdot ke ntak okpude ndinam n̄kpọ oro akande ukeme esie akpatuaha ye mme ima ima usụn̄ oro Jehovah esinamde n̄kpọ.—Psalm 103:14; Colossae 3:23; 1 John 5:3.

5. (a) Didie ke n̄ke Jesus owụt ke nnyịn imekeme ndinam n̄kọri ke ndin̄wụm mfri? (b) Ewe orụk mfri iba ke nnyịn idineme?

⁵ N̄ke Jesus aban̄ade vine mi owụt n̄ko nte ke inamke n̄kpọ se mme idaha nnyịn ẹdide, ana nnyịn iyom ifet ndinam n̄kọri ke utom nnyịn nte mme mbet. Tịm fiọk se Jesus ọdọhọde: “Kpukpru n̄kọk ke idem Mi eke mîn̄wụmke mfri, Enye esịbe efep; ndien kpukpru n̄kọk eke on̄wụmde mfri, Enye ọdiọn̄, man on̄wụm mfri awak akan.” (Sịghisịghi ubọkn̄wed edi eke nnyịn; John 15:2) Ke utịt n̄ke oro, Jesus ama esịn udọn̄ ọnọ mme anditiene enye ete ẹn̄wụm ‘mfri ekese.’ (Joh 15 Ufan̄ikọ 8) Nso ke emi ọwọrọ? Nte mme mbet, nnyịn ikpedehede ikop uyụhọ itre ndinam n̄kọri. (Ediyarade 3:14, 15, 19) Utu ke oro, nnyịn ikpenyene ndiyom mme usụn̄ ndinam n̄kọri ebe ke ndin̄wụm mfri. Nso orụk mfri ke nnyịn ikpodomo ndin̄wụm ekese? Mmọ ẹdi (1) “mbun̄wụm Spirit” ye (2) mfri Obio Ubọn̄.—Galatia 5:22, 23; Matthew 24:14.

Mbun̄wụm Edu Christian

6. Didie ke Jesus Christ ọkọsọn̄ọ owụt ufọn akpa mbun̄wụm spirit oro ẹsiakde?

⁶ Akpa ke otu “mbun̄wụm Spirit” oro ẹsiakde edi ima. Edisana spirit Abasi anam mme Christian ẹnyene ima, koro mmọ ẹnịmde ibet oro Jesus ọkọnọde esisịt ini mbemiso enye ekekede n̄ke vine oro on̄wụmde mfri. Enye ọkọdọhọ mme apostle esie ete: “Mmọnọ mbufo obufa ibet nte, Mbufo ẹma kiet eken.” (John 13:34) Ke akpanikọ, ke ofụri nneme oro enye ekenemede ke akpatre okoneyo oro enye okodude uwem ke isọn̄, Jesus ndien ndien ama eti mme apostle esie ufọn ediwụt ima.—John 14:15, 21, 23, 24; 15:12, 13, 17.

7. Didie ke apostle Peter okowụt ke ndin̄wụm mfri enyene ebuana ye ediwụt mme edu ẹbietde eke Christ?

⁷ Peter, emi okodude do okoneyo oro, ama ọfiọk ete ke ata mme mbet Christ ẹkenyene ndiwụt ima ebietde eke Christ ye mme edu ẹnyenede ebuana ye ima. Ediwak isua ke ukperedem, Peter ama esịn udọn̄ ọnọ mme Christian ndikọri utọ edu nte mfara ke idem, ima iman, ye ima. Enye ama adian do ete ke ndinam ntre  ‘ayanam nnyịn ikûtie ifu, ikûnyụn̄ inana mfri.’ (2 Peter 1:5-8) Se ededi oro idaha nnyịn edide, ndin̄wụm mfri eke spirit edi n̄kpọ oro nnyịn ikemede ndinam. Mmọdo, nnyịn ikpakam isịn ukeme ndiwụt ima, mfọnido, ifụre ifụre ido, ye mme edu eken ẹbietde eke Christ, ke ọyọhọ ọyọhọ udomo, koro “baba ibet kiet ibiọn̄ọke orụk edu emi.” (Galatia 5:23) Ke akpanikọ, ẹyak nnyịn in̄wụm ‘mfri ekese.’

Ndin̄wụm Mfri Obio Ubọn̄

8. (a) Nso ebuana idu ke ufọt mbun̄wụm spirit ye mfri Obio Ubọn̄? (b) Nso mbụme ke oyom nnyịn ibọrọ?

⁸ Ndiye inem inem mfri ẹsinam eto eye. Nte ededi, ufọn oro mme utọ mfri oro ẹnyenede okpon akan edinam eto eye. Edi n̄kpasịp mfri eto n̄ko ke ẹsida ẹtọ man eto awak. Kpasụk ntre, mbun̄wụm spirit anam se ikande edinam edu Christian nnyịn eye. Mme edu nte ima ye mbuọtidem ẹsinụk nnyịn n̄ko ndisuan etop Obio Ubọn̄ emi ẹkụtde ke Ikọ Abasi, emi onyụn̄ etiede nte n̄kpasịp. Tịm fiọk nte apostle Paul odoride nsọn̄uyo ke akpan ebuana emi. Enye ọdọhọ ete: “Nnyịn n̄ko imọbuọt idem [mbuọtidem emi edide ubak mbun̄wụm spirit] ndien ke ntre itịn̄.” (2 Corinth 4:13, NW) Ke usụn̄ emi, Paul aka iso anam an̄wan̄a ete, nnyịn “iwa uwa ekọm inọ Abasi kpukpru ini, kpa mfri n̄kpọk-inua”—udiana orụk mbun̄wụm emi ẹyomde nnyịn ikọri. (Mme Hebrew 13:15) Ndi ifet odu ke uwem nnyịn oro nnyịn ke akpanikọ ikemede ndin̄wụm mfri efen efen, in̄wụmde ‘mfri ekese,’ nte mme anditan̄a Obio Ubọn̄ Abasi?

9. Nte edin̄wụm mfri ọwọrọ ukem n̄kpọ ye edinam mme mbet? Nam an̄wan̄a.

⁹ Man ibọrọ mbụme oro nte enende, akpa kan̄a, nnyịn inyene ndifiọk se mfri Obio Ubọn̄ edide. Ndi ọkpọfọn ndibiere nte ke ndin̄wụm mfri ọwọrọ ndinam mbet? (Matthew 28:19) Ndi mfri emi nnyịn in̄wụmde ada akpan akpan aban̄a mme owo oro nnyịn in̄wamde ẹkabade ẹdi mme andituak ibuot nnọ Jehovah oro ẹma ẹkebụhọ ke mmọn̄? Baba. Edieke ekpedide ntre, Mme Ntiense oro ẹkade iso ẹtan̄a etop Obio Ubọn̄ ke ediwak isua ke efakutom oro owo mînyeneke udọn̄ ẹkpenen̄ede ẹkop mmemidem. Kamse, edieke mfri Obio Ubọn̄ emi nnyịn in̄wụmde akpadade aban̄a mbufa mbet kpọt, Mme Ntiense oro ẹnamde utom ọkpọsọn̄ mi ẹkpetie nte mme n̄kọk eke mîn̄wụmke mfri ke n̄ke Jesus! Nte ededi, oro idịghe ntre. Do, nso idi akpan mfri Obio Ubọn̄ ke utom ukwọrọikọ nnyịn?

Ndin̄wụm Mfri ebe ke Ndisuan N̄kpasịp Obio Ubọn̄

10. Didie ke n̄ke Jesus aban̄ade asuan n̄kpasịp ye nsio nsio orụk isọn̄ owụt se mfri Obio Ubọn̄ edide ye se enye mîdịghe?

¹⁰ N̄ke Jesus aban̄ade asuan-n̄kpasịp ye nsio nsio orụk isọn̄ ọnọ ibọrọ—ibọrọ oro esịnde udọn̄ ọnọ mbon emi ẹnọde ikọ ntiense ke mme efakutom oro mîn̄wụmke mfri. Jesus ọkọdọhọ ete ke n̄kpasịp edi etop Obio Ubọn̄ oro ẹkụtde ke Ikọ Abasi ndien ke isọn̄ edi ndamban̄a esịt owo. Ndusụk n̄kpasịp ẹma “ẹduọn̄ọ ke eti isọn̄, ẹtịbe, ẹnyụn̄ ẹn̄wụm mfri.” (Luke 8:8) Nso  mfri? Ọfọn, ke ini ibokpot etịbede, enye esikọri okpon, on̄wụm mfri, idịghe n̄kpri esan̄ ibokpot, edi obufa ibokpot. Kpasụk ntre, Christian esin̄wụm mfri, inen̄ekede idi mbufa mbet, edi mbufa n̄kpasịp Obio Ubọn̄.

11. Didie ke ẹkeme ndinam se mfri Obio Ubọn̄ edide an̄wan̄a?

¹¹ Ke ntre, mbun̄wụm mi idịghe mbufa mbet inyụn̄ idịghe nti edu Christian. Sia n̄kpasịp emi ẹsuande edide ikọ Obio Ubọn̄, ana mfri edi ediwak ikọ Obio Ubọn̄. Ndin̄wụm mfri ke afan̄ emi ọwọrọ nditịn̄ mban̄a Obio Ubọn̄. (Matthew 24:14) Nte nnyịn imekeme ndin̄wụm orụk mfri Obio Ubọn̄ oro—nditan̄a eti mbụk Obio Ubọn̄—inamke n̄kpọ m̀mê nso idi mme idaha nnyịn? Ih, imekeme! Ke n̄ke oro, Jesus ama anam ntak an̄wan̄a.

Ndisịn Mfọnn̄kan Ukeme Nnyịn Ọnọ Abasi Ubọn̄

12. Nte kpukpru mme Christian ẹdu ke ukem idaha edin̄wụm mfri Obio Ubọn̄? Nam an̄wan̄a.

¹² Jesus ọkọdọhọ ete: ‘Enye emi asuande n̄kpasịp ke eti isọn̄ on̄wụm idem, ndusụk utịm ikikie, ndusụk utịm ikata, ndusụk utịm ikedịp ye duop.’ (Matthew 13:23) N̄kpasịp oro ẹsuande ke in̄wan̄ ẹsin̄wụm ke nsio nsio udomo nte ekemde ye mme idaha mmọ. Ukem ntre, se nnyịn ikemede ndinam ke nditan̄a eti mbụk ekeme ndikpụhọde nte ekemde ye mme idaha nnyịn, ndien Jesus ama owụt ke imọ imọdiọn̄ọ emi. Ndusụk owo ẹkeme ndinyene ekese ifet; mbon efen ẹkeme ndinyene eti nsọn̄idem ẹnyụn̄ ẹnen̄ede ẹkop odudu. Ke ntre, se nnyịn ikemede ndinam ekeme ndikpon m̀mê  ndikpri n̄kan se mbon efen ẹnamde, edi adan̄a nte edide mfọnn̄kan ukeme nnyịn edi oro, Jehovah adat esịt. (Galatia 6:4) Idem ọkpọkọm usọn̄ m̀mê udọn̄ọ oro ọbọde owo odudu iyakke nnyịn ibuana ke utom ukwọrọikọ nte ikesibuanade, nte eyịghe mîdụhe Jehovah, Ete nnyịn oro atuade owo mbọm ese nnyịn nte kiet ke otu mmọ emi ‘ẹn̄wụmde mfri ekese.’ Ntak-a? Koro nnyịn inọde enye ‘kpukpru se nnyịn inyenede’—utom ofụri ukpọn̄. *—Mark 12:43, 44; Luke 10:27.

13. (a) Nso idi ata akpan ntak emi anamde nnyịn ‘ika iso’ in̄wụm mfri Obio Ubọn̄? (b) Nso idin̄wam nnyịn ndika iso n̄n̄wụm mfri ke efakutom oro owo mînyeneke udọn̄? (Se ekebe oro odude ke page 21.)

¹³ Ke udomo ekededi oro nnyịn ikemede ndision̄o mfri Obio Ubọn̄, edieke itide ntak emi nnyịn inamde emi, oro oyonụk nnyịn ‘ndika ika iso n̄n̄wụm mfri.’ (John 15:16) Jesus ama etịn̄ ata akpan ntak ete: “Ete Mi ada ubọn̄ ke edin̄wụm emi mbufo ẹn̄wụmde mfri ekese.” (John 15:8) Ih, utom ukwọrọikọ nnyịn anam enyịn̄ Jehovah asana ke iso kpukpru ubonowo. (Psalm 109:30) Honor, anam-akpanikọ Ntiense kiet emi odude ke iduọk isua 70 ọdọhọ ete: “Idem ke mme efakutom oro owo mînyeneke udọn̄, edi akwa ifet nditịn̄ ikọ ke ibuot Andikon̄ N̄kan.” Ke ini ẹkebụpde Claudio, emi edide ifịk ifịk Ntiense toto ke 1974, ntak emi enye akade iso ndikwọrọ ikọ okposụkedi edide ibat ibat owo ke efakutom esie ẹwụt udọn̄, enye ama okot oto John 4:34, emi ikotde ikọ Jesus ite: “Udia Mi edi ndinam uduak Andidọn̄ Mi, nnyụn̄ mma utom Esie.” Claudio ama adian do ete: “Ukem nte Jesus, ami nyomke nditọtọn̄ọ kpọt edi nyom ndikụre utom mi nte anditan̄a Obio Ubọn̄.” (John 17:4) Mme Ntiense Jehovah ke ofụri ererimbot ẹnyịme ye emi.—Se ekebe oro “Nte ‘Ẹkpen̄wụmde Mfri ke Ime,’” ke page 21.

Ndikwọrọ Ikọ Nnyụn̄ Nnọ Ukpep

14. (a) Ewe adiana-iba uduak ke utom John Andinịm Owo Baptism ye eke Jesus ẹkenyene? (b) Didie ke afo akpanam utom Christian mfịn an̄wan̄a?

¹⁴ Akpa anditan̄a Obio Ubọn̄ emi ẹsiakde ke Gospel edi John Andinịm Owo Baptism. (Matthew 3:1, 2; Luke 3:18) Akpan uduak esie ekedi ‘ndidi ntiense,’ ndien enye akanam ntre ye ọyọhọ mbuọtidem ye idotenyịn “kpan̄ kpukpru owo ẹnịm ke akpanikọ.” (John 1:6, 7) Ke akpanikọ, ndusụk mbon oro John ọkọkwọrọde ikọ ọnọ ẹma ẹkabade ẹdi mbet Christ. (John 1:35-37) Ntem, John ekedi ọkwọrọikọ ye andinam mbet. Jesus n̄ko ekedi ọkwọrọikọ ye andikpep. (Matthew 4:23; 11:1) Do, idịghe n̄kpọ n̄kpaidem Jesus mîkọnọhọ mme anditiene enye ewụhọ ndikwọrọ etop Obio Ubọn̄ kpọt edi n̄ko ndin̄wam mme owo emi ẹnyịmede etop oro ndikabade ndi mme mbet esie. (Matthew 28:19, 20) Ntem, utom nnyịn mfịn edi adiana-iba utom eke edikwọrọ ye edikpep.

15. Nso mbiet idu ke nte mme owo ẹkenamde n̄kpọ ẹban̄a utom ukwọrọikọ ke akpa isua E.N. ye nte ẹnamde mfịn?

¹⁵ Kaban̄a mbon akpa isua ikie E.N. emi ẹkekopde Paul ọkwọrọde ikọ onyụn̄ ọnọde ukpep, ‘ndusụk mmọ ẹma ẹnịm ikọ emi enye eketịn̄de ke akpanikọ, ndusụk ikenịmke.’ (Utom 28:24) Mfịn, mme owo ẹnam n̄kpọ ke ukem usụn̄ oro. Ke mfụhọ, ata ediwak n̄kpasịp Obio Ubọn̄ ẹduọn̄ọ ke idiọk isọn̄. Kpa ye emi, ndusụk n̄kpasịp ẹkam ẹduọn̄ọ ke eti isọn̄, ẹdọn̄ n̄kam, ẹnyụn̄ ẹtọn̄ọ ndikọri, kpa nte Jesus ekebemde iso etịn̄. Ke nditịm ntịn̄, ke ofụri ererimbot, se ibede owo 5,000 ke ẹbaharede ukem ukem ẹsikabade ẹdi ata mme mbet Christ ke urua kiet kiet ke isua! Mbufa mbet emi ‘ẹnịm ikọ emi ẹtịn̄de  ke akpanikọ,’ okposụkedi ata ediwak mbon en̄wen mînịmke. Nso ikan̄wam mmọ ndinyịme etop Obio Ubọn̄? Ediwak ini, ọkpọkpọ udọn̄ emi Mme Ntiense ẹkewụtde—ediduọk mmọn̄ ke mbufa n̄kpasịp emi ẹkesuande, yak idọhọ ntre—ẹma ẹnam ukpụhọde. (1 Corinth 3:6) Kere ban̄a iba kpọt ke otu ediwak uwụtn̄kpọ oro.

Ediwụt Ọkpọkpọ Udọn̄ Esinam Ukpụhọde

16, 17. Ntak edide akpan n̄kpọ ndiwụt ọkpọkpọ udọn̄ ke idem mbon oro nnyịn isobode ke an̄wautom?

¹⁶ Karolien, uyen Ntiense kiet ke Belgium, ama aka ebịne akanian̄wan kiet oro mîkenyeneke udọn̄ ke etop Obio Ubọn̄. Sia ẹkedade ọfọn̄ ẹwan̄ n̄wan emi ubọk, Karolien ye nsan̄a esie ẹma ẹyom ndinọ un̄wam, edi n̄wan oro ama esịn. Usen iba ke ukperedem, Mme Ntiense emi ẹma ẹfiak ẹka ufọk n̄wan oro ẹkebụp nte idem esie etiede. Karolien ama ọdọhọ ete: “Emi ama enen̄ede anam ukpụhọde. Idem ama akpa enye ndikụt ke nnyịn ima inen̄ede inyene udọn̄ ke idem esie. Enye ama ọdọhọ nnyịn idụk idi ufọk, ndien ukpepn̄kpọ Bible ama ọtọn̄ọ.”

¹⁷ Sandi, Ntiense kiet ke United States, esiwụt ọkpọkpọ udọn̄ n̄ko ke idem mbon oro enye esikwọrọde ikọ ọnọ. Enye esise n̄wedmbụk n̄kpọntịbe n̄kann̄kụk man oyom ntọt aban̄ade nseknditọ emi ẹmanade, ndien ekem akama N̄wed Mi eke Mme Mbụk Bible aka ekese mbufa ete ye eka emi. * Sia ekaeyen esiwakde ndidu ke ufọk esinyụn̄ amade ndiwụt isenowo nsekeyen esie, enye esiwak nditọn̄ọ nneme. Sandi anam an̄wan̄a ete: “Mmesineme ye mme ete ye eka mban̄a ufọn edinyene itie ebuana ye nsekeyen ebe ke ndikot n̄wed nnọ mmọ. Ekem mmesineme mban̄a mme n̄kpọ-ata oro ẹsan̄ade ye edibọk nditọ ke n̄kaowo mfịn.” Ke ndondo emi, nte utịp utọ nneme oro, eka ye nditọ itiokiet ẹma ẹtọn̄ọ ndinam n̄kpọ Jehovah. Ndinam usio-ukot nnyụn̄ n̄wụt ọkpọkpọ udọn̄ ekeme ndisụn̄ọ ke ndinyene ukem utịp idatesịt emi ke utom ukwọrọikọ nnyịn.

18. (a) Ntak emi kpukpru nnyịn ikemede ndisịm se ẹyomde ke ‘ndin̄wụm mfri ekese? (b) Ewe n̄kpọ ita oro ẹyomde man owo edi mbet oro ẹsiakde ke Gospel John ke afo ebiere ndisịm?

¹⁸ Edi n̄kpọ ndọn̄esịt didie ntem ndidiọn̄ọ nte ke nnyịn imekeme ‘ndin̄wụm mfri ekese’! Edide nnyịn idi n̄kpri m̀mê ikpọ owo, ikop nsọn̄idem m̀mê idọdọn̄ọ, edide ikwọrọ ikọ ke mme efakutom oro mme owo ẹnyenede udọn̄ m̀mê ke efakutom emi mme owo mînyeneke udọn̄, kpukpru nnyịn imekeme ndin̄wụm mfri ekese. Didie? Ebe ke ndin̄wụm mbun̄wụm spirit ke ọyọhọ ọyọhọ udomo ndinyụn̄ nda mfọnn̄kan ukeme nnyịn nsuan etop Obio Ubọn̄. Ke ukem ini oro, idomode ‘ndisọn̄ọ nda ke ikọ Jesus’ nnyụn̄ ‘mma kiet eken.’ Ih, ke ndinam akpan n̄kpọ ita oro ẹyomde man owo edi mbet, oro ẹsiakde mi ke Gospel John, nnyịn iwụt ite ke nnyịn ‘idi mbet Christ ke akpanikọ.’—John 8:31; 13:35.

[Mme Ikọ idakisọn̄]

Mme Mbụme Ndụn̄ọde

• Nso orụk mfri ke ana nnyịn in̄wụm ekese?

• Ntak emi ẹkemede ndisịm utịtmbuba ‘edin̄wụm mfri ekese’?

• Ewe akpan n̄kpọ ita oro ẹyomde man owo edi mbet oro ẹsiakde ke Gospel John ke nnyịn ineme iban̄a?

[Mme Mbụme Ukpepn̄kpọ]

[Ekebe/Ndise ke page 21]

NTE ‘ẸKPEN̄WỤMDE MFRI KE IME’

NSO isin̄wam fi ndika iso n̄kwọrọ etop Obio Ubọn̄ ke mme efakutom oro owo mîsinen̄ekede iwụt udọn̄? Mi ẹdi ndusụk ibọrọ oro ẹn̄wamde ndibọrọ mbụme emi.

“Ndifiọk nte ke Jesus ọnọ nnyịn ọyọhọ ibetedem anam nnyịn inyene in̄wan̄-in̄wan̄ ekikere ye ifịk, inamke n̄kpọ m̀mê mme owo ẹnam n̄kpọ didie ke efakutom.”—Harry, emi edide isua 72 okonyụn̄ anade baptism ke 1946.

“Itie N̄wed Abasi emi esidide n̄kpọ nsịnudọn̄ kpukpru ini ọnọ mi edi 2 Corinth 2:17. Enye ọdọhọ ete ke nnyịn inam utom ukwọrọikọ ye ‘Christ ke iso Abasi.’ Ke ini nnamde utom ukwọrọikọ, mmesikop inem edinam utom ye mme ata ufan mi.”—Claudio, emi edide isua 43 okonyụn̄ anade baptism ke 1974.

“Ke nditịm ntịn̄, utom ukwọrọikọ edi utom oro n̄n̄wanade ọkpọsọn̄ man n̄keme ndinam. Kpa ye oro, mmokụt nte mme ikọ oro ẹkụtde ke Psalm 18:29 ẹdide akpanikọ: ‘Abasi mi onyụn̄ anam mi mfrọ n̄kan̄a ibibene.’”—Gerard, emi edide isua 79 okonyụn̄ anade baptism ke 1955.

“Edieke n̄kam n̄kemede ndikot itie N̄wed Abasi kiet ke an̄wautom, emi esinam mi n̄kop uyụhọ nte ke owo ama ayak Bible odụn̄ọde esịt esie.”—Eleanor, emi edide isua 26 okonyụn̄ anade baptism ke 1989.

“Mmesika iso ndidomo nsio nsio usụn̄ edida ntọn̄ọ nneme. Mmọ ẹwak ke usụn̄ oro mmendikemeke ndida kpukpru mmọ nnam n̄kpọ ke isua uwem mi oro osụhọde.”—Paul, emi edide isua 79 okonyụn̄ anade baptism ke 1940.

“Etikwo etikwo ibọrọ isiyatke mi esịt. Mmesidomo nditie ufan ufan, ndineme nneme ye mme owo nnyụn̄ n̄kop ekikere mmọ.”—Daniel, emi edide isua 75 okonyụn̄ anade baptism ke 1946.

“Mmosobo ye mbon oro ẹnade baptism obufa emi ẹkesiande mi ẹte ke utom ukwọrọikọ mi ama etịp esịn ke mmimọ ndikabade ndi Mme Ntiense. Okposụkedi ami mmen̄kọfiọkke, nte ini akakade owo en̄wen ama ekpep Bible ye mmọ onyụn̄ an̄wam mmọ ndinam n̄kọri. Adat mi esịt ndifiọk nte ke utom ukwọrọikọ nnyịn edi utom otu.”—Joan, emi edide isua 66 okonyụn̄ anade baptism ke 1954.

Nso in̄wam fi ‘ndin̄wụm mfri ke ime’?—Luke 8:15.

[Mme ndise ke page 20]

Ke ndision̄o mbun̄wụm spirit nnyụn̄ n̄kwọrọ etop Obio Ubọn̄, nnyịn imon̄wụm mfri ekese

[Ndise ke page 23]

Jesus ndikọdọhọ mme apostle esie ete: ‘ẹn̄wụm mfri ekese’ ọkọwọrọ nso?