‘Ẹsọn̄ọ Ẹda ke Ikọ Mi’

“Edieke mbufo ẹsọn̄ọde ẹda ke ikọ Mi, mbufo ẹdi mbet Mi ke akpanikọ.”—JOHN 8:31.

1. (a) Ke ini Jesus ọkọnyọn̄de heaven, nso ke enye ọkọkpọn̄ ke isọn̄? (b) Mme mbụme ewe ke nnyịn idibọrọ?

 KE INI Jesus Christ, Anditọn̄ọ Ido Ukpono Christ, ọkọnyọn̄de heaven, enye ikewetke mme n̄wed, ikobotke mme n̄kpọ editi, m̀mê ndikọkọ inyene mbon mi ke isọn̄. Enye akakam ọkpọn̄ mme mbet ọkọrọ ye mme akpan n̄kpọ emi ẹyomde man owo edi mbet. Ke nditịm ntịn̄, ke Gospel John, nnyịn imokụt ke Jesus ama asiak akpan n̄kpọ ita anade owo ekededi oro oyomde ndidi anditiene enye anam. Nso idi mme n̄kpọ emi? Didie ke nnyịn ikeme ndinam mmọ? Ndien didie ke nnyịn ikeme ndikụt nte ke nnyịn imodot ndidi mbet Christ mfịn? *

2. Nso idi akpan n̄kpọ kiet oro ẹyomde man ẹdi mbet, nte ẹwetde ke Gospel John?

² N̄kpọ nte ọfiọn̄ itiokiet mbemiso n̄kpa esie, Jesus ama aka Jerusalem ọkọkwọrọ ikọ ọnọ otuowo oro ẹkesopde idem do ndinịm Usọrọ Mme Ataya oro ekesibịghide urua kiet. Nte utịp, ke ini esịmde ufọt usọrọ, “ediwak owo emi ẹdude ke otu oro [ẹma] ẹbuọt idem ye Enye.” Jesus ama aka iso ndikwọrọ ikọ, ntre ke akpatre usen usọrọ oro, ini kiet efen, “ediwak owo ẹbuọt idem ye Enye.” (John 7:10, 14, 31, 37; 8:30) Ini oro ke Jesus ọkọwọn̄ọde ntịn̄enyịn esie ọnọ mbufa mme andinịm ke akpanikọ emi onyụn̄ etịn̄ akpan n̄kpọ oro ẹyomde man ẹdi mbet, nte apostle John ekewetde ete: “Edieke mbufo ẹsọn̄ọde ẹda ke ikọ Mi, mbufo ẹdi mbet Mi ke akpanikọ.”—Sịghisịghi ubọkn̄wed edi eke nnyịn; John 8:31.

3. Nso edu ke ẹyom man owo ‘ọsọn̄ọ ada ke ikọ Jesus’?

³ Jesus nditịn̄ mme ikọ oro ikọnọhọ ekikere nte ke mbufa mme andinịm ke akpanikọ oro ikenyeneke mbuọtidem. Utu ke oro, enye okowụt ke mmọ ẹma ẹnyene ifet ndikabade ndi ata mme mbet imọ—edieke mmọ ẹsọn̄ọde ẹda ke ikọ imọ, ẹnyụn̄ ẹmede ime. Mmọ ẹma ẹnyịme ikọ esie, edi idahaemi ama oyom mmọ ẹsọn̄ọ ẹda ke enye. (John 4:34; Mme Hebrew 3:14) Ke akpanikọ, Jesus akabat ime nte ata akpan edu oro ẹyomde ẹtọ mme anditiene enye, tutu ke akpatre nneme oro enye ekenemede ye mme apostle esie, oro ẹwetde ke Gospel John, Jesus ama ọdọhọ utịm ikaba ete: ‘Ẹka iso ẹtiene mi.’ (John 21:19, 22, NW) Ediwak akpa mme Christian ẹma ẹnam ntre. (2 John 4) Nso ikan̄wam mmọ ndime ime?

4. Nso ikan̄wam akpa mme Christian ndime ime?

⁴ Apostle John oro ekedide anam-akpanikọ mbet Christ ke n̄kpọ nte isua 70, ama etịn̄ akpan n̄kpọ kiet. Enye ama otoro mme anam-akpanikọ Christian, ọdọhọde ete: “Koro mbufo ẹkopde idem, ikọ Abasi onyụn̄ odụn̄de mbufo ke esịt, mbufo ẹma ẹnyụn̄ ẹkan andidiọk.” Mme mbet Christ oro ẹma ẹme ime, m̀mê ẹsọn̄ọ ẹda ke ikọ Abasi, koro ikọ Abasi okodụn̄de mmọ ke esịt. Mmọ ẹma ẹwụt ntotụn̄ọ esịtekọm ẹban̄a enye. (1 John 2:14, 24) Kpasụk ntre mfịn, man ikeme ‘ndime ime tutu esịm akpatre,’ oyom nnyịn itịm ikụt ite ke ikọ Abasi odụn̄ nnyịn ke esịt. (Matthew 24:13) Didie ke nnyịn ikeme ndinam oro? N̄ke oro Jesus ekekede ọnọ ibọrọ.

 ‘Ndikop Ikọ’

5. (a) Nsio nsio orụk isọn̄ ewe ke Jesus akasiak ke kiet ke otu mme n̄ke esie? (b) Nso ke n̄kpasịp ye isọn̄ ke n̄ke Jesus ẹda ẹban̄a?

⁵ Jesus ama eke n̄ke aban̄a asuan-n̄kpasịp emi asuande n̄kpasịp, ndien ẹwet emi ke Gospel Matthew, Mark, ye Luke. (Matthew 13:1-9, 18-23; Mark 4:1-9, 14-20; Luke 8:4-8, 11-15) Nte afo okotde mme mbụk emi, afo oyokụt ke se idide ọkpọikọ ke n̄ke emi edi nte ke ukem n̄kpasịp ẹduọn̄ọ ke nsio nsio orụk isọn̄, ẹdade nsio nsio utịp ẹdi. Akpa edi nsatisọn̄, ọyọhọ iba edi isọn̄ emi mîtụn̄ọke, ndien ọyọhọ ita edi isọn̄ n̄kukịm. Ke mîbietke isọn̄ mbita eken, ọyọhọ isọn̄ inan̄ edi “eti isọn̄.” Nte Jesus akanamde an̄wan̄a, n̄kpasịp oro edi etop Obio Ubọn̄ emi odude ke Ikọ Abasi, ndien isọn̄ ada aban̄a mme owo ye nsio nsio idaha esịt oro mmọ ẹnyenede. Okposụkedi mme owo ẹdade ẹban̄a nsio nsio orụk isọn̄ oro ẹnyenede ndusụk n̄kpọ oro ẹdide ukem, mbon oro ẹdade ẹban̄a eti isọn̄ ẹnyene n̄kpọ oro anamde mmọ ẹkpụhọde ẹkpọn̄ mbon eken.

6. (a) Didie ke ọyọhọ isọn̄ inan̄ ke n̄ke Jesus okpụhọrede ye isọn̄ ita eken, ndien nso ke oro ọwọrọ? (b) Nso ke oyom man inyene ime nte mme mbet Christ?

⁶ Mbụk oro ke Luke 8:12-15 owụt nte ke mme owo ‘ẹkop ikọ’ ke ofụri idaha inan̄ oro. Nte ededi, mbon oro ẹnyenede “eti esịt akpanikọ” ẹnam se ikande ‘edikop ikọ.’ Mmọ “ẹmụm [ikọ emi] ẹkama ke eti esịt akpanikọ, ẹnyụn̄ ẹn̄wụm mfri ke ime.” Eti isọn̄ oro ememde onyụn̄ otụn̄ọde esiyak orụn̄ ẹdọn̄ n̄kam ndien nte utịp, n̄kpasịp ẹsitịbe ẹnyụn̄ ẹn̄wụm mfri. (Luke 8:8) Ukem ntre, mbon oro ẹnyenede eti esịt ẹfiọk, ẹwụt esịtekọm ẹnyụn̄ ẹsịn idem ofụri ofụri ke ikọ Abasi. (Rome 10:10; 2 Timothy 2:7) Ikọ Abasi odụn̄ mmọ ke esịt. Nte utịp, mmọ ẹn̄wụm mfri ke ime. Ntem, oyom inyene ata ntotụn̄ọ esịtekọm inọ Ikọ Abasi man inyene ime nte mme mbet Christ. (1 Timothy 4:15) Didie ndien ke nnyịn ikeme ndikọri utọ ntotụn̄ọ esịtekọm oro nnọ Ikọ Abasi?

Idaha Esịt ye Editie N̄kere Oro Enyenede Ufọn

7. Nso edinam enyene n̄kpet n̄kpet ebuana ye eti esịt?

⁷ Tịm fiọk edinam oro Bible esiwakde ndibuan ye eti esịt akpanikọ. ‘Esịt eti owo etịm ekere ndibọrọ.’ (Mme N̄ke 15:28) ‘Ndien ikọ inua mi, ye ekikere esịt mi ẹyenem fi esịt, O Jehovah.’ (Psalm 19:14) ‘Ekikere esịt mi oyonyụn̄ etịn̄ ọniọn̄.’—Psalm 49:3.

8. (a) Ke ini ikotde Bible, nso ke nnyịn mîkpanamke edi nso ke ikpanam? (b) Mme ufọn ewe ke nnyịn ibọ ito editie n̄kere Ikọ Abasi ke akam? (Sịn mme ikọ ẹdude ke ekebe oro ‘Ẹsọn̄ọ Ẹda ke Akpanikọ.’)

⁸ Ukem nte mme andiwet Bible emi, oyom nnyịn n̄ko ida esịtekọm ye akam ofụri ini itie ikere Ikọ Abasi ye utom esie. Ke ini ikotde Bible ye mme n̄wed oro ẹkọn̄ọde ke Bible, nnyịn ikpanamke n̄kpọ nte mbon oro ẹnamde isan̄ itọk itọk ẹkanade ẹse n̄kpọ, emi ẹfehede ẹto ediye ebiet kiet ẹka efen, ẹsiode kpukpru n̄kpọ ndise edi mîtịmke ise se mmọ ẹsiode. Utu ke oro, ke ini ikotde Bible, oyom nnyịn ida ini itịm ise n̄kann̄kụk oro, yak idọhọ ntre. * Nte nnyịn idopde uyo itie ikere se ikotde,  Ikọ Abasi oyotụk esịt nnyịn. Enye oyotụk ntụk nnyịn onyụn̄ okpụhọde ekikere nnyịn. Enye n̄ko oyonụk nnyịn nditịn̄ nditụn̄ọ ekikere nnyịn nnọ Abasi ke akam. Nte utịp, nnyịn iyetịm ima Jehovah, ndien ima oro nnyịn imade Abasi oyonụk nnyịn ndika iso ntiene Jesus idem ke ini isobode n̄kpọsọn̄ idaha. (Matthew 10:22) Nte an̄wan̄ade, nditie n̄kere se Abasi etịn̄de edi akpan n̄kpọ edieke nnyịn iyomde ndisọn̄ọ nda tutu esịm akpatre.—Luke 21:19.

9. Didie ke nnyịn ikeme ndikụt nte ke esịt nnyịn enyịme Ikọ Abasi?

⁹ N̄ke Jesus n̄ko owụt nte ke mme n̄kpọ ẹsibiọn̄ọ n̄kpasịp, kpa Ikọ Abasi, ndikọri. Ntem, man isọn̄ọ ida nte mme anam-akpanikọ mbet, nnyịn ikpenyene (1) ndidiọn̄ọ mme n̄kpọ ubiọn̄ọ oro idiọk isọn̄ oro ẹtịn̄de ẹban̄a ke n̄ke oro ẹdade ẹban̄a inyụn̄ (2) inam mme usio-ukot ndinen̄ede m̀mê ndifep mmọ. Ke usụn̄ emi nnyịn iyokụt ite ke esịt nnyịn enyịme n̄kpasịp Obio Ubọn̄ onyụn̄ aka iso ndin̄wụm mfri.

“Ke Mben Ọkpọusụn̄” —Ndiyọhọ ye Edinam

10. Tịn̄ nte akpa isọn̄ ke n̄ke Jesus etiede, nyụn̄ nam se enye ọwọrọde an̄wan̄a.

¹⁰ Akpa orụk isọn̄ oro n̄kpasịp emi ẹduọn̄ọde edi “ke mben ọkpọusụn̄,” ebiet emi ‘ẹdịghide’ n̄kpasịp oro. (Luke 8:5) Isọn̄ in̄wan̄ n̄kpasịp oro odude ke mben ọkpọusụn̄ esisasat koro mme owo ẹdịghide ẹbe. (Mark 2:23) Ukem ntre, mbon oro ẹyakde mme edinam ererimbot emi ẹbọ ini ye odudu mmọ nte mîdotke ẹkeme ndikụt nte ke mmimọ imanana ini tutu inyeneke ifet ndikọri ntotụn̄ọ esịtekọm nnọ Ikọ Abasi. Mmọ ẹkop, edi mmọ  ẹtre nditie n̄kere se mmọ ẹkekopde. Ntem esịt mmọ aka iso odobi. Mbemiso mmọ ẹdide ẹdikọri ima ẹnọ Ikọ Abasi, “Satan edi editan̄ ikọ ke esịt mmọ efep, mbak mmọ ẹdinịm ke akpanikọ ẹnyụn̄ ẹbọhọ.” (Luke 8:12) Nte ẹkeme ndibiọn̄ọ emi nditịbe?

11. Didie ke nnyịn ikeme nditre ndiyak esịt nnyịn akabade etie nte nsasat isọn̄?

¹¹ Ekese n̄kpọ ẹdu oro ikemede ndinam mbak esịt nnyịn edikabade etie nte idiọk isọn̄ mben ọkpọusụn̄. Isọn̄ oro ẹdịghide onyụn̄ asatde ekeme ndikabade mmem nnyụn̄ mfọn n̄kpọ edieke ẹfụn̄de ẹnyụn̄ ẹtrede ndisan̄a ke enye. Kpasụk ntre, ndifak ifet nnọ ukpepn̄kpọ ye editie n̄kere Ikọ Abasi ekeme ndinam esịt akabade etie nte eti isọn̄ oro ọfọnde n̄kpọ. Akpan n̄kpọ edi nditre ndisịn idem n̄kaha ke mme n̄kpọ uwem ererimbot emi. (Luke 12:13-15) Utu ke oro, ana ikụt ite ke imafak ifet inọ editie n̄kere “se ifọnde ikan” ke uwem.—Philippi 1:9-11.

“Ke Isọn̄ Itiat”—Ndikop Ndịk

12. Nso idi akpan ntak oro anamde emịne n̄kpasịp eyemede ke ọyọhọ isọn̄ iba oro ẹtịn̄de ẹban̄a ke n̄ke Jesus?

¹² Ke ini n̄kpasịp ọduọde ke ọyọhọ isọn̄ iba, enye ikam inaha do, nte ekedide ke akpa isọn̄. Enye esịn orụn̄ onyụn̄ etịbe. Edi ke ini utịn asiahade, ufiop utịn amia emịne oro, enye onyụn̄ eyemede. Nte ededi, tịm fiọk ata akpan ntọt emi. Idịghe ufiop edi akpan ntak oro anamde emịne oro eyemede. Kamse, utịn esimia eto oro ọkọride ke eti isọn̄ n̄ko, edi enye isiyemekede—ke nditịm ntịn̄, enye esikam ọkọkọri. Nso idi ntak ukpụhọde emi? Nte Jesus anamde an̄wan̄a, emịne n̄kpasịp emi eyemede koro “mînyeneke uwak ntan” ‘mînyụn̄ inyeneke mmọn̄.’ (Matthew 13:5, 6; Luke 8:6) “Akwa itiat,” m̀mê isọn̄ itiat oro odude ke idak enyọn̄ enyọn̄ isọn̄, isiyakke n̄kpasịp ọdọn̄ n̄kam man enyene mmọn̄ onyụn̄ aka iso odu uwem. N̄kpasịp emi eyemede koro isọn̄ mîtụn̄ọke.

13. Nso orụk mme owo ẹtie nte isọn̄ oro mîtụn̄ọke, ndien nso idi akpan ntak oro esinamde mmọ ẹnam n̄kpọ ke usụn̄ oro?

¹³ Ikpehe n̄ke emi aban̄a mmọ emi “ẹkopde ikọ ẹnyụn̄ ẹbọde ke idatesịt” ẹnyụn̄ ẹsịnde ifịk ẹtiene Jesus “ke ini esisịt.” (Luke 8:13) Ke ini ufiop ufiop eyo “ukụt m̀mê isịnenyịn etịbede,” mmọ ẹkabade ẹkop ndịk tutu mmọ ẹtaba idatesịt ye odudu mmọ ẹnyụn̄ ẹtre nditiene Christ. (Matthew 13:21) Nte ededi, idịghe ubiọn̄ọ edi akpan ntak oro anamde mmọ ẹkop ndịk. Kamse, ediwak miliọn mbet Christ ẹyọ nsio nsio orụk ukụt, edi ke ẹsụk ẹsọsọn̄ọ ẹda. (2 Corinth 2:4; 7:5) Ata akpan ntak oro esinamde ndusụk owo ẹkop ndịk ẹnyụn̄ ẹduọn̄ọ edi koro idaha esịt mmọ oro ebietde itiat isiyakke mmọ ẹtịm ẹtie ẹkere ntotụn̄ọ ntotụn̄ọ ẹban̄a nti n̄kpọ eke spirit. Nte utịp, esịtekọm oro mmọ ẹkọride ẹnọ Jehovah ye ikọ esie edi enyọn̄ enyọn̄ onyụn̄ emem akaha ndinam mmọ ẹsọn̄ọ ẹda eyọ ukụt. Didie ke owo ekeme ndibiọn̄ọ utọ n̄kpọ oro nditịbe?

14. Mme usio-ukot ewe ke nnyịn ikpanam mbak esịt nnyịn edikabade etie nte isọn̄ oro mîtụn̄ọke?

¹⁴ Oyom owo okụt ete ke baba ọkpọsọn̄ n̄kpọ ubiọn̄ọ ndomokiet, utọ nte ọkpọsọn̄ iyatesịt, ndedịbe udọn̄ idemowo, m̀mê ukem idiọk ndedịbe ntụk oro, idụhe enye ke esịt. Edieke edide utọ n̄kpọ ubiọn̄ọ oro ẹdodu, odudu oro ikọ Abasi enyenede ekeme ndikan enye. (Jeremiah 23:29; Ephesus 4:22; Mme Hebrew 4:12) Ke oro ebede, editie n̄kere ye akam ayanam “ikọ emi ẹtọde” etịm odụk owo esịt. (James 1:21) Emi ọyọnọ odudu ndiyọ ke mme ini mmemidem nnyụn̄ nnyene uko ndisọn̄ọ nda kpa ye mme idomo.

 “Ke Ikọt N̄kukịm”—Ndinyene Esịt Iba

15. (a) Ntak emi ọyọhọ isọn̄ ita oro Jesus eketịn̄de aban̄a enen̄erede oyom ntịn̄enyịn nnyịn? (b) Nte ini akade, nso isitịbe inọ ọyọhọ isọn̄ ita, ndien ntak-a?

¹⁵ Ọyọhọ isọn̄ ita, kpa enye oro ọyọhọde ye n̄kukịm, enen̄ede oyom ntịn̄enyịn nnyịn koro ke ndusụk usụn̄ enye ebiet eti isọn̄. Ukem nte eti isọn̄, isọn̄ n̄kukịm esiyak n̄kpasịp esịn orụn̄ onyụn̄ etịbe. Ke ntọn̄ọ ntọn̄ọ, ukpụhọde idụhe ke nte obufa eto ọkọride ke orụk isọn̄ mbiba emi. Nte ededi, nte ini akade, mme idaha ẹsidemede oro ẹbabade eto oro ẹwot ke akpatre. Ke mîbietke akpa isọn̄, n̄kukịm ẹsikọri ẹfụk isọn̄ oro. Nte ekpri eto oro ọtọn̄ọde nditịbe, ‘n̄kukịm oro ẹkọride’ ẹsimia mbuba ye enye. Ke ndusụk ini eto mbiba emi ẹsin̄wana ẹyom udia, un̄wana, ye ufan̄, edi ke akpatre n̄kukịm ẹsifụk eto emi ẹnyụn̄ ‘ẹbaba enye ẹwot.’—Luke 8:7.

16. (a) Mmanie ẹbiet isọn̄ n̄kukịm? (b) Nte ekemde ye mbụk Gospel ita oro, nso ke mme n̄kukịm ẹda ẹban̄a?—Se ikọ idakisọn̄.

¹⁶ Nso orụk mme owo ẹbiet isọn̄ n̄kukịm? Jesus anam an̄wan̄a ete: “Edi mmọ emi ẹkopde, ndien, nte mmọ ẹkade eke mmọ, ekikere ye inyene ye inemesịt uwem ẹbaba mmọ ẹwot; ntre ke mmọ in̄wụmke mfri eke ọfọnde ama.” (Luke 8:14) Kpa nte n̄kpasịp asuan-n̄kpasịp ye n̄kukịm ẹsikọride ke ukem ini, ntre ke ndusụk owo ẹdomo ndibọ ikọ Abasi ye “inemesịt uwem” ke ukem ini. Ẹtọ akpanikọ ikọ Abasi ke esịt mmọ, edi edibịne mme n̄kpọ eken iyakke mmọ ẹnọ ikọ Abasi ntịn̄enyịn. Ndamban̄a esịt mmọ asiaha iba. (Luke 9:57-62) Emi iyakke mmọ ẹnyene ini oro ekemde ndibọn̄ akam nnyụn̄ ntịm ntie n̄kere ikọ Abasi. Mmọ isiyakke ikọ Abasi etịm odụk mmọ esịt ndien ke ntem inyeneke ntotụn̄ọ esịtekọm oro ẹyomde man ẹyọ. Mme udọn̄ n̄kpọ obụkidem ẹsisan̄a sụn̄sụn̄ ẹbaba mme udọn̄ n̄kpọ eke spirit tutu ‘ẹbaba mmọ ẹwot.’ * Nso mfụhọ mfụhọ utịt ke emi edi ntem ọnọ mbon oro mîmaha Jehovah ke ofụri esịt!—Matthew 6:24; 22:37.

17. Nso ubiere ke oyom nnyịn inam ke uwem mbak ndamban̄a n̄kukịm oro ẹtịn̄de ẹban̄a ke n̄ke Jesus edibaba nnyịn owot?

¹⁷ Ebede ke ndinam mme n̄kpọ eke spirit ẹdi ebeiso ẹnọ mme n̄kpọ obụkidem, ubiak ye inemesịt uwem ererimbot emi idibabake nnyịn iwot. (Matthew 6:31-33; Luke 21:34-36) Nnyịn ikpedehede ifụmi ndikot Bible nnyụn̄ ntie n̄kere se nnyịn ikotde. Edieke nnyịn idomode ofụri ukeme nnyịn ndidu mmemmem uwem, nnyịn iyenyene ini efen efen nditie n̄kere ye akam. (1 Timothy 6:6-8) Mme asan̄autom Abasi emi ẹnamde ntre—oro ke ndamban̄a usụn̄ ẹwụberede mme n̄kukịm ẹsion̄o ke isọn̄ man ẹnam eto oro on̄wụmde mfri enen̄ede enyene udia, un̄wana, ye ufan̄,—ke ẹkụt edidiọn̄ Jehovah. Sandra emi edide isua 26 ọdọhọ ete: “Ke ini ntiede n̄kere mme edidiọn̄ oro nnyenede nto edifiọk akpanikọ, mmedi ndikụt ke ererimbot ikemeke ndinọ n̄kpọ ekededi oro ẹkemede ndimen ndomo ye mme edidiọn̄ Abasi!”—Psalm 84:11.

18. Didie ke nnyịn ikeme ndisọn̄ọ nda ke Ikọ Abasi nnyụn̄ mme ime nte mme Christian?

 ¹⁸ Do, nte an̄wan̄ade, kpukpru nnyịn n̄kpri ye ikpọ iyọsọn̄ọ ida ke Ikọ Abasi inyụn̄ inyene ime nte mme mbet Christ adan̄a nte Ikọ Abasi odụn̄de nnyịn ke esịt. Ke ntre, ẹyak ikụt ite ke isọn̄ ndamban̄a esịt nnyịn idehede isọn̄, itre nditụn̄ọ, m̀mê ndidi se n̄kukịm ẹkọride ẹfụk, utu ke oro yak enye aka iso emem onyụn̄ otụn̄ọ. Ke usụn̄ emi, nnyịn iyekeme ndinam Ikọ Abasi odụn̄ nnyịn ke idem ofụri ofụri inyụn̄ ‘in̄wụm mfri ke ime.’—Luke 8:15.

[Mme Ikọ idakisọn̄]

Nso Idi Ibọrọ Fo?

• Ntak oyomde nnyịn ‘isọn̄ọ ida ke ikọ Jesus’?

• Didie ke nnyịn ikeme ndiyak ikọ Abasi odụn̄ nnyịn ke esịt?

• Nso orụk mme owo ke nsio nsio orụk isọn̄ inan̄ oro Jesus eketịn̄de aban̄a ẹda ẹban̄a?

• Didie ke afo ekeme ndifak ifet nnọ editie n̄kere ikọ Abasi?

[Mme Mbụme Ukpepn̄kpọ]

[Ekebe/Ndise ke page 10]

‘ẸSỌN̄Ọ ẸDA KE AKPANIKỌ’

EDIWAK mbon oro ẹma ẹkedi mbet Christ ke anyan ini ẹwụt ke mmimọ imaka iso ‘isọn̄ọ ida ke akpanikọ.’ (2 Peter 1:12) Nso in̄wam mmọ ndika iso nsọn̄ọ nda? Kere ban̄a se ndusụk mmọ ẹtịn̄de.

“Akpatre n̄kpọ emi nsinamde ke usen kiet kiet esidi ndikot itie kiet ke Bible nnyụn̄ mbọn̄ akam. Ekem ntie n̄kere se n̄kokotde.”—Jean, emi akanade baptism ke 1939.

“Ndisitie n̄kere nte Jehovah, enye emi okon̄de akan, amade nnyịn ntotụn̄ọ ntotụn̄ọ esinam mi nnyene ifụre ye ukeme ndisọn̄ọ nda nnam akpanikọ.”—Patricia, emi akanade baptism ke 1946.

“Ndisọn̄ọ nyịre ke nti edu ukpep Bible ye nditịm mfiọk ‘nditụn̄ọ n̄kpọ Abasi,’ ẹn̄wam mi ndika iso nnam n̄kpọ Jehovah.”—1 Corinth 2:10; Anna, emi akanade baptism ke 1939.

“Mmesikot Bible ye mme n̄wed nnyịn oro ẹkọn̄ọde ke Bible ye ekikere edidụn̄ọde esịt ye uduakesịt mi.”—Zelda, emi akanade baptism ke 1943.

“Ini emi nsikopde inem n̄kan esidi ini oro nnamde isan̄ ubọ ofụm nnyụn̄ mbọn̄de akam nnọ Jehovah, nnamde enye ọdiọn̄ọ nte enen̄erede etie mi ke idem.”—Ralph, emi akanade baptism ke 1947.

“Nsitọn̄ọ usen kiet kiet ye edikere mban̄a itie N̄wed Abasi eke usen ke usen ye edikot itie kiet ke Bible. Emi esinọ mi obufa n̄kpọ nditie n̄kere ke usen oro.”—Marie, emi akanade baptism ke 1935.

“Ndidụn̄ọde nte ẹtatde ufan̄ikọ kiet kiet ke mme n̄wed Bible esinen̄ede ọnọ mi odudu.”—Daniel, emi akanade baptism ke 1946.

Ini ewe ke afo esitie ekere ikọ Abasi ye akam?—Daniel 6:10; Mark 1:35; Utom 10:9.

[Ndise ke page 13]

Ebede ke ndinam mme n̄kpọ eke spirit ẹdi ebeiso, nnyịn imekeme ‘ndin̄wụm mfri ke ime’