Ẹyom Edinam N̄kpọ ke Ofụri Esịt Edi nte Oro Ekem?

NTE enen̄ede oyom inam n̄kpọ ke ofụri esịt ke uwem eke usen ke usen nnyịn? N̄wed ukabadeikọ kiet ọdọhọ ke “edinam n̄kpọ ke ofụri esịt” ọwọrọ “ifụre oro mîsan̄ake ye n̄kari m̀mê mbubịk; edinam akpanikọ; in̄wan̄-in̄wan̄ ido; editịn̄ akpanikọ.” Nte an̄wan̄ade, edu emi enyene ufọn ke ndinam ẹnyene eti itie ebuana ye mbon en̄wen. Apostle Paul eketeme ete: “Ẹsụk ibuot ẹnọ mme ete-ufọk mbufo ke obụkidem ke kpukpru n̄kpọ; ẹkûnam utom enyịn owo, nte mbon mbukpek, edi ẹnam ye esịt kiet ke uten̄e Ọbọn̄.” (Colossae 3:22) Anie mîkpamaha owo oro anamde utom ke ofụri esịt anam utom ọnọ imọ? Mfịn, ekeme ndidi mmemmem n̄kpọ nnọ mbon oro ẹnamde utom ke ofụri esịt ndinyene utom nnyụn̄ n̄ka iso nnam utom mmọ.

Nte ededi, se inamde ẹnen̄ede ẹyom edinam n̄kpọ ke ofụri esịt edi usụn̄ oro enye otụkde itie ebuana nnyịn ye Abasi. Nditọ Israel eke eset ẹma ẹnyene edidiọn̄ Abasi ke ini mmọ ẹketịn̄de enyịn ẹnịm mme ibet ye mme usọrọ. Ke ini ekenemede aban̄a edisana idaha esop, Paul ama eteme ete: “Ẹyak nnyịn ikûda akani leaven, kpa ibak ye ukwan̄ido, inịm usọrọ, edi ida uyo edisana ido ye akpanikọ, eke leaven mîdụhe, inịm.” (1 Corinth 5:8) Man Abasi enyịme utuakibuot nnyịn, edinam n̄kpọ ke ofụri esịt idịghe n̄kpọ oro ẹyomde-yom kpọt, edi, edi akpan n̄kpọ n̄ko. Tịm fiọk ete ke edinam n̄kpọ ke ofụri esịt kpọt ikemke. Ana enye asan̄a ye akpanikọ.

Eyedi mbon oro ẹkebọpde ye mbon oro ẹkedụkde nsụn̄ikan̄ Titanic ẹma ẹnịm ke ofụri esịt ẹte ke nsụn̄ikan̄ oro ikemeke ndisịp. Nte ededi, ke akpa uwat esie ke 1912, enye ama ọkọtọ eboho ice ndien owo 1,517 ẹma ẹtaba uwem mmọ. Anaedi ndusụk mme Jew eke akpa isua ikie ẹma ẹnịm ke ofụri esịt nte ke usụn̄ oro mmimọ ikatuakde ibuot inọ Abasi ama ọfọn, edi ifịk mmọ ‘ikasan̄ake ye ifiọk.’ (Rome 10:2) Man Abasi enyịme nnyịn, ana se nnyịn inịmde ke ofụri esịt ẹkọn̄ọ ke nnennen ntọt. Mme Ntiense Jehovah emi ẹdude ke n̄kann̄kụk mbufo ẹyenem esịt ndin̄wam fi odụn̄ọde se edinam n̄kpọ Abasi ke ofụri esịt ye ke akpanikọ abuanade.