Ntọt Mme Anditan̄a Obio Ubọn̄

Mmọ ke “Ẹkop” Etop Obio Ubọn̄ ke Brazil

MAN ẹkwọrọ eti mbụk Obio Ubọn̄ ẹnọ mme inan, ediwak Mme Ntiense Jehovah ke Brazil ẹnyịme ndikpep Usem Idiọn̄ọ Mbon Brazil. Ukeme oro mmọ ẹsịnde ke enyene nti utịp, nte mme ifiọkutom ẹtienede mi ẹwụtde.

Eva, * n̄wan kiet emi edide inan ke São Paulo, ama ọtọn̄ọ ndikpep usem idiọn̄ọ ke enye ye nditọ esie ita ẹma ẹkewọrọ ẹkedụn̄ ye eren kiet emi edide inan. Ke ufọkurua kiet, Eva ye nda-ndụn̄ esie ẹma ẹsobo otu Mme Ntiense ẹdide inan ndien ẹma ẹnọ mmọ ikot ndidụk mbono esop ke Ufọkmbono Obio Ubọn̄. Mmọ ẹma ẹnyịme, ẹkerede ke edidi edinam otuowo.

Sia enye mîketịmke ifiọk usem idiọn̄ọ, se ẹketịn̄de ke mbono esop oro ikenen̄ekede in̄wan̄a Eva. Ke oro ebede, ediwak Ntiense ẹma ẹnọ enye ikot ẹte edibịt itọn̄ ke ufọk mmimọ. Ke ẹdade mme ndise ediye uduot ekpri n̄wed Dara Uwem ke Isọn̄ ke Nsinsi!, mmọ ẹma ẹnam un̄wọn̄ọ Abasi aban̄ade paradise isọn̄ ini iso an̄wan̄a enye. Se Eva ekekpepde ama enem enye ndien enye ama ọtọn̄ọ ndidụk mme mbono esop kpukpru ini.

Esisịt ini ke oro ebede, Eva ama ọkpọn̄ nda-ndụn̄ esie man odu uwem ekekem ye mme idaha Bible. Kpa ye ikan̄-ikan̄ ubiọn̄ọ oro okotode ubon esie, enye ama aka iso ndinam n̄kọri ke n̄kan̄ eke spirit onyụn̄ ana baptism ke 1995. Ọfiọn̄ itiokiet ke oro ebede, Eva ama esịn enyịn̄ nte asiakusụn̄, m̀mê anditan̄a Obio Ubọn̄ ofụri ini. Enye an̄wam inan inan̄ ẹnam n̄kọri ẹsịm uyakidem nnọ ye baptism.

Carlos akamana nte inan. Toto ke uyen enye ama esịn idem ke edida n̄kpọsọn̄ ibọk, oburobụt ido, ye uyịp inọ. Ke mbon n̄ka ubiatibet oro ẹken̄wanade ye enye ẹma ẹkedịghe enye uwem, enye ama efehe aka São Paulo okodụn̄ ye João ke ekpri ini. João ekedi inan ukem nte Carlos, onyụn̄ odu uwem nsọn̄ibuot.

Ke ndusụk isua ẹma ẹkebe, Carlos ama okop etop Obio Ubọn̄ emi okonụkde enye ndikpụhọde usụn̄ uwem esie nnyụn̄ nsịn ndọ esie ke n̄wed nte ekemde ye ibet. Ke ama ekesịm mme n̄kpọ N̄wed Abasi oro ẹyomde, Carlos ama ana baptism nte idiọn̄ọ uyakidem esie nnọ Jehovah. Ke ofụri ini emi, Carlos ikọdiọn̄ọke ke João n̄ko ama okop eti mbụk onyụn̄ anam ikpọ ukpụhọde n̄ko ke uwem esie. Ke ekpepde nte ke Jehovah imaha ẹkama mme mbiet ke utuakibuot, João ama ọduọn̄ọ mme mbiet “ndisana owo” oro enye ekenyenede. Ke ama ọkọkpọn̄ akani usụn̄ uwem esie, João n̄ko ama ana baptism.

Carlos ye João ẹkekop inemesịt didie ntem ke ini mmọ ẹkesobode ke Ufọkmbono Obio Ubọn̄ ẹnyụn̄ ẹkụtde mme ukpụhọde oro mmọ kiet kiet ẹkenamde! Mmọ mbiba ẹdi nti ibuot ufọk idahaemi ẹnyụn̄ ẹnam utom nte ifịk ifịk mme anditan̄a Obio Ubọn̄.

Ke Brazil, mme esop usem idiọn̄ọ 30 ye otu 154 ẹdu idahaemi ye mme asuanetop ẹwakde ẹbe 2,500, emi 1,500 ke otu mmọ ẹdide inan. Ke Mbono District “Mme Andikpep Ikọ Abasi” oro ẹkenịmde ke Brazil ke 2001 ẹnọ mme inan, se iwakde ibe owo 3,000 ẹkedụk, ndien owo 36 ẹkena baptism. Ye un̄wam Jehovah, idotenyịn odu nte ke mme inan efen efen ẹyebọ etop Obio Ubọn̄.

[Ikọ idakisọn̄]