Nso ke Udia Mbubịteyo Ọbọn̄ Ọwọrọ Ọnọ Fi?
Nso ke Udia Mbubịteyo Ọbọn̄ Ọwọrọ Ọnọ Fi?
“Owo ekededi eke edidiade uyo Ọbọn̄ edinyụn̄ ọn̄wọn̄de cup Ọbọn̄ ke usụn̄ eke mîdotke, eyenyene isop aban̄a ikpọkidem ye iyịp Ọbọn̄.”—1 CORINTH 11:27.
1. Nso idi ata akpan edinam emi ẹdiomide ẹnọ isua 2003, ndien enye ọkọtọn̄ọ didie?
ATA akpan edinam emi ẹdiomide ẹnọ isua 2003 edida itie ke utịn̄ ama okosụhọde ke April 16. Ini oro ke Mme Ntiense Jehovah ẹdisop idem man ẹnịm Editi n̄kpa Jesus Christ. Nte ẹkewụtde ke ibuotikọ oro ekebemde iso, Jesus ọkọtọn̄ọ edinam emi, oro ẹkotde n̄ko Udia Mbubịteyo Ọbọn̄, ke enye ye mme apostle esie ẹma ẹkedia Passover ẹma ke Nisan 14, 33 E.N. Mme n̄kpọ idiọn̄ọ Editi, emi ẹdide uyo eke leaven mîdụhe ye ndatndat wine ẹda ẹban̄a anana-idiọkn̄kpọ ikpọkidem Christ ye iyịp esie emi enye ọkọduọkde—kpa n̄kukụre uwa oro ekemede ndifak ubonowo nsio ke ndammana idiọkn̄kpọ ye n̄kpa.—Rome 5:12; 6:23.
2. Nso item ke ẹwet ke 1 Corinth 11:27?
2 Mbon oro ẹdiade mme n̄kpọ idiọn̄ọ Editi ẹnyene ndidia enye nte odotde. Apostle Paul ama anam emi an̄wan̄a ke ini ekewetde n̄wed ọnọ ẹsọk mme Christian ke Corinth eset, emi owo mîkesinịmke Udia Mbubịteyo Ọbọn̄ ke usụn̄ oro odotde. (1 Corinth 11:20-22) Paul ekewet ete: “Owo ekededi eke edidiade uyo Ọbọn̄ edinyụn̄ ọn̄wọn̄de cup Ọbọn̄ ke usụn̄ eke mîdotke, eyenyene isop aban̄a ikpọkidem ye iyịp Ọbọn̄.” (1 Corinth 11:27) Nso ke mme ikọ oro ẹwọrọ?
Ndusụk Owo Ẹma Ẹnịm Enye Nte Mîdotke
3. Didie ke ediwak mme Christian ke Corinth ẹkenam n̄kpọ ke usọrọ Udia Mbubịteyo Ọbọn̄?
3 Ediwak mbon Corinth ẹma ẹsidia udia Editi nte mîdotke. Ubahade ama odu ke otu mmọ, ke nsụhọde n̄kaha ke esisịt ini, ndusụk owo ẹma ẹkama udia mmọ ẹdidia ke mbubịteyo oro mbemiso m̀mê ke ini usọrọ oro akakade iso, ediwak ini ẹdiade ẹnyụn̄ ẹn̄wọn̄de n̄kpọ ẹbe ubọk. Mmọ ikodụhe ke edidemede ke ekikere m̀mê ke n̄kan̄ eke spirit. Emi ama anam mmọ ẹnyene ‘isop ẹban̄a ikpọkidem ye iyịp Ọbọn̄.’ Mbon oro mîkadiaha udia mbemiso ẹdide ẹma ẹkop biọn̄ ẹnyụn̄ ẹtre ndinọ n̄kpan̄utọn̄. Ih, ediwak owo ẹma ẹdia nte mîwụtke ukpono ye unana edifiọk ọyọhọ ọyọhọ nte edinam emi edide akpan n̄kpọ. Eyịghe idụhe mmọ ẹkedade ubiomikpe ẹdori idemmọ!—1 Corinth 11:27-34.
4, 5. Ntak emi oyomde mbon oro ẹsidiade mme n̄kpọ idiọn̄ọ Editi ẹdụn̄ọde idemmọ?
4 Nte Editi asan̄ade ekpere ke isua kiet kiet, oyom mbon emi ẹsidiade mme n̄kpọ idiọn̄ọ oro ẹdụn̄ọde idemmọ. Man ẹtiene ẹdia udia emem emi ke usụn̄ oro odotde, mmọ ẹnyene ndidu ke eti idaha ke n̄kan̄ eke spirit. Owo ekededi oro mîwụtke ukpono, idem esede uwa Jesus ke ndek, oyodu ke itiendịk edidi se ‘ẹsibede ẹfep ke otu ikọt Abasi,’ ukem nte eyen Israel oro akadiade uwa emem ke adan̄aemi mîsanake.—Leviticus 7:20; Mme Hebrew 10:28-31.
5 Paul ekemen Editi odomo ye uwa emem ke Israel eset. Enye ama etịn̄ ete ke mme andidia oro ẹbuana udia ye Christ ndien ekem ọdọhọ ete: “Mbufo ikemeke ndin̄wọn̄ cup Ọbọn̄ ye cup mme demon. Mbufo ikemeke nditiene ndia n̄kpọ ke okpokoro Ọbọn̄, nnyụn̄ ndia n̄kpọ ke okpokoro mme demon.” (1 Corinth 10:16-21) Edieke owo emi esidiade mme n̄kpọ idiọn̄ọ Editi anamde akwa idiọkn̄kpọ, enye ekpenyene ndiyarade emi nnọ Jehovah, okponyụn̄ enyene ndiyom un̄wam eke spirit nto mbiowo esop. (Mme N̄ke 28:13; James 5: 13-16) Edieke enye atuade n̄kpọfiọk ke ofụri esịt onyụn̄ osion̄ode mfri oro odotde edikabade esịt, enye ididiaha nte mîdotke.—Luke 3:8.
Ndidụk nte Mme Andida Nse Oro Ẹwụtde Ukpono
6. Mmanie ke Abasi ọnọ unen ndidia Udia Mbubịteyo Ọbọn̄?
6 Nte akpana mbon oro ẹnamde eti n̄kpọ idahaemi ẹnọ nsụhọ ke otu nditọete Christ 144,000 ẹdia Udia Mbubịteyo Ọbọn̄? (Matthew 25:31-40; Ediyarade 14:1) Baba. Abasi enịm ifet emi ọnọ mme owo oro enye eyetde aran ke edisana spirit, emi ‘ẹsan̄ade ye Christ ẹnyene udeme.’ (Rome 8:14-18; 1 John 2:20) Nso ndien idi idaha mbon oro ẹnyenede idotenyịn edidu uwem ke nsinsi ke paradise ofụri ekondo ke idak ukara Obio Ubọn̄? (Luke 23:43; Ediyarade 21:3, 4) Sia mmọ mîdịghe nsan̄a mme ada udeme ye Jesus emi ẹnyenede idotenyịn eke heaven, mmọ ẹsidụk Editi nte mme andida nse oro ẹwụtde ukpono.—Rome 6:3-5.
7. Mme Christian akpa isua ikie ẹkesan̄a didie ẹdiọn̄ọ ke mmimọ ikpenyene ndidia mme n̄kpọ idiọn̄ọ Editi?
7 Ẹkeda odudu edisana spirit ẹyet mme Christian akpanikọ aran ke akpa isua ikie. Ediwak mmọ ẹma ẹkeme ndida kiet m̀mê ediwak ke otu utịbe enọ eke spirit, utọ nte editịn̄ ikọ ke usem, nnam n̄kpọ. Ke ntre, ikọsọn̄ke mme utọ owo oro ndidiọn̄ọ ke mmimọ idi mbon oro ẹyetde aran ke spirit ndien ke ikpenyene ndidia mme n̄kpọ idiọn̄ọ Editi. Nte ededi, ke eyo nnyịn, ẹkeme ndida ikọ odudu spirit mbiere, utọ nte enye emi: “Koro adan̄a owo nte Spirit Abasi adade mmọ usụn̄, mmọ oro ẹdi nditọ Abasi. Koro mbufo mîkọbọhọ spirit ufịn eke esịnde mbufo ẹtọn̄ọ ntak ẹnyene ndịk; edi mbufo ẹkebọ spirit eke enyenede mmọ emi ẹdade ẹsịn ke ubon Abasi, emi anamde nnyịn ikot Abasi, ite, Abba, Ete.”—Rome 8:14, 15.
8. Mmanie ke “ibokpot” ye “idiọk n̄kpasịp” oro ẹtịn̄de ẹban̄a ke Matthew ibuot 13 ẹda ẹban̄a?
8 Ke ediwak isua ikie, ata mbon oro ẹyetde aran ẹkọri nte “ibokpot” ke in̄wan̄ “idiọk n̄kpasịp,” m̀mê mme nsunsu Christian. (Matthew 13:24-30, 36-43) Ọtọn̄ọde ke mme iduọk isua 1870, “ibokpot” ama enen̄ede ọwọrọ owụt idem ndien ke ndusụk isua ke ukperedem, ẹma ẹdọhọ mme esenyịn Christian oro ẹyetde aran ẹte: “Mbiowo . . . ẹkpenyene ndinam mme idaha emi an̄wan̄a mbon oro ẹsopde idem [kaban̄a Editi],—(1) mbuọtidem ke iyịp [Christ]; ye (2) uyakidem nnọ Ọbọn̄ ye utom esie, idem tutu esịm n̄kpa. Mmọ ndien ẹkpenyene ndikot kpukpru mbon oro ẹdotde ye mbon oro ẹyakde idem ẹnọ ke usụn̄ emi nditiene mbuana ke nditi n̄kpa Ọbọn̄.”—Studies in the Scriptures, Eboho VI, The New Creation, page 473. *
Ndiyom “Mme Erọn̄ En̄wen”
9. Didie ke ẹkenam mbon emi “akwa otuowo” ẹdide an̄wan̄a ke 1935, ndien didie ke emi okotụk ndusụk mbon oro ẹkesidiade mme n̄kpọ idiọn̄ọ Editi?
9 Nte ini akakade, esop Jehovah ama ọtọn̄ọ ndinọ ntịn̄enyịn ke mbon efen ke adianade ye mme anditiene Christ oro ẹyetde aran. N̄wọrọnda n̄kọri ke afan̄ emi ama ada itie ke ufọt ufọt iduọk isua 1930. Mbemiso ini oro, ikọt Abasi ẹkesise “akwa otuowo” eke Ediyarade 7:9 nte udiana otu eke spirit oro ẹdibuanade ye owo 144,000 oro ẹyetde aran emi ẹdinamde ẹset ke n̄kpa ẹka heaven—nte mbet n̄wanndọ m̀mê mme nsan̄a n̄wanndọ Christ. (Psalm 45:14, 15; Ediyarade 7:4; 21:2, 9) Edi ke May 31, 1935, ke utịn̄ikọ oro ẹkenọde ke akamba mbono mme Ntiense Jehovah ke Washington, D.C., U.S.A., ẹma ẹda N̄wed Abasi ẹnam an̄wan̄a nte ke “akwa otuowo” (“akwa udịmowo,” King James Version) ada aban̄a “mme erọn̄ en̄wen” emi ẹdude uwem ke utịt ini. (John 10:16) Ke ẹkụrede akamba mbono oro, ndusụk mbon emi ẹkesidiade mme n̄kpọ idiọn̄ọ Editi ẹma ẹtre ndidia koro mmọ ẹma ẹdidiọn̄ọ ke mmimọ inyene idotenyịn eke isọn̄, idịghe eke heaven.
10. Didie ke afo akpanam an̄wan̄a se idide idotenyịn ye mme mbiomo “mme erọn̄ en̄wen” eke eyomfịn?
10 Ke 1935, ẹma ẹnen̄ede ẹtọn̄ọ ndiyom mbon emi ẹdide “mme erọn̄ en̄wen,” emi ẹnyenede mbuọtidem ke uwa ufak, ẹyakde idemmọ ẹnọ Abasi, ẹnyụn̄ ẹnọde “ekpri otuerọn̄” oro ẹyetde aran ibetedem ke utom edikwọrọ Obio Ubọn̄. (Luke 12:32) Mme erọn̄ en̄wen emi ẹdori enyịn ndidụn̄ ke isọn̄ ke nsinsi, edi ke kpukpru usụn̄, mmọ ẹbiet nsụhọ eke eyomfịn emi ẹdide mme anditiene nnyene udeme ke Obio Ubọn̄. Ukem nte mme odudụn̄ ke Israel eset oro ẹkesituakde ibuot ẹnọ Jehovah ẹnyụn̄ ẹnịmde Ibet, mme erọn̄ en̄wen eke eyomfịn ẹnyịme ndibiom mme mbiomo Christian, utọ nte edidiana ye mme andibuana ke Israel eke spirit n̄kwọrọ eti mbụk. (Galatia 6:16) Nte ededi, kpa nte odudụn̄ ndomokiet mîkekemeke ndikabade ndi edidem m̀mê oku ke Israel, owo ndomokiet ke otu mme erọn̄ en̄wen emi ikemeke ndikara ke Obio Ubọn̄ eke heaven m̀mê ndinam utom nte oku.—Deuteronomy 17:15.
11. Ntak emi ini oro owo anamde uyakidem enyenede n̄kpọ ndinam ye idotenyịn esie?
11 Ke mme iduọk isua 1930, ama ọtọn̄ọ ndina in̄wan̄-in̄wan̄ nte ke ofụri ofụri, ẹma ẹmemek mme andika heaven. Ke ediwak iduọk isua idahaemi, ke ẹyom mme erọn̄ en̄wen, emi ẹnyenede idotenyịn eke isọn̄. Edieke kiet ke otu mbon oro ẹyetde aran etrede ndinam akpanikọ, enen̄ede etie nte ke ẹdikot owo ke otu mme erọn̄ en̄wen emi anamde akpanikọ ọnọ Abasi ke anyan ini ẹda ẹnam owo 144,000 ọyọhọ.
Ntak Ndusụk Owo Ẹnyenede Ukwan̄ Ekikere
12. Ke mme idaha ewe ke owo ekpetre ndidia mme n̄kpọ idiọn̄ọ Editi, ndien ntak?
12 Mme Christian oro ẹyetde aran ẹtịm ẹfiọk ke mmimọ imenyene ikot eke heaven. Edi nso edieke ndusụk mme owo oro mînyeneke ikot emi ẹkesidiade mme n̄kpọ idiọn̄ọ Editi? Idahaemi, sia mmọ ẹma ẹkedifiọk ke mmimọ ikenyeneke idotenyịn eke heaven, ke akpanikọ ubieresịt mmọ oyonụk mmọ ẹtre ndidia. Abasi idikopke inemesịt ye owo ekededi oro owụtde idemesie nte inyenede ikot ndidi edidem ye oku ke heaven ke ini enye ama ọkọfiọk ete ke imọ ke akpanikọ inyeneke utọ ikot oro. (Rome 9:16; Ediyarade 20:6) Jehovah ama owot Korah eyen Levi ke ntak oro enye okokohorede idem oyom itie oku Aaron. (Exodus 28:1; Numbers 16:4-11, 31-35) Edieke Christian ekededi edide edifiọk ke imọ ima idia mme n̄kpọ idiọn̄ọ Editi nte mîdotke, enye ekpenyene nditre ndidia onyụn̄ ọbọn̄ akam ke nsụhọdeidem eben̄e edifen Jehovah.—Psalm 19:13.
13, 14. Ntak emi ndusụk owo ke ndudue ẹkemede ndikere ke mmimọ imenyene ikot eke heaven?
13 Ntak emi ndusụk owo ke ndudue ẹkemede ndikere ke mmimọ imenyene ikot eke heaven? N̄kpa nsan̄a ndọ m̀mê ndusụk afanikọn̄ eken ẹkeme ndinam mmọ ẹnana udọn̄ ke uwem isọn̄. Mîdịghe, mmọ ẹkeme ndiyom ndinyene ukem idotenyịn eke n̄kpet n̄kpet ufan emi ọdọhọde ke idi Christian oro ẹyetde aran. Nte ededi, Abasi inịmke owo ndomokiet ndimek mbon en̄wen nnọ ifetutom emi. Enye inyụn̄ iyetke mme andida Obio Ubọn̄ emi nnyene aran ibe ke ndinam mmọ ẹkop uyo ye mme etop ndiwụt emi.
14 Nsunsu ekikere ido ukpono oro nte ke kpukpru nti owo ẹka heaven ekeme ndinam ndusụk owo ẹkere ke imenyene ikot eke heaven. Ntem, oyom nnyịn ikpeme mbak n̄kani ukwan̄ ekikere m̀mê mme n̄kpọ en̄wen idikara nnyịn. Ke uwụtn̄kpọ, ndusụk owo ẹkeme ndibụp idemmọ: ‘Nte ami mmesida ibọk oro ẹfịnade ntụk mi? Nte mmesiwak ndinyene ọkpọsọn̄ ntụk oro ekemede ndinam ami n̄kemeke ndibiere n̄kpọ nte enende?’
15, 16. Ntak emi ndusụk owo ẹkemede ndisịm ukwan̄ ubiere nte ke mmimọ idi mbon oro ẹyetde aran?
15 Ndusụk owo ẹkeme ndibụp idemmọ: ‘Nte ami nnyom uwọrọiso? Nte ami mmoyom itie odudu idahaemi m̀mê ndiyom ndidi nsan̄a ada udeme ye Christ ke ini iso?’ Ke ini ẹkenọde mme owo ikot ẹdidi mme ada udeme Obio Ubọn̄ ke akpa isua ikie, idịghe kpukpru mmọ ẹkenyene ifetutom ke esop. Ndien mme owo oro ẹnyenede ikot eke heaven iyomke uwọrọiso m̀mê ndinam inua mban̄a edidi mbon emi ẹyetde aran. Mmọ ẹsiwụt nsụhọdeidem oro ẹyomde ẹto mbon oro ẹnyenede “ekikere Christ.”—1 Corinth 2:16.
16 Ndusụk owo ẹkeme ndisịm ubiere nte ke mmimọ imenyene ikot eke heaven koro inyenede ekese ifiọk Bible. Edi ediyet aran ke edisana spirit inamke owo enyene n̄wọrọnda ifiọk, koro Paul ekenyene nditeme nnyụn̄ nnọ ndusụk mbon oro ẹyetde aran item. (1 Corinth 3:1-3; Mme Hebrew 5:11-14) Abasi enyene ndutịm ndida nnọ kpukpru ikọt esie udia eke spirit. (Matthew 24:45-47) Ntre, owo ndomokiet ikpekereke ke ndidi Christian oro ẹyetde aran anam imọ inyene ifiọk oro okponde akan eke mbon oro ẹnyenede idotenyịn eke isọn̄. Owo idaha ifiọk ubọrọ mbụme N̄wed Abasi, edinọ ikọ ntiense, m̀mê edinọ utịn̄ikọ Bible idiọn̄ọ owo emi ẹyetde aran ke spirit. Mme Christian oro ẹnyenede idotenyịn eke isọn̄ ẹsinam ọfọn n̄ko ke mme afan̄ emi.
17. Ediyet aran ke spirit ọkọn̄ọ ke nso onyụn̄ ọkọn̄ọ ke anie?
17 Edieke ekemmọ andinịm ke akpanikọ obụpde mbụme aban̄a ikot eke heaven, ebiowo m̀mê Christian efen oro ọkọride esịm ọyọhọ idaha ekeme ndineme n̄kpọ emi ye enye. Nte ededi, owo kiet ikemeke ndinam ubiere emi nnọ owo en̄wen. Iyomke owo emi enen̄erede enyene ikot emi obobụp mbon efen m̀mê imọ imenyene utọ idotenyịn oro. Mbon oro ẹyetde aran ẹdi se ‘ẹkebonde obufa, idịghe ke ubon [“mfri,” NW] eke edikpade, edi ke ubon eke mîkemeke ndikpa, oto ke ikọ Abasi, emi odude uwem onyụn̄ ebịghide ke nsinsi.’ (1 Peter 1:23) Ebede ke spirit ye ikọ esie, Abasi ọtọ “mfri” oro anamde owo oro edi “obufa edibotn̄kpọ,” onyụn̄ enyene idotenyịn eke heaven. (2 Corinth 5:17, NW) Ndien edi Jehovah esimek owo. Ediyet aran “itoho owo emi oyomde yom, inyụn̄ itoho owo emi efehede itọk, edi oto Abasi.” (Rome 9:16) Ntre didie ke owo ekeme nditịm mfiọk ke imọ imenyene ikot eke heaven?
Ntak Mmọ Ẹtịmde Ẹfiọk
18. Didie ke spirit Abasi etiene spirit mbon oro ẹyetde aran edi ntiense?
18 Ntiense emi spirit Abasi etiede, anam mme Christian oro ẹyetde aran ẹtịm ẹfiọk ke mmimọ imenyene idotenyịn eke heaven. Paul ekewet ete: “Mbufo ẹkebọ spirit eke enyenede mmọ emi ẹdade ẹsịn ke ubon Abasi, emi anamde nnyịn ikot Abasi, ite, Abba, Ete. Spirit ke Idem Esie etiene spirit nnyịn edi ntiense ete, nnyịn idi nditọ Abasi. Edi edieke nnyịn idide nditọ, imonyụn̄ inyene udeme ke se ẹnịmde ẹnọ nditọ; imenyene udeme ke se Abasi enịmde; imasan̄a ye Christ inyene udeme: koro ana nte nnyịn ima ikụt ndutụhọ ye Enye, iyonyụn̄ ida ubọn̄ ye Enye.” (Rome 8:15-17) Ke idak ndausụn̄ edisana spirit, spirit, m̀mê n̄wọrọnda edu, mbon oro ẹyetde aran esinụk mmọ ndida se N̄wed Abasi etịn̄de aban̄a nditọ Jehovah eke spirit ntịn̄ mban̄a idemmọ. (1 John 3:2) Spirit Abasi anam mmọ ẹfiọk ke mmimọ idi nditọ esie onyụn̄ anam mmọ ẹnyene n̄wọrọnda idotenyịn. (Galatia 4:6, 7) Ih, ndidu nsinsi uwem ke isọn̄ nte mme mfọnmma owo ye mbonubon ye mme ufan edidi ata eti n̄kpọ, edi oro idịghe idotenyịn emi Abasi ọnọde mmọ. Ebede ke spirit esie, Abasi anam utọ ọkpọsọn̄ idotenyịn eke heaven oro odu ke esịt mmọ tutu mmọ ẹnyịme ndiyak kpukpru itie ebuana ye idotenyịn eke isọn̄ ẹtak.—2 Corinth 5:1-5, 8; 2 Peter 1:13, 14.
19. Nso udeme ke obufa ediomi enyene ke uwem Christian oro ẹyetde aran?
19 Mme Christian oro ẹyetde aran ẹtịm ẹfiọk ke mmimọ imenyene idotenyịn eke heaven, nte ke ẹda mmimọ ẹsịn ke obufa ediomi. Jesus ama etịn̄ aban̄a oro ke ini enye ọkọtọn̄ọde Editi, ete: “Cup emi edi Obufa Ediomi ke iyịp Mi, emi ẹduọkde kaban̄a mbufo.” (Luke 22:20) Abasi ye mbon oro ẹyetde aran ẹdi mme andibuana ke obufa ediomi emi. (Jeremiah 31:31-34; Mme Hebrew 12:22-24) Jesus edi esịne-ufọt. Obufa ediomi emi odude ke ntak iyịp emi Christ ọkọduọkde ama osion̄o mme owo ọnọ enyịn̄ Jehovah idịghe ke otu mme Jew kpọt edi ke otu mme idụt n̄ko, onyụn̄ anam mmọ ẹdi ubak “mfri” Abraham. (Galatia 3:26-29; Utom 15:14) “Nsinsi ediomi” emi anam kpukpru nditọ Israel eke spirit ẹset ẹdụk uwem unana n̄kpa ke heaven.—Mme Hebrew 13:20.
20. Ẹda mbon oro ẹyetde aran ẹsịn ke nso ediomi ye Christ?
20 Mbon oro ẹyetde aran ẹtịm ẹfiọk idotenyịn mmọ. Ẹda mmọ ẹdisịn ke ediomi efen efen, kpa ediomi Obio Ubọn̄. Kaban̄a ebuana oro mmọ ẹnyenede ye Christ, Jesus ọkọdọhọ ete: “Mbufo ẹdi mmọ emi ẹkesọn̄ọde ẹda ye Ami ke idomo Mi; kpa nte Ete Mi ekenịmde Obio Ubọn̄ ọnọ Mi, kpasụk ntre ke Ami nnyụn̄ nnịm nnọ mbufo.” (Luke 22:28-30) Ediomi emi ke ufọt Christ ye nsan̄a ndidem esie odu ke nsinsi.—Ediyarade 22:5.
Ini Editi—Ini Edidiọn̄
21. Didie ke nnyịn ikeme ndibọ akamba ufọn nto ini Editi?
21 Mme edidiọn̄ ini Editi ẹwak. Nnyịn imekeme ndibọ ufọn nto edikot Bible oro ẹdiomide ẹnọ ini emi. Enye n̄ko edi akpan ini oro odotde ndibọn̄ akam, nditie n̄kere mban̄a uwem Jesus eke isọn̄ ye n̄kpa esie, ndinyụn̄ mbuana ke utom edikwọrọ Obio Ubọn̄. (Psalm 77:12; Philippi 4:6, 7) Edinam emi ke idemesie eti nnyịn aban̄a ima emi Abasi ye Christ ẹmade nnyịn ke ebuana ye uwa ufak Jesus. (Matthew 20:28; John 3:16) Ndutịm emi ọnọ nnyịn idotenyịn ye ndọn̄esịt, okponyụn̄ enyene ndisọn̄ọ ubiere nnyịn ndikpebe usụn̄ uwem Christ. (Exodus 34:6; Mme Hebrew 12:3) Editi ekpenyene n̄ko ndisọn̄ọ nnyịn idem man idu uwem ekekem ye uyakidem nnyịn nte mme asan̄autom Abasi inyụn̄ idi mme anam-akpanikọ mme anditiene edima Eyen esie.
22. Nso idi n̄kponn̄kan enọ oro Abasi ọnọde ubonowo, ndien nso idi usụn̄ kiet ndiwụt esịtekọm mban̄a enye?
22 Nso nti enọ ke Jehovah ọnọ nnyịn ntem! (James 1:17) Nnyịn imenyene ndausụn̄ Ikọ esie, un̄wam spirit esie, ye idotenyịn nsinsi uwem. N̄kponn̄kan enọ Abasi edi uwa Jesus kaban̄a idiọkn̄kpọ mbon oro ẹyetde aran ye eke kpukpru mbon oro ẹnyenede mbuọtidem. (1 John 2:1, 2) Ntre, n̄kpa Jesus otụk fi adan̄a didie? Nte afo eyedi kiet ke otu mbon oro ẹdiwụtde esịtekọm ẹban̄a emi ebe ke ndisop idem ke utịn ama okosụhọde ke April 16, 2003, man ẹnịm Udia Mbubịteyo Ọbọn̄?
[Ikọ idakisọn̄]
^ ikp. 8 Mme Ntiense Jehovah ẹkesio edi owo imịn̄ke aba.
Nso Idi Ibọrọ Fo?
• Mmanie ẹkpedia mme n̄kpọ idiọn̄ọ Editi?
• Ntak emi “mme erọn̄ en̄wen” ẹsidụkde Udia Mbubịteyo Ọbọn̄ n̄kukụre nte mme andida nse oro ẹwụtde ukpono?
• Mme Christian oro ẹyetde aran ẹsan̄a didie ẹdiọn̄ọ ke mmimọ ikpenyene ndidia uyo nnyụn̄ n̄n̄wọn̄ wine ke Editi n̄kpa Christ?
• Ini Editi edi eti ini ndinam nso?
[Mme Mbụme Ukpepn̄kpọ]
[Mme ndise ke page 18]
(Ama oyom ndikụt nte enye enen̄erede etie, se n̄wed)
Ibat Mme Andidụk Editi
KE MILIỌN
15,597,746
15
14
13,147,201
13
12
11
10
9
8
7
6
5
4,925,643
4
3
2
1
878,303
63,146
1935 1955 1975 1995 2002
[Ndise ke page 18]
Nte afo oyodụk Udia Mbubịteyo Ọbọn̄ isua emi?
[Mme ndise ke page 21]
Ini Editi edi eti ini ndinam n̄kọri ke edikot Bible ye edibuana ke utom edikwọrọ Obio Ubọn̄