Nte Afo Amabat Se Iditakde?

JESUS CHRIST ama ọnọ mme mbet esie idotenyịn nsinsi uwem, edi enye n̄ko ama esịn udọn̄ ọnọ mmọ ndibat se iditakde mmọ ke ndidi Christian. Enye ama anam akpan n̄kpọ oro an̄wan̄a ke ndibụp ete: “Anie owo ke otu mbufo, emi oyomde ndikọn̄ tower, idibemke iso itie ibat se iditakde enye, man enye ọfiọk m̀mê emenyene okụk nte edikemde ndida nnam utom mma?” (Luke 14:28) Nso ke ikọ Jesus ọkọwọrọ?

Kpukpru Christian ẹsisobo idomo—ndusụk ẹsidi n̄kpọsọn̄ idomo. (Psalm 34:19; Matthew 10:36) Ke ntre, oyom nnyịn idu ke mben̄eidem ke ekikere ye ke n̄kan̄ eke spirit man ikûkop n̄kpaidem ke ini ubiọn̄ọ m̀mê mme mfịna en̄wen ẹsịmde nnyịn. Anaedi nnyịn ima ibabat mme utọ n̄kpọ-ata oro isịn ke se iditakde nnyịn ke ndidi mbet Christ, ifiọkde ite ke utịp—edibọhọ idiọkn̄kpọ ye n̄kpa—enen̄ede okpon akan n̄kpọ ekededi oro ererimbot emi ekemede ndinọ nnyịn. Ih, n̄kpọ ndomokiet oro Abasi ayakde esịm nnyịn—ọkpọkọm n̄kpa—ikemeke ndinọmọ nnyịn ke nsinsi edieke nnyịn ikade iso ndinam n̄kpọ esie.—2 Corinth 4:16-18; Philippi 3:8.

Nso ikeme ndinam mbuọtidem nnyịn ọsọn̄ ntre? Mbuọtidem nnyịn esikabade ọsọn̄ akan ke ini kiet kiet oro nnyịn inamde ndinen ubiere, isọn̄ọde ida inọ mme edumbet Christian, m̀mê inamde n̄kpọ ekekem ye uduak Abasi—akpan akpan ke ini nnyịn idude ke mfịghe edinam se idide isio. Ke ini nnyịn ke idem nnyịn ibọde mme edidiọn̄ Jehovah nte utịp usụn̄ uwem edinam akpanikọ nnyịn, mbuọtidem nnyịn esisọn̄ onyụn̄ ọkọri. Ke usụn̄ oro, nnyịn itiene uwụtn̄kpọ Jesus, mme akpa mbet esie, ye kpukpru iren ye iban mbuọtidem oro ke ofụri mbụk ‘ẹkebatde nnennen se iditakde’ mmọ ke ndinam n̄kpọ Abasi.—Mark 1:16-20; Mme Hebrew 11:4, 7, 17, 24, 25, 32-38.