Nte Afo ‘Emesidep Ifet’?

APOSTLE Paul ama ọnọ mme Christian akpa isua ikie ke Ephesus item ete: “Ẹtịn̄ enyịn ẹkpeme nte ẹsan̄ade: ẹkûsan̄a nte ndisịme, edi ẹsan̄a nte mbon eti ibuot. Ẹdedep ifet, koro mme usen ẹdiọkde.” (Ephesus 5:15, 16) Ntak okoyomde ẹnọ item emi? Man ẹbọrọ mbụme emi, oyom ẹfiọk mme idaha oro mme Christian ke obio eset oro ẹkesobode.

Ẹma ẹdiọn̄ọ Ephesus ke ntak uwowo inyene, oburobụt ido, ntatara ubiatibet, ye nsio nsio edinam ubụpekpo esie. Ke adianade do, mme Christian do ẹkenyene ndin̄wana mbiọn̄ọ mme ekikere akwaifiọk ẹban̄ade ini. Mbon Greece oro mîkedịghe mme Christian emi ẹkedụn̄de ke Ephesus ikenịmke ke akpanikọ nte ke ini esisan̄a aka iso iso. Ukpepn̄kpọ akwaifiọk Greece ekekpep mmọ ete ke mme owo ẹsifiak ẹmana ndien ke edifiak mmana oro inyeneke utịt. Owo emi akataharede ini esie ke emana kiet ekeme ndifiak nnyene ini oro ke emana efen. Utọ ekikere emi ekpekekeme ndinam mme Christian ke Ephesus ẹnana udọn̄ ẹban̄a ini oro Jehovah enịmde ọnọ mme n̄kpọ nditịbe, esịnede ini ubiereikpe esie. Ntem, item oro Paul ọkọnọde ete “ẹdedep ifet” ama odot.

Paul iketịn̄ke iban̄a ikpîkpu ini. Ikọ Greek oro enye akadade etịn̄ ikọ ada aban̄a edimek ini, kpa edikem ini oro ẹnịmde ẹnọ akpan uduak. Paul eketeme mme Christian akpa isua ikie ete ẹda ifet, m̀mê ini mfọn, oro mmọ ẹkesụk ẹnyenede, ẹnam n̄kpọ nte ọfọnde mbemiso utịt edide, Abasi onyụn̄ ọbọde mbọm ye edinyan̄a oro enye okoyomde ndinọ mmọ.—Rome 13:11-13; 1 Thessalonica 5:6-11.

Nnyịn idu uwem ke ukem ini oro. Utu ke ndibiat utọ ini mfọn emi owo mîditọn̄ọke ntak inyene aba mi ke ndibịne inemesịt ibio ini oro ererimbot ọnọde, oyowụt eti ibuot edieke mme Christian ẹdade ini oro mmọ ẹnyenede ẹnam mme edinam “uten̄e Abasi” ndien ke ntem ẹsọn̄ọde itie ebuana mmọ ye Andibot mmọ, Jehovah Abasi.—2 Peter 3:11; Psalm 73:28; Philippi 1:10.