‘Nyene Uko, Nyụn̄ Sọn̄ Esịt!’
‘Nyene Uko, Nyụn̄ Sọn̄ Esịt!’
“Ẹsọn̄ esịt [“ẹnyene uko,” NW]; Ami n̄kakan ererimbot.”—JOHN 16:33.
1. Ke ntak se ikanade ibet nditọ Israel ke Canaan, nso nsịnudọn̄ ke ẹkenọ mmọ?
KE INI nditọ Israel ẹkesụk ẹyomde ndibe Akpa Jordan ndụk Isọn̄ Un̄wọn̄ọ, Moses ama ọdọhọ mmọ ete: “Ẹsọn̄ọ idem [“ẹnyene uko,” NW], ẹnyụn̄ ẹnyene esịt, ẹkûdịghe, ẹkûnyụn̄ ẹbak mmọ: koro edi Jehovah Abasi fo asan̄a ye afo.” Ekem Moses ama okot Joshua, emi akanade ada nditọ Israel odụk Canaan, onyụn̄ ọtọn̄ọ ntak ọnọ enye item emi san̄asan̄a ete enyene esịt. (Deuteronomy 31:6, 7) Ke ukperedem, Jehovah ke idemesie ama esịn udọn̄ ọnọ Joshua, ete: “Sọn̄ ubọk [“nyene uko,” NW] nyụn̄ sọn̄ esịt . . . Edi sọn̄ ubọk, nyụn̄ sọn̄ esịt eti-eti.” (Joshua 1:6, 7, 9) Ẹketịn̄ mme ikọ oro ke ekemini. Nditọ Israel ẹma ẹyom uko man ẹsọn̄ọ ẹda ẹn̄wana ye n̄kpọsọn̄ asua oro ẹketiede ẹbet mmọ ke edem Jordan eken.
2. Nso idaha ke nnyịn idu mfịn, ndien nso ke oyom nnyịn inyene?
2 Mfịn, ke mîbịghike mme Christian akpanikọ ẹmọn̄ ẹbe ẹdụk obufa ererimbot oro ẹken̄wọn̄ọde ndien, ukem nte Joshua, oyom mmọ ẹnyene uko. (2 Peter 3:13; Ediyarade 7:14) Nte ededi, idaha nnyịn okpụhọde ye eke Joshua. Joshua ekesikama ofụt ye eduat an̄wana ekọn̄. Nnyịn in̄wana ekọn̄ eke spirit inyụn̄ ikamake ata ata n̄kpọekọn̄. (Isaiah 2:2-4; Ephesus 6:11-17) Akan oro, Joshua ekenyene ndin̄wana ediwak enyene-ndịk ekọn̄ idem ke ama ekebe odụk Isọn̄ Un̄wọn̄ọ. Edi nnyịn in̄wana enyene-ndịk en̄wan nnyịn idahaemi—mbemiso ibede idụk obufa ererimbot. Ẹyak nnyịn ikere iban̄a ndusụk idaha oro ẹyomde uko.
Ntak Anade Nnyịn In̄wana?
3. Nso ke Bible ayarade aban̄a akwa andibiọn̄ọ nnyịn?
3 Apostle John ekewet ete: “Nnyịn imọfiọk ite, nnyịn idi eke Abasi, ofụri ererimbot onyụn̄ esịne ke ubọk andidiọk.” (1 John 5:19) Mme ikọ emi ẹwụt akpan ntak oro anade mme Christian ẹn̄wana ndimụm mbuọtidem mmọ n̄kama. Ke ini Christian ọsọn̄ọde ada, enye ke ndusụk udomo anam Satan kpa Devil okpu. Ntem, Satan ke oyo nte “lion eke okụnide” odomode ndisịn mme anam-akpanikọ Christian ndịk ke idem nnyụn̄ nta mmọ. (1 Peter 5:8) Ke akpanikọ, enye an̄wana ekọn̄ ye mme Christian oro ẹyetde aran ye mme nsan̄a mmọ. (Ediyarade 12:17) Ke ekọn̄ emi, enye ada mme owo oro ẹnamde uduak esie, edide mmọ ẹfiọk m̀mê ifiọkke. Oyom uko man isọn̄ọ ida in̄wana ye Satan ye kpukpru mme isụn̄utom esie.
4. Nso ntọt ke Jesus ọkọnọ, edi nso edu ke mme Christian akpanikọ ẹwụt?
4 Sia Jesus ama ọkọfiọk ete ke Satan ye mme isụn̄utom esie ẹyebiọn̄ọ eti mbụk ọkpọsọn̄ ọkpọsọn̄, Enye ama ọtọt mme anditiene enye ete: “Ẹyeda mbufo ẹyak ẹnọ ukụt, ẹnyụn̄ ẹwot mbufo: kpukpru mme idụt ẹyenyụn̄ ẹsua mbufo kaban̄a enyịn̄ Mi.” (Matthew 24:9) Mme ikọ oro ẹma ẹsu ke akpa isua ikie, mmọ ẹnyụn̄ ẹsu mfịn. Ke akpanikọ, ukọbọ oro ndusụk Mme Ntiense Jehovah eke eyomfịn ẹyọde ọsọn̄ kpa nte ukọbọ ekededi ke ofụri mbụk. Kpa ye oro, mme Christian akpanikọ ẹsinyene uko ke ẹsobode utọ ukọbọ oro. Mmọ ẹfiọk ẹte ke “uten̄e owo ọkọk afia enịm,” ndien mmọ iyomke afia omụm mmimọ.—Mme N̄ke 29:25.
5, 6. (a) Mme idaha ewe ẹyom nnyịn inyene uko? (b) Didie ke mme anam-akpanikọ Christian ẹsinam n̄kpọ ke ini ẹsịnde uko mmọ ke udomo?
5 Ke ẹsiode ukọbọ ẹfep, mme n̄kpọ-ata en̄wen ẹdu oro ẹyomde nnyịn inyene uko. Ye ndusụk owo, nditịn̄ eti mbụk nnọ isenowo edi n̄kpọ-ata. Ẹsidomo uko ndusụk nditọ ufọkn̄wed ke ini ẹkotde mmọ ẹditịn̄ en̄wọn̄ọ nsụkibuot ẹnọ idụt m̀mê ọfọn̄ etakubom. Ke nditịm ntịn̄, sia utọ en̄wọn̄ọ oro edide mme ikọ ido ukpono, nditọwọn̄ oro ẹdide mme Christian ẹsibiere uko uko ndinam n̄kpọ ke usụn̄ oro enemde Abasi esịt, ndien nti edinam mmọ ẹsidi n̄kpọ inemesịt.
6 Nnyịn imoyom uko n̄ko ke ini mme andibiọn̄ọ ẹnamde ndutịm usuanetop ẹsuan ukwan̄ etop ẹban̄a mme asan̄autom Abasi m̀mê ke ini mmọ ẹdomode ndikpan utuakibuot akpanikọ ebe ke ‘ndibot ibak ke ewụhọ.’ (Psalm 94:20) Ke uwụtn̄kpọ, didie ke nnyịn ikpanam n̄kpọ ke ini ntọt oro ẹsuande ke n̄wedmbụk n̄kpọntịbe, ekebe ukopikọ, m̀mê ekebe ndise ẹban̄a Mme Ntiense Jehovah ẹdide ukwan̄ ntọt m̀mê ata ata nsu? Nte akpana idem akpa nnyịn? Baba. Nnyịn imodori enyịn mme utọ n̄kpọ oro nditịbe. (Psalm 109:2) Ndien idem ikpaha nnyịn ke ini ndusụk owo ẹnịmde mme nsu ye ukwan̄ ntọt oro ẹsuande, koro “ọkọi ese kpukpru ikọ ke akpanikọ.” (Mme N̄ke 14:15) Kpa ye oro, mme anam-akpanikọ Christian isinịmke kpukpru ikọ oro ẹtịn̄de ẹban̄a nditọete mmọ, ndien mmọ ke akpanikọ isiyakke ukwan̄ etop oro ẹsuande ẹnam mmọ ẹtre ndidụk mme mbono esop Christian, ẹtek ke ifịk ke utom ukwọrọikọ, m̀mê ẹmem ke mbuọtidem. Ke edide isio, mmọ ‘ẹmewụt ẹte idi ata mme asan̄autom Abasi, ke ini ukpono ye ke ini esuene, ke idiọk etop eke ẹsiode mmọ, ye ke eti etop; mme andibiọn̄ọ ẹbat mmọ ke mbon abian̄a, edi mmọ ẹdi mbon akpanikọ.’—2 Corinth 6:4, 8.
7. Mme mbụme ndụn̄ọde ewe ke nnyịn ikpobụp idem nnyịn?
7 Ke ewetde n̄wed ọnọ ẹsọk Timothy, Paul ọkọdọhọ ete: “Abasi ikọnọhọ nnyịn spirit ufep, edi spirit odudu . . . Mmọdo kûyak bụt anam fi ndidi ntiense nnọ Ọbọn̄ nnyịn.” (2 Timothy 1:7, 8; Mark 8:38) Ke ima ikokot mme ikọ emi, nnyịn imekeme ndibụp idem nnyịn: ‘Nte ami mmokop bụt mban̄a se nnịmde ke akpanikọ, mîdịghe nte mmenyene uko? Ke itieutom mi (m̀mê ke ufọkn̄wed), nte mmanam mbon oro ẹdude ye ami ẹdiọn̄ọ ke ndi Ntiense Jehovah, mîdịghe nte nsidomo ndidedịbe? Nte mmokop bụt ndidi isio ye mbon efen, mîdịghe nte mmenyene uko ndidi isio ke ntak itie ebuana mi ye Jehovah?’ Edieke owo ekededi enyenede etikwo etikwo ekikere aban̄a edikwọrọ eti mbụk m̀mê ndinịm se mme owo mîmaha ke akpanikọ, yak enye eti item oro Jehovah ọkọnọde Joshua ete: “Sọn̄ ubọk [“nyene uko,” NW], nyụn̄ sọn̄ esịt.” Kûfre ete, ke idịghe ekikere mme nsan̄autom m̀mê eke mme nsan̄a ufọkn̄wed edi akpan n̄kpọ, edi ekikere Jehovah ye Jesus Christ edi.—Galatia 1:10.
Nte Ikemede Ndinyene Uko
8, 9. (a) Ke idaha kiet, didie ke ẹkedomo uko akpa mme Christian? (b) Didie ke Peter ye John ẹkenam n̄kpọ ke ini ẹkesịnde mmọ ndịk ke idem, ndien nso ke mmọ ye nditọete mmọ ẹkesobo?
8 Didie ke nnyịn ikeme ndinyene orụk uko oro ekemede ndinam nnyịn isọn̄ọ ida ke mme ini afanikọn̄ emi? Ọfọn, akpa mme Christian ẹkesan̄a didie ẹnyene uko? Kere se iketịbede ke ini ikpọ oku ye mbiowo ke Jerusalem ẹkekpande Peter ye John ẹte ẹkûkwọrọ ikọ ke enyịn̄ Jesus. Mme mbet oro ikenyịmeke emi ndien ẹma ẹsịn mmọ ndịk ke idem ndien ekem ẹsana mmọ ẹyak. Ke oro ebede, mmọ ẹma ẹfiak ẹkediana ye nditọete, ndien kpukpru mmọ ẹbọn̄ akam ọtọkiet, ẹte: “Jehovah, se ikọ emi ẹsịnde [nnyịn] ndịk eke mmọ ẹtịn̄de; nyụn̄ nọ mme asan̄autom Fo odudu nditịn̄ ikọ Fo ke ofụri uko.” (Utom 4:13, 29) Ke ibọrọ, Jehovah ama ada edisana spirit ọsọn̄ọ mmọ idem, ndien nte mme adaiso mme Jew ẹketịn̄de ke ukperedem, mme mbet oro ‘ẹma ẹyọhọ Jerusalem’ ye ukpepn̄kpọ mmọ.—Utom 5:28.
9 Ẹyak nnyịn idụn̄ọde se iketịbede ke idaha oro. Ke ini mme adaiso mme Jew ẹkesịnde mme mbet ndịk ke idem, mme mbet emi ikekereke nditre ukwọrọikọ ke ntak mfịghe. Utu ke oro, mme mbet emi ẹma ẹbọn̄ akam ẹben̄e uko man ẹka iso ẹkwọrọ ikọ. Ekem mmọ ẹma ẹnam n̄kpọ ekekem ye akam mmọ, ndien Jehovah ama ada edisana spirit esie ọsọn̄ọ mmọ idem. Ifiọk n̄kpọntịbe mmọ owụt ke se Paul ekewetde ndusụk isua ke ukperedem ke isio isio udọn̄ikọ enyene n̄kpọ ndinam ye mme Christian ke ini ẹkọbọde mmọ. Paul ọkọdọhọ ete: “Mmenyene ukeme ndinam kpukpru n̄kpọ ke odudu Andisọn̄ọ mi idem.”—Philippi 4:13.
10. Didie ke ifiọk n̄kpọntịbe Jeremiah an̄wam mbon o-bụt?
10 Nso edieke owo edide owo o-bụt? Ndi enye ekeme ndisụk nnam n̄kpọ Jehovah uko uko ke ini osobode idomo? Ke akpanikọ, ekeme! Ti se Jeremiah ọkọdọhọde ke ini Jehovah ekemekde enye nte prọfet. Akparawa oro ọkọdọhọ ete: ‘Ami ndi eyenọwọn̄.’ Ana in̄wan̄-in̄wan̄ nte ke enye ekekere ke imọ idotke. Kpa ye oro, Jehovah ama ada mme ikọ emi esịn udọn̄ ọnọ enye: “Kûdọhọ ete, ‘Ami ndi eyenọwọn̄:’ koro afo ayasan̄a kpukpru utom eke ndidọn̄de fi, oyonyụn̄ etịn̄ kpukpru se ndiwụkde fi. Kûfehe iso mmọ; koro ami ndude ye afo ndinyan̄a fi.” (Jeremiah 1:6-10) Jeremiah ama enyene mbuọtidem ke Jehovah, ndien nte utịp, enye ama ekeme ndida odudu oro Jehovah ọkọnọde enye n̄kan mmen̄e onyụn̄ akabade edi n̄wọrọnda enyene-uko ntiense ke Israel.
11. Nso in̄wam mme Christian mfịn ndibiet Jeremiah?
11 Mme Christian oro ẹyetde aran mfịn ẹnyene ukem utom oro Jeremiah ekenyenede, ndien ye un̄wam “akwa otuowo” eke “mme erọn̄ en̄wen,” mmọ ẹka iso nditan̄a mme uduak Jehovah, idem ke ini ẹsobode unana udọn̄, nsahi, ye ukọbọ. (Ediyarade 7:9; John 10:16) Ikọ emi, “kûfehe,” oro Jehovah eketịn̄de ọnọ Jeremiah ọdọn̄ mmọ esịt. Mmọ idehede ifre ite ke Abasi ọdọn̄ mmimọ utom, ke mmimọ inyụn̄ ikwọrọ etop esie.—2 Corinth 2:17.
Mme Uwụtn̄kpọ Uko Oro Ẹdotde Ikpebe
12. Nso eti uwụtn̄kpọ uko ke Jesus ekenịm, ndien didie ke enye ekesịn udọn̄ ọnọ mme anditiene enye?
12 Nditie n̄kere mme uwụtn̄kpọ mbon efen oro ẹkenamde n̄kpọ uko uko nte Jeremiah, ẹkeme ndin̄wam nnyịn nte isịnde ukeme ndinyene uko. (Psalm 77:12) Ke uwụtn̄kpọ, nte nnyịn idụn̄ọrede utom ukwọrọikọ Jesus, uko esie ke ini Satan okodomode enye ye ke ini enye okosobode ọkpọsọn̄ ubiọn̄ọ otode mme adaiso mme Jew, otụk nnyịn. (Luke 4:1-13; 20:19-47) Ke ntak ukeme oro Jehovah ọkọnọde enye, n̄kpọ ikesehekede Jesus, ndien esisịt ini mbemiso n̄kpa esie, enye ama ọdọhọ mme mbet esie ete: “Mbufo ẹyekụt ukụt ke ererimbot: edi ẹsọn̄ esịt [“ẹnyene uko,” NW]; Ami n̄kakan ererimbot.” (John 16:33; 17:16) Edieke mme mbet Jesus ẹtienede uwụtn̄kpọ esie, mmọ n̄ko ẹdidi mme andikan. (1 John 2:6; Ediyarade 2:7, 11, 17, 26) Edi ana mmọ “ẹnyene uko.”
13. Nso nsịnudọn̄ ke Paul ọkọnọ mbon Philippi?
13 Ndusụk isua ke Jesus ama akakpa, ẹma ẹtomo Paul ye Silas ẹdọn̄ ke ufọk-n̄kpọkọbi ke Philippi. Ekem, Paul ama esịn udọn̄ ọnọ mme Christian ke esop Philippi ete ẹka iso ‘ẹsọn̄ọ ẹda ẹnyene spirit kiet, ẹnyụn̄ ẹda esịt kiet ẹn̄wana ẹn̄wan ẹban̄a mbuọtidem emi odude ke gospel: mme asua mmọ ẹkûsịn mmọ ndịk ke idem ke baba n̄kpọ kiet.’ Man ọsọn̄ọ mmọ idem ndinam emi, Paul ọkọdọhọ ete: ‘[Edikọbọ mme Christian] edi idiọn̄ọ nsobo ọnọ [mme andikọbọ], edi edi idiọn̄ọ edinyan̄a ọnọ mbufo; idiọn̄ọ oro onyụn̄ oto Abasi. Koro ẹyak ẹnọ mbufo kaban̄a Christ, idịghe ndibuọt idem ye Enye ikpọn̄, edi ndinyụn̄ n̄kụt ndutụhọ kaban̄a Enye.’—Philippi 1:27-29.
14. Nso utịp ke uko Paul ekenyene ke Rome?
14 Ke ini Paul ekewetde n̄wed ọnọ ẹsọk esop ke Philippi, enye okodu ke ufọk-n̄kpọkọbi, isan̄ enye emi ke Rome. Kpa ye oro, enye ama aka iso ndikwọrọ ikọ uko uko nnọ mbon efen. Nso ikedi utịp? Enye ekewet ete: “Kpukpru mbon-ekọn̄ ke nnaekọn̄ ọbọn̄ ye kpukpru mmọ eken ẹnen̄ede ẹkụt ẹte, ẹma ẹkọbọ mi kaban̄a Christ; n̄kpọkọbi mi onyụn̄ anam ediwak nditọ-ete ke Ọbọn̄ ẹsọn̄ọ esịt ẹkaha ẹtịn̄ Ikọ Abasi ye uko, ẹnana ndịk.”—Philippi 1:13, 14.
15. M̀mọ̀n̄ ke nnyịn ikeme ndikụt nti uwụtn̄kpọ mbuọtidem oro ẹkemede ndisọn̄ọ ubiere nnyịn ndinyene uko?
15 Uwụtn̄kpọ Paul ọsọn̄ọ nnyịn idem. Ntre ke edi ye nti uwụtn̄kpọ mme Christian eyomfịn emi ẹyọde ukọbọ ke mme idụt emi ẹdude ke idak ukara ufịk m̀mê idak ukara mme ọkwọrọ ederi. Ẹmebụk ẹban̄a ediwak mmọ ke magazine Enyọn̄-Ukpeme ye Awake! ye ke mme Yearbook of Jehovah’s Witnesses. Nte okotde mme mbụk emi, ti ete ke mbon oro ẹbụkde ẹban̄a ẹkedi mme owo nte nnyịn; edi ke ini mmọ ẹkesobode ata n̄kpọsọn̄ idaha, Jehovah ama ọnọ mmọ akwa ubom odudu ndien mmọ ẹma ẹyọ. Nnyịn imenịm ke akpanikọ ke enye ọyọnọ nnyịn ukem odudu oro edieke mme idaha ẹyomde.
Nnyịn Ndisọn̄ọ Nda Uko Uko Enem Jehovah Esịt Onyụn̄ Ọnọ Enye Ukpono
16, 17. Didie ke nnyịn mfịn ikeme ndinyene uko?
16 Edieke owo ọsọn̄ọde ada ọnọ akpanikọ ye edinen ido, enye enyene uko. Edieke owo anamde ntre kpa ye oro okopde ndịk, oro akam edi ọkpọsọn̄ uko. Ke akpanikọ, Christian ekededi ekeme ndinyene uko edieke enye enen̄erede oyom ndinam uduak Jehovah, edieke enye ebierede ndisọn̄ọ nda nnam akpanikọ, edieke enye eberide edem ke Abasi kpukpru ini, ye edieke enye etide kpukpru ini nte ke Jehovah ama ebebem iso ọsọn̄ọ ediwak owo nte imọ idem. Akan oro, ke ini ifiọkde ite ke nnyịn ndisọn̄ọ nda uko uko enem Jehovah esịt onyụn̄ ọnọ enye ukpono, nnyịn iyenen̄ede ibiere nditre ndikop mmemidem. Nnyịn iyeben̄e idem ndiyọ nsahi m̀mê se idiọkde ikan oro koro nnyịn inen̄erede ima enye.—1 John 2:5; 4:18.
17 Kûfre ete ke ini nnyịn ikụtde ndutụhọ ke ntak mbuọtidem nnyịn, oro iwọrọke ite ke nnyịn imanam se ikwan̄ade. (1 Peter 3:17) Nnyịn ikụt ndutụhọ koro inọde itie edikara Jehovah ibetedem, koro inamde eti n̄kpọ, ye koro nnyịn mîdịghe eke ererimbot. Ke afan̄ emi, apostle Peter ọkọdọhọ ete: “Edieke mbufo ẹmede ime ke ini ẹkụtde ndutụhọ ke edinam nti n̄kpọ, oro edi se inemde Abasi esịt.” Peter ama ọdọhọ n̄ko ete: “Ọfọn mmọ emi ẹkụtde ndutụhọ nte uduak Abasi edide ẹyak ukpọn̄ mmọ ke edinam eti n̄kpọ ẹsịn ke ubọk Andibot, emi edide Abasi akpanikọ.” (1 Peter 2:20; 4:19) Ih, mbuọtidem nnyịn esinem ima ima Abasi nnyịn, Jehovah, esịt esinyụn̄ ada ukpono ọsọk enye. Nso okopodudu ntak ndinyene uko ke emi edi ntem!
Nditịn̄ Ikọ ke Iso Mme Andikara
18, 19. Ke ini nnyịn inyenede uko ke iso mme ebiereikpe, nso etop ke nnyịn, nte utịp, idinọ?
18 Ke ini Jesus ọkọdọhọde mme anditiene enye ete ke ẹyekọbọ mmọ, enye ama ọdọhọ n̄ko ete: “[Mme owo] ẹyeyak mbufo ẹsịn ke ubọk mme esop, ndien ẹyemia mbufo ke mme synagogue mmọ; ẹyenyụn̄ ẹda mbufo ẹwọrọ ke iso mme andikara ye ndidem kaban̄a Mi, kpan̄ mbufo ẹdi ntiense ẹnọ mmọ ye mme Gentile.” (Matthew 10:17, 18) Ndida ke iso ebiereikpe m̀mê andikara ke ntak edori ikọ oyom uko. Kpa ye oro, ke ini nnyịn idade mme utọ idaha oro ndinọ mme owo oro ikọ ntiense uko uko, nnyịn ida idiọk idaha oro inam akpan n̄kpọ. Nte utịp, nnyịn inọ mbon oro ẹbierede ikpe ẹnọ nnyịn ikọ Jehovah oro ẹwetde ke Psalm ọyọhọ 2: “Mbufo ndidem ẹdi ọniọn̄, ndien: mbufo, mme ebiereikpe ererimbot, ẹkop item. Ẹnam n̄kpọ Jehovah ke ndịk.” (Psalm 2:10, 11) Ediwak ini, ke ini ẹdoride Mme Ntiense Jehovah ikọ ke esopikpe, mme ebiereikpe ẹsinọ ifụre utuakibuot, ndien nnyịn imesikop inemesịt iban̄a oro. Nte ededi, ndusụk mme ebiereikpe ẹsiyak mme andibiọn̄ọ ẹtịmede mmọ. N̄wed Abasi ọdọhọ mme utọ ebiereikpe oro ete: “Ẹkop item.”
19 Mme ebiereikpe ẹkpenyene ndidiọn̄ọ nte ke ibet Jehovah Abasi okon̄ akan. Mmọ ẹkpenyene nditi nte ke kpukpru owo, ẹsịnede mme ebiereikpe, ẹyenam ibat ẹnọ Jehovah Abasi ye Jesus Christ. (Rome 14:10) Amaedi nnyịn, edide nnyịn imọbọ unenikpe ke ubọk ebiereikpe edide owo m̀mê ibọhọ, nnyịn imenyene kpukpru ntak ndinyene uko koro Jehovah ọnọde nnyịn ibetedem. Bible ọdọhọ ete: “Ọfọfọn ọnọ kpukpru mmọ eke ẹbuọtde idem ye Enye.”—Psalm 2:12.
20. Ntak emi nnyịn ikpokopde inemesịt edieke nnyịn isobode ukọbọ ye edori ikọ?
20 Ke Ukwọrọikọ oro ke Obot, Jesus ọkọdọhọ ete: “Ọfọfọn ọnọ mbufo ke adan̄aemi owo edisụn̄ide mbufo, ẹnyụn̄ ẹnam mbufo isịn-enyịn, ẹnyụn̄ ẹtịn̄ kpukpru orụk idiọk-n̄kpọ ke nsu ẹdian mbufo kaban̄a Mi. Ẹdat esịt, ẹdara eti-eti: koro utịp mbufo ke Heaven omokpon: koro kpa ntre ke mmọ ẹkenam mme prophet emi ẹbemde mbufo iso ẹdu isịn-enyịn̄.” (Matthew 5:11, 12) Nte ededi, ukọbọ isinemke-nem, edi nnyịn ndisọn̄ọ nda kpa ye ukọbọ, esịnede edori ikọ eke ndutịm usuanetop, edi n̄kpọ idatesịt. Emi ọwọrọ ke nnyịn ke inem Jehovah esịt ndien ke iyọbọ utịp. Nnyịn ndisọn̄ọ nda uko uko owụt ke nnyịn imenyene ata mbuọtidem onyụn̄ ọsọn̄ọ nte ke nnyịn imenyene unyịme Abasi. Ke akpanikọ, enye owụt ke nnyịn imenyene ọyọhọ mbuọtidem ke Jehovah. Utọ mbuọtidem oro edi akpan n̄kpọ ọnọ Christian, nte ẹdiwụtde ke ibuotikọ oro etienede.
Nso ke Afo Ekekpep?
• Mme idaha ewe ẹyom uko mfịn?
• Didie ke nnyịn ikeme ndinyene uko?
• Mmanie ẹnịm nti uwụtn̄kpọ uko?
• Ntak emi nnyịn iyomde ndinam n̄kpọ ye uko?
[Mme Mbụme Ukpepn̄kpọ]
[Mme ndise ke page 9]
Simone Arnold (emi ekerede Liebster idahaemi) ke Germany, Widdas Madona ke Malawi, ye Lydia ye Oleksii Kurdas ke Ukraine ẹma ẹnyene uko ẹnyụn̄ ẹbiọn̄ọ andidiọk
[Mme ndise ke page 10]
Bụt inamke nnyịn iban̄a eti mbụk
[Ndise ke page 11]
Uko Paul ke ufọk-n̄kpọkọbi ama anam ekese ufọn ọnọ eti mbụk
[Ndise ke page 12]
Edieke nnyịn inamde idaha N̄wed Abasi nnyịn an̄wan̄a ebiereikpe uko uko, nnyịn inọ akpan etop