Ukọbọ Ido Ukpono—Ntak-a?

NTE afo emekere ke ẹkpenyene ndikọbọ mme owo ke ntak ido ukpono mmọ? Eyedi ukereke ntre—ke nsụhọde n̄kaha adan̄a nte mmọ mîbiọn̄ọke unen mbon en̄wen. Edi, ukọbọ ido ukpono omodu ke anyan ini ndien ke osụk ododu. Ke uwụtn̄kpọ, ediwak ke otu Mme Ntiense Jehovah ke Europe ye ke mme ikpehe ererimbot efen ikawakke ndinyene ifụre ido ukpono ndien ẹma ẹfiomo mmọ ke ofụri ọyọhọ isua ikie 20.

Ke ini oro, Mme Ntiense Jehovah ẹma ẹyọ n̄kaiso ibak ibak ukọbọ anyan ini ke idak n̄kpọsọn̄ ukara ufịk iba ke Europe. Nso ke ifiọk n̄kpọntịbe mmọ ekpep nnyịn aban̄a ukọbọ ido ukpono? Ndien nso ke nnyịn ikeme ndikpep nto usụn̄ oro mmọ ẹkenamde n̄kpọ ẹban̄a ndutụhọ?

“Idịghe eke Ererimbot”

Mme Ntiense Jehovah ẹsidomo ndinịm ibet, nditie emem emem, ndinyụn̄ nnyene nti ido uwem. Mmọ isibiọn̄ọke m̀mê ndin̄wana ye ukara, m̀mê ndidemede ukọbọ koro mmọ ẹyomde ndidi mme akpan̄kpa usụn̄ Abasi. Mme Christian emi ẹda san̄asan̄a ẹkpọn̄ ukaraidem. Emi odu ke n̄kemuyo ye mme ikọ Jesus emi: “[Mme anditiene Mi] idịghe eke ererimbot, kpa nte Ami mmendịghe eke ererimbot.” (John 17:16) Ata ediwak ukara ẹsinyịme edida san̄asan̄a Mme Ntiense emi. Edi mme akara ukara ufịk inyeneke ukpono inọ se Bible oyomde, nte ke mme Christian ikpenyeneke ndidi eke ererimbot.

Ẹma ẹnam ntak kaban̄a emi an̄wan̄a ke  mbono oro ẹkenyenede ke Ufọkn̄wed Ntaifiọk Heidelberg, Germany, ke November 2000. Ibuotikọ mbono oro ekedi “Ufịk ye Unen Owo: Mme Ntiense Jehovah ke Idak Ukara Nazi ye Ukara Ufịk Communist.” Dr. Clemens Vollnhals eke Itie Ukpepn̄kpọ Ẹnamde Ndụn̄ọde Ẹban̄a Ukara Ufịk ke Ufọkn̄wed Hannah-Arendt ọkọdọhọ ete: “Ukara ufịk isitreke ye edinam mbre ukara kpọt. Mmọ ẹsiyom nsụkibuot oro mînyeneke adan̄a.”

Mme Christian akpanikọ ikemeke ndinọ ukara owo “nsụkibuot oro mînyeneke adan̄a,” sia mmọ ẹn̄wọn̄ọde ndinọ Jehovah Abasi ikpọn̄-ikpọn̄ ọyọhọ nsụkibuot. Mme Ntiense oro ẹdude ke idak ukara ufịk ẹkụt nte ke se Ukara esiyomde ndusụk ini ẹsituaha ye mme edinịm ke akpanikọ mmimọ. Nso ke mmọ ẹsinam ke ini mme utọ ntuaha emi ẹdude? Nte mbụk owụtde, Mme Ntiense Jehovah ẹmeda edumbet emi mme mbet Jesus Christ ẹketienede ẹsịn ke edinam: “Nnyịn inyene ndikop uyo Abasi n̄kan uyo owo.”—Utom 5:29.

Ediwak Mme Ntiense ẹma ẹsọn̄ọ ẹda ke mbuọtidem ẹnyụn̄ ẹda san̄asan̄a ke mme mbubehe ukaraidem, idem kpa ye ibak ibak ukọbọ. Didie ke mmọ ẹkekeme ndiyọ? Mmọ ẹkeda odudu ke m̀mọ̀n̄ ẹnam ntre? Yak mmọ ẹtịn̄ ikọ idemmọ. Ndien ẹyak nnyịn ise se kpukpru owo, Mme Ntiense ye mbon oro mîdịghe Mme Ntiense, ẹkemede ndikpep nto ifiọk n̄kpọntịbe mmọ.

[Se Ẹwetde ke Ikpọ Abisi ke page 4]

Mme Ntiense Jehovah ke Germany ẹma ẹyọ ibak ibak ukọbọ anyan ini ke idak n̄kpọsọn̄ ukara ufịk iba ke ọyọhọ isua ikie 20

[Se Ẹwetde ke Ikpọ Abisi ke page 4]

“Ukara ufịk isitreke ye edinam mbre ukara kpọt. Mmọ ẹsiyom nsụkibuot oro mînyeneke adan̄a.”—Dr. Clemens Vollnhals

[Ndise ke page 4]

Owo ikayakke ubon Kusserow enyene ifụre koro mmọ mîkenyịmeke ndikan̄ mbuọtidem

[Ndise ke page 4]

Ẹma ẹwot Johannes Harms ke ufọk-n̄kpọkọbi Nazi ke ntak mme edinịm ke akpanikọ esie