“Ẹsọn̄ Esịt; Ami N̄kakan Ererimbot”

USEN n̄kpa Jesus—ọyọhọ usen 14 ke ọfiọn̄ Nisan mme Jew—ọkọtọn̄ọ ke utịn ama okosụhọde ke Thursday, March 31, 33 E.N. Ke mbubịteyo oro, Jesus ye mme apostle esie ẹma ẹsop idem ke ubet enyọn̄ ke Jerusalem man ẹdia Passover. Nte enye ekeben̄ede idem ‘ndikpọn̄ ererimbot emi nnyọn̄ ntiene Ete,’ Jesus ama owụt ke imọ ima ima mme apostle imọ tutu esịm akpatre. (John 13:1) Didie? Ebe ke ndinọ mmọ nti ukpep, ntem etịmde mmọ idem ọnọ se ikanade mmọ ke iso.

Nte ini akade ke okoneyo oro, Jesus ama ọdọhọ mme mbet esie ete: “Ẹsọn̄ esịt; Ami n̄kakan ererimbot.” (John 16:33) Nso ke uko uko ikọ esie emi ọkọwọrọ? Ke ubak ubak, ikọ esie ọkọwọrọ: ‘Idiọkn̄kpọ ererimbot inamke esịt ayat Mi m̀mê ndinam Mi nsio usiene. Nyakke ererimbot enyịk Mi esịn ke usụn̄ esie. Mbufo n̄ko ẹmekeme ndinam emi.’ Se Jesus ekekpepde mme anam-akpanikọ apostle esie ke akpatre hour uwem esie eke isọn̄ ayan̄wam mmọ n̄ko ndikan ererimbot.

Anie akpafan̄a ke idiọkn̄kpọ iyọhọke ererimbot mfịn? Didie ke nnyịn isinam n̄kpọ iban̄a ukwan̄ikpe ye afai oro mînyeneke ntak? Ndi mme n̄kpọ emi ẹsinam esịt ayat nnyịn mîdịghe ẹsịn nnyịn ke idomo edisio usiene? Didie ke mbiara ido uwem oro ẹkande nnyịn ẹkụk ẹtụk nnyịn? Adianade ye emi edi unana mfọnmma ye ntụhọ edinam idiọkn̄kpọ, ndien nnyịn imenyene en̄wan ndin̄wana ye n̄kpọ mbiba emi: idiọk ererimbot ye ndiọi udọn̄. Ndi nnyịn ikpenen̄ede idori enyịn ndikan ke en̄wan emi ye unana un̄wam Abasi? Didie ke nnyịn ikeme ndinyene un̄wam esie? Mme edu ewe ke nnyịn ikpọkọri man ẹn̄wam nnyịn ndin̄wana ye ntụhọ ikpọkidem? Man inyene ibọrọ, ẹyak iwọn̄ọde ibịne se Jesus ekekpepde ndima mbet esie ke akpatre usen uwem esie ke isọn̄.

Da Nsụhọdeidem Kan Ntan̄idem

Ke uwụtn̄kpọ, kere ban̄a mfịna ntan̄idem m̀mê iseri. Bible etịn̄ aban̄a emi ete: “Iseri ebem nsobo iso: n̄kpon-esịt onyụn̄ ebem iduọ iso.” (Mme N̄ke 16:18) N̄wed Abasi ọnọ nnyịn item n̄ko ete: “Edieke owo abatde idem ke n̄kpọ ke ini enye mîdịghe n̄kpọ, enye ababian̄a idem.” (Galatia 6:3) Ih, ntan̄idem esikama nsobo onyụn̄ abian̄a owo. Oyowụt eti ibuot nnyịn ndisua “iseri, ye isen̄.”—Mme N̄ke 8:13.

Ndi mme apostle Jesus ẹma ẹnyene mfịna iseri ye isen̄? Ke nsụhọde n̄kaha ke idaha kiet, mmọ ẹma ẹneni ke otu idemmọ ẹban̄a owo oro edide andikpon n̄kan. (Mark 9:33-37) Ke idaha efen, James ye John ẹma ẹben̄e ikpọ itie ke Obio Ubọn̄. (Mark 10:35-45) Ama ọdọn̄ Jesus ndin̄wam mme mbet esie ẹsio ntụhọ emi ẹfep ke idemmọ. Ntre nte mmọ ẹdiade Passover, enye ama adaha ke enyọn̄, ada ukwọhọdeidem awan̄ ke n̄kụk, onyụn̄ ọtọn̄ọ ndiyet mme mbet esie ukot. Eyịghe ikodụhe kaban̄a se enye okoyomde mmọ ẹkpep. Jesus ama ọdọhọ ete:  “Edieke Ami ndien, emi ndide Ọbọn̄ ye Andikpep, n̄keyetde mbufo ukot, mbufo nde ẹkpeyet kiet eken ukot.” (John 13:14) Ana nsụhọdeidem ada itie ntan̄idem.

Nte ededi, isidịghe mmemmem n̄kpọ ndikan ntan̄idem. Nte ini akakade ke mbubịteyo oro ke Jesus ama ekebịn Judas Iscariot, emi okoyomde ndida enye nnọ, ọkpọsọn̄ eneni ama edemede ke otu apostle 11 emi. Nso ikedi mfịna mmọ? Mfịna mmọ ekedi m̀mê anie ke otu mmimọ edi andikpon n̄kan! Utu ke nditọk mmọ, Jesus ke ime ama ọtọn̄ọ ntak ọsọn̄ọ etịn̄ ufọn edinam n̄kpọ nnọ mbon en̄wen. Enye ama ọdọhọ ete: “Ndidem mme Gentile ẹkara mmọ; ẹnyụn̄ ẹkot mmọ emi ẹnyenede odudu ndikara mmọ, ẹte Mme anam-ufọn. Edi inyeneke ndidi ntre ye mbufo: yak enye emi okponde akan ke otu mbufo akabade etie nte eyenọwọn̄; enye emi onyụn̄ edide etubom akabade etie nte anam-utom.” Ke etide mmọ uwụtn̄kpọ esie, enye ama adian do ete: “Ami ndu ke otu mbufo nte enye emi adade mbet.”—Luke 22:24-27.

Ndi emi ama an̄wan̄a mme apostle oro? Etie nte ama an̄wan̄a. Ediwak isua ke ukperedem, apostle Peter ama ewet ete: “Mbufo kpukpru ẹnyene esịt kiet, ẹkop mbọm ye kiet eken, ẹtie ima-ima nte nditọ-ete, ẹnyene mfefere esịt, ẹnyụn̄ ẹsụhọde idem.” (1 Peter 3:8) Edi akpan n̄kpọ didie ntem ete nnyịn n̄ko ida nsụhọdeidem ikan ntan̄idem! Ikpowụtke eti ibuot nnyịn ndiyom uwọrọetop, odudu, m̀mê ikpọ itie. Bible ọdọhọ ete: “Abasi ọbiọn̄ọ mbon iseri, edi ọnọ mbon nsụhọde-idem mfọn.” (James 4:6) Kpasụk ntre, n̄ke ọniọn̄ eke eset kiet ọdọhọ ete: “Utịp nsụkesịt ye eke uten̄e Jehovah edi inyene, ye ukpono, ye uwem.”—Mme N̄ke 22:4.

Kan Usua—Didie?

Kere ban̄a ọsọ edu efen ke ererimbot—usua. Edide ndịk, unana ifiọk, asari, ufịk, ukwan̄ikpe, ufreidụt, m̀mê usua eke ekpụk edi ntak, etie nte usua akakan nnyịn okụk. (2 Timothy 3:1-4) Usua ekedi ọsọ n̄kpọ n̄ko ke eyo Jesus. Ẹma ẹsua ẹnyụn̄ ẹsọn mme ọbọ a-tax ke n̄ka mme Jew. Mme Jew ikasan̄ake n̄kpọ ye mbon Samaria. (John 4:9) Ndien mme Jew n̄ko ẹma ẹsise mme Gentile m̀mê mbon oro mîkedịghe mme Jew ke usụhọde. Nte ededi, nte ini akakade, usụn̄ utuakibuot oro Jesus ọkọtọn̄ọde ekenyene ndisịne mme owo ẹtode kpukpru idụt. (Utom 10:34, 35; Galatia 3:28) Ntre enye ke ima ima usụn̄ ama ọnọ mme mbet esie obufa n̄kpọ.

Jesus ọkọdọhọ ete: “Mmọnọ mbufo obufa ibet nte, Mbufo ẹma kiet eken; nte, mbufo nde ẹma kiet eken kpa nte n̄kamade mbufo.” Mmọ ẹkenyene ndikpep ndiwụt ima emi, koro enye ama aka iso ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:34, 35) Ibet oro ekedi obufa koro enye ama aka anyan akan edima “mbọhọ-idụn̄ fo nte idem fo.” (Leviticus 19:18) Ke nso usụn̄? Jesus ama anam n̄kpọ emi an̄wan̄a, ọdọhọde ete: “Ibet Mi edi ntem, ete, mbufo ẹma kiet eken, kpa nte n̄kamade mbufo. Baba owo kiet inyeneke ima eke okponde akan enye emi, owo ndikpayak uwem esie nduọk kaban̄a mme ufan esie.” (John 15:12, 13) Mmọ ẹkenyene ndinyịme ndikpa nnọ kiet eken ye mbon en̄wen.

Didie ke mme anana-mfọnmma owo ẹkpesio ubi ubi usua ke uwem mmọ ẹfep? Ebe ke ndinam ima n̄waidem ada itie ubi ubi usua. Ediwak miliọn mbon esịt akpanikọ oro ẹtode kpukpru ekpụk, obio, ido ukpono, ye ukaraidem ke ẹnam kpa ntre. Ẹnam mmọ ẹkabade  ẹdi obio emi adianade kiet, usua mînyụn̄ idụhe—kpa itie nditọete ofụri ererimbot eke Mme Ntiense Jehovah. Mmọ ẹnam mme ikọ odudu spirit eke apostle John emi: “Kpukpru owo eke asuade eyen-ete esie edi obom: ndien mbufo ẹfiọk ẹte, baba obom kiet inyeneke nsinsi uwem ke esịt esie.” (1 John 3:15) Mme Christian akpanikọ isịnke ndin̄wana ekọn̄ kpọt edi mmọ ẹsịn ofụri ukeme ndima kiet eken.

Nte ededi, nso ikpedi ekikere nnyịn kaban̄a mbon oro mîdịghe ekemmọ mme andinịm ke akpanikọ oro ẹnyụn̄ ẹkemede ndisua nnyịn? Ke ini ọkọkọn̄ọde ke eto, Jesus ama ọbọn̄ akam ke ufọn mbon oro ẹkeyomde ndiwot enye ete: “Ete, dahado nọ mmọ; koro mmọ mîfiọkke se mmọ ẹnamde.” (Luke 23:34) Ke ini mbon usua ẹketọn̄ọde mbet oro Stephen ke itiat ẹwot, mme akpatre ikọ esie ẹkedi: “Ọbọn̄, kûda idiọk-n̄kpọ emi udori mmọ.” (Utom 7:60) Jesus ye Stephen ẹma ẹyom n̄kpọ akam ọfọn mme asua mmọ. Mmọ ikenyeneke usua ndomokiet ke esịt. Bible ọnọ nnyịn item ete: “Ẹyak nnyịn ifọn ido ye kpukpru owo.”—Galatia 6:10.

‘Ibetedem Oro Edidude ke Nsinsi’

Nte mbono oro enye ekenịmde ye apostle esie 11 akakade iso, Jesus ama asian mmọ ete ke ibịghike imọ ididụhe aba ye mmọ ke obụkidem. (John 14:28; 16:28) Edi enye ama ọn̄wọn̄ọ ọnọ mmọ ete: “[Nyeben̄e] Ete, ndien Enye ọyọnọ mbufo Ibetedem efen, man Enye edidu ye mbufo ke nsinsi.” (John 14:16) Ibetedem oro ẹken̄wọn̄ọde edi edisana spirit Abasi. Enye ekenyene ndikpep mmọ nditụn̄ọ n̄kpọ N̄wed Abasi nnyụn̄ nnam mmọ ẹti se Jesus ekekpepde mmọ ke ini utom ukwọrọikọ esie ke isọn̄.—John 14:26.

Didie ke edisana spirit ekeme ndin̄wam nnyịn mfịn? Ọfọn, Bible edi Ikọ Abasi eke odudu spirit. Iren oro ẹkedade nditịn̄ ntịn̄nnịm ikọ nnyụn̄ n̄wet Bible ẹkenam, ‘nte Edisana Spirit ekesịnde mmọ ẹtịn̄.’ (2 Peter 1:20, 21; 2 Timothy 3:16) Nnyịn ndikpep N̄wed Abasi nnyụn̄ nda se nnyịn ikpepde nsịn ke edinam anam nnyịn inyene ifiọk, ọniọn̄, asian, ikike, mbufiọk ye ukeme ukere n̄kpọ. Do, nte nnyịn itịmke idu ke mben̄eidem ndiyọ mme mfịghe idiọk ererimbot emi?

Edisana spirit edi ibetedem ke usụn̄ efen. Edisana spirit Abasi edi ọkpọsọn̄ odudu oro onụkde owo ndinam se ifọnde, an̄wamde mbon oro ẹsụkde ibuot ẹnọ odudu esie ndiwụt mme edu Abasi. Bible ọdọhọ ete: “Mbun̄wụm Spirit edi ima, ye idatesịt, ye emem, ye ime, ye mfọn-ido, ye eti ido, ye edinam akpanikọ, ye ifụre-ifụre ido, ye mfara ke idem.” Nte mmọ emi idịghe mme edu oro iyomde man ikeme ndikan mme ntụhọ oburobụt ido, utọk, ufụp, iyatesịt, ye mme n̄kpọ ntre?—Galatia 5:19-23.

Ebede ke ndikọn̄ mbuọtidem ke spirit Abasi, nnyịn imekeme n̄ko ndibọ “akwa ubom odudu esie” ndida nse mban̄a mfịna m̀mê nnanenyịn ekededi. (2 Corinth 4:7) Ke adan̄aemi ekemede ndidi edisana spirit idimenke mme idomo ifep, ke akpanikọ enye ekeme ndin̄wam nnyịn ndiyọ mmọ. (1 Corinth 10:13) Apostle Paul ekewet ete: “Mmenyene ukeme ndinam kpukpru n̄kpọ ke odudu Andisọn̄ọ mi idem.” (Philippi 4:13) Abasi esida edisana spirit esie ọnọ utọ odudu oro. Nnyịn ikpowụt esịtekọm didie ntem iban̄a edisana spirit emi! Ẹn̄wọn̄ọ enye ẹnọ mbon oro ‘ẹmade Jesus ẹnyụn̄ ẹnịmde mbet esie.’—John 14:15.

“Ẹsụk Ẹdụn̄ ke Ima Mi”

Ke akpatre okoneyo oro enye okodude uwem nte owo, Jesus n̄ko ama asian mme apostle esie ete: “Owo eke enyenede mbet Mi, onyụn̄ enịmde mmọ, enye edi owo eke amade Mi: ndien owo eke amade Mi, Ete Mi ayama enye.” (John 14:21) Enye ama eteme mmọ ẹte: “Ẹsụk ẹdụn̄ ke ima Mi.” (John 15:9) Didie ke ndisụk ndụn̄ ke ima Ete ye Eyen an̄wam nnyịn ke en̄wan oro in̄wanade ye ntụhọ unam idiọkn̄kpọ ye idiọk ererimbot emi?

Ọfọn, nte nnyịn imekeme ndinen̄ede n̄kara ntụhọ unam idiọkn̄kpọ edieke nnyịn mînyeneke n̄kpọ oro enen̄erede onụk nnyịn ndinam oro? Nso okopodudu n̄kpọ ikponụk nnyịn akan udọn̄ edinyene eti itie ebuana ye Jehovah Abasi ye Eyen esie? Ernesto, * akparawa  oro akan̄wanade ọkpọsọn̄ ọbiọn̄ọ oburobụt usụn̄ uwem oro enye okodude toto ke ntọn̄ọ ntọn̄ọ isua uyen esie anam an̄wan̄a ete: “Ami n̄koyom ndinem Abasi esịt, ndien mma n̄kpep nto Bible nte ke enye imaha usụn̄ oro ami n̄kodude uwem. Ntre ami mma mbiere ndidi isio isio orụk owo, nditiene ndausụn̄ Abasi. Kpukpru usen, n̄kenyene ndin̄wana mbiọn̄ọ mme etikwo etikwo, ndek ndek ekikere oro ẹkesụk ẹdide ẹdiyọhọ mi esịt. Mma mbiere ndikan ke en̄wan emi, ndien mma nsibọn̄ akam kpukpru ini nyom un̄wam Abasi. Ke isua iba ẹbede se ikedide ndiọkn̄kan n̄kpọ ama ebe, kpa ye oro ami nsụk nnanam n̄kpọ ọkpọsọn̄ ye idemmi.”

Kaban̄a en̄wan oro in̄wanade ye ererimbot, kere ban̄a akpatre akam oro Jesus ọkọbọn̄de mbemiso ọkọkpọn̄de ubet enyọn̄ oro ke Jerusalem. Enye ama ọbọn̄ akam ke ibuot mme mbet esie ọnọ Ete esie onyụn̄ ọdọhọ ete: “Mben̄eke nte Afo osio mmọ ke ererimbot efep, edi mmeben̄e nte ekpeme mmọ ke idiọk esie. Mmọ idịghe eke ererimbot, kpa nte Ami mmendịghe eke ererimbot.” (John 17:15, 16) Emi ọnọ ndọn̄esịt didie ntem! Jehovah esikpeme mbon ima esie onyụn̄ ọnọ mmọ odudu nte mmọ ẹkade iso ndida san̄asan̄a n̄kpọn̄ ererimbot.

“Ẹbuọt Idem”

Ndinịm mbet Jesus ekeme ndinen̄ede n̄n̄wam nnyịn ndikan ke en̄wan oro in̄wanade ye idiọk ererimbot emi ye ntụhọ unam idiọkn̄kpọ nnyịn. Nte ededi, kpa ye oro mme utọ edikan oro ẹdide akpan n̄kpọ, mmọ ikemeke ndimen ererimbot m̀mê ndammana idiọkn̄kpọ mfep. Edi iyomke nnyịn iduọk idotenyịn.

Bible ọdọhọ ete: “Ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.” (1 John 2:17) Jesus ọkọnọ uwem esie ndifak “owo ekededi eke ọbuọtde idem ye Enye” nsio ke idiọkn̄kpọ ye n̄kpa. (John 3:16) Do, nte nnyịn ikọride ke ifiọk uduak Abasi, ẹyak nnyịn ndien inam ikọ Jesus emi: “Ẹbuọt idem ye Abasi, ẹnyụn̄ ẹbuọt idem ye Ami.”—John 14:1.

[Ikọ idakisọn̄]

[Ndise ke page 6, 7]

Jesus ama eteme mme apostle esie ete: “Ẹsụk ẹdụn̄ ke ima Mi”

[Ndise ke page 7]

Ke mîbịghike, iyọbọhọ idiọkn̄kpọ ye utịp esie