Nte Ubuene Eyetre Tutu Amama?

“SE MMỌN̄EYET mmọ emi owo ẹfịkde: ndien baba owo kiet eke ọdọn̄de mmọ esịt idụhe; mme andifịk mmọ ẹnyụn̄ ẹkan mmọ ubọk; ndien baba owo kiet eke ọdọn̄de mmọ esịt idụhe,” ntem ke enyene-ọniọn̄ Edidem Solomon eke Israel eset eketịn̄. (Ecclesiastes 4:1) Nte eyịghe mîdụhe, ediwak mbon oro ẹkefịkde emi enye ekenyenede ke ekikere ẹkedi mme ubuene n̄ko.

Owo ikemeke ndida okụk kpọt mbiere owo emi edide ubuene. Nte ekemde ye ntọt Itie Unịm Okụk Ofụri Ererimbot eke June 2002, “ẹdọhọ ẹte ke 1998, biliọn owo 1.2 ke ofụri ererimbot ẹkeda okụk oro mîyọhọke $1 ẹdu uwem ke usen . . . ndien biliọn owo 2.8 ẹkeda se isụhọrede ikan $2 ẹdu uwem ke usen.” Ẹma ẹkụt nte ke okposụkedi ibat emi okosụhọrede akan se ẹkenyenede ke mbemiso, “ibat emi osụk ọdọdọk ke ẹkerede ẹban̄a ndutụhọ oro ubonowo okụtde ke ntak ubuene.”

Nte ubuene eyetre tutu amama? Jesus Christ ọkọdọhọ mme mbet esie ete: “Mbufo ẹmenyene mme ubuene ye mbufo kpukpru ini.” (John 12:8) Edi nte emi ọwọrọ ke ubuene ye ndiọi utịp esie ẹyeka iso ke nsinsi? Baba, koro okposụkedi Jesus mîkọdọhọke ke kpukpru mme anditiene imọ ẹyekabade ẹdi mbon inyene, nnyịn ikpenyeneke ndida ikọ esie mbiere nte ke idotenyịn idụhe inọ mme ubuene.

Kpa ye oro mme ukeme owo ye mme un̄wọn̄ọ mmọ ndinam ubuene etre ẹsikpude ediwak ini, Ikọ Abasi kpa Bible, ọsọn̄ọ etịn̄ ọnọ nnyịn ete ke mîbịghike mme ubuene ididụhe aba. Ke akpanikọ, Jesus ama ‘ọkwọrọ eti mbụk ọnọ nditọ-ubuene.’ (Luke 4:18) Eti mbụk emi abuana un̄wọn̄ọ edisio ubuene mfep. Emi edida itie ke ini Obio Ubọn̄ Abasi edidade ndinen idaha edi ke isọn̄.

Ererimbot edikpụhọde didie ntem ini oro! Jesus Christ, Edidem eke heaven “ayatua eyen unana ye ubuene mbọm, onyụn̄ anyan̄a ukpọn̄ mme ubuene.” Ke akpanikọ, “enye ayafak ukpọn̄ [mmọ] osio ke ukụt ye nnama.”—Psalm 72:13, 14.

Micah 4:4 etịn̄ aban̄a ini oro ete: “Kpukpru mmọ ẹyetie ke idak vine mmọ ye ke idak fig mmọ; ndien baba owo kiet eke edinamde mmọ ndịk ididụhe: koro edi inua Jehovah mme udịm ọdọhọ.” Obio Ubọn̄ Abasi ọyọkọk kpukpru mfịna oro ẹnọmọde ubonowo, idem osiode udọn̄ọ ye n̄kpa efep. Abasi “eyemen n̄kpa ke nsinsi; Ọbọn̄ Jehovah [oyonyụn̄] ọkwọhọde kpukpru iso mmọn̄eyet efep.”—Isaiah 25:8.

Afo emekeme ndiberi edem ke mme un̄wọn̄ọ emi koro edi Abasi ke idemesie ọkọnọ odudu spirit esie ẹda ẹwet mmọ. Ntak mûdụn̄ọkede mme uyarade oro ẹwụtde ke mme ntịn̄nnịm ikọ Bible ẹdi se ẹberide edem?

[Ebiet Ẹdade Ndise Ẹto ke page 32]

Foto FAO/M. Marzot