Ẹwụt “Kpukpru Owo Ifụre Ifụre Ido”
Ẹwụt “Kpukpru Owo Ifụre Ifụre Ido”
“Ti mmọ ete . . . ẹtie ifụre-ifụre, ẹnyụn̄ ẹwụt kpukpru owo sụn̄-sụn̄ [“ifụre ifụre,” “NW”] ido.”—TITUS 3:1, 2.
1. Ntak emi mîmemke utom ndiwụt ifụre ifụre ido kpukpru ini?
APOSTLE Paul ekewet ete: “Mbufo ẹkabade ẹkpebe mi, kpa nte ami n̄kekpebede Christ.” (1 Corinth 11:1) Kpukpru ikọt Abasi mfịn ẹnen̄ede ẹdomo ndinam item emi. Edi akpanikọ, imemke utom, koro nnyịn ima ida mme udọn̄ ibụk ye mme edu oro mîkemke ye uwụtn̄kpọ Christ imana ito akpa ete ye eka nnyịn. (Rome 3:23; 7:21-25) Nte ededi, ke edide edisịm ediwụt ifụre ifụre ido, kpukpru nnyịn imekeme ndikụt unen edieke isịnde ukeme. Edi ndiberi edem ke ikpîkpu ukeme idem nnyịn ikemke. Nso n̄kpọ efen ke oyom?
2. Didie ke nnyịn ikeme ndiwụt “kpukpru owo ifụre ifụre ido”?
2 Ifụre ifụre ido Abasi edi ubak mbun̄wụm edisana spirit. Adan̄a nte nnyịn iyakde anamutom odudu Abasi ada nnyịn usụn̄, ntre ke ẹdikụt mbun̄wụm esie. Adan̄aoro kpọt ke nnyịn idikeme ndiwụt “kpukpru owo ifụre ifụre ido.” (Titus 3:2, NW) Ẹyak nnyịn idụn̄ọde nte nnyịn ikemede ndikpebe uwụtn̄kpọ Jesus nnyụn̄ nyak mbon oro ẹdụkde ndụk ye nnyịn ‘ẹkụt nduọk-odudu.’—Matthew 11:29; Galatia 5:22, 23.
Ke Ubon
3. Nso idaha ke ubon owụt spirit ererimbot?
3 Ubon edi ikpehe kiet oro ẹnen̄erede ẹyom ifụre ifụre ido. Esop Kaban̄a Nsọn̄idem Ererimbot ọdọhọ ke afai ubon esịn nsọn̄idem iban ke itiendịk akan eke mbabuat n̄kpọntịbe ubomisọn̄ ye utoenyịn ke ẹtan̄de ẹdian ọtọkiet. Ke uwụtn̄kpọ, ke London, England, mbahade kiet ke itie inan̄ ke otu afai afai ubiatibet oro ẹtọtde edi ke ubon. Mme bodisi ẹsiwak ndikụt mme owo emi ẹdade “utọk, ye isụn̄i” ẹwụt iyatesịt mmọ. Ke akam ọdiọkde akan, ndusụk ebe ye n̄wan ẹmeyak “ndot-ndot ekikere” abiat itie ebuana mmọ. Kpukpru emi edi ediwụt idiọk “spirit ererimbot emi” ndien utọ edu oro idotke ke ubon Christian.—Ephesus 4:31; 1 Corinth 2:12.
4. Nso utịp ke ifụre ifụre ido ekeme ndinyene ke ubon?
4 Imoyom spirit Abasi man ibiọn̄ọ mme edu ererimbot. “Ọtọ nte Spirit Ọbọn̄ odude, ubọhọ-ufụn etiene odu do n̄ko.” (2 Corinth 3:17) Ima, mfọnido, mfara ke idem, ye anyanime ẹsọn̄ọ edidianakiet mme anana-mfọnmma ebe ye n̄wan. (Ephesus 5:33) Nsụhọde-esịt anam ubon etie inem inem onyụn̄ edi isio ye eneni ye utọk oro ẹsibiatde ediwak ubon. Se owo etịn̄de edi akpan n̄kpọ, edi usụn̄ nte enye etịn̄de owụt se inamde enye etịn̄ ikọ oro. Editịmede esịt ye mfịna oro ẹtịn̄de ke ifụre ifụre ido esisụhọde nsịn̄ede. Enyene-ọniọn̄ Edidem Solomon ekewet ete: “Sụn̄-sụn̄ ibọrọ akabade ifiopesịt efep: edi uyat ikọ edemede iyatesịt.”—Mme N̄ke 15:1.
5. Didie ke ifụre ifụre ido ekeme ndin̄wam ke ubon oro abaharede ke n̄kan̄ ido ukpono?
5 Ifụre ifụre ido edi ata akpan n̄kpọ ke ubon oro abaharede ke n̄kan̄ ido ukpono. Ifụre ifụre ido oro asan̄ade ye nti edinam ekeme ndida mbon oro mînịmke ke akpanikọ nsọk Jehovah. Peter eketeme ibanndọ Christian ete: “Kpasụk ntre mbufo iban, ẹsụk idem ẹnọ ebe eke mbufo, man edieke ndusụk mmọ mînịmke ikọ Abasi ke akpanikọ, ẹkpedụri mmọ ẹda, itoho ke ukwọrọ-ikọ, edi oto ke edu iban mmọ; ke adan̄aemi mmọ ẹkụtde nte mbufo iban ẹnyenede edisana ido ye ndịk. Ẹkûbana idem enyọn̄-enyọn̄ ke edidọk idet, ye edikọn̄ọ n̄kpọ mbana gold, ye edisịne ediye ọfọn̄idem; edi ẹda edisịne-n̄kpọ eke mîdibiarake, kpa sụn̄-sụn̄ spirit eke enyenede iso bụt, ẹbana idem ke esịt-esịt uwem mbufo; koro oro edi se isọn̄de urua ke enyịn Abasi.”—1 Peter 3:1-4.
6. Didie ke ndiwụt ifụre ifụre ido ekeme ndisọn̄ọ mbọbọ oro odude ke ufọt mme ete ye eka ye nditọ?
6 Nsịn̄ede ekeme ndidu ke ufọt ete ye eka ye nditọ, akpan akpan edieke owo mînyeneke ima inọ Jehovah. Edi oyom ẹwụt ifụre ifụre ido ke kpukpru ubon Christian. Paul ọkọnọ mme ete item ete: “Ẹkûfiomo nditọ mbufo; edi ẹkama mmọ ke ntụnọ ye item Ọbọn̄.” (Ephesus 6:4) Ke ini ubon ẹnen̄erede ẹwụt ifụre ifụre ido, ẹsisọn̄ọ n̄kpet n̄kpet mbọbọ oro odude ke ufọt mme ete ye eka ye nditọ. Dean, kiet ke otu nditọ ition, eti ntem aban̄a ete esie: “Papa ama enyene ifụre ifụre ido. Ntịghi nte akanam mfan̄ade mfan̄a ye enye—idem ke ini n̄kedide uyen. Enye ekesitie ifụre ifụre kpukpru ini, idem ke ini esịt akayatde enye. Ndusụk ini enye ama esikọbi mi esịn ke ubet mîdịghe iyakke mi nnam ndusụk n̄kpọ, edi akananam nnyịn ikafan̄ake mfan̄a. Enye ikedịghe ete kpọt inọ nnyịn. Enye ekedi ufan nnyịn n̄ko, ndien nnyịn ikoyomke ndikpu enye.” Ke akpanikọ, ifụre ifụre ido esisọn̄ọ mbọbọ oro odude ke ufọt mme ete ye eka ye nditọ.
Ke Utom Ukwọrọikọ Nnyịn
7, 8. Ntak edide akpan n̄kpọ ndiwụt ifụre ifụre ido ke an̄wautom?
7 An̄wautom edi ikpehe efen emi ẹnen̄erede ẹyom ifụre ifụre ido. Nte nnyịn ibuanade eti mbụk Obio Ubọn̄ ye mbon efen, nnyịn imesisobo ye mme owo emi ẹnyenede nsio nsio edu. Ndusụk ẹsidat esịt ndikpan̄ utọn̄ nnọ etop idotenyịn oro nnyịn idade isọk mmọ. Ke nsio nsio ntak, mbon eken ẹkeme nditre ndikpan̄ utọn̄. Ke utọ ini emi ke ifụre ifụre ido ekeme ndinen̄ede n̄n̄wam nnyịn ndinam utom nnyịn nte mme ntiense tutu esịm utịt ererimbot.—Utom 1:8; 2 Timothy 4:5.
8 Apostle Peter ekewet ete: “Ẹten̄e Christ ke esịt mbufo nte Ọbọn̄. Kpukpru ini ẹben̄e idem ndibọrọ kpukpru owo eke ẹdibụpde mbufo ntak idotenyịn emi mbufo ẹnyenede; edi ẹkpeme ndibọrọ ke sụn̄-sụn̄ [“ifụre ifụre,” NW] ido ye ke ido uten̄e.” (1 Peter 3:15) Sia nnyịn inen̄erede ida Christ nte Uwụtn̄kpọ nnyịn, nnyịn itịn̄ enyịn ndiwụt ifụre ifụre ido ye uten̄e ke ini inọde mbon oro ẹsitịn̄de ikọ uyat uyat ikọ ntiense. Edu emi esiwak ndida n̄wọrọnda utịp ndi.
9, 10. Bụk ifiọkutom ndiwụt ufọn ifụre ifụre ido ke an̄wautom.
9 Ke ini n̄wan esie ekeyerede ke ini ẹkekọn̄de usụn̄ ufọk mmọ, Keith ikosioroke uyo. Ke ama ọkọfiọk ke esenowo mmọ ekedi kiet ke otu Mme Ntiense Jehovah, n̄wan Keith ama ayat esịt odori Mme Ntiense ikọ ete ke mmọ ẹsinam n̄kpọ ibak ibak ye nditọ mmọ. Eyenete oro akada sụn̄-n̄. Enye ama ada ifụre ifụre ido ọbọrọ ete: “Mmeseme ndifiọk ke afo ekere ntre. Mbọk yak n̄wụt fi se Mme Ntiense Jehovah ẹnịmde ke akpanikọ.” Keith ke akakpan̄ utọn̄ ke nneme oro ndien ekem ama asan̄a edi enyịnusụn̄ edibịn eyenete oro ọnyọn̄.
10 Ke ukperedem, ebe ye n̄wan oro ẹma ẹditua n̄kpọfiọk ẹban̄a ndikanam n̄kpọ nsọn̄ido nsọn̄ido ye esenowo mmọ. Ifụre ifụre ido esie ama otụk mmọ esịt. Idem ama akpa mmọ ndikụt eyenete oro afiakde edi ke urua kiet ama ekebe, ndien Keith ye n̄wan esie ẹma ẹnyịme enye anam ntak N̄wed Abasi kaban̄a se enye enịmde ke akpanikọ an̄wan̄a. Nte ini akakade mmọ ẹkedọhọ ẹte: “Ke ufan̄ isua iba, nnyịn ima inen̄ede ikpan̄ utọn̄ ikop se Mme Ntiense en̄wen ẹketịn̄de.” Ebe ye n̄wan oro ẹma ẹnyịme ukpepn̄kpọ Bible ẹnyụn̄ ẹna baptism ke akpatre ke uyarade ediyak idemmọ nnọ Jehovah. Emi ọkọnọ akpa Ntiense oro akawahade ekese Keith ye n̄wan esie utịp didie ntem! Ediwak isua ke ukperedem Ntiense emi ama osobo ye ebe ye n̄wan emi onyụn̄ edifiọk ke mmọ idahaemi ẹkedi nditọete imọ eke spirit. Ifụre ifụre ido esikụt unen.
11. Ke nso usụn̄ ke ifụre ifụre ido ekeme ndidiọn̄ usụn̄ nnọ owo ndibọ akpanikọ Christian?
11 Mme n̄kpọ oro Harold okosobode nte owoekọn̄ ẹma ẹyat enye esịt ẹnyụn̄ ẹnam enye eyịk m̀mê Abasi odu. Unọmọ ubomisọn̄ emi awat ubomisọn̄ emi akakpade mmịn ekedide ntak ama obiomo Harold nsinsi ndo, anamde mfịna esie etetịm okpon. Ke ini Mme Ntiense Jehovah ẹkewahade ufọk esie, Harold ama ọdọhọ mmọ ete ẹkûsudi aba. Edi usen kiet, Ntiense emi ekerede Bill ama aka ndise owo emi enyenede udọn̄ emi odụn̄de ke ọyọhọ ubet ita ọtọn̄ọde ke eke Harold. Bill ama edue ọkọn̄ usụn̄ ufọk Harold. Ke ini Harold, emi adade eto iba asan̄a isan̄, ekebererede usụn̄, Bill ama ọsọsọp ekpe ubọk, ọdọhọde ete ke imọ ikoyom ndika ubet en̄wen. Harold akanam n̄kpọ didie? Ye unana Bill ndifiọk, Harold ama okụt ke ekebe ndise nte Mme Ntiense ẹdianade kiet ẹbọp Ufọkmbono Obio Ubọn̄ ke ata esisịt ini. Sia okotụkde enye ndikụt nte ata ediwak owo ẹkedianade kiet ntre ẹnam utom, enye ama okpụhọde edu esie kaban̄a Mme Ntiense. Sia eti n̄kpeubọk ye ifụre ifụre ido Bill ẹketụkde enye, Harold ama ebiere ndisiyak Mme Ntiense ẹdi ẹdise imọ. Enye ama ekpep Bible, anam n̄kọri, onyụn̄ akabade edi asan̄autom Jehovah emi anade baptism.
Ke Esop
12. Ewe mme edu ererimbot ke mme andibuana ke esop Christian ẹkpebiọn̄ọ?
12 Esop Christian edi ọyọhọ ikpehe ita emi ẹnen̄erede ẹyom ifụre ifụre ido. En̄wan edi ọsọ n̄kpọ ke n̄kaowo mfịn. Eneni, mfan̄a, ye utọk ẹdi edinam ofụri ini ẹnọ mbon oro ẹsede uwem ke enyịn obụkidem. Ndusụk ini, mme utọ edu oro ẹsinyọni ẹdụk esop Christian ẹnyụn̄ ẹda eneni ye utọk ẹdi. Isinemke nditọete oro ẹkamade ifetutom esịt ke ini anade mmọ ẹse ẹban̄a mme utọ idaha oro. Nte ededi, ima ẹnyenede ẹnọ Jehovah ye nditọete mmọ esinụk mmọ ndidomo ndinen̄ede nditọete mmọ oro ẹduede.—Galatia 5:25, 26.
13, 14. Nso ikeme ndidi utịp ‘edida ifụre ifụre ido nnam mmọ emi ẹbiọn̄ọde ẹnen̄ede ẹsan̄a’?
13 Ke akpa isua ikie, Paul ye nsan̄a esie Timothy ẹma ẹsobo mfịna otode ndusụk owo ke esịt esop. Paul ama odụri Timothy utọn̄ aban̄a nditọete oro ẹkebietde n̄kpọutom oro ẹnịmde “ẹnọ usụhọde-itie.” Paul ọkọkọk ibuot ntem: “Owo Ọbọn̄ inyeneke ndidi owo utọk; enye enyene ndinyene sụn̄-sụn̄ ido ye kpukpru owo; enye enyene ndifiọk nditeme owo, nnyụn̄ mme ime ke ini ẹnamde enye idiọk: enye onyụn̄ enyene ndida ata nsụkesịt [“ifụre ifụre ido,” NW] nnam mmọ emi ẹbiọn̄ọde ẹnen̄ede ẹsan̄a.” Ke ini nnyịn ikade iso ndinyene ifụre ifụre ido idem ke ini ẹyatde nnyịn esịt, emi esiwak ndinụk mbon mfan̄a ndifiak ndụn̄ọde mme ikọ ukụt ndudue mmọ. Nte utịp, nte Paul akade iso ndiwet, Jehovah ekeme ‘ndinam mmọ ẹkabade esịt ẹnyene ifiọk akpanikọ.’ (2 Timothy 2:20, 21, 24, 25) Tịm fiọk ete ke Paul ekemen sụn̄sụn̄ ido ye ime abuan ye ifụre ifụre ido.
14 Paul akanam se enye ọkọkwọrọde. Ke ini enye akanamde n̄kpọ ye “mme akakan apostle” ke esop Corinth, enye ọkọdọhọ nditọete ete: “Edi ami Paul ke idem mi nda ifụre-ifụre ido ye mmem-ido Christ nnọ mbufo uyo—ami emi ndide owo nsụk-idem ke iso mbufo, ke ini ndude ye mbufo, edi nsọn̄de inua ye mbufo, ke ini mmendụhe ye mbufo.” (2 Corinth 10:1; 11:5) Paul ama enen̄ede ekpebe Christ. Tịm fiọk ete ke enye akada “ifụre-ifụre ido” Christ ekpe ye nditọete emi. Ke ntem enye ama efep edu nsọn̄ido ye ufịk. Nte eyịghe mîdụhe, mbon oro ẹkenyenede eti esịt ke esop oro ẹma ẹma item esie. Enye ama ọkọk mme mfịna idiọk itie ebuana onyụn̄ anam emem ye edidianakiet ẹdu ke esop. Nte emi idịghe edinam oro kpukpru nnyịn ikpodomode ndikpebe? Mbiowo akpan akpan ẹkpenyene ndikpebe mme edinam Christ ye Paul.
15. Ntak emi ifụre ifụre ido edide akpan n̄kpọ ke ini ẹnọde item?
15 Ke akpanikọ inaha ẹn̄wam mbon en̄wen n̄kukụre ke ini oro n̄kpọ etịmerede emem ye edidianakiet esop. Nditọete ẹyom ima ima ndausụn̄ anyan ini mbemiso nsịn̄ede odude ke itie ebuana. Paul eketeme ete: “Nditọ-ete, edieke ẹkụtde owo ke ndudue ekededi, mbufo, emi ẹdide mbon spirit, ẹsan̄a ke spirit ifụre-ifụre ido, ẹda enye ẹfiak ẹsịn ke itie; nyụn̄ kpeme idem, mbak ẹdidomo fi n̄ko.” (Galatia 6:1) Imemke utom ndinyene “spirit ifụre-ifụre ido” kpukpru ini, akpan akpan koro kpukpru Christian, esịnede nditọete iren oro ẹmekde, ẹnyene ntụhọ unam idiọkn̄kpọ. Nte ededi, ifụre ifụre ido edinam anamidiọk enyịme ndinam ukpụhọde oro ẹyomde.
16, 17. Nso ikeme ndikpan mmen̄e ekededi ke ndida item nsịn ke edinam?
16 Ke akpasarade usem Greek, ikọ oro ẹkabarede ‘ẹda ẹfiak ẹsịn ke itie’ ekeme n̄ko nditịn̄ mban̄a edida nsịn ke nnennen idaha m̀mê edinen̄ede ọkpọ oro obụn̄ọde nnịm, kpa ubiak ubiak edinam. Abiausọbọ oro enen̄erede ọkpọ oro obụn̄ọde esitịn̄ eti ikọ nsịnudọn̄ aban̄a mme ufọn edinam oro. Sụn̄sụn̄ edu esie esinọ ndọn̄esịt. Ndibem iso ntịn̄ mme ikọ nsịnudọn̄ ifan̄ esisụhọde ndiọkn̄kan ubiak. Kpasụk ntre, edinen̄ede ke n̄kan̄ eke spirit ekeme ndibiak. Edi ifụre ifụre ido ayanam ẹkeme ndinen̄ede nnyịme enye, ke ntem anamde ẹfiak ẹnyene inem inem itie ebuana onyụn̄ ọdiọn̄ usụn̄ ọnọ anamidiọk ndikpụhọde usụn̄ uwem esie. Idem ke ini owo esịnde ndibọ item ke akpa ifet, ifụre ifụre ido ọnọ-item ekeme ndikpan mmen̄e ekededi ke ndida eti item N̄wed Abasi nsịn ke edinam.—Mme N̄ke 25:15.
17 Ke ini ẹn̄wamde ndida mbon en̄wen mfiak nsịn ke itie, ẹsiwak ndida item oro nte edikụt ndudue nnọ owo. Ewetn̄wed kiet ọdọhọ ntem: “Nnyịn imekeme ndinen̄ede mbat idem nnyịn ke edinen ke ini inọde mbon en̄wen item, ndien ke ntre imenen̄ede iyom sụn̄sụn̄ ido.” Ndikọri ifụre ifụre ido emi otode nsụhọdeidem ayan̄wam Christian emi ọnọde item ndifep n̄kpọndịk emi.
“Ẹwụt Kpukpru Owo”
18, 19. (a) Ntak emi ekemede ndisọn̄ Christian ndiwụt ifụre ifụre ido ke ini anamde n̄kpọ ye ukara? (b) Nso idin̄wam Christian ndiwụt ifụre ifụre ido ye ikpọ owo ukara, ndien nso ikeme ndidi utịp?
18 Ikpehe kiet oro esisọn̄de ediwak owo ndiwụt ifụre ifụre ido edi ke ini ẹnamde n̄kpọ ye ukara. Edi akpanikọ, usụn̄ oro ndusụk mbon ukara ẹsinamde n̄kpọ owụt nsọn̄ido ye unana mbọm. (Ecclesiastes 4:1; 8:9) Nte ededi, ima oro imade Jehovah ayan̄wam nnyịn ndifiọk akakan odudu ukara esie nnyụn̄ nnọ ukara ukeuke nsụkibuot oro enyenede mmọ. (Rome 13:1, 4; 1 Timothy 2:1, 2) Idem ke ini mbon oro ẹkamade ikpọ itie ẹyomde ndibiọn̄ọ an̄wan̄wa utuakibuot nnyịn nnọ Jehovah, nnyịn imesidat esịt ndiyom mme usụn̄ oro ẹsụk ẹdude ndiwa uwa ekọm nnyịn.—Mme N̄ke 13:15.
19 Nnyịn ikpedehede itie utọk utọk ke idaha ekededi. Nnyịn idomo ndiwụt eti ibuot ke adan̄aemi itrede ndibiat ndinen edumbet. Ke usụn̄ emi, nditọete nnyịn ẹkụt unen ke ndika iso nnam utom ukwọrọikọ mmọ ke idụt 234 ke ofụri ererimbot. Nnyịn inam item Paul emi ọdọhọde “ẹsụk idem ẹnọ mme andikara ye mme enyene-idaha, ẹnyụn̄ ẹsụk ibuot, ẹnyụn̄ ẹben̄e idem ndinam kpukpru nti utom; ẹkûsụn̄i baba owo kiet, ẹkûnyụn̄ ẹdi mbon utọk; edi ẹtie ifụre-ifụre, ẹnyụn̄ ẹwụt kpukpru owo sụn̄-sụn̄ [“ifụre ifụre,” NW] ido.”—Titus 3:1, 2.
20. Mme utịp ewe ẹna ẹbet mbon oro ẹwụtde ifụre ifụre ido?
20 Akpakịp edidiọn̄ ke ẹna ẹbet mbon oro ẹwụtde ifụre ifụre ido. Jesus ọkọdọhọ ete: “Ọfọfọn ọnọ mmọ eke ẹnyenede ifụre-ifụre ido: koro mmọ ẹyeda isọn̄ ẹnyene.” (Matthew 5:5) Kaban̄a nditọete Christ oro ẹyetde aran, ndika iso nnyene ifụre ifụre ido anam mmọ ẹnyene inemesịt ye ifet edikara ikpehe isọn̄ eke Obio Ubọn̄. Amaedi “akwa otu owo” eke “mme erọn̄ en̄wen,” mmọ ẹka iso ndiwụt ifụre ifụre ido ẹnyụn̄ ẹdori enyịn ndidu uwem ke Paradise mi ke isọn̄. (Ediyarade 7:9; John 10:16; Psalm 37:11) Nso mme utịbe utịbe idotenyịn ẹdu ntem ke iso! Do, ẹyak nnyịn ikûdede ifụmi item oro Paul ọkọnọde mme Christian ke Ephesus ete: “Mmọdo ami, emi ndide owo-n̄kpọkọbi ke Ọbọn̄, mmekpe mbufo ubọk, nte, ẹsan̄a nte odotde ikot emi ẹkekotde mbufo, ke kpukpru nsụk-idem ye ifụre-ifụre ido.”—Sịghisịghi ubọkn̄wed edi eke nnyịn; Ephesus 4:1, 2.
Ke Ndidụn̄ọde
• Mme edidiọn̄ ewe ẹto ediwụt ifụre ifụre ido
• ke ubon?
• ke an̄wautom?
• ke esop?
• Mme utịp ewe ke ẹn̄wọn̄ọ ẹnọ mbon oro ẹnyenede ifụre ifụre ido?
[Mme Mbụme Ukpepn̄kpọ]
[Ndise ke page 21]
Ifụre ifụre ido edi ata akpan n̄kpọ ke ubon oro abaharede ke n̄kan̄ ido ukpono
[Ndise ke page 21]
Ifụre ifụre ido ọsọn̄ọ mbọbọ ubon
[Ndise ke page 23]
Ẹbọrọ ke ifụre ifụre ido ye ke ido uten̄e
[Ndise ke page 24]
Ifụre ifụre ido ọnọitem ekeme ndin̄wam anamidiọk