Udia Mbubịteyo Ọbọn̄ Enen̄ede Enyene Se Ọwọrọde ọnọ Fi

NTE Udia Mbubịteyo Ọbọn̄ enyene akamba ye nsinsi ufọn ọnọ fi? Man ifiọk, ẹyak ikam ibem iso ise nte Jesus Christ ke idemesie akadade akpan edinam emi.

Ke mbubịteyo Nisan 14, 33 E.N., Jesus ama osobo ye mme apostle esie 12 ke ubet enyọn̄ ke Jerusalem ndinịm usọrọ Passover eke isua ke isua. Ke mmọ ẹma ẹkedia Passover, Judas, asan̄a-mbia oro, ama ọwọrọ ọkpọn̄ ubet oro man ada Jesus ọnọ. (John 13:21, 26-30) Jesus ama ọtọn̄ọ “Udia [Mbubịteyo] Ọbọn̄” ye mbet 11 oro ẹkesụhọde. (1 Corinth 11:20) Ẹkot enye n̄ko Editi, sia Jesus okowụkde mme anditiene enye ete: “Ẹnam emi nditi Mi.” Emi edi n̄kukụre edinam oro ẹwụkde mme Christian ẹte ẹti.—1 Corinth 11:24.

Ke ediwak itie, mme owo ẹsiwụk itiat editi m̀mê ẹsio akpan usen ẹnịm ndida nti owo m̀mê akpan edinam. Kpasụk ntre, Jesus ama ọtọn̄ọ udia editi oro edin̄wamde mme mbet esie nditi mme n̄wọrọnda edinam akpan usen oro. Ke mme emana oro ẹdidide, udia emi eyeti mme andinịm usọrọ emi se edinam Jesus ke okoneyo oro ekenen̄erede ọwọrọ, akpan akpan mme n̄kpọ idiọn̄ọ oro enye akadade ke edinam emi. Mme n̄kpọ idiọn̄ọ ewe ke Jesus akada, ndien nso ke mmọ ẹwọrọ? Ẹyak nnyịn idụn̄ọde mbụk Bible ise se iketịbede ke okoneyo oro ke isua 33 E.N.

Ndisana Ndamban̄a N̄kpọ

“Enye onyụn̄ emen uyo, ndien ke ama ọkọnọ ekọm, obụn̄, ọnọ mmọ, ete, Emi [“ada aban̄a,” NW] ikpọkidem Mi eke ẹnọde kaban̄a mbufo: ẹnam emi nditi Mi.”—Luke 22:19.

Ke ini Jesus ekemende uyo onyụn̄ ọdọhọ ete, “emi ada aban̄a ikpọkidem Mi,” enye okowụt ete ke uyo eke leaven mîdụhe do akada aban̄a, m̀mê ekedi idiọn̄ọ, mfọnmma ikpọkidem esie, emi enye ọkọnọde “man ererimbot odu uwem.” (John 6:51) Okposụkedi ndusụk edikabade Bible ẹdọhọde “emi edi [Greek, es·tinʹ] ikpọkidem Mi,” Greek-English Lexicon of the New Testament eke Thayer ọdọhọ ke ikọedinam emi esiwak ndiwọrọ, “ndida nnọ, ndida mban̄a, ndiwọrọ.” Enye ọnọ ekikere edida nnọ, m̀mê edida mban̄a n̄kpọ.—Matthew 26:26.

Ntre ke ekedi ye wine oro ekesịnede ke  cup. Jesus ọkọdọhọ ete: “Cup emi [“ada aban̄a,” NW] Obufa Ediomi ke iyịp Mi, emi ẹduọkde kaban̄a mbufo.”—Luke 22:20.

Nte Matthew ewetde, Jesus eketịn̄ aban̄a cup oro ete: “Emi [“ada aban̄a,” NW] iyịp Mi, eke ediomi, emi ẹduọkde ẹban̄a ediwak owo, man ẹfen mme idiọk-n̄kpọ mmọ.” (Matthew 26:28) Jesus akada wine oro ekesịnede ke cup nte idiọn̄ọ, m̀mê ndamban̄a, iyịp esie. Iyịp esie oro ẹkeduọkde ke ẹkenyene ndida nsọn̄ọ “obufa ediomi” nnọ mme mbet oro ẹyetde aran ke spirit oro ẹdikarade ye enye nte ndidem ye mme oku ke heaven.—Jeremiah 31:31-33; John 14:2, 3; 2 Corinth 5:5; Ediyarade 1:5, 6; 5:9, 10; 20:4, 6.

N̄ko wine oro ke cup eti owo nte ke iyịp Jesus oro ẹkeduọkde ke ẹda “ẹfen mme idiọk-n̄kpọ,” ntem ebererede usụn̄ uwem eke heaven ọnọ mme andin̄wọn̄ wine emi nditiene Christ n̄kara. Nte an̄wan̄ade, sụk ekpri ibat owo oro ẹnyenede ikot eke heaven ẹsita uyo ẹnyụn̄ ẹn̄wọn̄ wine Editi emi.—Luke 12:32; Ephesus 1:13, 14; Mme Hebrew 9:22; 1 Peter 1:3, 4.

Nso ndien kaban̄a kpukpru mme anditiene Jesus oro mîsịneke ke obufa ediomi? Mmọ emi ẹdi “mme erọn̄ en̄wen” Ọbọn̄, emi mînyeneke idotenyịn ndikara ye Christ ke heaven edi ẹnyenede idotenyịn ndidu nsinsi uwem ke paradise isọn̄. (John 10:16; Luke 23:43; Ediyarade 21:3, 4) Nte “akwa otu owo” eke mme anam-akpanikọ Christian emi ‘ẹnamde n̄kpọ ẹnọ Abasi uwemeyo ye okoneyo,’ mmọ ẹkop idatesịt nditiene mbuana ke Udia Mbubịteyo Ọbọn̄ nte mme andida nse oro ẹwụtde esịtekọm. Ke nditịm ntịn̄, edinam ye ikọ mmọ ẹwụt ke mmọ ẹdọhọ ẹte: “Yak edinyan̄a enyene Abasi nnyịn emi etiede ke ebekpo, onyụn̄ enyene Eyen-erọn̄.”—Ediyarade 7:9, 10, 14, 15.

Ikafan̄?

“Ẹnam emi nditi Mi.”—Luke 22:19.

Ikafan̄ ke ẹkpenịm Editi n̄kpa Christ? Jesus iketịn̄ke. Nte ededi, sia enye ọkọtọn̄ọde Udia Mbubịteyo Ọbọn̄ ke Nisan 14, ke mbubịteyo emi nditọ Israel ẹkesinịmde Passover eke isua ke isua, ana in̄wan̄-in̄wan̄ nte ke Jesus okoyom ẹsinịm Editi ke ukem usụn̄ oro. Ke adan̄aemi nditọ Israel ẹkesinịmde usọrọ edinyan̄a mmọ nsion̄o ke ufụn Egypt ke isua ke isua, mme Christian ẹsinịm usọrọ nditi edinyan̄a mmọ nsion̄o ke ufụn idiọkn̄kpọ ye n̄kpa, ke isua ke isua.—Exodus 12:11, 17; Rome 5:20, 21.

Ndisio ini kiet ke isua nnịm ndida nti akpan edinam idịghe obufa n̄kpọ. Ke uwụtn̄kpọ, kere ban̄a ini emi ebe ye n̄wan ẹsitide usen ndọ mmọ m̀mê ini emi idụt ẹsitide akpan edinam ke mbụk idụt mmọ. Editi emi esida itie ini kiet ke isua ke ukem usenọfiọn̄ emi edinam oro akadade itie. Nte enemde, ke ediwak isua ikie ke Christ ama akakpa, ẹkekot ediwak mbon oro ẹkedọhọde ke idi mme Christian, Mbon Quartodeciman, emi ọwọrọde “Mbon Ọyọhọ Usen Duopenan̄,” sia mmọ ẹkesinịmde Editi n̄kpa Jesus ini kiet ke isua, ke Nisan 14.

Emem edi Enen̄ede Enyene Se Ọwọrọde

Apostle Paul ama anam an̄wan̄a nte ke ndinịm usọrọ Udia Mbubịteyo Ọbọn̄ ayan̄wam  mme mbet Jesus ‘ndika iso n̄kwọrọ n̄kpa Ọbọn̄ tutu Enye edi.’ (1 Corinth 11:26) Ntem, usọrọ editi emi esiwụk ntịn̄enyịn ke akpan udeme oro n̄kpa Jesus enyenede ke ndisu uduak Abasi.

Ke ndinam akpanikọ tutu esịm n̄kpa, Jesus Christ ama owụt Jehovah Abasi nte enyene-ọniọn̄ ye ima ima Andibot ye edinen Andikara. Ke owụtde ikọ Satan nte nsu, Jesus emi mîkebietke Adam, ama owụt ke owo ekeme ndisọn̄ọ nda nnam akpanikọ nnọ Abasi, idem ke idak n̄kpọsọn̄ mfịghe.—Job 2:4, 5.

Udia Mbubịteyo Ọbọn̄ n̄ko anam iti ima n̄waidem Jesus ye esịtekọm. Kpa ye n̄kpọsọn̄ idomo, Jesus ama ọsọn̄ọ ada anam item Ete esie ke mfọnmma usụn̄. Ntem, enye ama ekeme ndinọ mfọnmma uwem esie ndida nsio akwa isọn idiọkn̄kpọ Adam. Nte Jesus ke idemesie akanamde an̄wan̄a, enye ekedi man “ọnọ uwem Esie ndifak ediwak owo.” (Matthew 20:28) Nte utịp, kpukpru mbon oro ẹbuọtde idem ye Jesus ẹkeme ndinyene edifen mme idiọkn̄kpọ nnyụn̄ nnyene nsinsi uwem nte ekemde ye se Jehovah akaduakde ọnọ ubonowo ke akpa.—Rome 5:6, 8, 12, 18, 19; 6:23; 1 Timothy 2:5, 6. *

Kpukpru emi n̄ko ẹwụt akpakịp nti ido ye mfọnido Jehovah oro owo mîdotke ke ndinam ndutịm kaban̄a edinyan̄a ubonowo. Bible ọdọhọ ete: “Abasi akada emi ayarade ima emi Enye amade nnyịn, ke emi Enye okosiode edibon Eyen Esie kierakiet ọdọn̄ ke ererimbot, kpan̄ nnyịn ikpodu uwem oto ke Enye. Ima odu ke orụk usụn̄ emi, itoho ke emi nnyịn ikamade Abasi, edi oto ke emi Abasi akamade nnyịn, onyụn̄ osiode Eyen Esie ọdọn̄, ete, edidi usio-isop mme idiọk-n̄kpọ nnyịn.”—1 John 4:9, 10.

Ih, nso utịbe utịbe usọrọ ke Editi edi ntem! Emem onyụn̄ edi se ẹkemede ndinịm ke ofụri ererimbot ke nsio nsio idaha, edi se enye adade aban̄a enen̄ede enyene se ọwọrọde tutu ẹkeme nditi idem ke anyan ini.

Se Enye Ọwọrọde ọnọ Fi

N̄kpa uwa Ọbọn̄ nnyịn Jesus Christ ama enen̄ede atak Enye ye Ete esie, Jehovah, n̄kpọ. Nte mfọnmma owo, Jesus ikadaha  n̄kpa imana nte nnyịn. (Rome 5:12; Mme Hebrew 7:26) Enye ekpekekeme ndika iso ndu uwem ke nsinsi. Owo ikpekekemeke ndida uwem esie, ọkpọkọm ke odudu, ye unana unyịme esie. Enye ọkọdọhọ ete: “Owo baba kiet ibọhọ Mi uwem, edi Ami ke Idem Mi nyak uwem Mi nduọk.”—John 10:18.

Edi, Jesus ama enyịme ndinọ mfọnmma uwem esie nte uwa man otodo “Enye akpasan̄a ke n̄kpa osobo enye emi akamade odudu n̄kpa, oro edi Satan, onyụn̄ emen ubọhọ ọnọ mmọ emi ẹma ẹdu ke itie ufụn ke ofụri uwem mmọ ọnọ ndịk n̄kpa.” (Mme Hebrew 2:14, 15) Ẹkụt n̄ko ima n̄waidem Christ ke utọ n̄kpa oro enye akakpade. Enye ama enen̄ede ọfiọk nte imọ idibọde ufen inyụn̄ ikpa.—Matthew 17:22; 20:17-19.

Editi n̄ko anam nnyịn iti n̄kponn̄kan ima oro akanam Ete nnyịn eke heaven, Jehovah, owụtde. Sia enye edide Abasi emi “enyenede esịt mbọm, onyụn̄ atuade owo mbọm,” enye okofụhọ didie ntem ndikop nnyụn̄ n̄kụt “ọkpọsọn̄ eseme ye mmọn̄-eyet” Jesus ke in̄wan̄ Gethsemane, ibak ibak umia ye usụn̄ oro ẹkekọn̄de enye ke eto, ye sụn̄sụn̄ n̄kpa ndutụhọ esie. (James 5:11; Mme Hebrew 5:7; John 3:16; 1 John 4:7, 8) Kamse, ndikam ntie n̄kere oro idahaemi ke ananam ediwak owo mbọm okposụkedi ediwak isua ikie ẹma ẹkebe.

Kere ban̄a utọ akamba ekọmurua oro Jehovah Abasi ye Jesus Christ ẹkekpede ke ibuot nnyịn mme anamidiọk! (Rome 3:23) Kpukpru usen, esibiak nnyịn ndisobo mme idaha oro ẹyararede idaha idiọkn̄kpọ ye unana mfọnmma nnyịn. Nte ededi, ọkọn̄ọde ke mbuọtidem nnyịn ke uwa ufak Jesus, nnyịn imekeme ndiben̄e Abasi efen ọnọ nnyịn. (1 John 2:1, 2) Emi anam nnyịn ikeme ndinyene edisana ubieresịt ye ifụre editịn̄ ikọ ye Abasi. (Mme Hebrew 4:14-16; 9:13, 14) Akan oro, nnyịn imekeme ndinyene idotenyịn edidụn̄ ke paradise isọn̄ ke nsinsi nsinsi. ( John 17:3; Ediyarade 21:3, 4) Mmọ emi ye ata ediwak edidiọn̄ eken ẹto akakan edu n̄waidem Jesus.

Ndiwụt Esịtekọm Mban̄a Udia Mbubịteyo Ọbọn̄

Nte eyịghe mîdụhe, Udia Mbubịteyo Ọbọn̄ edi utịbe utịbe uyarade “akwa mfọn Abasi.” Ndien Jehovah ndinam ndutịm kaban̄a uwa ufak—oro adade itie ke ntak ima n̄waidem Jesus—enen̄ede edi ‘enọ emi ayan̄ade edeme.’ (2 Corinth 9:14, 15) Ndi mfọnido oro Abasi owụtde mi ebe ke Jesus Christ inamke fi enyene ntotụn̄ọ esịtekọm oro ebịghide?

Nnyịn imodori enyịn ite ke anam. Ntem, nnyịn imọnọ fi ufiop ufiop ikot ndisop idem ye Mme Ntiense Jehovah man enịm Editi n̄kpa Jesus. Isua emi, ẹdinịm Editi ke Wednesday, April 16, ke utịn ama okosop. Mme Ntiense Jehovah ke n̄kann̄kụk mbufo ẹyekop inemesịt ndinam fi ọfiọk nnennen ini ye ebiet oro ẹdisopde idem kaban̄a akpan edinam emi.

[Ikọ idakisọn̄]

[Ekebe/Mme ndise ke page 6]

“EMI EDI IKPỌKIDEM MI” M̀MÊ “EMI ADA ABAN̄A IKPỌKIDEM MI” EWE?

Ke ini Jesus ọkọdọhọde ete: ‘Ami ndi inua-otop’ ye, ‘Ami ndi ata vine,’ owo ndomokiet ikekereke ke enye ekedi ata inuaotop m̀mê ata vine. (John 10:7; 15:1) Kpasụk ntre, ke ini Edisana Ŋwed Abasi Ibom ọdọhọde ke Jesus ọkọdọhọ: ‘Cup emi edi Obufa Ediomi,’ nnyịn ikpenyeneke ndida nte ke cup oro ke idemesie ekedi obufa ediomi oro. Ntre n̄ko, ke ini enye ọkọdọhọde ke uyo oro “edi” ikpọkidem imọ, eyịghe idụhe nte ke uyo oro ọkọwọrọ, m̀mê akada aban̄a, ikpọkidem esie. Ntem, edikabade Charles B. Williams ọdọhọ ete: “Emi ada aban̄a ikpọkidem mi.”—Luke 22:19, 20.

[Ndise ke page 5]

Uyo eke leaven mîdụhe ye wine ẹdi idiọn̄ọ oro ẹtịmde ẹdot ndida mban̄a mfọnmma ikpọkidem ye iyịp Jesus oro ẹkeduọkde

[Ndise ke page 7]

Editi an̄wam nnyịn nditi akwa ima oro Jehovah Abasi ye Jesus Christ ẹkewụtde