Ke Ini Ukwọrọikọ Enen̄erede Edi Se Ẹtide

“Eyo ke ada ikan̄-ikan̄. Afan̄ obot etie nte inyeneke utịt. Ke ima ikebe ata ediwak n̄kpọ ubiọn̄ọ, nnyịn ke akpatre imedisịm utịt isan̄ nnyịn: ata nsannsan obio-in̄wan̄. Mmemidem akabade idatesịt ke ini ikọn̄de akpa usụn̄ufọk, ẹnyụn̄ ẹdarade nnyịn. Etisịm utịt usen oro, nnyịn ima inịm kpukpru n̄wed oro ikadade idi inyụn̄ itọn̄ọ ediwak ukpepn̄kpọ Bible. Mme owo oro ẹnyene ọkpọsọn̄ udọn̄ ndikpep n̄kpọ. Idahaemi nnyịn inyene ndinyọn̄, edi nnyịn imaduak ndifiak ndi.”

MME utọ ifiọkutom emi ẹdi ọsọ n̄kpọ ke otu mme asan̄autom asiakusụn̄ ke Mexico. Mme owo emi ẹbiere ndibuana ifịk ifịk ke ndinam utom oro Jesus Christ ọkọdọn̄de mme mbet esie: “Mbufo ẹyenyụn̄ ẹdi mme ntiense Mi . . . tutu esịm utịt ererimbot.” (Utom 1:8) Ke Mexico, ẹnam ndutịm ẹnọ san̄asan̄a ubịnikọt ukwọrọikọ—oro ẹkotde efakutom mme asiakusụn̄—man ẹsịm mme efakutom oro owo mîbahakede inọ esop owo mînyụn̄ ikwọrọke eti mbụk Obio Ubọn̄ Abasi kpukpru ini. Ke ofụri ofụri, mmọ emi ẹsidi mme efakutom oro ẹdude nsannsan m̀mê ẹsọn̄de ndisịm. Ẹsinọ mme esop oro ẹdude nsannsan ẹnyụn̄ ẹnyenede akamba efakutom un̄wam n̄ko.

Man ẹbiere m̀mê mme ikpehe ewe ke idụt oro ke ẹkpeda ndutịm efakutom mme asiakusụn̄ ẹn̄wam, ọfis n̄kọk itieutom Mme Ntiense Jehovah esidụn̄ọde mme udọn̄ efakutom. * Ke ndondo oro ẹnamde emi, ẹsinọ otu mme akpan asiakusụn̄ ẹka ẹkenam utom ke efakutom emi. Ẹsinọ mmọ mme n̄kpọisan̄ oro ẹkemede ndiwat ke n̄kpotụk n̄kpotụk usụn̄ oro owo mîduọkke itai mi. Ẹsibon n̄wed ẹnyụn̄ ẹde idap ke mme n̄kpọisan̄ oro n̄ko ke ini ẹyomde emi.

Ndisọsọp Nnam N̄kpọ Mban̄a

Ọtọn̄ọde ke October 1996, ẹmenọ mme ọkwọrọ eti mbụk efen efen ikot ẹte ẹditiene mme akpan asiakusụn̄ oro ẹbuana ke utom emi. Mme asuanetop Obio Ubọn̄ ọkọrọ ye mme asiakusụn̄ ofụri ini oro ẹnyịmede ndinam utom ke ebiet oro udọn̄ okponde, ẹbuana ke ubịnikọt emi ke nsio nsio ikpehe esie. Ẹnọ ndusụk mmọ ẹka mme esop ẹdude ke mme efakutom emi man mmọ ẹkese ẹban̄a efakutom emi ẹnyụn̄ ẹfori udọn̄ ẹkụtde. Ediwak mme asuanetop ẹdide n̄kparawa ye mme asiakusụn̄ ẹnyịme ikot emi ẹnyụn̄ ẹnyene mme akama-nsịnudọn̄ ifiọkutom.

Ke uwụtn̄kpọ, Abimael, akparawa Christian oro akanamde utom emi ẹkpede ediwak okụk ke usiakifia unam urụk ukopikọ oro ẹkamade-kama ẹsan̄a, ama ebiere ndibuana ke utom ukwọrọikọ ke mme ikpehe ẹdude nsannsan mi. Ke ini mme eteutom esie ẹkekopde ke enye ọmọn̄ ọkpọn̄ utom, mmọ ẹma ẹdọhọ ke mmimọ imọn̄ imenede enye itie inyụn̄ isịn okụkutom inọ enye. Mme nsan̄autom esie ẹma ẹnyịk enye, ẹsọn̄ọde ẹdọhọ ke emi edi akwa ifet ye ke okpowụt unana ifiọk ndisịn utọ akwa ifet emi. Nte ededi, Abimael ama ebiere nditiene mbuana ke san̄asan̄a ubịnikọt ukwọrọikọ emi ke ọfiọn̄ ita. Ke ama okokop inem utom emi, Abimael ebiere ndika iso ndu ke esop odude nsannsan mi, kpa ebiet ẹnen̄erede ẹyom mme asuanetop Obio Ubọn̄. Idahaemi enye enyene ukeuke utom onyụn̄ ekpep ndidu mmemmem uwem.

Ke idaha efen, Julissa ekenyene ndinam isan̄ hour 22 ke bọs man ekesịm efakutom esie. Ke akpatre ikpehe isan̄ esie, enye ikesịmke akpatre  bọs usen oro. Nte ededi, ubomisọn̄ mbiomo oro ekemende mbonutom ama odu. Julissa ama ọsọn̄ esịt ọdọhọ mmọ ẹmen imọ. Nte an̄wan̄ade, enye ama okop ndịk, sia enye ekedide n̄kukụre an̄wan ke otu ata ediwak irenowo. Ke ini enye ọkọtọn̄ọde ndikwọrọ ikọ nnọ akparawa kiet, enye ama edifiọk ke akparawa oro edi kiet ke otu Mme Ntiense Jehovah! Julissa eti ete: “Ke ẹsiode oro ẹfep, mma ndifiọk ke awat ubomisọn̄ oro edi ebiowo ke esop oro ẹkenọde mi n̄ka.”

Mbonusọn̄ Ẹtiene Ẹbuana

Nte ededi, utom emi idịghe utom n̄kparawa kpọt. Kpukpru ini Adela, akanian̄wan eyenete kiet ama esiyom ndisịn ini efen efen ke utom ukwọrọikọ. Ifet ama ediberede ke ini ẹkenọde enye ikot nditiene mbuana ke san̄asan̄a utom ukwọrọikọ emi. Enye obụk ete: “Mma nnen̄ede n̄kop inem efakutom mi tutu mben̄e mbiowo esop oro nte ẹyak mi n̄ka iso ndu do. Mmokop inemesịt koro okposụkedi nsọn̄de, mmekeme ndisụk nnyene ufọn nnọ Jehovah.”

Kpasụk ntre, esịtekọm oro owụtde ọnọ Jehovah ye ima oro enye amade ekemmọ owo ẹnụk Martha emi edide isua 60 ndinọ idemesie unyịme unyịme nditiene mbuana ke ubịnikọt emi. Ke okụtde ke anyan usụn̄ ye idiọk usụn̄ iyakke otu esie esịm kpukpru owo, enye ama edep ubomisọn̄ ọnọ mme asiakusụn̄ ndida nnam utom. Eyenete an̄wan emi ndikedep ubomisọn̄ emi ama anam ẹkeme ndikụre efakutom efen efen ẹnyụn̄ ẹkeme ndibuana akpanikọ Bible ye mme owo efen efen.

Mme Inem Inem Utịp

Utịtmbuba mme anditiene mbuana ke san̄asan̄a ubịnikọt emi edi ‘ndinam mme mbet.’ Ke afan̄ emi, ẹmenyene mme n̄wọrọnda utịp. Mme owo oro ẹdude nsannsan ẹmebọ akpanikọ Bible emi anyan̄ade uwem. (Matthew 28:19, 20) Ẹmetọn̄ọ ediwak ukpepn̄kpọ Bible. Mme asuanetop ẹdude ke n̄kann̄kụk oro m̀mê mme ọkwọrọikọ oro ẹdụn̄de ke mme efakutom oro ẹsise ẹban̄a emi. Ke ndusụk idaha, ẹma ẹtọn̄ọ otu mme asuanetop, ndien ke mme idaha en̄wen, ẹma ẹkam ẹtọn̄ọ n̄kpri esop.

Magdaleno ye mme nsan̄a esie ẹkesan̄a ke n̄kpọisan̄ ofụri owo ẹka efakutom oro ẹkenọde mmọ, emi odude nsannsan. Nte mmọ ẹkade, mmọ ẹma ẹda ifet oro ekebererede ẹkwọrọ ikọ ẹnọ awat ubomisọn̄. “Eren emi ama asian nnyịn ete ke urua oro ekebemde iso, ndusụk Mme Ntiense ẹma ẹwaha ufọk imọ ke adan̄aemi imọ mîkodụhe. Ke ini imọ inyọn̄de idi, ubon imọ ẹma ẹmen se mmọ ẹkekopde ẹbụk  ẹnọ imọ. Nnyịn ima idọhọ enye ke nnyịn itoho mbọhọ oro edi ke ito nsio nsio obio ke idụt oro idi man iditiene ibuana ke san̄asan̄a ubịnikọt ukwọrọikọ oro ndien ke kpukpru nnyịn ikekpe usụn̄ idem nnyịn. Ke emi otụkde enye, awat ubomisọn̄ emi ama ọdọhọ ke imọ ye ubon imọ imọn̄ itọn̄ọ ndikpep Bible kpa urua oro. Enye ama akam etịp esịn ke utom emi ebe ke ndiketre ndibọ nnyịn okụk ukpeusụn̄.”

Magdaleno ama enen̄ede okop inemesịt n̄ko aban̄a nte mme amanaisọn̄ ikpọ obot Chiapas ẹkenamde n̄kpọ. “Ami ye n̄wan mi ima ibuana etop Obio Ubọn̄ ye otu oro ẹkesịnede n̄kparawa 26 oro ẹkedụkde Ufọkabasi Presbyterian. Kpukpru mmọ ẹma ẹtịm ẹnọ n̄kpan̄utọn̄ ke minit 30. Mmọ ẹma ẹsion̄o Bible mmọ ẹdi, ndien nnyịn ima ikeme ndinọ mmọ ọyọhọ ikọ ntiense mban̄a mme uduak Jehovah. Ata ediwak mmọ ẹnyene Bible usem Tzeltal.” Ẹma ẹtọn̄ọ ediwak ukpepn̄kpọ Bible emi ẹnyenede uforo.

Ubiọn̄ọ Osụhọde Ubọk

Ke se ibede isua iba, owo ikadaha etop Bible ika obio kiet ke Chiapas ke ntak ubiọn̄ọ ndusụk owo. Teresa, ọkwọrọikọ uyọhọ ini, ama okụt ke ndusụk Ntiense ẹma ẹkop ndịk ndikwọrọ ikọ ke obio-in̄wan̄ oro. “Ke n̄kpaidem kpukpru owo, mbon obio oro ẹma ẹnyịme ndinọ n̄kpan̄utọn̄. Ke ini ikụrede ukwọrọikọ, ọkpọsọn̄ edịm ama edep. Sia ikoyomde itie udakibuot, nnyịn ima iwaha ufọk ọfọn-ido owo kiet emi ekekerede Sebastián, emi akayakde nnyịn idụk esịtufọk man ibọhọ edịm. Ke ndondo oro idụkde esịtufọk, mma mbụp enye m̀mê ẹma ẹwaha ufọk esie. Ke ini enye ọdọhọde ke owo ikawahake, mma ntọn̄ọ ndinọ enye ikọ ntiense nnyụn̄ nda n̄wed oro Ifiọk Oro Adade Osịm Nsinsi Uwem ntọn̄ọ ukpepn̄kpọ Bible ye enye. * Ke ini ikụrede ukpepn̄kpọ oro, Sebastián, ye mmọn̄eyet ke enyịn, ama eben̄e nnyịn ete ifiak idi usen efen idikpep imọ n̄kpọ.”

Otu mme asiakusụn̄ efen oro ẹkekade Chiapas ẹtọt ẹte: “Ye un̄wam Jehovah, nnyịn ima inyene nti utịp. Ke akpa urua, nnyịn ima itọn̄ọ ukpepn̄kpọ 27, ke ọyọhọ urua iba, nnyịn ima inọ mme owo oro ikot ite ẹdise vidio nnyịn oro The Bible—Its Power in Your Life. Owo 60 ẹkewọrọ ẹdi. Kpukpru mmọ ẹma ẹma se mmọ ẹkekụtde. Ke utịt edinam oro, nnyịn ima idọhọ ke imọn̄ itọn̄ọ ukpepn̄kpọ Bible otu. Ke n̄kpaidem, ẹma ẹtọn̄ọ otu ukpepn̄kpọ iba ke obio-in̄wan̄ emi.

“Ke ima ikokụre ndinam utom ke efakutom oro ẹkenọde nnyịn ika, nnyịn ima ifiak ika obio-in̄wan̄ oro ndisọn̄ọ mbon oro ẹkenyenede udọn̄ idem nnyụn̄ nse nte mme otu ukpepn̄kpọ Bible oro ẹketọn̄ọde ẹtiede. Nnyịn ima inọ  mmọ ikot ẹdidụk An̄wan̄wa Mbono Esop ye Ukpepn̄kpọ Enyọn̄-Ukpeme. Nte ededi, itie oro okponde ekem ndinịm mme mbono esop emi ikodụhe. Owo emi ọkọnọde ufọk esie ẹda ẹnịm ukpepn̄kpọ otu oro ama anyan ubọk owụt edemesa ufọk esie onyụn̄ ọdọhọ ete: ‘Ẹkeme ndinịm ukpepn̄kpọ ke edemesa oko.’”

Ke utịturua oro, mme asiakusụn̄ emi ẹkedide ndin̄wam ye mbon oro ẹnyenede udọn̄ ke ifiopesịt ẹma ẹdi ẹdidiọn̄ esa oro man ẹkeme ndida enye nnịm mme mbono esop. Owo 103 ẹkedụk akpa mbono esop oro ẹkenịmde. Idahaemi ke ẹnịm ukpepn̄kpọ Bible 40 ke obio-in̄wan̄ oro.

“N̄wọrọnda Ifiọkutom”

Ke ẹsiode edinyene ata nti utịp ke utom ukwọrọikọ ẹfep, mbon oro ẹketienede ẹbuana ke utom ukwọrọikọ emi ẹnen̄ede ẹbọ ufọn. María, n̄kaiferi edide asiakusụn̄ oro eketienede abuana ke kiet ke otu ubịnikọt emi, ama etịn̄ ekikere esie ke usụn̄ emi ete: “Enye ekedi n̄wọrọnda ifiọkutom ke ntak iba. Idatesịt oro nnyenede ke utom ukwọrọikọ ama okpon, ndien itie ebuana mi ye Jehovah ama ọdọdiọn̄ ọkọri. Ini kiet, ke ini ikosụk idọkde obot, nnyịn ima ikpa mba. Ke ima ikeben̄e Jehovah un̄wam, nnyịn ima ikụt se Isaiah 40:29-31 ọdọhọde ete: ‘Mmọ eke ẹberede ye Jehovah ẹyekop obufa nsọn̄idem.’ Ntre nnyịn ima idọk ikesịm ebiet ikakade inyụn̄ inịm ukpepn̄kpọ ye mbon oro ẹkenen̄erede ẹdara nnyịn.”

Claudia, n̄kaiferi efen edide asiakusụn̄ onyụn̄ edide isua 17, asian nnyịn ete: “Mmọbọ ufọn ekese. Mmekpep nditịm nnyene usọ ke utom ukwọrọikọ, ndien emi ọnọ mi ekese idatesịt, onyụn̄ osụn̄ọ ke ami ndinịm mme utịtmbuba eke spirit. Ami n̄ko mmọkọri nsịm ọyọhọ idaha ke n̄kan̄ eke spirit. Ke ufọk, eka mi ekesinam kpukpru n̄kpọ ọnọ mi. Idahaemi, ke ntak ediwak n̄kpọ oro nsobode, mmakabade mfiọk ndinam n̄kpọ n̄kan nte n̄kọfiọkde. Ke uwụtn̄kpọ, mma nsinen̄ede nsat se ndiade. Edi idahaemi oro anade n̄kpụhọde nda ekekem ye nsio nsio idaha, nsatke aba udia. Orụk utom emi an̄wam mi ndinyene ata nti ufan. Nnyịn imesibuana kpukpru n̄kpọ oro inyenede inyụn̄ in̄wam kiet eken.”

Idara Idara Idọk

Nso idi mme utịp utọ san̄asan̄a ukeme emi? Ke ntọn̄ọ ntọn̄ọ 2002, n̄kpọ nte mme asiakusụn̄ 28,300 ẹketiene ẹbuana ke ndutịm efakutom mme asiakusụn̄ emi. Mmọ ẹma ẹnịm se iwakde ibe ukpepn̄kpọ Bible 140,000, ẹsịnde se ibede miliọn hour iba ke utom ukwọrọikọ. Man ẹn̄wam mme owo ndikpep akpanikọ Bible, mmọ ẹma ẹnịm n̄kpọ nte n̄wed 121,000 ye se ikperede ndisịm magazine 730,000. Isidịghe esen n̄kpọ ndusụk mme asiakusụn̄ ndinịm ukpepn̄kpọ Bible 20 m̀mê akande oro.

Mbon oro ẹwụtde mmọ mfọnido mi ẹnen̄ede ẹwụt esịtekọm ẹban̄a san̄asan̄a ukeme oro ẹsịnde ndida etop Bible nsọk mmọ. Kpa ye unana mmọ, ediwak mmọ ẹsisọn̄ọ ẹyịre ẹte mme asuanetop emi ẹbọ mmimọ etịbe. Kpukpru ini, ubuene akanian̄wan kiet oro edide isua 70 esinọ mme asiakusụn̄ oro ẹwahade ufọk esie n̄kpọ. Ke mmọ ẹsịnde ndibọ enọ esie, enye esitua. Ubon emi ẹdide ubuene ẹsidọhọ mme ọkwọrọikọ uyọhọ ini ke unen mmimọ esịn nsen san̄asan̄a ọnọ mmọ, ẹsinyụn̄ ẹkpak ẹte mmọ ẹbọ mme nsenunen oro.

Ke edide akpan n̄kpọ akan, mbon eti esịt emi ẹsiwụt ata esịtekọm ẹban̄a mme n̄kpọ eke spirit. Ke uwụtn̄kpọ, n̄kaiferi kiet esisan̄a hour ita ye ubak ndikodụk mme mbono esop Christian, ndien akanam itabake mbono emi ndomokiet. Kpa ye oro enyenede mfịna ke edọn̄, akanian̄wan kiet emi enyenede udọn̄ esinam isan̄ hour iba man ọkọbọ item Bible ke ini edidi esenyịn emi asan̄ade-san̄a. Mbon emi mîkọfiọkke ndikot nnyụn̄ n̄wet n̄kpọ ẹma ẹyom ndikpep ndinam oro man mmọ ẹkeme nditịm mbọ ufọn nto unọ ukpep Bible. Ẹnen̄ede ẹdiọn̄ mme ukeme oro mmọ ẹsịnde.

Ke n̄wed Utom, Luke etịn̄ aban̄a n̄kukụt oro apostle Paul okokụtde, ete: “Owo Macedonia kiet ke ada eben̄e enye ete, Be di ke Macedonia, dinyan̄a nnyịn.” Paul ama enyịme ikot emi. Mfịn, ke mme nsannsan ikpehe Mexico, ediwak owo ẹmenam n̄kpọ ye ukem edu emi, ẹnọde idemmọ unyịme unyịme nditan̄a eti mbụk “tutu esịm utịt ererimbot.”—Utom 1:8; 16:9, 10.

[Mme Ikọ idakisọn̄]

[Ndise ke page 9]

Ediwak Mme Ntiense ke Mexico ẹma ẹtiene ẹbuana ke mme san̄asan̄a ubịnikọt ukwọrọikọ