Nte Afo Emeti?

Nte afo ama adara ndikot mme nsiondi Enyọn̄-Ukpeme eke ndondo emi? Ọfọn, se m̀mê afo emekeme ndibọrọ mme mbụme ẹtienede mi:

• Didie ke nnyịn ikeme ndibọ ufọn nto ndikpep mban̄a ubon Shaphan?

Shaphan ekedi osion̄o n̄wed ye ewetn̄wed edidem Josiah eke Judah. Sia ekenyenede odudu ukara ke obio ubọn̄ oro, Shaphan ama an̄wam edidem ke ubịnikọt oro enye akanamde ndifiak n̄wụk utuakibuot akpanikọ. Iba ke otu nditọiren Shaphan ẹma ẹsọn̄ọ ẹda ye prọfet Jeremiah. Ndien eyen esie en̄wen ye nditọ nditọ esie iba n̄ko ẹma ẹda itie odudu mmọ ẹnam n̄kpọ ke ufọn utuakibuot akpanikọ. Ukem ntre, nnyịn ikpenyene ndida inyene ye itie odudu nnyịn nnọ utuakibuot akpanikọ ibetedem.—12/15, page 19-22.

• Didie ke Irene Hochstenbach akakan akamba ubiọn̄ọ onyụn̄ ekeme ndinam n̄kpọ Jehovah?

Ke edide isua itiaba, enye ama oforo inan. Kpa ye oro edide inan, enye ama ekpep ndisineme nneme ye mbon en̄wen ndien idahaemi esisan̄a ye ebe esie (esenyịn oro asan̄ade-san̄a) nte enye asan̄ade ese mme esop ke Netherlands.—1/1, page 23-26.

• Mbufa n̄wed ukpepn̄kpọ iba ewe ke ẹkesio ke mme Mbono District “Ifịk Ifịk Mme Anditan̄a Obio Ubọn̄”?

Mme Christian ke ofụri ekondo ẹma ẹkop idatesịt ndibọ n̄wed oro Tuak Ibuot nọ Ata Abasi Kierakiet, emi ẹtịmde man ẹda ẹkpep n̄kpọ ye mbufa owo ke mmọ ẹma ẹkekụre ukpepn̄kpọ ke n̄wed Ifiọk Oro Adade Osịm Nsinsi Uwem; obufa n̄wed enye eken edi San̄a Kpere Jehovah, emi owụkde ntịn̄enyịn ke mme edu Jehovah ye mme edinam esie. Enye n̄ko owụt nte nnyịn ikpekpebede enye ke ndiwụt mme edu esie.—1/15, page 23-24.

• Nso ekikere ke Mme N̄ke 12:5 ọnọ: “Se nti owo ẹkerede enenen”?

Ekikere nti owo ẹkam ẹfọn, mmọ ẹsinyụn̄ ẹkere se inende inyụn̄ idotde. Sia ima emi mmọ ẹmade Abasi ye mme ekemmọ owo esikarade ekikere ndinen owo, mmọ ẹsinyene nti uduak.—1/15, page 30.

• Nso ikeme ndin̄wam owo enyene ekikere oro adade ukem ukem aban̄a utom?

Ọfọn ẹkpep ndima utom toto ke uyen. Bible eteme nnyịn ete inyene eti edu unam utom, ifep ndifu ifu. (Mme N̄ke 20:4) Enye n̄ko esịn udọn̄ ọnọ mme Christian ete ẹkûyak idem ofụri ofụri ẹsịn ke utom. Nnyịn ikpenyene ndifiọk ke utom ẹnamde ẹnọ Abasi odot ndidi ata akpan n̄kpọ ke uwem nnyịn. (1 Corinth 7:29-31) N̄ko-n̄ko, mme Christian akpanikọ ẹnyene mbuọtidem nte ke Abasi idikpọn̄ke mmimọ.—2/1, page 4-6.

• M̀mọ̀n̄ ke Bible ke ẹbem iso ẹtịn̄ ẹban̄a itieuwa?

Edi ke Genesis 8:20, emi ẹtịn̄de ẹban̄a itieuwa oro Noah ọkọbọpde ke ini enye ọkọwọrọde ke ubom ke Ukwọ ama ekebe. Nte ededi, eyedi Cain ye Abel ẹkeda itieuwa ẹwa mme uwa mmọ. (Genesis 4:3, 4)—2/15, page 28.

• Didie ke ndusụk mme Christian ẹkpeda mme ukpụhọde idaha ẹnam n̄kpọ nte ọfọnde?

Ndusụk ẹnyịme—m̀mê ẹnam—ukpụhọde ke utom ndien emi ayak mmọ ẹsịn ini efen efen ke utom ukwọrọikọ. Mbon en̄wen ẹsisịn ini efen efen ẹnyụn̄ ẹbọ mme ifetutom efen efen ke utom Abasi ke ini mbiomo ubon mmọ osụhọrede, utọ nte ke ini nditọ mmọ ẹkponide ẹdọ ndọ.—3/1, page 19-22.

• Didie ke uwụtn̄kpọ Jonah ye apostle Peter ẹn̄wam nnyịn ndise mbon en̄wen nte Jehovah esede?

Jonah ye Peter ẹma ẹnam ndudue oro ẹtịmde ẹdiọn̄ọ ke nte mmọ ẹkekerede n̄kpọ ye nte mmọ ẹkenamde n̄kpọ ẹban̄a mme idomo mbuọtidem ye nsụkibuot. Kpa ye oro, Jehovah ama enen̄ede okụt nti edu ke idem mmọ onyụn̄ aka iso ada mmọ anam n̄kpọ ke utom esie. Ke ini mbon en̄wen ẹyatde nnyịn esịt m̀mê ẹkpude nnyịn, nnyịn imekeme ndiwụk ntịn̄enyịn ke nti edu oro ekemede ndidi ima isikụt ke idem mmọ ke ini edem ye ke nti edu oro Abasi okụtde ke idem mmọ.—3/15, page 16-19.

• Ntak emi nte ẹnọde n̄wed Psalm nọmba mîdịghe ukem ke kpukpru mme edikabade Bible?

Ukpụhọde odu ke nte ẹnọde n̄wed emi nọmba ke akpasarade usem Hebrew ye nte ẹnọde enye nọmba ke Septuagint usem Greek. Mme edikabade eke ata ndondo emi ẹkeme ndinyene ukpụhọde, ọkọn̄ọde ke m̀mê ẹkekabade mmọ ẹto uwetn̄kpọ eke usem Hebrew m̀mê eke Septuagint.—4/1, page 31.