Mme Mbụme Ẹtode Mme Andikot

Edieke Christian esikopde mme uyo, ndi oro enen̄ede ọwọrọ ke mme demon ẹsifịna enye?

Baba. Ke adan̄aemi ẹdọhọde ke mme demon ẹsinam n̄kpọ ntem, ke ẹma ẹkenam ndụn̄ọde, ediwak owo oro ẹsikopde mme uyo m̀mê ẹsikopde mme idiọk ntụk oro owo mîkemeke ndinam an̄wan̄a, ẹsidi ẹdifiọk ke mmimọ idọdọn̄ọ.

Idem ke akpa isua ikie, etie nte ẹma ẹfiọk ke mfịna mme demon ye udọn̄ọ ẹsinyene ukem utịp ke ndusụk ini. Ke Matthew 17:14-18, nnyịn ikot iban̄a ekpri eyeneren oro Jesus akanamde udọn̄ọ okụre. Okposụkedi ekpri eyen oro ekenyenede idiọn̄ọ idiọk mbukpi, ndutụhọ esie ekenen̄ede oto demon. Nte ededi, ke idaha oro ekebemde iso, ke ini ẹkedade mbon udọn̄ọ emi ẹkebọde ndutụhọ ẹsọk Jesus ẹte anam udọn̄ọ okụre mmọ, emi ama esịne “mmọ eke ẹnyenede mme demon, ye mmọ eke ẹdọn̄ọde mbukpi.” (Sịghisịghi ubọkn̄wed edi eke nnyịn; Matthew 4:24) Nte an̄wan̄ade, ẹma ẹfiọk ke ndusụk mbon oro ẹkedọn̄ọde mbukpi ikenyeneke mme demon. Mmọ ẹkedọn̄ọ ata udọn̄ọ.

Ẹtọt ẹte ke ndusụk mbon oro ẹdọn̄ọde udọn̄ọ ibuot oro ẹkotde schizophrenia, udọn̄ọ emi ẹsiwakde ndikọk edieke ẹbọde usọbọ, ẹsikop mme uyo m̀mê ke ẹsinyene mme idiọn̄ọ udọn̄ọ en̄wen oro ẹkemede nditie esen esen. * Mme udọn̄ọ en̄wen ẹdu n̄ko emi ẹkemede ndidi ntak udọn̄ọ ibuot emi ndusụk owo ẹkemede ndidue n̄kere ke mme demon ẹdi ntak. Ntem, ke adan̄aemi owo emi ọdọhọde nte ikopde mme uyo m̀mê mme idiọk ntụk eken mîkpofụmike ekikere oro nte ke mme demon ẹkeme ndidi ntak mfịna emi, ẹkpenyene ndisịn udọn̄ nnọ enye ndidụn̄ọde mfiọk m̀mê udọn̄ọ ọdọn̄ọ enye.

[Ikọ idakisọn̄]