Nso ke Afo Akpama Ndibụp Abasi?

KE OFỤRI ererimbot, mme owo ẹnyene mme akpan mbụme ẹban̄ade uwem. Ndi afo emenyene utọ mbụme oro? Ediwak owo ẹmebụp mme ekpep ukpepn̄kpọ ido ukpono mme mbụme mmọ edi ibọhọ mme ibọrọ oro ẹnọde uyụhọ. Mbon eken ẹkere ẹban̄a mme mbụme emi ke idemmọ. Ndusụk owo ẹbọn̄ akam ẹyom ndausụn̄. Ndi afo emekeme ndinen̄ede nnyene mme ibọrọ nto Abasi ke mme n̄kpọ oro ẹfịnade fi? Emi edi ndusụk ke otu mbụme oro ediwak owo ẹdọhọde ke mmimọ ikpama ndibụp Abasi.

Abasi, afo enen̄ede edi anie?

Ido edinam mmọ, ido ukpono ete ye eka, ndien eyedi ọkpọkpọ edimek mmọ ẹkara usụn̄ oro mme owo ẹsede Abasi. Ndusụk owo ẹnọ Abasi enyịn̄; mbon eken ẹkam ẹkot enye Abasi. Ndi emi enen̄ede edi akpan n̄kpọ? Ndi ata Abasi kierakiet kpọt odu emi ayararede idemesie ye enyịn̄ esie ọnọ nnyịn?

Ntak emi ata ekese ndutụhọ ẹdude?

Edieke anafai m̀mê oburobụt usụn̄ uwem owo abiatde nsọn̄idem esie m̀mê anamde enye ebuene, enye ekeme ndiseme. Edi enye ekeme nditịm mfiọk ntak emi enye ọbọde ndutụhọ.

Nte ededi, ediwak mbon eken ẹsibọ ndutụhọ idiọk idiọk ke mme n̄kpọ oro mîdịghe mmọ ẹnam. Ndusụk owo ẹdọn̄ọ uyịre uyịre udọn̄ọ. Mbon eken ẹn̄wana ye mme mfịna oro ẹtiede nte ke owo ikemeke ndikan man ẹnyene ufọkidụn̄ ye udia oro ekemde ubon mmọ. Ediwak miliọn owo ẹdi mbon unọmọ ubiatibet, ekọn̄, ntịme ntịme afai, mme oto-obot afanikọn̄, m̀mê ukwan̄ikpe otode mbon oro ẹkarade.

Nte an̄wan̄ade, ediwak owo ẹsibụp ẹte: ‘Ntak emi mme utọ idaha oro ẹnen̄erede ẹtara? Ntak emi Abasi ayakde kpukpru ndutụhọ emi ẹdu?’

 Ntak emi ami ndude mi? Nso idi uduak uwem?

Mme mbụme emi ẹsiwak ndidemede ke ini edinam owo eke usen ke usen okpude ndida ata uyụhọ ndi—ndien oro edi se ediwak owo ẹsobode. Ediwak miliọn mbon eken ẹnịm ke akpanikọ ẹte ke Abasi ama ememek usụn̄ owo kiet kiet enịm. Ndi ntre ke edi? Edieke Abasi enen̄erede enyene ndusụk akpan uduak ọnọ fi, nte eyịghe mîdụhe afo ayama ndifiọk se oro edide.

Ke otu kpukpru n̄wed oro ẹdude ke ererimbot, odu kiet emi ẹtịn̄de in̄wan̄-in̄wan̄ nte ke ẹda odudu spirit ẹwet. Nte afo okpodoride enyịn aban̄a etop oro Abasi ọnọde ofụri ubonowo, n̄wed emi odu ke ata ediwak usem akan n̄wed efen ekededi oro akanam ẹwetde. Enye edi Edisana Bible. Ke Bible, Abasi ke idemesie, kpa Andibot enyọn̄ ye isọn̄, ayarade owo emi enye edide ye se enyịn̄ esie edide. Nte afo ọmọfiọk enyịn̄ oro? Nte afo ọmọfiọk se Bible etịn̄de aban̄a orụk Owo emi Abasi edide? Nte afo ọmọfiọk se enye etịn̄de aban̄a se Abasi oyomde oto fi?

 [Ebiet Ẹdade Ndise Ẹto ke page 2]

IKPAEDEM: Chad Ehlers/Ndise emi Index Stock osiode

[Ebiet Ẹdade Ndise Ẹto ke page 3]

Obot: Chad Ehlers/Ndise emi Index Stock osiode