Nte Ndusụk Owo Ẹkenyenede Ibọrọ

EDIWAK miliọn owo ẹsibọn̄ akam. Ndusụk mmọ ẹnịm ke akpanikọ ẹte ke ẹsibọrọ akam mmimọ. Mbon en̄wen ẹyịk m̀mê ẹsikop eke mmimọ. Ndien mbon eken ẹyom mme ibọrọ edi ikereke iban̄a edimen eben̄e mmọ mbịne Abasi ke akam.

Bible anam ẹdiọn̄ọ ata Abasi nte ‘Andikop akam.’ (Psalm 65:2) Ke ini afo ọbọn̄de akam, nte afo emesinịm ke akpanikọ nte ke imọ ibọn̄ akam inọ ata Abasi? Nte enye oyokop akam fo?

Ye ediwak owo ke ofụri ikpehe isọn̄, ibọrọ edi ih! Didie ke mmọ ẹkenyene ibọrọ? Nso ke mmọ ẹkekpep?

Abasi—Anie ke Enye Edi?

Andikpep kiet ke Portugal emi ọkọbọde ukpep oto mme nun ye mme oku ama enen̄ede esịn idem ke ido ukpono esie. Enye ikọfiọkke se akpanamde ke ini ufọkabasi oro okokpụhọde onyụn̄ ọkpọn̄de mme edinam oro ẹkekpepde enye nte ke ẹdi akpan n̄kpọ. Ukaisan̄ ama anam enye emehe ye mme usụn̄ utuakibuot mbon Edem Usiahautịn, ndien enye ama ọtọn̄ọ ndikere m̀mê ata Abasi kierakiet odu. Didie ke enye akpatuak ibuot? Ke ini enye okobụpde oku esie aban̄a mme n̄kpọ ke Bible, ẹma ẹfụmi mme mbụme esie, ndien enye ama okụt edikpu.

Ufọkabasi Catholic ẹma ẹsuan n̄kpri babru ke obio andikpep emi, ẹdụride mbon ufọkabasi utọn̄ ẹte ẹkûneme nneme ye Mme Ntiense Jehovah. Edi owo ikọbọrọke mme mbụme esie. Usen kiet ke ini Mme Ntiense ẹkekade ufọk esie, enye ama akpan̄ utọn̄ onyụn̄ enyene udọn̄ ke se enye okokopde. Emi ekedi akpa ini oro enye ekenemede nneme ye mmọ.

N̄wan emi ama ọtọn̄ọ ndikpep Bible ye Mme Ntiense man enyene mme ibọrọ ọnọ ediwak mbụme esie. Kpukpru urua, enye ama enyene udịm udịm mbụme ndibụp mmọ. Enye okoyom ndifiọk enyịn̄ Abasi, m̀mê ata Abasi kiet kpọt odu, m̀mê enye enyịme ẹkama ndisọi mbiet ke utuakibuot, ye ekese eken. Enye ama okụt nte ke kpukpru ibọrọ oro imọ ikenyenede ẹketo Bible, idịghe ekikere owo, ntre enye ama okop n̄kpaidem ye idatesịt ke se enye ekekpepde. Sụn̄sụn̄, enye ama enyene mme ibọrọ ediwak mbụme esie. Mfịn, enye atuak ibuot  ọnọ Jehovah ke spirit ye ke akpanikọ, nte Jesus Christ ọkọdọhọde ke “ata mme andituak ibuot” ẹdinam.—John 4:23.

Ke Sri Lanka, ubon kiet ama esikot Bible ọtọkiet kpukpru ini, edi mmọ ikenyeneke mme ibọrọ ediwak mbụme oro ẹkedide akpan n̄kpọ ẹnọ mmọ. Okposụkedi mmọ ẹkeyomde un̄wam, oku mmọ ikekemeke ndinọ un̄wam oro. Nte ededi, Mme Ntiense Jehovah ẹma ẹwaha ẹnyụn̄ ẹnọ ubon oro mme n̄wed Bible oro ẹnọde un̄wam. Ke ukperedem, ke ini Mme Ntiense Jehovah ẹkenọde ubon oro mme ibọrọ oro ẹnọde uyụhọ ke mme mbụme Bible mmọ, mmọ ẹma ẹnyịme ukpepn̄kpọ Bible. Se mmọ ẹkekpepde ke ukpepn̄kpọ mmọ ama edemede mmọ udọn̄.

Edi, n̄kpọ oro enye ekekpepde ke ufọkabasi ke ini uyen ikayakke n̄wan oro okụt nte ke Ete Jesus Christ edi “ata Abasi kierakiet,” nte Jesus ke idemesie ọkọdọhọde. (John 17:1, 3) Ẹkekpep enye nte ke Jesus edi ukem ye Ete ye nte ke inaha ẹbụp mbụme ẹban̄a “ndịben̄kpọ” emi. Enye ama ọbọn̄ akam ke ofụri esịt ye ke nnanenyịn ọnọ Jehovah, asiak enyịn̄ esie, onyụn̄ ọdọhọ enye owụt imọ owo emi Jesus edide. Ekem enye ama afiak etịn̄ enyịn odụn̄ọde mme itie N̄wed Abasi oro ẹtịn̄de ẹban̄a emi. (John 14:28; 17:21; 1 Corinth 8:5, 6) Nte n̄kpọ eke n̄kpan̄ akadian̄arede ke enyịn esie ọduọ, idahaemi enye okụt in̄wan̄-in̄wan̄ nte ke Jehovah—Andibot enyọn̄ ye isọn̄ ye Ete Jesus Christ—edi ata Abasi.—Isaiah 42:8; Jeremiah 10:10-12.

Ndutụhọ—Ntak-a?

Job ama ọbọ ndutụhọ ekesịm akpatre udomo. Oyobio ama owot kpukpru nditọ esie, ndien enye ama akabade edi ubuene. Enye n̄ko ama ọdọn̄ọ ubiak ubiak udọn̄ọ onyụn̄ ọyọ mfịghe otode mme ufan abian̄a. Ke ini kpukpru emi ẹketịbede, Job ama etịn̄ ndusụk uyat uyat ikọ. (Job 6:3) Edi Abasi ama ekere aban̄a mme idaha oro. (Job 35:15) Enye ama ọfiọk se ikodude ke esịt Job onyụn̄ ọnọ item oro Job okoyomde. Enye esinam oro ọnọ mme owo mfịn n̄ko.

Ke Mozambique, Castro ekedi isua duop kpọt ke ini eka esie akakpade. Oro ama etịmede enye. Enye ama obụp ete, “Ntak emi enye akakpade ọkpọn̄ nnyịn?” Okposụkedi ete ye eka oro ẹbakde Abasi ẹkebọkde enye, idahaemi ekikere esie ama etịmede. Nso ikekeme ndinọ enye ndọn̄esịt? Enye ama ọbọ ndọn̄esịt ke ndikot ekpri Bible Chichewa nnyụn̄ nneme enye ye ikpọ nditọeka esie.

Sụn̄sụn̄, Castro ama edi edifiọk ete ke eka imọ ikakpaha ke ntak ukwan̄ikpe Abasi, edi akakpa ke ntak unana mfọnmma oro ikadade imana. (Rome 5:12; 6:23) Un̄wọn̄ọ Bible aban̄ade ediset ke n̄kpa ama ọnọ enye n̄kponn̄kan ndọn̄esịt koro enye ama okụt ke idotenyịn ediset ke n̄kpa edi isọn̄ kaban̄a mbuọtidem nte ke imọ iyafiak ikụt eka imọ. (John 5:28, 29; Utom 24:15) Ke mfụhọ, ete esie ama akpa ke isua inan̄ kpọt ẹbede. Edi isan̄ emi Castro ama ekeme nditịm nyọ n̄kpa ete esie. Mfịn, enye ama Jehovah onyụn̄ enen̄ede esịn uwem esie ke utom Abasi. Kpukpru mbon oro ẹfiọkde enye ẹkụt idatesịt oro enye enyenede.

Ediwak mbon oro ẹtabade mbonima ke n̄kpa ẹkop ndọn̄esịt ke ukem akpanikọ Bible oro ọkọnọde Castro ndọn̄esịt. Ndusụk mbon oro ẹsobode akwa nsọn̄ọn̄kpọ ke ntak mme edinam ndiọi owo ẹbụp, ukem nte Job okobụpde, ẹte: “Mme idiọk owo ẹnam didie ẹdu uwem?” (Job 21:7) Ke ini mme owo ẹnen̄erede ẹkpan̄ utọn̄ ẹkop se Abasi etịn̄de nte ibọrọ ke Ikọ esie, mmọ ẹkpep nte ke usụn̄ oro Abasi anamde n̄kpọ esida ufọn ọsọk mmimọ.—2 Peter 3:9.

Barbara, emi ọkọkọride ke United States, ikosoboke ndịk oro ekọn̄ akamade ọkpọkpọ. Edi enye ọkọkọri okpon ke ererimbot oro ẹsin̄wanade ekọn̄. Mme ntọt ẹban̄ade ibak ibak ekọn̄ ẹkedi mbụk n̄kpọntịbe ofụri usen. Ke mme ini ukpepn̄kpọ esie ke ufọkn̄wed, idem ama esikpa enye aban̄a mme n̄kpọntịbe oro ẹkedade itie ke usụn̄ oro owo mîfiọkke ntak. Nso ikedi ntak? Ndi Abasi ama ekere aban̄a se iketịbede? Enye ama enịm ke akpanikọ ke Abasi odu, edi enye ama eyịk m̀mê Abasi ekere aban̄a.

Nte ededi, idaha ekikere Babara aban̄ade uwem ama okpụhọde sụn̄sụn̄ ke ntak edibuana ye Mme Ntiense Jehovah. Enye ama akpan̄ utọn̄ ọnọ mmọ onyụn̄ ekpep Bible ye mmọ.  Enye ama odụk mme mbono esop ke Ufọkmbono Obio Ubọn̄. Enye ama akam odụk kiet ke otu akamba mbono mmọ. Akan oro, ke ini enye okobụpde mme mbụme, enye ama okụt ke imọ ikenyeneke nsio nsio ekikere ito nsio nsio Ntiense. Utu ke oro, Mme Ntiense oro ẹketịn̄ ikọ ke n̄kemuyo koro ekikere mmọ ọkọkọn̄ọ ke Bible.

Mme Ntiense oro ẹma ẹda Bible ẹwụt nte ke Satan kpa Devil akara ererimbot, ye nte ke ererimbot enyene edu Satan. (John 14:30; 2 Corinth 4:4; Ephesus 2:1-3; 1 John 5:19) Mmọ ẹma ẹnam an̄wan̄a nte ke ẹma ẹbebem iso ẹtịn̄ ke Bible ẹban̄a mme n̄kpọntịbe oro ẹkekpade Babara idem. (Daniel, ibuot 2, 7, ye 8) Abasi ekebem iso etịn̄ mmọ koro enye enyene ukeme ndifiọk ini iso ke ini enye emekde ndinam ntre. Abasi ama anam ndusụk n̄kpọntịbe oro ẹda itie. Enye akam ayak mbon eken ẹka iso. Mme Ntiense oro ẹma ẹwụt Babara nte ke Bible n̄ko ebem iso etịn̄ aban̄a mme n̄kpọntịbe eyo nnyịn oro ẹdide eti ye idiọk onyụn̄ anam se mmọ ẹwọrọde ẹn̄wan̄a. (Matthew 24:3-14) Mmọ ẹma ẹwụt enye mme un̄wọn̄ọ Bible ẹban̄ade obufa ererimbot oro edinen ido edidụn̄de, emi ndutụhọ edibede ifep.—2 Peter 3:13; Ediyarade 21:3, 4.

Sụn̄sụn̄, Babara ama ọtọn̄ọ ndifiọk nte ke adan̄aemi Jehovah Abasi mîdịghe ntak ndutụhọ owo, enye itreke ndutụhọ emi ebe ke ndinyịk mme owo ndinịm mbet esie ke ini mmọ ẹmekde ndisọn̄ ibuot. (Deuteronomy 30:19, 20) Abasi anam mme ndutịm man nnyịn ikeme ndidu uwem ke nsinsi ke inemesịt, edi enye ke ọnọ nnyịn ifet idahaemi ndiwụt m̀mê nnyịn iyodu uwem ke n̄kemuyo ye ndinen usụn̄ esie. (Ediyarade 14:6, 7) Babara ama ebiere ndikpep mban̄a mme n̄kpọ oro Abasi oyomde nnyụn̄ nda mmọ ndu uwem. Enye n̄ko ama okụt orụk ima oro Jesus ọkọdọhọde ke ẹdida ẹdiọn̄ọ ata mme anditiene enye ke otu Mme Ntiense Jehovah.—John 13:34, 35.

Afo n̄ko emekeme ndibọ ufọn nto mme ndutịm oro ẹken̄wamde enye.

Uwem Oro Enyenede Uduak

Idem mbon oro ẹtiede nte ke ẹkop inem uwem ẹkeme ndiyom mme ibọrọ mbụme oro etịmerede mmọ. Ke uwụtn̄kpọ, Matthew, akparawa kiet ke Britain, ama esinyene ntotụn̄ọ udọn̄ kpukpru ini ndifiọk ata Abasi ye uduak uwem. Ete esie akakpa ke ini Matthew ekedide isua 17. Ke oro ebede, Matthew ama enyene n̄weditoro ufọkn̄wed ntaifiọk ke ikwọ. Ekem enye ama edifiọk nte ke usụn̄ uwem uma inyene imọ ekedi ikpîkpu. Enye ama ọkpọn̄ ufọk esie okodụn̄ ke London, ndien do enye ama akabade esịn idem ke edida n̄kpọsọn̄ ibọk, edika unek okoneyo, edisiak ntantaọfiọn̄, ubụpekpo, ufọkn̄wed ido ukpono Buddha, ye mme ukpepn̄kpọ akwaifiọk eken—kpukpru emi ke ndiyom usụn̄ uwem oro ọnọde uyụhọ. Enye ama eseme ke nnanenyịn ọnọ Abasi ete an̄wam imọ ikụt akpanikọ.

Ke usen iba ẹbede, Matthew ama osobo ye akani ufan esie onyụn̄ etịn̄ mfịna esie ọnọ enye. Ufan emi ama ekpep n̄kpọ ye Mme Ntiense Jehovah. Ke ini ẹkekotde 2 Timothy 3:1-5 ẹnọ Matthew, enye ama okop n̄kpaidem aban̄a nte Bible etịn̄de nnennen nnennen aban̄a ererimbot oro akande nnyịn okụk. Ke ini enye okokotde Ukwọrọikọ Oro ke Obot, emi ama otụk esịt esie. (Matthew, ibuot 5-7) Ke akpa, enye ama emen̄e koro enye ama okot ndusụk n̄wed oro ẹkekụtde ndudue ẹnọ Mme Ntiense Jehovah, edi ke akpatre enye ama ebiere ndidụk mme mbono esop ke n̄kpet n̄kpet Ufọkmbono Obio Ubọn̄.

Matthew ama ama se enye okokopde onyụn̄ ọtọn̄ọ ndikpep Bible ye kiet ke otu mbiowo esop. Ikebịghike enye ama ọfiọk nte ke se imọ ikekpepde edi se imọ ikoyomde, kpa ibọrọ akam oro enye ekebemde iso ọbọn̄ ọnọ Abasi. Enye ama ọbọ mme ufọn nte enye ọkọkpọn̄de mme edinam oro mînemke Jehovah esịt. Nte enye ọkọkọride eti mbak Abasi, ama onụk enye ndinam uwem esie odu ke n̄kemuyo ye mme ewụhọ Abasi. Matthew ama ekpep nte ke utọ uwem oro enyene ata uduak.—Ecclesiastes 12:13.

Owo ikebemke iso itịn̄ nte ke Matthew m̀mê mbon eken oro ẹkesiakde ke ibuotikọ emi ẹyekụt usụn̄ uwem oro ọnọde uyụhọ. Nte ededi, mmọ ẹma ẹkpep nte ke Jehovah Abasi enyene  ima ima uduak ọnọ kpukpru mbon oro ẹmekde ke idatesịt ndinam mme ewụhọ esie. (Utom 10:34, 35) Uduak oro esịne nsinsi uwem ke ererimbot oro ekọn̄, udọn̄ọ, biọn̄—ye idem n̄kpa mîdidụhe aba. (Isaiah 2:4; 25:6-8; 33:24; John 3:16) Nte emi edi se afo oyomde? Ke edide ntre, afo emekeme ndikpep ekese mban̄a edikụt ukpọhọde uwem oro ọnọde uyụhọ ebe ke ndidụk mme mbono esop oro ẹkọn̄ọde ke Bible ke Ufọkmbono Obio Ubọn̄ eke Mme Ntiense Jehovah. Ẹnọ fi ufiop ufiop ikot ndinam ntre.

[Ndise ke page 7]

Bọn̄ akam ifịk ifịk nọ Abasi, asiakde ọkpọkpọ enyịn̄ esie

[Ndise ke page 7]

Kpep Bible ye mbon oro ẹnen̄erede ẹkpep se isịnede ke esịt esie

[Mme ndise ke page 7]

Dụk mme mbono esop ke Ufọkmbono Obio Ubọn̄

[Ebiet Ẹdade Ndise Ẹto ke page 4]

Akaisan̄: Chad Ehlers/Ndise emi Index Stock osiode